NKAZI unango wa piaka 25 pyakubalwa alemba: “M’caka 1981 mama wanga wakundifuya afa na nthenda ya cancro. Kufa kwace kwatsukwalisa kakamwe ine na m’bale wanga wakufuyiwa. Ndikhali na piaka 17 pyakubalwa, na m’bale wanga akhali na piaka 11 pyakubalwa. Ndakhala na citsuwo cikulu kakamwe na iye. Nakuti ndapfunziswa kuti iye akhali kudzulu, ndikhafuna kupheka towera ndikakhale na iye. Iye akhali xamwali wanga wadidi.”

Pisaoneka ninga pyakusowa ulungami kuti kufa kukhale na mphambvu yakupha munthu anafuna imwe. Pyenepi pingacitika, nyerezero yakuti nkhabe kudzalongabve naye, kuseka naye, peno kukhumbatira nyakufunika wanu ingakwanise kukhala yakunensa kuipirira. Kubva kupha kweneku nee kusamala thangwi yakupangwa kuti nyakufunika wanu ali kudzulu tayu.

Mbwenye Biblya isapereka cidikhiro cakusiyana kakamwe. Ninga mudaona ife, Malemba asapangiza kuti mphyakukwanisika kugumanikana pontho na nyakufunika wanu adafa patsogolo apa, tayu kudzulu kokhonda dziwika mbwenye pano pa dziko yapantsi pantsi pa makhaliro a ntendere na akulungama. M’nzidzi unoyu anthu anadzakhala na cidikhiro ca kutsanzaya na ungumi waungwiro, na iwo cipo anadzafa pontho. Anango angakwanise kulonga: ‘Mbwenye anewa ndi manyerezero aumbirimi!’

WKodi musafunika kucitanji towera mukhulupire kuti cidikhiro ceneci ndi candimomwene? Towera kukhulupira pikiro ineyi, musafunika kukhala na cinyindiro cakuti adacita pikiro ineyi asafunisisa na ali na mphambvu yakucita pyenepi. Kodi mbani mphapo adapikira kuti anyakufa anadzakhala pontho maso?

M’kutoma kwa nzidzi wa malimwe wa 31 E.C., Yezu Kristu apikira mwakuwanga ntima: “Sawasawa ninga mudalamusa Baba anyakufa, mbaabwezera moyo, tenepambo Mwana analamusa muli akufa ale adasankhula iye. Lekani kudzuma na ipyo thangwi unadzafika ndzidzi wa kuti anthu onsene anagona mu nthumbi anadzabva mafala ache [Yezu]. Penepo iwo anadzalamukambo.” (Jwau 5:21, 28, 29) Inde, Yezu Kristu apikira kuti mamiliyau a anthu adafa anadzakhala pontho maso pa dziko ino yapantsi mbakhala na cidikhiro cakukhala kwenda na kwenda m’makhaliro a ntendere na a paradizu. (Luka 23:43; Jwau 3:16; 17:3; landanisani Masalmo 37:29 na Mateo 5:4 [5:5, NM]) Nakuti Yezu acita pikiro  ineyi, tingakwanise kukhala na cibaso cakuti iye asafunisisa kuikwanirisa. Kodi iye anakwanisa kucita pyenepi?

Mbipisati kumala piaka piwiri kutomera pa nzidzi udacita iye pikiro ineyi, Yezu apangiza m’njira yamphambvu kuti iye asafunisisa na ali na mphambvu yakulamusa anthu muli akufa.

”Kwacitika cinthu cakuphata ntima. Lazaro akhaduwala maningi. Anakazi ace awiri, Mariya na Marta, atumiza mphangwa kuna Yezu, wakuti akhali ku ntunda unango wa Nkulo wa Yoridani: “Mbuya, ona, munthu anafuna iwe ana manungo.” (Jwau 11:3) Iwo akhadziwa kuti Yezu akhafuna Lazaro. Kodi Yezu nee mbadafuna kuona xamwali wace wakuduwala? Mbwenye mbuto mwa kuenda ku Betanya mwakucimbiza, Yezu apitiriza kukhala kukhagumanika iye ntsiku ziwiri.—Jwau 11:5, 6.

Lazaro afa nzidzi ungasi mudamala kutumizwa mphangwa za kuduwala kwace. Yezu adziwa mudafa Lazaro, na iye akhafuna kucita cinthu thangwi ya pyenepi. M’nzidzi udafika Yezu ku Betanya, xamwali wace wapantima akhadamala kufa kale ntsiku zinai. (Jwau 11:17, 39) Kodi Yezu mbadabweresa pontho ku umaso munthu wakuti akhadafa m’nzidzi unoyu onsene?

