Mu ndzidzi ukhali Aisraeli n’thando, Kora, Dhatani, Abhironi na amuna akukwana 250 apandukira Mose. Iwo ampanga: ‘Taneta na imwe! Thangwi yanji usafunika kukhala ntsogoleri wathu, Aroni mbakhala nyantsembe wankulu? Yahova ali na ife, iye nee ali na imwe.’ Yahova nee akomerwa. Iye aona pyenepi ninga kupandukira iye!

Mose apanga Kora na anyakuphedzera ace: ‘Mangwana bwerani ku tabhernakulu, bweresani pyombo pyakudzala na ntsembe za pyakununkhira. Yahova anadzatipangiza munthu adasankhula iye.’

Mangwana mwace, Kora na amuna 250 aenda kaonana na Mose ku tabhernakulu. Buluka penepo, apisa ntsembe za pyakununkhira ninga ndi anyantsembe. Yahova apanga Mose na Aroni: ‘Bulukani pana Kora na nsoka wace.’

Ngakhale Kora aenda kaonana na Mose ku tabhernakulu, Dhatani, Abhironi na mabanja awo akhonda kuenda. Yahova apanga Aisraeli toera abuluke pa misasa ya Kora, Dhatani na Abhironi. Mu ndzidzi ubodzi ene Aisraeli abuluka. Dhatani,  Abhironi na mabanja awo alimira kunja kwa misasa yawo. Mwakututumusa, mataka afunguka mbameza onsene! Ku tabhernakulu, moto wabuluka kudzulu mbupisa Kora na amuna akukwana 250.

Buluka penepo, Yahova apanga Mose: ‘Kwata ndodo ya ntsogoleri wa dzindza ibodzi na ibodzi, mbuilemba dzinace. Mbwenye pa ndodo ya dzindza ya Alevi, lemba dzina ya Aroni. Ikha ndodo zonsene mu tabhernakulu, ndodo ya mamuna anafuna sankhula ine inadzabuluka maluwa.’

Mangwana mwace, Mose abulusa ndodo zonsene mbapangiza atsogoleri. Ndodo ya Aroni yamera maluwa mbibala misapo yakutokota. Pyenepi pyapangiza kuti Yahova asankhula Aroni toera kukhala nyantsembe wankulu.