Mu Ejito, banja ya Yakobe yadzadziwika na dzina yakuti Aisraeli. Mudamala kufa Yakobe na Zuze, Farau mupswa atoma kutonga mu Ejito. Iye akhagopa kuti Aisraeli mbadakhala azinji kakamwe kupiringana Aejito. Natenepa, Farau acita Aisraeli mabitcu. Iye aakakamiza kucita mabhuloko na kuphata basa yakuwanga m’maminda. Mbwenye mu ndzidzi wakuti Aejito akhakakamiza Aisraeli kuphata basa mwakuwanga, Aisraeli akhathimizirika kakamwe. Nakuti Farau nee akhafuna kuti pyenepi picitike, iye atonga kuti anapiana amuna onsene anabalwa aphiwe. Nee usanyerezerambo kuti pyenepi mbapidacitisa Aisraeli kugopa kakamwe?

Nkazi m’bodzi Waciisraeli akhacemerwa Jokabhedhe abala mwana wamamuna wakubalika. Toera kuntsidzikiza, iye amuikha mu ntanga peno sestu mbaibisa m’mitete mu Nkulo wa Nilo. M’bale wankazi wa mwana unoyu akhakhala cifupi toera kuona pikhafuna kucitika.

 Mwana wankazi wa Farau aenda kasamba mu nkulo mbaona sestu. Iye akhala na ntsisi mudaona iye mwana mbakalira nkati mwa sestu. Miriamu abvundza: ‘Ndiende kacemera nkazi Waciisraeli toera akutsalakanireni khombwani uyu?’ Mudatawira mwana wa Farau iye aenda kacemera mai wace, Jokabhedhe. Mwana wankazi wa Farau ampanga: ‘Kwata khombwani uyu untsalakane, ine ndinakulipa.’

Mudakula mwana unoyu, Jokabhedhe ampereka kuna mwana wankazi wa Farau, wakuti an’thula na dzina ya Mose mbankuza ninga mwanace ene. Mose akula ninga mwana wa mambo. Mbwenye Mose cipo aduwala Yahova. Iye akhadziwa kuti akhali dzindza ya Aisraeli, tayu ya Aejito. Pontho iye asankhula kutumikira Yahova.

Pikhali Mose na pyaka 40, iye atonga kuphedza mbumba yace. Mudaona iye mamuna wa ku Ejito mbakamenya bitcu Waciisraeli, Mose amenya mamuna unoyu mbamupha. Buluka penepo abisa manungo m’matcetca. Mudadzindikira Farau pyenepi, iye ayesera kupha Mose. Mbwenye Mose athawa mbaenda ku Midhiani. Kweneko, Yahova antsalakana.