KHUNDU WAKUTOMA
‘Ine Ndinadzasaka Mabira Anga Adatayika’
Bira iri yakudzudzumika. Mwakukhonda kudzindikira, mu ndzidzi ukhadya iyo thongwe, yalekana na mabira andzace. Cincino iyo nkhabe kwanisa kuona kuna nkumbi nee kuna nkumbizi. Dzuwa ikubira. Nakuti bira ineyi yatayika m’magowa akuti musakhala pikala, iyo iri pangozwi. Pakumalisa iyo isabva fala ya nkumbizi wace wakuti akuthamangira kuna iyo, iye asaithukula mbaipyangirira na nguwo zace mbaenda nayo kunyumba.
MWAKUBWEREZA-BWEREZA, Yahova asalandanisika ekhene na nkumbizi ninga unoyu. M’Mafalace iye asatipasa cinyindiro: ‘Ine ene ndinadzasaka mabira anga, mbandiatsalakana.’—Ezekyele 34:11, 12.
“Mabira Anga Anaonera Ine”
Mbani mabira a Yahova? Mwacigwagwa, mabira a Yahova ndi anthu akuti asanfuna mbamulambira. Bhibhlya isalonga: ‘Bwerani tigodamire Yahova Nciti wathu. Ndiye Mulungu wathu, ndife mbumba yace; ndiye nkumbizi wathu, ndife mabira ace.’ (Masalmo 95:6, 7) Ninga mabira anatowerera nkumbizi, alambiri a Yahova asafuna kakamwe kutowerera Nkumbizi wawo. Kodi iwo ndi aungwiro? Nkhabe. Midzidzi inango atumiki a Mulungu ‘asakhala mabira akubalalika,’ peno ‘mabira akutayika.’ (Ezekyele 34:12; Mateo 15:24; 1 Pedro 2:25) Mbwenye maseze munthu atayike, Yahova nkhabe kunsiya ninga kuti iye nkhabebve cidikhiro.
Kodi muli na mabvero akuti Yahova asapitiriza kukhala Nkumbizi wanu? Kodi Yahova asapangiza tani kukhala Nkumbizi lero? Onani njira zitatu:
Iye asatidyesa mwauzimu. Yahova asalonga: “Ndinadzaakumbiza ku thongwe iwisi ya pa mapiri na ya magowa na ya mbuto zadidi.” (Ezekyele 34:14) Yahova cipo asiya kutipasa cakudya cadidi cauzimu cakusiyana-siyana. Munakwanisa kunyerezera nsolo wa bukhu, nkhani, peno vidyu idatawira phembero yanu toera kugumana ciphedzo? Kodi pyenepi nee pyakupasani cinyindiro cakuti Yahova asakutsalakanani?
Iye asatitsidzikiza mbatiphedza. Yahova asapikira: ‘Ndinadzasaka ale adatayika mbandibweza ale anandzendza mbandikondza ale adaphekeswa mbandiwangisa ale anafewa.’ (Ezekyele 34:16) Yahova asapasa mphambvu ale adafewa peno adakundwa thangwi yakupswipa ntima. Iye asakondza mabira ace mbaaphedza toera kuwanga khala iwo aphekeswa—panango thangwi yakutsalakanwa mwakuipa na anyakukhulupira andzawo. Iye asabweza ale adatayika, akuti panango akuthimbana na mabvero akuphonyeka.
Iye asatitsalakana. Yahova asalonga: ‘Ine ndinadzaabweza buluka konsene kudabalalika iwo. Ndinadzasakambo ale adatayika.’ (Ezekyele 34:12, 16) Kwa Yahova, bira yakutayika si munthu wakuti nkhabebve kucinja tayu. Iye asadziwa khala bira yatayika, iye asasaka bira ineyi mbatsandzaya angaigumana. (Mateo 18:12-14) Kusiyapo pyenepi, iye asacemera alambiri ace andimomwene ninga “mabira anga anaonera ine.” (Ezekyele 34:31) Imwe ndimwe m’bodzi wa mabira anewa.
Kwa Yahova, bira yakutayika si munthu wakuti nkhabebve kucinja tayu. Iye asakomerwa kakamwe bira yace ingagumanika
“Citisani Kuti Ntsiku Zathu Zikhale Ninga Zakale”
Thangwi yanji Yahova asakusakani mbakuphembani toera mubwerere kuna iye? Thangwi iye asafuna kuti mukhale wakutsandzaya. Iye asapikira kuti ‘anadzapereka nkhombo’ kuna mabira ace ‘ninga madzi akubvumba.’ (Ezekyele 34:26) Pikiro ineyi si yapezi tayu. Imwe mwaona kale pipangizo pya nkhombo zenezi.
Kumbukani pya ndzidzi udadziwa imwe Yahova. Mwacitsandzo, ndi api mabvero adakhala na imwe mu ndzidzi udapfundza imwe undimomwene wakutsandzayisa unalonga pya dzina ya Mulungu na cifuniro cace kuna anthu. Musakumbuka kutsandzaya kudakhala na imwe thangwi yakugumanyikana na Akristu andzanu m’misonkhano ya cisa na ya gawo? Kodi nee mwabwerera kunyumba mwakutsandzaya kakamwe pa ntsiku idamwazira imwe mphangwa zadidi munthu adapangiza cifuno candimomwene?
Imwe munakwanisa kuwina pontho kutsandzaya kweneku. Atumiki akale a Mulungu aphembera: “Yahova, tibwereseni pontho kuna imwe! Ande, ife tinabwerera mwakucimbiza. Citisani kuti ntsiku zathu zikhale ninga zakale.” (Nyimbo ya chiriro 5:21, Tradução do Novo Mundo) Yahova atawira phembero ineyi, atumiki ace abwerera mbantumikira pontho mwakutsandzaya. (Nehemiya 8:17) Yahova anadzacita pibodzi pyene kwa imwe.
Mbwenye kubwerera kuna Yahova mphyakukhonda nentsa kupilonga kusiyapo kupicita. Onani pinentso pingasi pinapingiza anthu toera kubwerera, pontho munapikunda tani.
