Mwinji wa anthu wazungulira Yezu ku nzinda wa Dhekapoli kumabulukiro a dzuwa a Bara ya Galileya. Iwo abwera toera kubva na kuwangiswa, pontho abweresa pitundu pikulu pya pyakudya.

Mbwenye mukupita kwa ndzidzi Yezu apanga anyakupfundzace: ‘Ndisabvera ntsisi mwinji uyu wa anthu, thangwi ali pabodzi na ine mu ntsiku zitatu, pontho nee ali na cakudya. Ndingaapanga toera aende m’mamidzi mwawo na njala, anakomoka n’njira, pontho anango mwa iwo abuluka kutali kakamwe.’ Anyakupfundza ambvundza: ‘Kuno ndi kutali kakamwe na mamidzi, tinagumana kupi mikate yakukwana toera kudyesa anthu onsene awa?’—Marko 8:2-4.

Yezu abvundza: ‘Muli na mikate mingasi?’ Anyakupfundza atawira: ‘Minomwe na nyama zing’ono zingasi za m’madzi.’ (Mateu 15:34) Natenepa Yezu aphemba anthu toera akhale pantsi. Iye akwata mikate na ntsomba, aphembera kwa Mulungu, mbaipasa anyakupfundzace toera kugawira kuna anthu. Mphyakudzumatirisa kudziwa kuti onsene adya mbakhuta. Maphindi adasala agumanywa mbaikhwa m’pitundu pinomwe pikulu. Pa ntsiku ineyi amuna cifupi 4.000 adya, kusiyapo akazi na anapiana adadyambo.

Pidamala Yezu kupanga mwinji toera kuenda, iye na anyakupfundzace awambuka bara na mwadiya mbaenda ku Magadhani, kumadokero a dzuwa a Bara ya Galileya. Penepo, Afarisi na Asadhuki angasi ayesera Yezu mukum’phemba toera apangize cidzindikiro cakudzulu.

Pidadzindikira iye pifuno pyawo, Yezu aatawira: ‘Mu ndzidzi unadoka dzuwa, mungaona kuti kudzulu kwafuira, imwe musalonga: Mangwana kunacerwa mwadidi, na macibese mungaona kuti kudzulu kuna mitambo, imwe musalonga: Lero kunja kwaipa, madzi anabvumba. Imwe musadziwa kufokotoza pidzindikiro pya kudzulu, mbwenye pidzindikiro pya midzidzi imwe nee munakwanisa kupifokotoza.’ (Mateu 16:2, 3) Buluka penepo, Yezu apanga Afarisi na Asadhuki kuti nee anadzapangizwa cidzindikiro kusiyapo cidzindikiro ca Yona.

Yezu na anyakupfundzace akwira m’mwadiya mbaenda ku Bhetisaidha kumadokero a dzuwa a bara. Paulendo, anyakupfundza adzindikira kuti aduwala kukwata mikate yakukwana. Iwo akwata nkate ubodzi basi. Mu kukumbuka kuketesana kwace na Afarisi na Asadhuki akuti akhaphedzera Herodhi, Yezu acenjeza anyakupfundzace: ‘Fungulani maso anu; citani mphole-mphole na ntombwe wakutupisa mikate wa Afarisi na wa Herodhi.’ Anyakupfundza akhanyerezera kuti iye akhalonga pya mikate idaduwala iwo. Yezu adzindikira kuti iwo nee akhadabvesesa, mbaapanga: ‘Thangwi yanji musaketesana thangwi yakukhonda bweresa mikate?’—Marko 8:15-17.

Yezu akhadamala kwene kupasa anthu azinji mikate. Natenepa, anyakupfundza akhafunika kudziwa kuti Yezu nee akhadzudzumika na kusoweka kwa mikate. Iye aabvundza: ‘Kodi nee musakumbuka? Pidagwanda ine mikate mixanu mbadya amuna 5.000, ndi pitundu pingasi pidadzadza imwe na mapindi a mikate adasala?’ Iwo antawira: ‘Khumi na piwiri.’ Yezu apitiriza kuapanga: ‘Pidagwanda ine mikate minomwe mbadya amuna 4.000, ndi pitundu pingasi pikulu pidadzadza imwe na mapindi a mikate adasala?’ Iwo antawira: ‘Pinomwe.’—Marko 8:18-20.

Yezu abvundza: ‘Thangwi yanji nee mukudzindikira kuti nee ndikhalonga pya mikate? Ine ndikhafuna kulonga kuti musafunika kucita mphole-mphole na ntombwe wakutupisa mikate wa Afarisi na Asadhuki.’—Mateu 16:11.

Pakumalisa anyakupfundza abvesesa pikhafuna Yezu kulonga. Pyakutupisa pisacitisa nkate kukula. Penepo, Yezu aphatisira fala yakuti pyakutupisa ninga cidzindikiro ca n’khaliro wakuipa. Iye akhacenjeza anyakupfundza toera acalire ‘pipfundziso pya Afarisi na pya Asadhuki’ pyakuti pisakhuya munthu munjira yakuipa.—Mateu 16:12.