1, 2. Tisafunika kucita cisankhulo cipi pa nkhani ya ubalangazi?

NYEREZERANI kuti mukufuna kudya nsapo wakudzipa kakamwe, mbwenye mukuona kuti khundu ibodzi ndi yakubvunda. Kodi munacitanji? Natenepa, imwe mbumudadya nsapo onsene, kuphataniza khundu yakubvunda; peno mbumudataya nsapo onsene, peno mbumudabulusa khundu yakubvunda ya nsapo mbumudya khundu yadidi. Kodi mbumudasankhulanji?

² Sawasawa, ubalangazi ndi ninga nsapo unoyu. M’midzidzi inango musafuna kutsandzaya na ubalangazi, mbwenye musadzindikira kuti pyakubalangaza pizinji pinagumanika lero ndi pyakuphekesa, ngakhale pyakubvunda. Natenepa, kodi munacitanji? Anango mwakufunisisa asatawira pinthu pyakuipa mbatawira ubalangazi onsene unaperekwa na dziko ino. Anango asacalira ubalangazi onsene toera kukhala na cinyindiro cakuti iwo nkhabe kudzaona cinthu consene cakuphekesa. Ngakhale tenepa, anango anakwanisa kucalira mwacidikhodikho ubalangazi wakuti ndi wakuphekesa mbwenye m’midzidzi inango mbacita khundu mu ubalangazi wakuti usaoneka kukhala wadidi. Kodi ndi cisankhulo cipi cinafunika imwe kucita toera kupitiriza kukhala mu ufuni wa Mulungu?

3. Kodi cincino tinadzadinganji?

³ Azinji a ife mbadasankhula nyerezero yacitatu. Tisadziwa kufunika kwa ubalangazi mbwenye tisafuna basi ene kubalangaza na pinthu pyakuti ndi pya makhaliro akucena. Na thangwi ineyi, tisafunika kudinga kuti tinakwanisa tani kusankhula  cadidi na cakuipa. Cakutoma, tendeni tidinge kuti kusankhula kwathu ubalangazi kuli na maphindu anji mu ulambiri wathu kwa Yahova.

4. Kodi kuperekeka kwathu kunakwanisa tani kukhuya kusankhula kwathu ubalangazi?

⁴ Mu dzidzi unango ndulimu, Mboni m’bodzi wakugwesera adabatizwa mu 1946 alonga: “Ndzidzi onsene ndisawangisira toera kugumanika pa nkhani zonsene za ubatizo na kubvesera mwacidikhodikho, ninga pa ubatizo wanga ene.” Thangwi yanji? Iye afokotoza: “Kukoya m’manyerezero kuperekeka kwanga kusakhala njira yakufunika kakamwe toera kupitiriza kukhala wakukhulupirika.” Mwakukhonda penula musatawira maonero anewa. Kukumbuka mwekhene kuti mwacita pikiro kwa Yahova kuti munaphatisira umaso wanu onsene toera kuntumikira kusakukulumizani toera kupirira. (Lerini Koelete 5:4.) Kunyerezera mwacidikhodikho kuperekeka kwanu kunadzakhuya maonero anu tayu basi ene mu utumiki Wacikristu mbwenye m’mabasa anango onsene a umaso kuphataniza ubalangazi. Mpostolo Paulu alonga undimomwene unoyu mudalemba iye kwa Akristu mu ntsiku zace: “Pa kudya, pa kumwa, na pa kuphata mabasa anu onsene musimbe Mulungu.”—1 Akorinto 10:31.

