“Imwe Nyakubva phembero, anthu a mitundu yonsene anadzabwera kuna imwe.”—Masalmo 65:2.

Anthu anango asalonga kuti angacita phembero pisaaphedza kakamwe maseze akhulupire kuti nkhabepo anaabvesera. Mbwenye ife nee tisacita phembero basi ene toera kupibva mwadidi, mbatipirira nyatwa zathu. Bhibhlya isalonga kuti “Yahova a ali dhuzi na onsene anancemera, onsene anancemera mwakubverana na undimomwene. . . . Iye asabva n’khuwo wawo wakuphemba ciphedzo.”—Masalmo 145:18, 19.

Natenepa, tinakwanisa kukhala na cinyindiro cakuti Yahova Mulungu asabvesera maphembero a atumiki ace. Mwaufuni iye asatipanga: “Imwe munadzandicemera mbamubwera mpaka kuna ine mu phembero, pontho ine ndinadzakubveserani.”—Yeremiya 29:12.

“Pitirizani kucita phembero.”—Aroma 12:12.

Bhibhlya isatiwangisa toera ‘tipitirize kucita phembero ndzidzi onsene.’ Mwandimomwene, Yahova Mulungu asafuna kuti anthu acite phembero kuna iye.—Mateu 26:41; Aefesi 6:18.

Thangwi yanji Mulungu asafuna kuti ife ticite phembero kuna iye? Nyerezerani basi: Baba asatsandzaya kakamwe mwanace angam’phemba ciphedzo. Ndimomwene kuti baba midzidzi inango asadziwa kale pinafuna mwana; mbwenye baba angabva mwanace mbakaphemba ciphedzo, baba asapibva kuti mwanace asan’nyindira, pontho asanfuna. Munjira ibodzi ene, tingacita phembero kuna Yahova Mulungu, tisapangiza kuti tisan’nyindira, pontho tisafuna kukhala xamwali wace.—Misangani 15:8; Tiyago 4:8.

‘Tulani kuna Yahova pinthu pyonsene pinakudzudzumisani, thangwi iye asakutsalakanani.’ —1 Pedhru 5:7.

Mulungu asafuna kuti ticite phembero kuna iye thangwi asatifuna, pontho asatitsalakana. Iye asadzudzumikambo na nyatwa zathu, pontho asafuna kutiphedza.

Mu umaso wace onsene, Mambo Dhavidhi aphemba ciphedzo ca Yahova kubulukira m’phembero mbampanga pinthu pyonsene pikhan’dzudzumisa. (Masalmo 23:1-6) Mulungu akhaona tani Dhavidhi? Iye akhafuna Dhavidhi, pontho akhabvesera maphembero ace mazinji. (Mabasa 13:22) Munjira ibodzi ene, Mulungu asabvesera maphembero athu thangwi asatitsalakana.

Anewa ndi mafala adalembwa na nyamasalmo m’bodzi. Iye akhadziwa kuti Mulungu akhabvesera maphembero ace, pontho pyenepi pikham’phedza kakamwe. Pikhancitisa kupibva kuti ali cifupi na Mulungu, pontho pikham’phedza toera kupirira nyatwa zikhatamba iye.—Masalmo 116:1-9.

Tingakhala na cinyindiro cakuti Mulungu asabvesera maphembero athu, ife tinapitiriza kucita phembero kuna iye. Onani pidacitikira Pedro anakhala ku norti kwa Espanya. Iye aferwa na mwanace wamamuna wa pyaka 19 thangwi ya cidengwa. Pedro atsukwala kakamwe, apanga Mulungu pyonsene pikhan’dzudzumisa, pontho acita phembero kazinji kene toera kuphemba ciphedzo na cibalangazo. Mphapo ninji pidacitika? Pedro alonga: “Yahova aphatisira abale na alongo toera kutawira maphembero anga; iwo atiphedza, pontho abalangaza ine na nkazanga.”

Maseze kucita phembero nee mbakudalamusa mwanace muli akufa, mbwenye phembero yaphedza kakamwe Pedro na banja yace. María Carmen wakuti ndi nkazace alonga: “Phembero yandiphedza toera kupirira kubva kupha kwanga. Ndikhadziwa kuti Yahova Mulungu akhandibvesera thangwi pikhacita ine phembero kuna iye ndikhali wakukhurudzika, pontho ndikhali na ntendere.”

Bhibhlya na pitsandzo pya anthu anango pisapangiza kuti Yahova asabvesera maphembero. Mbwenye pana maphembero anango akuti Mulungu nee asaatawira. Mphapo thangwi yanji Mulungu asatawira maphembero a anthu anango mbwenye a anango nkhabe?