Pidamala Yezu kuonana na Marta na Mariya cifupi na Bhetanya, iwo aenda ku nthumbi idaikhwa Lazaro. Nthumbi ineyi ikhali mphako yakuti ikhadafungwa na mwala ukulu. Yezu alonga: “Bulusani mwala.” Marta akhadzudzumika kakamwe, thangwi nee akhadziwa pikhafuna kucita Yezu. Marta alonga: “Mbuya, mpaka pano panango manungo ace akununkha, thangwi papita ntsiku zinai mbadamala kufa.” Yezu ampanga: “Kodi ine nee ndakupanga kuti ungakhulupira mbudaona mbiri ya Mulungu?”—Juwau 11:39, 40.

Natenepa mwala wabuluswa. Buluka penepo, Yezu ayang’ana kudzulu mbaphemba: “Baba, ine ndisapereka takhuta kuna imwe thangwi mwandibvesera. Mwandimomwene, ine ndisapidziwa kuti ndzidzi onsene imwe musandibvesera; mbwenye  ndalonga pyenepi thangwi ya mwinji wa anthu udalimira pano, toera iwo akhulupire kuti ndimwe adandituma.” Phembero idacita Yezu mwakugaluza yapangiza kuna anthu kuti iye mbadaphatisira mphambvu ya Mulungu. Buluka penepo, Yezu akhuwa: “Lazaro, buluka panja!” Lazaro abuluka na manja, miyendo na nkhope yakupyangirirwa na nguwo. Yezu alonga: “Nsudzuleni, munsiye aende pyace.”—Juwau 11:41-44.

Ayuda azinji adaenda kabalangaza Marta na Mariya aona cirengo ceneci mbakhulupira Yezu. Mbwenye anango abuluka mbaenda kapanga Afarisi pinthu pidacita Yezu. Afarisi na akulu a anyantsembe agumanyikana mu thando ikulu yakutongera miseru ya Ayuda ikhacemerwa Sinedhriyu. Nkulu wa anyantsembe, Kayifa akhalimbo mu nsoka unoyu. Anango mwa iwo adungunya: “Tinacitanji, thangwi munthu uyu akucita pirengo pizinji? Ife tingansiya mbapitiriza tenepa, anthu onsene anan’khulupira. Buluka penepo Aroma anabwera mbatikwatira templo yathu na mbumba yathu.” (Juwau 11:47, 48) Maseze iwo abva umboni wa anthu adaona “pirengo pizinji” pidacita Yezu, mbwenye iwo nee akomerwa na pinthu pidacita Mulungu kubulukira kwa iye. Iwo akhadzudzumika kakamwe na cidzo cawo na utongi wawo.

Asadhuki pidabva iwo kuti Lazaro alamuswa aipirwa kakamwe thangwi nee akakhulupira kulamuswa kwa anthu muli akufa. Kayifa, wakuti akhali m’bodzi wa Asadhuki, alonga: “Imwe nkhabe cinthu cinadziwa imwe, imwe nee musadziwa kuti mphyadidi kwa imwe kuti munthu m’bodzi afere anthu m’mbuto mwa kufudzwa mbumba yonsene.”—Juwau 11:49, 50; Mabasa 5:17; 23:8.

Kayifa nee alonga pyenepi na ‘kufuna kwace.’ Mulungu ndiye adancitisa kulonga pyenepi thangwi iye akhali nyantsembe wankulu. Kayifa akhafuna kulonga kuti Yezu akhafunika kufa toera kucalira kupasa manyadzo utongi na mphambvu ya atsogoleri auphemberi Aciyuda. Profesiya ya Kayifa isapangiza kuti kufa kwa Yezu kunadzakhala ciomboli toera kuphindulisa Ayuda na ‘ana onsene a Mulungu adabalalika.’—Juwau 11:51, 52.

Anthu onsene mu Thando Ikulu Yakutongera Miseru abvera maonero a Kayifa toera kupha Yezu. Kodi Nikodhemu wakuti ndi m’bodzi wa thando ineyi, pontho akhadziwa mwadidi Yezu apanga Yezu maonero a Kayifa? Mwakukhonda tsalakana khala iye ampanga peno nkhabe, mbwenye Yezu abuluka mwakucimbiza mu cisa ca Yerusalemu toera akhonde kuphiwa mbudzati kufika ndzidzi udakhazikisa Mulungu.