5. Kodi Levitiko 22:18-20 isatiphedza tani toera kuona cenjezo yakubisalika pa Aroma 12:1?

 ⁵ Pyonsene pinacita imwe mu umaso pisabverana na kulambira kwanu Yahova. Mutsamba yace kwa Aroma, Paulu aphatisira mafala amphambvu toera kubvekesa undimomwene unoyu kwa anyakukhulupira andzace. Iye aadembetera: ‘Mupereke manungo anu, toera akhale ntsembe ya maso na yakucena inakomeresa Mulungu; kucita ipi ndi kulemedza Mulungu pyadidi.’ (Aroma 12:1) Manungo anu asaphataniza manyerezero anu, ntima wanu, na mphambvu zanu. Pyonsene ipi, musapiphatisira pa kutumikira Mulungu. (Marko 12:30) Paulu alonga utumiki unoyu wa ntima onsene ninga ntsembe. Fala yakuti “ntsembe” iri na cenjezo yakubisika. Pantsi pa Mwambo wa Mose, ntsembe yakuti ikhali na cirema peno cibanyo ikhakhondwa na Mulungu. (Levitiko 22:18-20) Sawasawa, khala ntsembe yauzimu ya Nkristu iri na cirema, inadzakhondwa na Mulungu. Natenepa, kodi pyenepi mbipidadzacitika tani?

6, 7. Nkristu anapswipisa tani manungo ace, na ndi nyatwa zipi zinafuna kudzaoneka?

⁶ Paulu adembetera Akristu ku Roma kuti: ‘Akhonde kupereka maphindi a manungo awo ku madawo.’ Pontho Paulu aapanga kuti: ‘aphe masiriro a manungo.’ (Aroma 6:12-14; 8:13) Kalene mutsamba yace, iye akhadapereka pitsandzo pinango pya “masiriro a manungo.” Thangwi ya anthu a madawo, tisaleri tenepa: ‘Nkanwa mwawo mwadzala na maxolero akugopswa.’ ‘Miyendo yawo inathamanga toera kuthedzesa ciropa.’ ‘Nkhabe kugopa Mulungu pa maso pawo.’ (Aroma 3:13-18) Nkristu anakwanisa kupswipisa manungo ace khala asaphatisira “maphindi” peno piwalo pya manungo ace, m’macitiro anewa a madawo. Mwacitsandzo, khala Nkristu lero mwanyakhomo asaona nkhani zinapangiza ucipezipezi peno usumankha, iye ali ‘kupereka maso ace ku madawo’ natenepa iye akupswipisa manungo ace onsene. Kulambira konsene kunacita iye kunadzakhala ntsembe yakuti ndi yakukhonda kucena na  yakukhonda kutawirika kwa Mulungu. (Deuteronomyo 15:21; 1 Pedro 1:14-16; 2 Pedro 3:11, NM) Ndi dzedze ikulu kakamwe munthu angasankhula ubalangazi wakuipa.

⁷ Mwapakweca, kusankhula ubalangazi kwa Akristu kuli na maphindu adidi kakamwe. Mwakukhonda kupenula, tisafuna kusankhula ubalangazi wakuti unadzathimizira ntsembe yathu kwa Mulungu, tayu kupswipisika. Tendeni cincino tidinge kuti tinadziwa tani cadidi na cakuipa.

8, 9. (a) Kodi ubalangazi unakwanisa kugawiwa m’makhundu api mawiri? (b) Ndi mitundu ipi ya ubalangazi inakhonda ife, na thangwi yanji?

⁸ Ubalangazi unakwanisa kugawiwa m’makhundu mawiri. Khundu ibodzi isaphataniza ubalangazi wakuti Akristu asaucalira mwakukwana; khundu inango isaphataniza ubalangazi wakuti panango Akristu anakwanisa kuuona kukhala wakutawirika peno nkhabe. Tendeni titome kudinga khundu yakutoma, ubalangazi wakuti Akristu asaucalira.

⁹ Ninga taona pa Nsolo 1, mitundu inango ya ubalangazi isagomezera pakweca mabasa anakhondeswa m’Bhibhlya. Mwacitsandzo, nyerezerani mbuto za interneti ninga mafilimu, maprogramu a televizau, na nyimbo zakuti maimbiro azo ndi akunyanyasa peno audimonyo, peno zakuti zisapangiza ucipezipezi peno zakuti zisakulumiza kucita pyakuipa, macitiro aulukwali. Nakuti mitundu ineyi yakuipa ya ubalangazi isaswa midida na miyambo ya Bhibhlya, isafunika kucalirwa na Akristu andimomwene. (Machitiro 15:28, 29; 1 Akorinto 6:9, 10; Apokalipse 21:8) Mu kucalira ubalangazi unoyu wakukhonda kuthema, imwe musapangiza kwa Yahova kuti mwandimomwene ‘mukutcinga pyakuipa’ na musawangisira ‘kucalira pyakuipa’ ndzidzi onsene. Munjira ineyi, munakhala na ‘cikhulupiro cakusowa ufakafaka.’—Aroma 12:9; Masalmo 34:14; 1 Timoti 1:5, NM.

