Pidamala iye kwene kubatizwa, mbadzati kutoma utumiki wace, Yezu athimbana na nyamalwa wakuti akhafuna kakamwe kupingiza basa yace. Dyabo ayesera kazinji kene Yezu. Mukupita kwa ndzidzi, Yezu alonga thangwi ya nyamalwa unoyu: “Ntongi wa dziko ino ali kubwera. Iye nkhabe mphambvu kuna ine.”—Juwau 14:30.

Mpostolo Juwau aona masomphenya adapangiza pikhafuna kucitikira ‘nyangumi wankulu, nyoka yakale inacemerwa Sathani na Dyabo.’ Nyamalwa unoyu wankulu wa anthu mbadathamangiswa kudzulu, pontho ali na ‘ukali wakugopswa, thangwi asadziwa kuti asala na ndzidzi wakucepa kakamwe.’ (Apokalipse 12:9, 12) Akristu ali na mathangwi adidi toera kukhulupira kuti ali kukhala mu ‘ndzidzi unoyu wakucepa,’ pontho thimize pano ‘nyangumi, nyoka yakale,’ anadzaikhwa n’kaidi mbakhonda kunyengeza pontho anthu nkati mwa utongi wa Yezu wa pyaka 1.000 mu Umambo wa Mulungu.—Apokalipse 20:1, 2.

Kodi pinthu pinadzakhala tani pa dziko yapantsi nkati mwa ndzidzi unoyu? Mbani anafuna kukhala mu dziko ino, pontho m’makhaliro api? Yezu atawira mibvundzo ineyi. Mu nsangani wace wa mabira na mbuzi, iye alonga pinafuna kucitikira anthu akulungama akulandana na mabira akuti asaphedzera abale a Yezu. Iye alongambo pinafuna kucitikira ale anakhonda kucita pyenepi akuti ndi akulandana na mbuzi. Yezu alonga: “Anewa [mbuzi] anadzaona nyatwa ya kufa kwa kwenda na kwenda, mbwenye anthu akulungama [mabira] anadzatambira umaso wakukhonda mala.”—Mateu 25:46.

Pyenepi pisatiphedza kubvesesa pidalonga Yezu kwa phanga akhali n’khundu mwace pamuti wakusikimizira. Yezu nee apikira kumpasa nkhombo zibodzi zene na zidapikira iye apostolo ace akukhulupirika za kutonga pabodzi na iye mu Umambo wakudzulu. M’mbuto mwace, Yezu  apikira kwa nyakudawa wakutcunyuka: “Mwandimomwene ndiri kukupanga lero kuti, unadzakhala na ine m’Paraizu.” (Luka 23:43) Natenepa, pidatambira mamuna unoyu ndi cidikhiro cakukhala maso m’Paraizu, munda wakubalika. Mwandimomwene, anthu akuti ndi akulandana na mabira lero, akuti ‘asafuna umaso wakukhonda mala,’ anadzakhala m’Paraizu.

Pyenepi pisabverana na pidalonga mpostolo Juwau pakufokotoza kuti umaso unadzakhala tani pa dziko yapantsi. Iye alonga: ‘Maramada a Mulungu ali pakati pa anthu. Mulungu anadzakhala pabodzi na anthu. Anthumbo anadzakhala mbumba ya Mulungu. Iye ene Mulungu anadzakhala pabodzi na anthu, mbapukuta misozi yonsene m’maso mwawo. Nee kunadzaonekabve kufa, nee kutsukwala, nee kulira, nee nyatwa, thangwi pyakale pyamala.’—Apokalipse 21:3, 4.

Toera phanga ineyi itsandzaye na umaso m’Paraizu, iye asafunika kulamuswa muli akufa. Pontho anafuna kudzalamuswa nee ndiye basi. Yezu apangiza pyenepi pidalonga iye kuti: ‘Lekani kudzumatirwa na pyenepi, thangwi unadzafika ndzidzi wakuti munthu onsene ali munthumbi zakukumbukirwa anadzabva fala yace, mbabuluka. Ale adacita pinthu pyadidi anadzalamuka toera kukhala na umaso, ale adacita pinthu pyakuipa anadzalamuka toera kutongwa.’—Juwau 5:28, 29.

Mphapo ndiye tani apostolo akukhulupirika na anthu anango akucepa anafuna kudzakhala pabodzi na Yezu kudzulu? Bhibhlya isalonga: ‘Iwo anadzakhala anyantsembe a Mulungu na a Kristu, mbadzatonga pabodzi na iye mu pyaka cikwi.’ (Apokalipse 20:6) Anthu anewa anafuna kudzatonga na Yezu ndi amuna na akazi a pa dziko yapantsi. Natenepa, iwo anadzabvera ntsisi anthu anafuna iwo kudzatonga pa dziko yapantsi na kubvesesa makhaliro awo.—Apokalipse 5:10.

Yezu anadzaphatisira ciomboli cidapereka iye kwa anthu pa dziko yapantsi toera kuasudzula m’madawo. Iye na ale anafuna kudzatonga na iye anadzacitisa anthu kukhala aungwiro. Natenepa anthu anadzatsandzaya na umaso ukhafuna Mulungu kuti Adhamu na Eva akhale nawo mu ndzidzi udalonga iye kuti mubalane na kudzadza dziko yapantsi. Pontho kufa kunaoneka lero thangwi ya madawo a Adhamu nkhabe kudzaonekabve.

Pyenepi pingacitika pinapangiza kuti Yezu amalisa basa yonsene idapaswa iye na Yahova. Pyaka cikwi pya utongi wace pingamala, Yezu anadzapereka Umambo na banja ya anthu aungwiro kuna Baba wace. Thangwi ya cipangizo ceneci cakucepeseka kakamwe kwa Yezu, mpostolo Paulu alemba: ‘Pyonsene pingadzakhala pantsi pace, natenepa iye ene Mwana, anadzakhalambo pantsi pa Ule adacitisa kuti pinthu pyonsene pikhale pantsi pa Mwana toera Mulungu akhale pyonsene kuna onsene.’—1 Akorinto 15:28.

Pyenepi pisapangiza pakweca kuti Yezu ali na basa yakufunika kakamwe mu cifuniro ca Yahova. Mu ndzidzi unakwanirisika pinafuna Mulungu kwenda na kwenda, mafala adalonga Yezu anadzakhaladi andimomwene akuti: “Ine ndine njira, undimomwene na umaso.”—Juwau 14:6.