Mudabva iye kuti Yezu akhabwera, Marta, nkazi waphinga, athamanga towera akagumanikane naye. (Landanisani na Luka 10:38-42.) M’kukhuyiwa na kutsukwala kwa Marta, Yezu ampasa cibaso ici: “Mbale wako anadzalamuka.” Mudapangiza Marta cikhulupiro cace ca kulamuka muli akufa kunafuna citika ntsogolo, Yezu ampanga mwapakweca: “Ine ndine kulamuka na moyo. Munthu munthu ananditawira, ngakhala iye amala kufa kale, anadzakhala na moyo.”—Jwau 11:20-25.

Mudafika iye pa nthumbi, Yezu apanga anthu kuti abuluse mwala ukhafunga nsuwo. Buluka penepo, pakumala  kuphembera mwakugaluza, iye alonga: “Lazaro, buluka panja!”—Jwau 11:38-43.

Maso onsene akhayang’ana nthumbi. Buluka penepo, mwabuluka munthu ncidima. Manjace na miyendo yace ikhadapyangirirwa na mithambo, na nkhope yace ikhadaphimbirwa na nguwo. Yezu aapanga: “Nsudzuleni, mulekeni, aende pyache.” Mithambo yakumalisa yagwa pantsi. Inde, akhali Lazaro, mamuna wakuti akhali wakufa m’ntsiku zinai!—Jwau 11:44.

Mbiri yakulamuswa kwa Lazaro muli akufa isapangizwa m’Evanjeliyu wa Jwau kuti ndi cinthu cidacitikadi. Unyomonyomo wa pyenepi ndi wakubveka kakamwe mbupangiza kuti mbiri ineyi si cithankano basi tayu. Kupokanya kucitika kwa pyenepi ndi kupokanya pirengo pyonsene pinagumanika m’Biblya, kuphataniza kulamuka kwa Yezu Kristu muli akufa. Kukhonda kuti Yezu nee alamuka muli akufa ndi kukhonda cikhulupiro consene Cacikristu.—1 Akorinto 15:13-15.

Mwandimomwene, khala musatawira kukhalapo kwa Mulungu, nee mbipidakunenserani kukhulupira kulamuka muli akufa. Mwacitsanzo: Munthu angakwanise kuikha mafala a cifuno cace m’kasete ya vidiyu, na angafa, acibale na axamwali ace angakwanise kumuona na kumbvesera mbakafokotoza njira inafuna iye kuti pinthu pyace pitsalakanwe. M’piaka dzana pidamala, pinthu pyenepi nee pikhakwanisika tayu. Kwa anthu anango anakhala kutali kakamwe na mizinda, tekinolojiya ya kuikha mafala m’kasete ya vidiyu isaoneka ninga cirengo thangwi iwo nkhabe kuidziwa. Nakuti midida ya siyensiya idaikhwa na Nciti ingakwanise kuphatisirwa na anthu towera kucita pinthu pyakuoneka na pyakubveka, kodi Nciti nkhabe kwanisa kucita pinthu pikulu kakamwe kupiringana pyenepi? Kodi si pyanzeru tayu kuti Ule adacita umaso angakwanise kuucita pontho papswa?

Cirengo cakubweresa pontho Lazaro ku umaso cisaphedza kuthimizira cikhulupiro kwa Yezu na kwa kulamuka muli akufa. (Jwau 11:41, 42; 12:9-11, 17-19) M’njira yakuphata ntima, cisapangizambo cifuno ca Yahova na ca Mwanace ca kulamusa anthu muli akufa.

Pidacita Yezu pa kufa kwa Lazaro pisapangiza kukoma ntima kwa Mwana wa Mulungu. Kubva kwace ntsisi kukulu m’nzidzi unoyu kwapangiza cifuno cace cikulu ca kulamusa anyakufa. Tisaleri tenepa: “Mariya pidafika iye kuna Yezu, amuona mbambulumundira mbampanga: ‘Mbuya, mbamudakhala pano, mbale wanga mbadafa tayu’. Adzamale Mariya alira. Ayuda akhadza na iye alirambo. Yezu adzuma mu ntima mwache, mbatsamali, mbabvundza anthu: ‘Mwamuyikha kupi?’ Iwo antawira mbati: ‘Mbuya, bwerani, mudzaone’. Adzamale Yezu alirambo. Penepo ayuda alonga: ‘Onani, iye akhanfuna pikulu.’”—Jwau 11:32-36.