10. Ndi ntundu upi wa manyerezero a ubalangazi akuti ndi akugopswa, na thangwi yanji?

¹⁰ Natenepa, panango anango anakwanisa kunyerezera kuti  ubalangazi unapangiza pakweca makhaliro akuipa nkhabe kukwaza. Iwo asanyerezera, ‘Ine ndinakwanisa kuona pyenepi m’mafilimu peno mu televizau, mbwenye ine nkhabe kucita pinthu pyenepi.’ Manyerezero anewa ndi akunyengeta na ndi akugopswa. (Lerini Yeremiya 17:9, NM.) Khala ife tadzindikira kuti tisaona ubalangazi wakuti Yahova asaukhondesa, kodi mwandimomwene ‘tisatcinga pyakuipa?’ Kuona mwakubwereza-bwereza, kuleri peno kubvesera pinthu pyakuti ndi pyakuipa pinadzaphingiza manyerezero athu. (Masalmo 119:70; 1 Timoti 4:1, 2) Macitiro anewa anakhuya pinacita ife peno maonero athu ku madawo a anango na makhaliro awo.

11. Agalata 6:7 isapangiza tani undimomwene wa pya ubalangazi?

¹¹ Mwandimomwene pyenepi pisacitika. Akristu anango acita pinthu pyaulukwali thangwi akhala akunyengererwa na pyakubalangaza pyakuti ndzidzi onsene akhapiona. Kubulukira ku pyakugumana napyo pyakuipa, iwo apfundza kuti “pinabzwala munthu anadzapibvuna.” (Agalata 6:7) Mbwenye pinthu pyenepi pyakutsukwalisa pinakwaniswa kucalirwa. Khala mwadzwala mwacidikhodikho pinthu pyadidi m’manyerezero mwanu, imwe munadzatsandzaya na kukolola mu umaso wanu pinthu pyadidi.—Onani bokosi “ Ndi Ubalangazi Upi Unafunika Ine Kusankhula?”.

12. Agalata 6:5, NM isalonga tani ubalangazi, na ndi citsogolero cipi ciri na ife pa kucita cisankhulo ca munthu paekha?

¹² Tendeni cincino tidinge khundu yaciwiri—ubalangazi wakuti usapangiza mabasa akuti nee asakhondeswa mwapakweca peno akuti nee asatawiriswa mwapakweca m’Mafala a Mulungu. Pakusankhula ntundu unoyu wa ubalangazi, Nkristu asafunika kucita cisankhulo cace mu pinthu pinaona iye kukhala pyadidi. (Lerini Agalata 6:5, NM.) Mbwenye, ife tiri na pitsogolero tingathimbana na ntundu unoyu wa ubalangazi . Bhibhlya iri na midida, peno pipfundziso pyakuwanga, pyakuti pisaticitisa kubvesesa njira ya kunyerezera kwa Yahova.  Mu kuikha citsalakano cathu ku midida ineyi, tinadzakwanisa kubvesesa ‘pire pinafuna Yahova’ mu pinthu pyonsene, kuphataniza kusankhula kwathu ubalangazi.—Aefesi 5:17.

13. Ndi ninji cinafuna kudzatikulumiza toera kucalira ubalangazi wakuti unapindisa Yahova?

¹³ Si Akristu onsene tayu ali na maluso akudziwa, peno a kudzindikira, munjira ibodzi ene. (Afilipi 1:9) Kusiyapo pyenepi, Akristu asadziwa kuti m’makhundu a ubalangazi, pyakufuna na pyakukhonda kufuna ndi pyakusiyana-siyana. Ndi thangwi yace, nkhabe kudikhira kuti Akristu onsene anadzacita pisankhulo  pibodzi pyene. Ngakhale tenepa, tingatawirisa midida ya Mulungu kukhuya manyerezero na ntima wathu, tinadzakhala akufunisisa kucalira ntundu onsene wa ubalangazi wakuti unapindisa Yahova.—Masalmo 119:11, 129; 1 Pedro 2:16.

