Maseze Yezu akhaenda ku Yerusalemu, panango iye apitiriza kukhala panyumba ya Zakeu pabodzi na anyakupfundzace. Iwo akhakhulupira kuti mwakukhonda dembuka “Umambo wa Mulungu” unadzakhadzikiswa, pontho Yezu anadzakhala Mambo. (Luka 19:11) Mbwenye anyakupfundza nee akhabvesesa pyenepi, pontho nee akhabvesesa kuti Yezu akhafunika kufa. Natenepa iye alonga nsangani toera kuaphedza kuona kuti Umambo mbudabwera ntsogolo.

Iye alonga: “Mamuna unango wakuti ndi mwana wa mambo aenda ku dziko yakutali kakamwe toera akhazikiswe ninga mambo, angamala abwerere.” (Luka 19:12) Ulendo unoyu ukhali wakulapha kakamwe. Mwakukhonda penula, Yezu ndi “mwana wa mambo” akhafuna kuenda ku “dziko yakutali,” kudzulu, toera kupaswa Umambo na Baba wace.

Mu nsangani, “mwana wa mambo” mbadzati cita ulendo wace, iye acemera anyabasa ace khumi mbaapasa kobiri khumi za parata, buluka penepo iye aapanga: “Citani malonda na kobiri izi mpaka kubwera kwanga.” (Luka 19:13) Kobiri zenezi zikhali za ntengo ukulu. Natenepa nyakulima akhafunika kuphata basa miyezi yakupiringana mitatu toera kutambira kobiri ibodzi.

Panango anyakupfundza anyerezera kuti ndiwo akhalandaniswa na anyabasa anewa khumi, thangwi Yezu akhadamala kale kualandanisa na anyabasa akubvuna. (Mateu 9:35-38) Yezu nee akhaphemba anyakupfundzace toera kucita basa yakubvuna mbeu. M’mbuto mwace iye akhalonga pya kubvuna anyakupfundza akuti mbadacita khundu mu Umambo wa Mulungu. Anyakupfundza aphatisira maluso awo na pinthu pyawo toera kusaka anthu akuti mbadacita khundu mu Umambo.

Ninji pontho pikhafuna Yezu kupfundzisa mu nsangani unoyu? Iye alonga kuti anthu a mu dziko yace “amuida [mwana wa mambo] mbatuma aimiriri awo toera aende kampanga kuti: ‘Ife nkhabe funa kuti iwe ukhale mambo wathu.’” (Luka 19:14) Anyakupfundza akhadziwa kuti Ayuda akhakhonda Yezu, pontho akhadziwa kuti anango akhafuna kumupha. Pidafa Yezu mbaenda kudzulu, Ayuda apangiza kuti akhaida Yezu mukutcinga anyakupfundzace. Anyakutcinga anewa apangiza pakweca kuti iwo nee akhafuna kuti Yezu akhale Mambo.—Juwau 19:15, 16; Mabasa 4:13-18; 5:40.

Mu ndzidzi udaenda ‘mamuna wakuti ndi mwana wa mambo’ katambira ‘umambo’ mpaka kubwerera kwace, kodi anyabasa khumi aphatisira tani kobiri zawo? Yezu alonga: “Pidabwerera iye pakumala kukhazikiswa ninga mambo, acemeresa anyabasa akhadapasa iye kobiri yace toera aone kuti ndi kobiri zingasi zidawina iwo na malonda adacita iwo. Natenepa, wakutoma abwera mbalonga: ‘Mbuya, na kobiri yanu ibodzi ya parata, ndawina kobiri khumi za parata.’ Mambo ampanga: ‘Wacita mwadidi, ndiwe nyabasa wadidi! Nakuti wakhulupirika mu pinthu pyakucepa, unadzatonga mizinda khumi.’ Waciwiri abwera, mbalonga: ‘Mbuya, na kobiri yanu ibodzi ya parata, ndawina kobiri zixanu za parata.’ Iye apangambo nyabasa unoyu: ‘Iwembo unadzatonga mizinda mixanu.’”—Luka 19:15-19.

Khala anyakupfundza adzindikira kuti iwo akhali ninga anyabasa akuti aphatisira mwakukwana ndzidzi na pinthu pyawo toera kucita anyakupfundza azinji, akhafunika kukhala na cinyindiro cakuti Yezu akhakomerwa na mabasa akhacita iwo. Akhanyindirambo kuti Yezu anadzaapasa nkhombo thangwi ya phinga yawo. Anyakupfundza a Yezu akhathimbana na pinthu pyakusiyana-siyana mu umaso, pontho akhali na maluso akusiyana-siyana. Ngakhale tenepo, Yezu wakuti atambira ‘umambo’ anadzaapasa nkhombo thangwi yakuwangisira kwawo m’basa yakucita anyakupfundza.—Mateu 28:19, 20.

Pakumalisa kwa nsangani unoyu, Yezu afokotoza kusiyana kwa pidacita anyabasa apfemba na pidacita nyabasa m’bodzi. Iye alonga: “Mbwenye unango abwera, mbalonga: ‘Mbuya, kobiri yanu iyi, ine ndikhadaikoya mu nguwo. Ndacita pyenepi thangwi ndisakugopani, imwe ndimwe munthu wakuuma ntima kakamwe; musakwata pidakhonda imwe kukoyesa, pontho musabvuna pidakhonda imwe kubzwala.’  Mambo ampanga: ‘Thangwi ya mafala ako, ndinakupanga kuti ndiwe nyabasa wakuipa. Walonga kuti ukhapidziwa kuti ndine munthu wakuuma ntima, ndisakwata pidakhonda ine kukoyesa, mbandibvuna pidakhonda ine kubzwala? Mphapo thangwi yanji wakhonda kukoyesa kobiri yanga kubhanko? Pakubwera kwanga, mbidaitambira na m’bairo.’ Natenepa, iye apanga ale akhali cifupi: ‘Nkwatireni kobiri iri na iye mbamuipasa ule ali na kobiri khumi za parata.’”—Luka 19:20-24.

Nakuti nyabasa unoyu nee aphata basa toera kuthimizira mpfuma ya umambo wa mbuyace, iye aluza pyonsene. Apostolo asadikhira ndzidzi unafuna Yezu kutonga mu Umambo wa Mulungu. Mwakubverana na pidalonga iye thangwi ya nyabasa wakumalisa, iwo adzindikira kuti angakhonda kukhala aphinga, iwo nee anadzakhala na mbuto mu Umambo unoyu.

Mafala a Yezu awangisa anyakupfundza akukhulupirika toera kuwangisira kakamwe. Iye amalisa na kulonga: “Ine ndinakupangani kuti munthu onsene ali na cinthu, anadzapaswa pizinji, mbwenye ule adasowa cinthu, anadzapokoserwa ciri na iye.” Alongambo kuti anyamalwa ace, akuti nee asafuna kuti iye ‘akhale mambo wawo,’ anadzaphiwa. Natenepa Yezu apitiriza na ulendo wace wakuenda ku Yerusalemu.—Luka 19:26-28.