Ntsisi ya Yezu yakubulukira m’ntima isapangizwa pano na mafala matatu akuti: “adzuma,” ‘atsamali [‘atsukwala,’ MZ]’ na “alirambo.” Mafala acilongero cakutoma adaphatisirwa m’kulemba cakucitika ceneci cakuphata ntima asapangiza kuti Yezu akhuyiwa kakamwe na kufa kwa xamwali wace wapantima Lazaro na kuona mwanankazi wa Lazaro mbakalira kwakuti maso Ace adzala na misozi. a

Cinthu cikulu ndi cakuti Yezu akhadamala kubweresa  pontho anthu anango awiri ku umaso. Na iye akhafuna kucita cibodzibodzi kwa Lazaro. (Jwau 11:11, 23, 25) Ngakhale tenepa, iye ‘alira.’ Yezu nkhabe bweresa pontho anthu ku umaso thangwi iye ali na mphambvu basi tayu. Ntsisi na kukoma ntima kukulu kudapangiza iye m’nzidzi unoyu kusapangiza mwapakweca cifuno cace cikulu cakumalisa nyatwa zinabwereswa na kufa.

Nakuti Yezu ndi ‘[chithunzi] cha Yahova Mulungu,’ mwakuthema ife tisadikhira pinthu pizinji kwa Babathu wakudzulu. (Ahebere 1:3) Mamuna wakukhulupirika Yobe alonga pya cifuno ca Yahova ca kulamusa anthu muli akufa: ‘Kodi angafa munthu wamphambvu angakwanise kukhala pontho maso? . . . Unadzacemera, na ine ndinadzakutawira. Unadzakhala na citsuwo ca basa ya manja ako.’ (Yobe 14:14, 15, NM) Pano, fala yacilongero cakutoma idathumburuzwa kuti ‘unadzakhala na citsuwo’ isapangiza cifuno cikulu kakamwe ca Mulungu. (Genesi 31:30; Masalmo 84:2) Mwapakweca, Yahova asadikhira kakamwe nzidzi wakulamusa anthu muli akufa.

Kodi tingakwanisedi kukhulupira pikiro ya kulamuka muli akufa? Inde, nkhabepo cipenulo cakuti Yahova na Mwanace asafuna na ali na mphambvu ya kuikwanirisa. Kodi pyenepi pisabvekanji kwa imwe? Pisabveka kuti imwe muli na cidikhiro cakugumanikana pontho na anyakufunika anu adafa pano pa dziko yapantsi mbwenye pantsi pa makhaliro akusiyana kakamwe!

Yahova Mulungu, wakuti pakutoma aikha anthu m’munda wakubalika, apikira kucita pontho Paradizu pa dziko ino yapantsi pantsi pa utongi wa Umambo Wace wakudzulu m’manja mwa Yezu Kristu wakuti cincino ali pa mpando wa cidzo. (Genesi 2:7-9; Mateo 6:10; Luka 23:42, 43) M’Paradizu ineyi, banja ya anthu inadzakhala na cidikhiro ca kutsanzaya na umaso okhonda mala, mbakhonda nensekabve na mautenda. (Apokalipse 21:1-4; landanisani na Yobe 33:25; Izaiya 35:5-7.) Kunadzamalambo kuidana, kupambulana thangwi ya ntundu wa khanda, nthonga thangwi ya kusiyana kwa madzinza, na kupondererana thangwi ya mpfuma. M’kuphatisira Yezu Kristu, Yahova Mulungu anadzalamusa anyakufa m’dziko ineyi yapantsi yakumala kuceneswa.

Cincino ceneci ndi cidikhiro ca nkazi Wacikristu adalongwa pakutoma pa khundu ino. Piaka pizinji mace mbadamala kufa, Mboni za Yahova zamphedza kucita pfunziro yacidikhodikho ya Biblya. Iye asakumbuka: “Ndalira mudapfunza ine pya cidikhiro ca kulamuka muli akufa. Pikhali pyakudzumisa kudziwa kuti ndinadzaona pontho mama wanga.”

Cincino ceneci ndi cidikhiro ca nkazi Wacikristu adalongwa pakutoma pa khundu ino. Piaka pizinji mace mbadamala kufa, Mboni za Yahova zamphedza kucita pfunziro yacidikhodikho ya Biblya. Iye asakumbuka: “Ndalira mudapfunza ine pya cidikhiro ca kulamuka muli akufa. Pikhali pyakudzumisa kudziwa kuti ndinadzaona pontho mama wanga.”

Khala ntima wanu usafunisisambo kuona pontho nyakufunika wanu, Mboni za Yahova zinakomerwa na kukuphedzani kupfunza njira yakuti imwembo mukhale na cidikhiro ceneci cakunyindirika. Thangwi yanji imwe nkhabe kulonga nazo ku Nyumba ya Umambo duzi na kunakhala imwe, peno kuzilembera kwa ibodzi ya zimbuto zinagumanika pa tsamba 32.