MUNTHU onsene asathimbana na kupswipa ntima, kuphatanizambo atumiki a Mulungu. Nyamasalmo alemba: ‘Ndakundwa na kupswipa ntima.’ (Masalmo 94:19, Tradução do Novo Mundo) Yezu alonga kuti mu ntsiku zakumalisa ‘kupswipa ntima thangwi ya umaso’ mbukudacitisa kukhala kwakunentsa kutumikira Yahova. (Luka 21:34) Ndiye tani kwa imwe? Musaona ninga mwakundwa na nyatwa zakusowa kobiri, nyatwa za m’banja, peno nyatwa za ungumi? Kodi Yahova anakuphedzani tani toera kupirira?

Ife nkhabe kwanisa kuthimbana na nyatwa mukunyindira mphambvu zathu. Mpostolo Paulu alonga: “Ife tisapirira nyatwa munjira zonsene. Ife tisadzudzumika . . . ; tisagwiswa pantsi.” Mbwenye iye alongambo kuti, “kukhulupira tinaleka tayu,” “ife nkhabe kukhala tekha [peno kusowa cakucita,]” anthu ‘anacimwana kutipha.’ Ninji cinatiphedza toera kupirira? Ndi ‘mphambvu yakupiringana yacibaliro.’ Ineyi ndi mphambvu inabuluka kuna Mulungu wathu wamphambvu zonsene, Yahova.​—2 Akorinto 4:7-9, NM.

Nyerezerani njira idatambira imwe ‘mphambvu yakupiringana yacibaliro’ nduli. Musakumbuka nkhani yakuwangisa idathimizira kupereka kwanu takhuta thangwi ya ufuni wa Yahova? Kodi cikhulupiro canu ku mapikiro a Yahova cikhathimizirika mu ndzidzi ukhapfundzisa imwe anango pya cidikhiro ca Paradizu? Tingagumanika pa misonkhano Yacikristu mbatilonga pinakhulupira ife kuna anango, tisatambira mphambvu toera kupirira kupswipa ntima. Tisakhalambo na ntendere wa manyerezero toera kutumikira Yahova mwakukomerwa.

Ndimomwene kuti panango munanyerezera kuti muli na pizinji toera kucita mu ndzidzi ubodzi ene. Mwacitsandzo, Yahova asatiphemba toera kuikha Umambo pa mbuto yakutoma mbatipitiriza na ndandanda yauzimu. (Mateo 6:33; Luka 13:24) Mbwenye ndiye tani khala mitcingo, nyatwa ya ungumi, peno nyatwa za m’banja pisakupingizani kucita pizinji? Ndiye tani khala basa yanu yakudziko isaphemba ndzidzi uzinji na mphambvu zikhafunika imwe kuphatisira ku mpingo? Mungakhala na mabasa mazinji toera kucita ndzidzi mbukhala wakucepa, panango munaona ninga mwakundwa na kupswipa ntima. Panango mwabvundzika kale khala Yahova asaphemba pizinji kakamwe kwa imwe.

Yahova ndi wakulinganira. Iye cipo asadikhira pizinji kakamwe kupiringana pinakwanisa ife. Pontho, iye asadzindikira kuti pisaphemba ndzidzi kwa ife toera kuwina mphambvu na manyerezero adidi.​—Masalmo 103:13, 14.

Mwacitsandzo, onani kuti Yahova atsalakana tani mprofeta Eliya. Eliya afewa manungo mbathawira nthando thangwi yakugopa. Kodi Yahova ansandika mbampanga kuti abwerere ku basa yace ya uprofeta? Nkhabe. Yahova atuma anju kawiri toera  kulamusa Eliya mwaufuni na kumpasa cakudya. Ngakhale tenepo, mudapita ntsiku 40, Eliya akhapitiriza kudzudzumika na kugopa. Kodi Yahova acitanji toera kuphedza Eliya? Pakutoma, Yahova apangiza kuti mbadantsidzikiza. Buluka penepo, Yahova awangisa Eliya na ‘fala yakuthowa.’ Pakumalisa, Yahova apangiza kuti akhali na pikwi na pikwi pya alambiri anango akukhulupirika. Mwakukhonda dembuka, Eliya akhali pontho mprofeta waphinga na wacipapo. (1 Amambo 19:1-19) Pyenepi pisatipfundzisanji? Eliya akhadakundwa na kupswipa ntima, mbwenye Yahova antsalakana mwakupirira na mwakukoma ntima. Yahova nee acinja. Iye asatitsalakana munjira ibodzi ene.

Khalani na maonero akulinganira mu ndzidzi unanyerezera imwe pinadikhira Yahova kwa imwe. Lekani kulandanisa pinacita imwe mu ntsiku zino na pikhacita imwe kale. Mwacitsandzo: Nyakuthamanga wakuti asiya kukhunganyika mu nthanda zizinji peno mu pyaka pizinji, pakutoma nee anakwanisa kucita pikhacita iye kale. Mbwenye asakhazikisa pifuno pyakucepa pyakuti pinamphedza toera kuwina mphambvu na kupirira. Akristu ndi ninga anyakuthamanga. Iwo asakhunganyika na cifuno cibodzi. (1 Akorinto 9:24-27) Thangwi yanji nkhabe kukhazikisa cifuno cauzimu cakuti munacikwanirisa cincino? Mwacitsandzo, munakwanisa kukhazikisa cifuno cakugumanika pa misonkhano ya mpingo. Phembani Yahova toera akuphedzeni kukwanirisa cifuno canu. Mu ndzidzi unawina imwe mphambvu yauzimu, imwe ‘munadzaona kuti Yahova ngwadidi.’ (Masalmo 34:8, NM) Kumbukani kuti cinthu consene cinacita imwe toera kupangiza ufuni wanu kuna Yahova, maseze cioneke ninga ndi cing’ono​—ndi cakufunika kakamwe kwa iye.​—Luka 21:1-4.

Kodi Yahova apasa tani mphambvu June toera kubwerera kuna iye? Iye alonga: “Ndapitiriza kucita phembero kuna Yahova, mbandimphemba toera andiphedze. Buluka penepo, nkwenya wanga andipanga pya nsonkhano wa cisa ukhafuna kucitwa mu nzinda wanga. Ndatonga kugumanika pa ntsiku ibodzi ya nsonkhano. Pikhali pyakutsandzayisa kakamwe kugumanyikana pontho na atumiki a Yahova. Nsonkhano unoyu ukhali ciphedzo cikhadikhira ine. Cincino ndisatumikira pontho Yahova mwakukomerwa. Umaso wanga uli na cifuniro kakamwe kwa ine. Lero ndisadziwa kuti nee ndisafunika kuthaukirana na abale na alongo. Ndisapereka takhuta thangwi yakupitiriza kukhala na mwai wakubwerera.”