Yezu na anyakupfundzace abuluka mu cisa ca Pereya mbakaenda ku Yerusalemu. Cifupi na kufika ulendo wawo, awambuka Nkulo wa Yordani wakuti ukhali dhuzi na nzinda wa Yeriko. Anthu anango aendambo na iwo toera kucita Paskwa ya 33 N.W.

Yezu akhali kutsogolo kwa anyakupfundza thangwi akhafuna kufika nakweru ku Paskwa. Mbwenye anyakupfundza akhagopa. Paulendo unango nduli, pidafa Lazaro, pikhafuna kubuluka Yezu ku Pereya toera kuenda ku Yudeya, Tomasi apanga anyakupfundza anango: “Tendenimbo, toera tife pabodzi na Yezu.” (Juwau 11:16, 47-53) Natenepa, kuenda ku Yerusalemu mbipidaikha umaso wawo pangozwi, ndi thangwi yace anyakupfundza akhagopa.

Toera kuakhunganya thangwi ya pinthu pikhafuna kucitika ntsogolo, Yezu aenda pakhundu na apostolo ace mbaapanga: “Ife tiri kuenda ku Yerusalemu, kweneko Mwana wa munthu anadzaperekwa kuna akulu a anyantsembe na apfundzisi a mwambo. Iwo anadzatonga kuti iye aphiwe, pontho iwo anadzampereka kuna anthu a madzindza anango toera ansingirire, ankwapule na kumupha pamuti; mbwenye pa ntsiku yacitatu iye anadzalamuswa muli akufa.”—Mateu 20:18, 19.

Unoyu ukhali ulendo wacitatu wakuti Yezu akhapanga anyakupfundzace pya kufa na kulamuswa kwace muli akufa. (Mateu 16:21; 17:22, 23) Mbwenye, paulendo unoyu iye alonga kuti anadzaphiwa pa muti. Anyakupfundza akhambvesera, mbwenye nee akhabvesesa pikhalonga iye. Panango iwo akhanyerezera kuti umambo wa Izraeli mbudabwezereswa pontho pa dziko yapantsi thangwi akhafuna kukhala na mbiri na cilemedzo pabodzi na Kristu mu umambo wa pa dziko yapantsi.

Mai wa mpostolo Tiyago na Juwau, wakuti panango ndi Salome akhalipombo paulendo unoyu. Yezu akhadapasa apostolo anewa dzina yakuti  isabveka “ana a njazi” thangwi ya makhaliro awo akuipirwa mwakucimbiza. (Marko 3:17; Luka 9:54) Mu ndzidzi uzinji, iwo akhafuna kakamwe kukhala na cidzo mu Umambo wa Kristu. Mai wawo akhadziwa pyenepi. Natenepa iye afendedzera Yezu, agodama mbaphemba pinthu mu dzina ya anace. Yezu abvundza: “Usafunanji?” Iye alonga: “Ndisaphemba kuti ananga awiri awa akhale na imwe mu Umambo wanu, m’bodzi kunkono wanu wamadyo unango kunkono wanu wabzwere.”—Mateu 20:20, 21.

Mwandimomwene, phembo ineyi yabuluka kuna Tiyago na Juwau. Yezu akhadamala kale kulonga kuti mbadapaswa manyadzo pontho mbadapwazwa. Ndi thangwi yace iye aapanga: “Imwe nkhabe dziwa pinaphemba imwe. Kodi imwe munakwanisa kumwera mu ndiko inafuna ine kumwera?” Iwo antawira: “Tinakwanisa.” (Mateu 20:22) Panango iwo nee akhabvesesa kuti pyenepi pikhabvekanji kwa iwo.

Ngakhale tenepo, Yezu aapanga: “Ndimomwene kuti imwe munadzamwera ndiko yanga, mbwenye pyakukhala kunkono wanga wamadyo na wabzwere sine tayu anatonga pyenepi, mbuto zenezi ndi za ale adasankhulwa na Baba wanga.”—Mateu 20:23.

Apostolo anango khumi aipirwa pidadzindikira iwo phembo idacita Tiyago na Juwau. Kodi Tiyago na Juwau ndiwo adatomesa toera apostolo aketesane kuti mbani akhali nkulu pakati pawo? (Luka 9:46-48) Ife nee tisapidziwa, mbwenye phembo ineyi yakumalisa isapangiza kuti apostolo 12 nee aphatisira uphungu wa Yezu unalonga pya kufunika kwa kukhala ninga mwanang’ono. Iwo akhapitiriza kukhala na cifuno cakukhala na cidzo.

Yezu aona kuti pikhali pyakuthema kuaphedza thangwi pyenepi pikhabweresa nkandzo. Iye acemera onsene Khumi na Awiri mbaasandika mwaufuni, mukulonga: “Imwe musadziwa kuti atongi a dziko asatonga anthu ninga munafunira iwo, pontho akulu-akulu awo asaphatisira mphambvu zawo toera kuponderera anthu. Pyenepi nee pisafunika kucitika pakati panu; mbwenye ule anafuna kukhala nkulu pakati panu asafunika kukhala ntumiki wanu, pontho ule anafuna kukhala wakutoma pakati panu asafunika kukhala bitcu wa onsene.”—Marko 10:42-44.

Buluka penepo, Yezu alonga citsandzo cikhafunika iwo kutowezera. Iye alonga: “Mwana wa munthu nee abwera toera kutumikirwa, mbwenye toera kutumikira na kupereka umaso wace ninga ciomboli toera kuombola anthu azinji.” (Mateu 20:28) Yezu akhatumikira anango mu pyaka pitatu. Iye apitiriza kucita pyenepi mpaka kufera anthu! Anyakupfundza akhafunika kutowezera Kristu, mukutumikira anango m’mbuto mwakutumikirwa na kukhala akucepeseka m’mbuto mwakufuna kukhala na cidzo.