Yezu aciri ku Yerusalemu. Ikhali ntsiku ya Sabudu. Mu ndzidzi ukhafamba Yezu na anyakupfundzace mu nzinda, iwo aona nyakuphemba-phemba wakuti akhadabalwa boliboli. Anyakupfundza abvundza Yezu: ‘Mpfundzisi, mbani adadawa, ndiye peno ndi anyakubalace toera iye abaliwe boliboli?’—Juwau 9:2.

Anyakupfundzace akhadziwa kuti nkhabe munthu anakhala maso mbadzati kubalwa. Iwo akhabvundza khala munthu anakwanisa kudawa mbaciri m’mimba mwa mai wace. Yezu aatawira: ‘Nkhabe munthu adadawa, nee iye nee anyakubalace, mbwenye pyacitika tenepa toera anthu aone mabasa a Mulungu kubulukira mwa iye.’ (Juwau 9:3) Pyenepi pikhapangiza kuti akhali na mulando nee ndi boliboli, pontho nee ndi anyakubalace. Mbwenye ndi madawo a Adhamu anacitisa kuti anthu abalwe akusowa ungwiro, pontho paoneke mautenda ninga uboliboli. Mbwenye makhaliro a mamuna unoyu apasa Yezu mwai toera apangize mabasa a Mulungu. Iye awangisa mamuna unoyu ninga pidacita iye nduli kuna anthu anango.

Yezu alonga kuti mabasa anewa asafunika kucitwa mwakucimbiza. Iye alonga: ‘Tisafunika kuphata mabasa a Ule adandituma dzuwa mbiciripo; thangwi masiku ali kufika akuti nee munthu m’bodzi anakwanisa kuphata basa. Mbandiri pa dziko yapantsi, ine ndine ceza ca dziko.’ (Juwau 9:4, 5) Mwakukhonda dembuka, Yezu mbadaphiwa mbaikhwa n’cidima ca nthumbi, mbuto yakuti nee mbadakwanisa kucita cinthu. Mbwenye mbadzati kufa iye akhacitisa ceza pa dziko.

Kodi Yezu mbadakwanisa kuwangisa mamuna unoyu? Mphapo, mbadamuwangisa tani? Iye aphula mata pantsi mbacita matope pang’ono. Buluka penepo akwata mbaakhwaza m’maso mwace, mbampanga: ‘Ndoko kasambe nkhope ku thawala ya Silowe.’ (Juwau 9:7) Mamuna unoyu abvera. Pidamala iye kusamba nkhope, aoneratu! Mamuna atsandzaya kakamwe thangwi unoyu ukhali ulendo wakutoma kuona mu umaso wace.

Anthu a pacisa na ale akuti kale akhandziwa adzumatirwa kakamwe. Iwo abvundza: ‘Kodi uyu nee ndi ule akakhala pantsi mbakaphemba-phemba?’ Anango atawira: “Ndiye.” Mbwenye anango nee akhulupira. Iwo alonga: ‘Nkhabe, siye tayu mbwenye alandana na iye.’ Mamuna atawira: ‘Inde, ndine pano.’—Juwau 9:8, 9.

Buluka penepo, iwo ambvundza: ‘Mphapo maso ako afunguka tani?’ Iye aatawira: ‘Munthu unango anacemerwa Yezu amunya matope mbaakhwaza m’maso mwanga, mbandipanga kuti ndoko kasambe nkhope ku thawala ya Silowe. Natenepa ine ndaenda, ndasamba nkhope mbanditoma kuona.’ Iwo ambvundza pontho: ‘Ali kupi munthu unoyu?’ Mamuna aatawira: ‘Ine nkhabe dziwako kuna iye.’—Juwau 9:10-12.

Anthu aendesa mamuna akhali boliboli kuna Afarisi, akuti akhafunambo dziwa kuti awangiswa tani. Iye alonga: ‘Iye akhwaza matope m’maso mwanga,  ndasamba nkhope, cincino ndiri kuona.’ Afarisi akhafunika kutsandzayambo na kuwangiswa kwa nyakuphemba-phemba. Mbwenye anango mwa iwo apambizira Yezu, mbalonga: ‘Munthu unoyu nee atumwa na Mulungu, thangwi iye nkhabe kukoya ntsiku ya Sabudu.’ Anangombo alonga: ‘Pinakwanisika tani kuti munthu wakudawa acite pirengo ninga pyenepi?’ (Juwau 9:15, 16) Iwo akhali na maonero akusiyana.

Thangwi yakusiyana kwa maonero iwo abvundza pontho: ‘Nakuti iye afungula maso ako, iwe usanyerezera kuti iye mbani?’ Mamuna wakuti akhali boliboli nee akhapenula kuti Yezu mbani, iye aatawira: ‘Iye ndi mprofeta.’—Juwau 9:17.

Ayuda nee akhapitawira pyenepi. Panango iwo akhanyerezera kuti Yezu na mamuna unoyu akhadabverana toera kunyengeza anthu. Pakumalisira iwo aona kuti njira yadidi toera kumalisa pyenepi ndi kubvundzisa anyakubala a nyakuphemba-phemba khala iye akhalidi boliboli.