Nyakukhulupira ndzathu wakufunika:

Ninga musadziwa, Bhibhlya ndi bukhu yakuti isalonga pizinji thangwi ya anthu. Azinji a iwo akhali amuna na akazi akukhulupirika adathimbana na nyatwa ninga zathu. Iwo akhali na ‘mabvero akulandana na athu.’ (Tyago 5:17) Anango akundwa na nyatwa na kupswipa ntima. Anango atsalakanwa mwakuipa na anthu a pabanja yawo peno anyakulambira andzawo. Anangombo athimbana na mabvero akupasika mulando thangwi ya madodo awo.

Kodi anthu anewa asiyiratu kutumikira Yahova? Nkhabe. Azinji akhali ninga nyamasalmo adaphembera mbalonga: ‘Ndine ninga bira yakutayika, ndisakeni; thangwi sidaduwala matongero anu tayu.’ (Masalmo 119:176) Kodi imwe muli na mabvero akulandana na anewa?

Yahova cipo asaduwala alambiri ace adatayika mu nkumbi. Mbuto mwace, iye asaasaka. Kazinji kene iye asacita pyenepi mu kuphatisira anyakukhulupira andzawo. Mwacitsandzo, onani kuti Yahova aphedza tani ntumiki wace Yobe wakuti athimbana na nyatwa zizinji, kuphatanizambo kuluza mpfuma yace, kuferwa na anyakufunika ace, na kuthabuka na nyatwa ikulu ya ungumi. Yobe athimbanambo na mafala akuphekesa a ale adaenda kam’balangaza. Maseze Yobe akhadaphatwa na manyerezero akuphonyeka mu ndzidzi wakucepa, iye cipo asiya kulambira Yahova. (Yobe 1:22; 2:10) Kodi Yahova aphedza tani Yobe toera kukhala pontho na maonero akulinganira?

Njira ibodzi idaphatisira Yahova toera kuphedza Yobe ndi kubulukira kwa nyakukhulupira ndzace akhacemerwa Eliyu. Pikhalonga Yobe kudzudzumika kwace, Eliyu abvesera mbakulumizika toera kulonga. Mbadalonganji? Mbadasandika Yobe peno kuyesera kumuwangisa mu kuncitisa kupasika mulando peno kukhala na manyadzo? Kodi Eliyu anyerezera kuti akhali wadidi kupiringana Yobe? Nee pang’ono pene! Mu kukulumizwa na nzimu wa Mulungu, Eliyu alonga: ‘Ine ndine sawasawa na iwe pamaso pa Mulungu, ine ndaumbwambo na matope.’ Buluka penepo iye apasa cinyindiro Yobe: ‘Leka kundigopa mbupwala, thangwi ndine munthu ene pyanga.’ (Yobe 33:6, 7) Mbuto mwakuthimizira nyatwa za Yobe, mwaufuni Eliyu apereka uphungu na ciwangiso cikhafuna Yobe.

Taphata miyendo, dziwani kuti cifuno cibodzi cene ndico cidatikulumiza toera kukhunganya bruxura ino. Pakutoma, ife tadinga mwacidikhodikho makhaliro na mafala a anthu azinji akhadasiya kulambira Yahova. (Misangani 18:13) Buluka penepo, tacita phembero mbatidinga mwacidikhodikho mbiri za Bhibhlya zinapangiza kuti Yahova aphedza tani atumiki ace a nduli mudathimbana iwo na makhaliro ninga anewa. Pakumalisa, taphataniza mbiri zenezi za Bhibhlya na pyakugumana napyo pya ntsiku zino toera kubulusa bruxura ino. Tisakuphembani na ntima onsene toera kudinga mphangwa zenezi. Taphata miyendo, khalani na cinyindiro cakuti tisakufunani kakamwe.

Mathubo Akutonga a Mboni za Yahova