14. (a) Tisafunika kudinganji pakusankhula ubalangazi? (b) Tinapitiriza tani kuikha pifuno pya Umambo pa mbuto yakutoma mu umaso?

¹⁴ Pakusankhula ubalangazi, pana cinthu cinango cakufunika kakamwe toera kucidinga: ndzidzi wanu. Ngakhale kuti kutsandzaya na ubalangazi wanu pisapangiza kuti musauona kukhala wakutawirika, ntsama ya ndzidzi unabvunga imwe mu ubalangazi isapangiza pinaikha imwe pa mbuto yakutoma. Mwandimomwene, kwa Akristu pinthu pyauzimu ndi pyakufunika kakamwe. (Lerini Mateo 6:33.) Munacitanji toera kukhala na cinyindiro cakuti pinthu pyauzimu pikupitiriza kukhala pa mbuto yakutoma mu umaso wanu? Mpostolo Paulu alonga: ‘Cenjerani mphapo, mpholeni macitiro anu, lekani kucita ninga mapswiru mbwenye ninga anthu a ndzeru. Bandzani ndzidzi wanu.’ (Aefesi 5:15, 16) Kuikha pakweca madire a ntsama ya ndzidzi unakoya imwe toera kubalangaza kunadzakuphedzani toera kugumana ndzidzi wakucita pinthu “pyonsene pyadidi [peno pyakufunika kakamwe]” pyakuti pisaphedzera kukhala kwanu mwauzimu.—Afilipi 1:10, MZ.

15. Thangwi yanji mphyandzeru kusaka khundu yadidi pa kusankhula ubalangazi?

¹⁵ Pontho mphyandzeru kusaka khundu yadidi pakusankhula ubalangazi. Kodi pyenepi pisabvekanji? Nyerezerani pontho citsandzo ca nsapo. Toera kucalira kudya mwasusudeu khundu ya nsapo yakubvunda, imwe musabulusa tayu basi ene pale padabvunda mbwenyembo musadjidjibula n’khundu-n’khundu mwa mbuto idabvunda ya nsapo. Munjira ibodzi ene, mphyandzeru kudinga khundu yadidi pakusankhula ubalangazi. Akristu aluso asacalira tayu basi ene ubalangazi wakuti ndi wakuoneka pakweca kuti usaswa midida ya Bhibhlya, mbwenye asacalirambo mitundu ya ubalangazi wakuti ndi wakupenulisa peno wakuphataniza pinthu pyakuti pinakwanisa kufudza uxamwali wathu na Yahova.  (Misangani 4:25-27) Kuphatisisa uphungu wa Mafala a Mulungu kunadzakuphedzani toera kucalira ubalangazi wakuti usaphataniza pinthu pyakuipa.

16. (a) Tinapangiza tani kuti tiri na maonero a Yahova pa nkhani ya ubalangazi? (b) Kuphatisira midida ya Bhibhlya kunakwanisa tani kukhala n’khaliro wathu mu umaso?

¹⁶ Pakusankhula ubalangazi, Akristu andimomwene cakutoma asadinga maonero a Yahova. Bhibhlya isapangiza mabvero na midida ya Yahova. Mwacitsandzo, Mambo Salomoni andandalisa pinthu pizinji pyakuti Yahova asapiida, ninga ‘lirimi ya uthambi, manja a anyaciropa, ntima unanyerezera pya upandu, miyendo inafamba njira zakuipa.’ (Misangani 6:16-19) Kodi maonero a Yahova anakwanisa tani kukhuya maonero anu? Nyamasalmo acenjeza: ‘Imwe munafuna Yahova calirani pyakuipa.’ (Masalmo 97:10) Kusankhula kwanu ubalangazi kusafunika kupangiza kuti imwe musaida pinaida Yahova. (Agalata 5:19-21) Kumbukani pontho kuti pinacita imwe pakubisalika, kupiringana pinacita imwe pakweca, pisapangiza kuti imwe ndimwe ntundu wanji wa munthu. (Masalmo 11:4; 16:8) Na thangwi ineyi, khala munacifuno cakupangiza m’makhundu onsene a umaso wanu mabvero a Yahova a pinthu pyadidi, m’midzidzi yonsene munadzacita pisankhulo pyakubverana na midida ya Bhibhlya. Kucita pyenepi kunadzakhala n’khaliro wa umaso wanu.—2 Akorinto 3:18.

