Yezu apfundzisa pinthu pyakufunika kakamwe pikhadya iye panyumba ya ntsogoleri m’bodzi wa Afarisi. Anthu azinji atowerera Yezu pikhaenda iye ku Yerusalemu. Thangwi yanji? Kodi iwo akhafunadi kukhala atowereri ace andimomwene, mwakukhonda tsalakana pikhafuna kuthimbana na iwo?

Mu ndzidzi ukhacita iwo ulendo, Yezu alonga pinthu pyakuti anthu anango aipirwa napyo, iye alonga: ‘Munthu onsene anafuna kukhala nyakupfundza wanga, asafunika kundifuna kakamwe kupiringana babace, mace, nkazace, anace, abaleace acimuna na acikazi, peno umaso wace.’ (Luka 14:26) Mphapo iye akhafuna kulonganji na mafala anewa?

Yezu nee akhafuna kulonga kuti ule anakhala ntowereri wace asafunikadi kuida acibale ace. Iye akhafuna kulonga kuti nee asafunika kuafuna kakamwe kupiringana Yezu, ninga mamuna pa nsangani wace wakuti akhonda ncemerero wakufunika kakamwe thangwi akhadamanga kwene banja. (Luka 14:20) Bhibhlya isalonga kuti Yakobe, baba wa Ayuda, ‘aida’ Leya mbafuna Rakeli, pyenepi pisabveka kuti iye afuna kakamwe Rakeli kupiringana Leya.—Genesi 29:31.

Yezu alongambo kuti nyakupfundza asafunika kuida ‘umaso wace ene.’ Pyenepi pisabveka kuti nyakupfundza wandimomwene asafunika kufuna kakamwe Yezu kupiringana umaso wace, ngakhale kufa pingafunika. Mwandimomwene, kukhala nyakupfundza wa Kristu si pyadzenda tayu. Ndi thangwi yace tisafunika kunyerezera mwacidikhodikho toera kukhala nyakupfundza wace.

Kukhala nyakupfundza wa Yezu pisaphataniza kuthimbana na nyatwa na mitcingo, ninga mudalonga iye: ‘Munthu onsene anakhonda kukwata muti wace wakusikimizira mbanditowera, nee anakwanisa kukhala nyakupfundza wanga.’ (Luka 14:27) Nyakupfundza wandimomwene wa Yezu akhafunika kudikhira kutsalakanwa mwakuipa ninga pidacitwa Yezu. Iye alonga kuti akhali dzololo toera kuphiwa na anyamalwa ace.

Natenepa, mwinji wakuti ukhacita ulendo ukhafunika kunyerezera mwacidikhodikho kuti pisabvekanji kukhala nyakupfundza wa Kristu. Yezu agomezera pyenepi mukulonga nsangani. Iye alonga: ‘Mwacitsandzo, mbani mwa imwe wakuti angafuna kumanga nyumba, pakutoma nkhabe kukhala pantsi toera kuona khala kobiri yace inakwana? Angakhonda kucita pyenepi, iye anatoma kuimanga mbacimwana kuimalisa.’ (Luka 14:28, 29) Natenepa, mbadzati kukhala anyakupfundza a Yezu, ale akuti akhaenda na Yezu ku Yerusalemu akhafunika kukhala dzololo toera kukwanirisa basa yawo. Yezu agomezera pyenepi mukulonga nsangani unango.

Iye alonga: ‘Ndi mambo upi wakuti angafuna kuenda kamenyana na mambo unango kunkhondo, pakutoma nee anakhala pantsi na andzace mbacedza toera kuona khala na anyankhondo ace  10.000 anakwanisa kumenyana na mambo anadza na anyankhondo 20.000? Khala nee anakwanisa, ndzace mbaciri kutali, iye anatuma aimiriri ace toera aende kakhazikise ntendere.’ Toera kugomezera ntsonga ineyi, Yezu alonga: ‘Munjira ibodzi ene, dziwani kuti nee m’bodzi wa imwe anakwanisa kukhala nyakupfundza wanga angakhonda kusiya pinthu pyace pyonsene.’—Luka 14:31-33.

Mwandimomwene, Yezu nee akulonga basi ene kuna anthu anan’towerera. Onsene anapfundza pya Kristu asafunika kukhala dzololo toera kucita pinalonga iye. Pyenepi pisabveka kuti asafunika kukhala dzololo toera kucita pyonsene pinakwanisa iwo toera kusiya piri na iwo, mpfuma zawo, ngakhale kufa angafuna kukhala anyakupfundza a Yezu. Toera kucita pyenepi, mphyadidi kunyerezera mwacidikhodikho na kucita phembero.

Buluka penepo, Yezu alonga pontho ntsonga inango idalonga iye mu nkhani yace ya Paphiri mudapanga iye anyakupfundzace kuti akhali ‘munyu wa dziko yapantsi.’ (Mateu 5:13) Iye akhafuna kulonga kuti, ninga munyu wakuti usacitisa cinthu kukhonda bvunda, anyakupfundza akhali na mphambvu yakutsidzikiza anthu kuti akhale na uxamwali wadidi na Yahova na kucalira makhaliro akuipa. Mu ndzidzi wakuti basa ya utumiki wa Yezu ikhali cifupi na kumala, iye alonga: ‘Mwandimomwene, munyu ndi wadidi. Mphapo ungasuluka, unakhala tani pontho na mphambvu yakulungula?’ (Luka 14:34) Anyakubveserace akhadziwa kuti munyu unango mu cisa cawo ukhadabvungazika na mataka, natenepa nee ukhalibve na mphambvu.

Mbwenye Yezu apangiza kuti anyakupfundzace nkhabe funika kufewesa phinga yawo. Pyenepi pingacitika, anakhala akusowa basa, ninga munyu wakusuluka. Pyenepi pinaacitisa kusingirirwa na anthu. Kusiyapo pyenepi, nee anakhala akuthema kwa Mulungu, pontho anapswipisa dzinace. Toera kugomezera kufunika kwa kucalira kufewesa phinga yathu, Yezu alonga: ‘Ule ali na makutu akubva, mbabve.’—Luka 14:35.