1. Kodi mbani adatipasa umaso?

YAHOVA ndi “Mulungu wamaso.” (Yeremiya 10:10) Iye ndi Nciti wathu, pontho ndiye adatipasa umaso. Bhibhlya isalonga: ‘Imwe mwacita pinthu pyonsene, mbapikhala thangwi ya imwe, mwapifuna mbamupicita.’ (Apokalipse 4:11) Inde, Yahova asafuna kuti tikhale na umaso. Umaso ndi muoni wakufunika wakubuluka kuna iye.​—Lerini Masalmo 36:9.

2. Tisafunika kucitanji toera kupembera mu umaso?

² Yahova asatipasa pinafuna ife toera kupitiriza na umaso, ninga pyakudya na madzi. (Machitiro 17:28) Mbwenye kupiringana pyenepi, iye asafuna kuti tikomerwe na umaso. (Machitiro 14:15-17) Toera kupembera mu umaso, tisafunika kubvera miyambo ya Mulungu.​—Izaiya 48:17, 18.

3. Kodi Yahova acitanji, pidapha Kaini Abhele?

³ Bhibhlya isatipfundzisa kuti umaso wathu na umaso wa anthu anango ndi wakufunika kuna Yahova. Mwacitsandzo, Kaini​—mwana wa Adhamu na Eva​—pidaipirwa iye kakamwe na m’bale wace wang’ono Abhele, Yahova acenjeza Kaini kuti iye akhafunika kumalisa kuipirwa kwace. Mbwenye Kaini nee abvera, natenepa iye athimiza kuipirwa kwace ‘mbamenya m’bale wace mbampha.’ (Genesi 4:3-8) Yahova atcunyusa Kaini thangwi ya kupha Abhele. (Genesi 4:9-11) Ukali na kuida ndi pyakugopswa thangwi pinakwanisa kuticitisa kukhala auphanga na akuipa ntima. Munthu wakuti ali na makhaliro ninga anewa cipo anagumana umaso wa kwenda na kwenda. (Lerini 1 Jwau 3:15.) Toera kukomeresa Yahova, tisafunika kupfundza kufuna anthu onsene.​—1 Jwau 3:11, 12.

4. Kodi ubodzi mwa miyambo idapereka Mulungu kuna Aisraele usatipfundzisanji thangwi ya muoni wa umaso?

 ⁴ Mudapita pyaka pikwi, Yahova apangiza kuti iye asaona umaso kukhala wakufunika mudapereka iye Matongero Khumi kuna Mose. Ubodzi mwa miyambo ineyi usalonga: ‘Lekani kupha munthu.’ (Deuteronomyo 5:17) Khala munthu apha munthu unango mwakufuna, iye akhafunikambo kuphiwa.

5. Ndi api maonero a Mulungu thangwi ya kutaya mimba?

⁵ Ndi api maonero a Mulungu thangwi ya kutaya mimba? Ngakhale mwana wakuti aciri m’mimba umaso wace ndi wakufunika kuna Yahova. Mu Mwambo udapereka Yahova kuna Aisraele, Yahova alonga kuti khala munthu angaphekesa nkazi, pontho mwanace mbafa thangwi ya pyenepi, munthu unoyu akhafunika kuphiwa. (Lerini Eksodo 21:22, 23; Masalmo 127:3) Pyenepi pisatipfundzisa kuti kutaya mimba ndi pyakuipa.​—Onani Cidzindikiro cakumalisa 28.

6, 7. Tinapangiza tani kuna Yahova kuti tisaona umaso ninga wakufunika?

⁶ Tinapangiza tani kuna Yahova kuti tisaona umaso wathu na wa anango kukhala wakufunika? Toera kukhonda kuikha pangozwi umaso wathu peno wa anthu anango, nee tisafunika kuphatisira fodya na mitombwe yakuledzeresa, thangwi pyenepi pinatiphekesa peno kutipha.

⁷ Mulungu atipasa umaso na manungo athu, pontho tisafunika kuphatisira umaso wathu ninga munafunira iye. Natenepa tisafunika kutsalakana mwadidi manungo athu. Tingakhonda kucita pyenepi, tinakhala akukhonda cena pamaso pa Mulungu. (Aroma 6:19; 12:1; 2 Akorinto 7:1) Cipo tinalambira Yahova, ule adatipasa umaso, khala nee tisaona umaso ninga wakufunika. Maseze pinakhala pyakunentsa kusiya misambo yakuipa, Yahova  anadzatiphedza khala tisawangisira kuona umaso ninga wakufunika.