17. Mbatisati kusankhula ubalangazi, tisafunika kubvundzikanji?

¹⁷ Kodi ndi pipi pinthu pinango pyakuti imwe munakwanisa kucita toera kukhala na cinyindiro cakuti mukucita mwakubverana  na n’khaliro wakunyerezera wa Yahova pa kusankhula ubalangazi? Nyerezerani pa mbvundzo uyu, ‘Kodi ubalangazi unoyu unandikhuya tani na unakhuyambo tani uxamwali wanga na Mulungu?’ Mwacitsandzo, mbamusati kutonga kusankhula kuona filimu, bvundzikani, ‘Kodi pyankati mwa filimu ineyi pinakhuya tani cikumbuntima canga?’ Tendeni tidinge midida yakuti inakwanisa kuphatisirwa pa nkhani ineyi.

18, 19. (a) N’dida unagumanika pa Afilipi 4:8, 9 unatiphedza tani toera kuona khala ubalangazi wathu ndi wadidi? (b) Ndi ipi midida inango yakuti inakuphedzani kusankhula ubalangazi wadidi? (Onani cidzindikiro capantsi)

¹⁸ N’dida wakufunika kakamwe usagumanika pa Afilipi 4:8, 9, usalonga tenepa: ‘Pinthu pyonsene pya maso, pya mbiri, pya ulungami, pyakucena, pyakufuniwa, pyakukoma, pya mphambvu na pyakusimbwa, pyonsenembo pidapfundza, pidapaswa, pidabva, pidaonambo imwe mwa ine, ipi mupicite!’ Inde, Paulu nee akhalonga pya ubalangazi tayu, mbwenye pya kunyerezera mwacidikhodikho muntima, kwakuti kusafunika kukhala na pfuli mu pinthu pyakuti pisakomeresa Mulungu. (Masalmo 19:14) Ngakhale tenepa, mafala a Paulu anakwanisa kuphatisirwa ninga n’dida pa nkhani za ubalangazi. Anaphatisirwa tani?

¹⁹ Bvundzikani, ‘Kodi kusankhula kwanga mafilimu, masendzekero a mavidyu, nyimbo, peno mitundu inango ya ubalangazi isadzadza manyerezero anga na ‘pinthu pyonsene pyakucena?’ Mwacitsandzo, pakumala kuona filimu, kodi ndi pithundzithundzi pipi pinasala na kutonga manyerezero anu? Khala ndi pyakutsandzayisa, pyakucena, pyakukomeresa, natenepa dziwani kuti ubalangazi wanu ndi wadidi. Mbwenye, khala filimu idaona imwe isakucitisani kunyerezera pinthu pyakuti ndi pyakukhonda kucena, natenepa ubalangazi wanu ukhali wakuipa, ngakhale wakuphekesa. (Mateo 12:33; Marko 7:20-23) Thangwi yanji? Thangwi yakuti kunyerezera pinthu pyakuti ndi pya makhaliro akukhonda kucena pisadzudzumisa ntendere wanu wankati, pisacitisa kuti cikumbuntima canu cakupfundziswa na Bhibhlya cikhale na madazi, pontho  pinakwanisa kufudza uxamwali wanu na Mulungu. (Aefesi 5:5; 1 Timoti 1:5, 19, NM) Nakuti ubalangazi unoyu unakwanisa kuphekesa kakamwe uunthu wanu, khalani dzololo toera kuucalira. * (Aroma 12:2) Khalani ninga nyamasalmo ule adaphembera kwa Yahova: “Thawisani maso anga pa pinthu pyapezi.”—Masalmo 119:37.

20, 21. Kodi 1 Akorinto 10:23, 24 isalonga tani pa kusankhula ubalangazi wadidi?

