Mambo wa ku Sirya Bhene-Hadhadhe ayesera kazinji kene toera kumenyana na Aisraeli. Mbwenye, midzidzi yonsene mprofeta Elizeu akhacenjeza mambo wa Israeli pikhafuna kucita Bhene-Hadhadhe. Na thangwi ineyi iye nee akwanisa pikhafuna iye. Natenepa, Bhene-Hadhadhe akhafuna kupha Elizeu. Iye acemeresa anyankhondo onsene a Asirya toera kusaka Elizeu mu nzinda wa Dhotani.

Anyankhondo a ku Sirya afika ku Dhotani namasiku. Mangwana mwace na macibese, ntumiki wa Elizeu abuluka panja mbaona kuti nzinda ukhadazungulirwa na anyankhondo azinji. Iye agopa kakamwe mbakhuwa: ‘Elizeu, tinacitanji?’ Elizeu antawira: ‘Leka gopa, ife tiri na azinji kupiringana iwo.’ Pa ndzidzi unoyu, Yahova acitisa ntumiki wa Elizeu kuona kuti mapiri akhadadzala na makavalo a moto na ngolo za nkhondo.

Mudayesera anyankhondo a ku Sirya kumanga Elizeu, iye aphembera: ‘Yahova, ndaphata miyendo, acitiseni anthu awa kukhala maboliboli.’ Anyankhondo anewa nee akhaladi maboliboli, mbwenye mwakukhonda dikhira iwo nee akhadziwa mbuto ikhali iwo. Elizeu aapanga:  ‘Mwatayika, nditowereni, ndinakupangizani munthu anasaka imwe.’ Iwo atowerera Elizeu mpaka ku Samariya kukhakhala mambo wa Israeli.

Mukupita kwa ndzidzi, ku Sirya adzadzindikira mbuto ikhali iwo. Mambo wa Israeli abvundzisa Elizeu: ‘Ndisafunika kuapha onsene?’ Elizeu akhali na mwai toera kupha anthu akhafuna kum’manga. Mbwenye usadziwa pidacita iye? Elizeu alonga: ‘Lekani kuapha.’ Apaseni cakudya, buluka penepo asiyeni aende pyawo.’ Natenepa, mambo wa Israeli aacitira phwando ikulu, buluka penepo aapanga toera abwerere kwawo.