8. Tinacitanji toera tikhale na cinyindiro cakuti nee tisaikha pangozwi umaso wathu na wa anango?

⁸ Tapfundza kuti umaso ndi muoni wakufunika. Yahova asanyindira kuti tinacita pinakwanisa ife toera kukhonda kuikha pangozwi umaso wathu na wa anango. Tisacita pyenepi munjira inatekenya ife motokala wathu, mota wathu peno ntundu unango wa cakufamba naco. Tisacalira ngozwi peno masendzekero auphanga. (Masalmo 11:5) Tisacitambo pinakwanisa ife toera panyumba pathu pakhale pakutsidzikizika. Yahova apanga Aisraele: ‘Ungamanga nyumba ipswa, mangambo pfufu yakuzungulira ntsoi, toera ukhonde kukhala na mulando wa ciropa munthu angagwa pa ntsoi ineyi.’​—Deuteronomyo 22:8.

9. Tisafunika kutsalakana tani pinyama?

⁹ Ngakhale njira inatsalakanira ife pinyama ndi yakufunika kuna Yahova. Iye asatitawirisa kupha pinyama toera kudya, kucita pyakubvala, pontho iye asatitawirisa kupha pinyama khala pisatiphekesa. (Genesi 3:21; 9:3; Eksodo 21:28) Mbwenye ife nee tisafunika kuthabusa pinyama peno kupipha toera kusendzeka napyo.​—Misangani 12:10.

10. Tisadziwa tani kuti ciropa ndi umaso?

¹⁰ Ciropa ndi cakucena kuna Yahova thangwi ciropa ndi umaso. Pidamala Kaini kupha Abhele, Yahova apanga Kaini: ‘Ciropa ca m’bale wako ciri kukhuwa kuna ine, bulukira pa mataka.’ (Genesi 4:10) Ciropa ca Abhele cikhaimirira umaso wace, pontho Yahova atcunyusa Kaini thangwi ya kupha Abhele. Pakumala Cigumula mu ntsiku za Nowa, Yahova apangiza pontho kuti ciropa cisaimirira umaso. Yahova atawirisa Nowa na banja yace toera kudya pinyama. Iye alonga: ‘Pinyama pyonsene pinaoneka  kunja kuno ndakupasani, toera pikhale pyakudya pyanu. Ninga mudakupasani ine masamba a miti.’ Mbwenye, pakhali na cinthu cakuti Yahova aapanga toera akhonde kudya: ‘Lekani kudya ciropa ca cinyama consene, thangwi ndi umaso wace.’​—Genesi 1:29; 9:3, 4.

11. Ndi ntemo upi udapereka Mulungu kuna dzindza ya Israele thangwi ya ciropa?

¹¹ Pakupita pyaka 800 bulukira pidapanga Yahova Nowa toera akhonde kudya ciropa, iye apanga pontho mbumba yace: “Khala Muisraele peno munthu wakunja anakhala pakati panu, pakuenda kapha nyama, angagumana nyama ya ntsanga peno mbalame yakuti isadyiwa, iye asafunika kubulusa ciropa mbacifikira na mataka.” Buluka penepo iye alonga: “Lekani kudya ciropa.” (Levitiko 17:13, 14, Tradução do Novo Mundo) Yahova asapitiriza kufuna kuti mbumba yace ione ciropa ninga cakucena. Iwo mbadadya nyama mbwenye tayu ciropa. Mu ndzidzi ukhapha iwo cinyama toera kudya, iwo akhafikira ciropa pantsi.

12. Kodi Akristu asaona tani ciropa?

¹² Pakupita pyaka pingasi bulukira pakufa kwa Yezu, apostolo na akulu a mpingo m’mpingo Wacikristu ku Yerusalemu agumanyikana toera kudinga kuti ndi makhundu api a Mwambo adapaswa Aisraele akuti asapitiriza kuphata basa kuna Akristu. (Lerini Machitiro 15:28, 29; 21:25.) Yahova aaphedza toera kubvesesa kuti ciropa cisapitiriza kukhala cakufunika kuna iye, pontho iwo akhafunika kupitiriza kuona ciropa ninga cakucena. Akristu akutoma nee akhafunika kudya peno kumwa ciropa peno kudya nyama yakuti nee yabuluswa mwadidi ciropa. Mbadacita pyenepi, pikhali ninga akulambira adzimunthu peno akucita ulukwali. Bulukira ndzidzi unoyu kuenda kutsogolo, Akristu andimomwene asakhonda kudya peno kumwa ciropa. Ndiye tani lero? Yahova asapitiriza kufuna kuti ife tione ciropa ninga cakucena.

13. Thangwi yanji Akristu nkhabe tawira kuikhwa ciropa?

 ¹³ Kodi pyenepi pisabveka kuti Akristu asafunikambo kukhonda kuikhwa ciropa? Inde. Yahova asatipanga toera tikhonde kudya peno kumwa ciropa. Khala dotoro akukhondesani kumwa pyakumwa pyakuledzeresa, kodi mbamudaikha m’manungo mwanu pyakumwa pyenepi mukuphatisira njirisau? Mwandimomwene nkhabe! Munjira ibodzi ene, ntemo wakukhonda kudya peno kumwa ciropa usabveka kuti nee tisafunika kuikhwa ciropa.​—Onani Cidzindikiro cakumalisa 29.