²⁰ Paulu alonga n’dida wakufunika kakamwe wa m’Bhibhlya wakuti usafunika kudingwa mwadidi pakucita pisankhulo pya munthu paekha. Iye alemba: ‘Ande ndinakwanisa kucita pyonsene mbwenye si pyonsene pinawangisa andzanga tayu. Munthu aleke kusaka udidi wace mbasake udidi wa andzace.’ (1 Akorinto 10:23, 24) N’dida unoyu usabverana tani na n’dida wa kusankhula ubalangazi wadidi? Musafunika kubvundzika, ‘Kodi ubalangazi udasankhula ine unadzakhuya tani anango?’

²¹ Cikumbuntima canu cinakwanisa kukutawirisani kutsandzaya na ntundu unango wa ubalangazi wakuti musauona kukhala ‘wakulungama’ peno wakutawirika. Natenepa, khala mukuona kuti anyakukhulupira anango akuti cikumbuntima cawo cisaakhondesa kukhala na ubalangazi wakuti asauona ninga wakuipa, imwe musafunika kutonga kukhonda kukhala nawo ntundu unoyu wa ubalangazi. Thangwi yanji? Thangwi yakuti imwe nkhabe kufuna kuti “madawo anewa [aipise] mitima ya abale anu,” ngakhale “kuchitambo madawo kuli Kristu ene.” Paulu alemba kuti kucita pyenepi kunanentsa anyakukhulupira andzanu kupitiriza kukhala akukhulupirika kwa Mulungu. Phatisirani mwadidi cenjezo yakuti: “Lekani kusosa andzanu [peno kuagwegwedusa].” (1 Akorinto 8:12; 10:32) Akristu andimomwene lero asabvera mwakufunisisa  na mwakucimbiza uphungu wa Paulu mu kucalira pyakubalangaza pyakuti ndi “pyakulungama” mbwenye nkhabe ‘kuwangisa tayu.’—Aroma 14:1; 15:1.

22. Thangwi yanji Akristu ndi akusiyana maonero pa pinthu pya munthu paekha?

²² Natenepa, pana khundu inango yakusaka kuphindulisa anango. Nkristu wakuti ali na cikumbuntima cakuwanga nkhabe funika kukakamiza anango m’mpingo Wacikristu kutowezera maonero ace mu ubalangazi wakuthema. Khala iye asakakamiza anango kutowezera maonero ace, iye mbadakhala ninga nyakutekenya motokala mu nseu ukulu anakakamiza kuti anyakutekenya motokala anango onsene anaphatisira khundu ineyi ya nseu afambe mu luwiro ibodzi ene ninga munafunira iye. Kukakamiza kweneku si kwadidi tayu. Na thangwi ya kufunana Kwacikristu, Nkristu unango wakuti ali na cikumbuntima cakuwanga asafunika kulemedza anyakukhulupira andzace ale anaona ubalangazi munjira yakusiyana na maonero ace ene, mbwenye akuti akupitiriza kukhala m’madire mwa midida Yacikristu. Munjira ineyi, iye asiya kuti ‘Ndzeru zace zakulungama zidziwike na anthu onsene.’—Afilipi 4:5; Koelete 7:16.

23. Munakhala tani na cinyindiro cakuti mwasankhula ubalangazi wadidi?

²³ Mwacigwagwa, munakwanisa tani kukhala na cinyindiro cakuti mwasankhula ubalangazi wadidi? Khondani ntundu onsene wa ubalangazi wakuti mwapakweca nkhabe kutsandzayisa, unapangiza mabasa aulukwali akuti asakhondeswa m’Mafala a Mulungu. Towezerani midida ya Bhibhlya yakuti inakwanisa kuphatisirwa ku mitundu yonsene ya ubalangazi wadidi yakuti mwapakweca nee watcululwa m’Bhibhlya tayu. Calirani ubalangazi wakuti usaphekesa cikumbuntima canu na khalani wakufunisisa kusiya mitundu ya ubalangazi yakuti inakwanisa kupindisa anango, makamaka anyakukhulupira andzanu. Kusankhula kwanu kwacipapo kucita pyenepi kusapasa mbiri Yahova na kusacitisa imwe pabodzi na banja yanu kupitiriza kukhala mu ufuni wace.