Anthu atawira munjira zakusiyana pinthu pikhacita Yezu na pikhalonga iye, mwakubverana na pikhanyerezera iwo. Pyenepi pyaoneka pakweca panyumba inango ku Galileya. Nfarisi wakucemerwa Simau acemera Yezu toera kudya panyumba pace, panango toera kudziwa mwadidi ule anacita mabasa akudzumisa. Yezu atawira ncemerero thangwi aona kuti unoyu mbudakhala mwai wakupfundzisa anthu akhafuna kugumanika penepo, ninga pidacita iye na anyakulipisa misonkho na anyakudawa.

Mbwenye Yezu nee atambirwa ninga pikhacitirwa alendo onsene. Ku Palestina, mulendo angafika panyumba akhatsukwa miyendo yace na madzi akuthondola, thangwi iye akhapita na masandali m’miseu ya pfumbi, miyendo ikhapswipa, pontho ikhapisa kakamwe. Mbwenye iwo nee acita pyenepi kuna Yezu. Iye nee ampswompswonwa mu ndzidzi udafika iye. Nsambo unango wakuti ukhacitwa, ndi kuikha mafuta mu nsolo wa mulendo, mbwenye iwo nee acita pyenepi kuna Yezu. Kodi pyenepi pisapangiza kuti Yezu atambirwa mwadidi?

Alendo onsene akhala n’khundu mwa meza mbatoma kudya. Mu ndzidzi ukhadya iwo, nkazi unango wakukhonda cemerwa apita mwacibisobiso. Iye asadziwika mu ‘nzinda unoyu ninga nyakudawa.’ (Luka 7:37) Anthu onsene akusowa ungwiro ndi akudawa, mbwenye nkazi unoyu akhaoniwa ninga waulukwali. Panango iye abva pipfundziso pya Yezu, kuphatanizambo ncemerero toera ‘onsene adaneta na adalemerwa aende kuna iye toera apumiswe.’ (Mateu 11:28, 29) Mukukulumizwa na mafala a Yezu na mabasace, acita pyonsene toera kugumanikana naye.

Iye abwera na kunduli kwa Yezu mbagodama pa miyendo yace. Misozi yace yagwa pa miyendo ya Yezu mbaipukuta na tsisi yace. Buluka penepo ampswompswona miyendo ya Yezu mbaikhwaza mafuta akununkhira adabweresa iye. Simau nee akomerwa na pyenepi mbanyerezera: ‘Munthu uyu mbadakhala mprofeta, mwandimomwene iye mbadadziwa kuti mbani nkazi uyu adam’phata, mbadadziwa kuti iye ndi nyakudawa.’—Luka 7:39.

Pidadziwa iye pikhanyerezera Simau, Yezu alonga: ‘Simau, ndina mphangwa pang’ono na iwe.’ Iye atawira: ‘Mpfundzisi, longani!’ Yezu apitiriza: ‘Amuna awiri akhali na mangawa kuna mamuna unango; m’bodzi afiyari madhenaryo 500, mbwenye unango afiyari madhenaryo 50. Pidasowa iwo cinthu toera kubwezera mangawa awo, iye aalekerera. Mphapo, mbani mwa iwo anadzanfuna kakamwe?’ Simau atawira: ‘Ndisanyerezera kuti ndi ule adalekerera iye mangawa makulu.’—Luka 7:40-43.

Yezu atawira mbapanga Simau: ‘Ukuona nkazi uyu? Ine ndapita n’nyumba mwako; iwe nee wandipasa madzi toera kutsuka miyendo yanga. Mbwenye nkazi uyu atotesa miyendo yanga na misozi yace mbaipukuta na tsisi yace. Iwe nee wandimpswompswona, mbwenye nkazi uyu, kubulukira pa ndzidzi udapita ine muno, iye apitiriza kumpswompswona miyendo yanga. Iwe nee waikha mafuta munsolo mwanga, mbwenye nkazi uyu akhwaza mafuta akununkhira m’miyendo yanga.’ Yezu akwanisa kuona pikhacita nkazi kuti atcunyuka na ntima onsene ku makhaliro ace akuipa. Natenepa, iye alonga: ‘Madawo ace alekererwa, maseze ndi mazinji. Thangwi iye andifuna kakamwe. Mbwenye ule analekererwa pang’ono, asafuna pang’ono.’—Luka 7:44-47.

Pyenepi nee pisabveka kuti Yezu asatawirisa makhaliro aulukwali. M’mbuto mwace, iye akhafuna kupangiza kuti ntsisi zamphedza kudziwa kuti thangwi yanji anthu acita madawo makulu, buluka penepo mbatcunyuka mbaenda kuna Kristu toera kubalangazwa. Nkazi abalangazika pidalonga Yezu kuti: ‘Madawo ako alekererwa. Cikhulupiro cako cakupulumusa, ndoko mu ntendere.’—Luka 7:48, 50.