14, 15. Thangwi yanji ndi pyakufunika kwa Akristu kulemedza umaso na kubvera Yahova?

¹⁴ Ndiye tani khala dotoro waungumi atipanga kuti tinafa tingakhonda kuikhwa ciropa? Munthu onsene asafunika kusankhula ekha khala asafuna kubvera mwambo wa Mulungu thangwi ya ciropa. Akristu asalemedza kakamwe muoni wa umaso udatipasa Mulungu, pontho asasaka ntundu unango wa ukondzi toera akhale maso; mbwenye nee asatawira kuikhwa ciropa.

¹⁵ Tisayesera mwakuwanga toera tipitirize na ungumi wadidi, thangwi umaso ndi wakufunika kwa Mulungu, ife nee tinadzatawira kuikhwa ciropa. Ndi pyakufunika kakamwe kubvera Yahova mbuto mwakuthimizira ntsiku za umaso wathu mukukhonda kumbvera. Yezu alonga: ‘Munthu onsene anafuna kupulumusa umaso wace, anadzautaya; mbwenye uyu anautaya thangwi ya ine anadzaugumana.’ (Mateo 16:25) Ife tisafunika kubvera Yahova thangwi tisanfuna. Iye asadziwa pinthu pyadidi pinafuna ife, pontho ife tisaona umaso ninga wakufunika na wakucena ninga munauonera Yahova.​—Ahebere 11:6.

16. Thangwi yanji atumiki a Mulungu asambvera?

¹⁶ Atumiki akukhulupirika a Mulungu ali akutonga kubvera mwambo wace unalonga pya ciropa. Iwo nee  anadzadya peno kumwa ciropa, pontho iwo nkhabe kudzatawira kuikhwa ciropa ninga njira ya ukondzi. * Mbwenye iwo anadzatawira ntundu unango wa ukondzi toera kupulumusa umaso wawo. Iwo ali na cinyindiro cakuti Nciti wa umaso na ciropa asadziwa mwadidi pinafuna iwo. Kodi musakhulupira kuti iye asadziwa mwadidi pinafuna imwe?

17. Ndi ipi njira ibodzi basi yakuphatisira ciropa yakuti Yahova akhaitawirisa mu Israele?

¹⁷ Mu Mwambo udapereka Mulungu kuna Mose, Yahova apanga Aisraele: ‘Ciropa ndi umaso wa nyama zonsene, unakupasani ine pa guwa ya ntsembe, toera mulekererwe madawo, thangwi ciropa ndico cinacitisa kulekererwa.’ (Levitiko 17:11) Pikhadawa Aisraele, iwo akhafunika kuphemba Yahova toera aalekerere mukupereka ntsembe ya cinyama na kuphemba nyantsembe toera kuthirira ciropa cinango ca cinyama ceneci pa guwa mu templo. Ineyi ikhali njira ibodzi basi yakuti Yahova akhatawirisa Aisraele toera kuphatisira ciropa.

18. Kodi ntsembe ya Yezu yakwanirisanji kwa ife?

¹⁸ Pidabwera Yezu pa dziko yapantsi, iye acinja mwambo wakupereka ntsembe ya cinyama mukupereka umaso wace, peno ciropa, toera kulekererwa madawo athu. (Mateo 20:28; Ahebere 10:1) Umaso wa Yezu ukhali wa ntengo ukulu kwakuti pidalamuswa iye muli akufa na Yahova toera kuenda kudzulu, Yahova akwanisa kupasa anthu onsene mwai wakukhala maso kwenda na kwenda.​—Jwau 3:16; Ahebere 9:11, 12; 1 Pedro 1:18, 19.

19. Tinacitanji toera tikhonde kukhala na ‘mulando wa ciropa ca anthu onsene’?

 ¹⁹ Tisapereka takhuta kakamwe kuna Yahova thangwi ya muoni wace wakudzumisa wa umaso! Tisafuna kupanga anthu kuti khala iwo ali na cikhulupiro kuna Yezu, anakwanisa kukhala maso kwenda na kwenda. Tisafuna anthu, pontho tinacita pyonsene pinakwanisa ife toera kuapfundzisa kuti anagumana tani umaso. (Ezekyele 3:17-21) Buluka penepo, ninga mpostolo Paulu, tinakwanisa kulonga: ‘Ine nkhabe mulando wa ciropa ca anthu onsene. Ine nee ndakubisirani cinthu tayu, mbwenye ndakupangani uphungu onsene wa Mulungu.’ (Machitiro 20:26, 27) Inde, tisapangiza kuti tisalemedza kakamwe umaso na ciropa mu ndzidzi unapanga ife anango thangwi ya Yahova na kufunika kwa umaso wawo kwa iye.