Yoswa atsogolera mbumba ya Yahova mu pyaka pizinji, iye afa na pyaka 110. Mu ndzidzi ukhali iye maso, Aisraeli akhalambira Yahova. Mbwenye pidafa Yoswa, iwo atoma kulambira alungu apezi ninga Akanani. Nakuti Aisraeli nee apitiriza kubvera, Yahova atawirisa mambo wa Akanani akhacemerwa Yabini toera kuathabusa. Mbumba yaphemba ciphedzo kwa Yahova. Natenepa, Yahova aapasa ntsogoleri mupswa, Bhalaki. Iye aphedza mbumba toera kutumikira pontho Yahova.

Yahova atuma mprofeta wankazi, Dhebhora, toera kuenda kuna Bhalaki. Dhebhora alonga: ‘Kwata amuna 10.000 uende kaonana na anyankhondo a Yabini ku nkulo wa Kikone. Kweneko unadzakunda Sizera, nkadamu wa anyankhondo a Yabini.’ Bhalaki apanga Dhebhora: ‘Basi ene ndinaenda iwe ungaendambo.’ Dhebhora alonga: ‘Ndinaenda na iwe. Mbwenye nee ndiwe anadzapha Sizera. Yahova alonga kuti ndi nkazi anafuna kumupha.’

Bhalaki na anyankhondo ace aenda na Dhebhora pa Phiri ya Tabhore toera kukhunganyika nkhondo. Mudabva Sizera pyenepi,  iye agumanyiza ngolo za nkhondo na anyankhondo ace ku nkulo wa Kikone. Dhebhora apanga Bhalaki: ‘Lero Yahova anatiphedza toera kuwina’. Bhalaki na anyankhondo ace akukwana 10.000 atcitha pa phiri toera kumenyana na nsoka wa anyankhondo a Sizera.

Buluka penepo, Yahova acitisa nkulo wa Kikone kudzala. Ngolo za anyankhondo a Sizera nee zakwanisa kufamba thangwi ya matope. Sizera atcitha mu ngolo yace mbatoma kuthamanga. Bhalaki na anyankhondo ace akunda anyankhondo a Sizera, mbwenye Sizera athawa mbaenda kabisala mu nsasa wa nkazi akhacemerwa Yaeli. Iye apasa Sizera nkaka toera kumwa, buluka penepo anfinikiza bulangeti. Nakuti akhadaneta aphatwa na citulo mbagona. Buluka penepo, mwakukhonda cita dzumbi, Yaeli akwata phindi ya utale mbakhomera mu nsolo wa Sizera, natenepa iye afa.

Bhalaki aenda kasaka Sizera. Yaeli abuluka mu nsasa mwace mbalonga: ‘Bwera! Ndinakupangiza munthu anasaka iwe.’ Mudapita Bhalaki mu nsasa agumana Sizera afa. Bhalaki na Dhebhora aimba nyimbo yakusimba Yahova thangwi ya kuaphedza kukunda anyamalwa awo. Buluka penepo, Aisraeli akhala mu ntendere mu pyaka 40.