Pidadziwa iye kuti Afarisi na atowereri a Herodhi akhasaka njira toera kumupha, Yezu na anyakupfundzace abuluka mbaenda ku Bara ya Galileya. Mwinji wa anthu wabuluka ku Galileya, mizinda ya Tiro na Sidhoni, kumabulukiro a dzuwa a Nkulo wa Yordani, Yerusalemu na Idhumeya waenda kukhali Yezu. Iye awangisa anthu azinji. Na thangwi ineyi, ale akhali na utenda wakugopswa akhacita pyonsene toera kufika dhuzi na Yezu. Iwo nee akhadikhira kuti Yezu aakhuye, mbwenye iwo akhafendedzera toera an’khuye.—Marko 3:9, 10.

Mwinji ukhali ukulu kakamwe kwakuti Yezu apanga anyakupfundzace kuti abwerese mwadiya ung’ono toera akwanise kuthaukira pang’ono mwinji ukhadan’zungulira. Natenepa iye mbadakwanisa kuapfundzisa mbali m’mwadiya peno kuenda ku cisa cinango toera kuphedza anthu azinji.

Nyakupfundza Mateu alonga kuti pidacita Yezu pikhakwanirisa ‘pidalonga mprofeta Izaiya.’ (Mateu 12:17) Ndi profesiya ipi idakwanirisa Yezu ndzidzi unoyu?

‘Onani bitcu wanga adasankhula ine, wakufunika wanga anakomerwa na ine. Ndinadzampasa nzimu wanga. Iye anadzadziwisa pya ulungami anthu akukhonda khulupira. Iye nee anadzasosa nthonga nee kutikana. Nee munthu m’bodzi anadzabva fala yace m’miseu. Iye nee anagwanda ntete wakugongonyeka, nee anadzathimisa nyale yakupucira, mpaka kukhazikisa ulungami. Mitundu yonsene inadzakhulupira dzina yace.’—Mateu 12:18-21; Izaiya 42:1-4.

Mwakukhonda penula, Yezu ndi ntumiki wakuti asafuniwa kakamwe na Mulungu. Yezu apangiza pakweca undimomwene wa ulungami, wakuti nee usapangizwa m’mauphemberi authambi akuti asatowezera miyambo ya anthu. Nakuti Afarisi asaphatisira mwakuipa Mwambo wa Mulungu, iwo nee akhaenda kaona munthu wakuduwala pa ntsiku ya Sabudu. Toera kupangiza ulungami wa Mulungu na kupangiza kuti iye apaswa nzimu wa Mulungu, Yezu aasudzula ku miyambo yakuipa idakhazikiswa na anthu. Ndi thangwi yace atsogoleri auphemberi akhasaka njira toera kumupha. Pyenepi pikhali pyakutsukwalisa kakamwe!

Mafala akuti ‘iye nee anadzasosa nthonga nee kutikana, pontho nee munthu m’bodzi anadzabva fala yace m’miseu’ asabvekanji? Mu ndzidzi ukhawangisa  Yezu anthu, iye nee akhafuna kuti iwo peno madimonyo ‘adziwise anango kuti iye akhali ani.’ (Marko 3:12) Iye nee akhafuna kuti anthu aende mbakalonga mu nseu thangwi ya iye peno pikhacita iye.

Yezu akhalimbo na mphangwa zakubalangaza anthu akhaoneka ninga ntete wakugongonyeka wakuti ukugwandika. Iwo akhali ninga nyale yakupucira yakuti iri cifupi na kuthima. Yezu nee agwanda ntete wakugongonyeka, peno kusiya kuti nyale ithime. M’mbuto mwace, iye aphatisira mafala aufuni na antsisi toera kubalangaza anthu akucepeseka. Mwandimomwene, Yezu ndi anafuna kumalisa nyatwa za anthu.