Pinanyerezera Anthu Anango Thangwi ya Phembero
“Ndingacita phembero, ndisapibva ninga Mulungu ali pa khundu panga, ali kuphata djanja yanga mbanditsogolera ndingatayika.”—MARÍA.
“Nkazanga amala pyaka 13 mbakathabuka na utenda wa cancro. Buluka penepo, iye afa. Ndisakumbuka kuti mu ndzidzi unoyu ine ndikhacita phembero ntsiku zonsene kuna Mulungu; ndikhaona kuti iye akhandibvesera mwadidi, pontho akhabvesesa nyatwa zanga. Natenepa, pyenepi pikhandipasa ntendere.”—RAÚL.
“Phembero ndi muoni wakufunika kakamwe udapereka Mulungu kuna anthu.”—ARNE.
María, Raúl, Arne, na anthu anango azinji, asaona kuti phembero ndi muoni wakufunika. Kubulukira m’phembero, iwo asaona kuti anakwanisa kulonga na Mulungu, kupereka takhuta kuna iye na kuphemba ciphedzo cace. Iwo asakhulupira na ntima onsene kuti pinalonga Bhibhlya thangwi yakucita phembero ndi pyandimomwene. Iyo isalonga: “Ici ndi cinyindiro ciri na ife kuna [Mulungu], tingaphemba cinthu mwakubverana na pinafuna iye, iye asatibvesera.”—1 Juwau 5:14.
Mbwenye kuna anango, ndi pyakunentsa kukhulupira pinapfundzisa Bhibhlya thangwi yakucita phembero kuna Mulungu. Steve alonga pikhanyerezera iye thangwi yakucita phembero: “Pikhali ine na pyaka 17, ndaluza axamwali anga atatu. M’bodzi afa na cidengwa ca karu, awiri afa m’madzi m’bara.” Kodi Steve acitanji? Iye alonga: “Ndacita phembero kuna Mulungu toera kudziwa kuti thangwi yanji pyenepi pyacitika, mbwenye iye nee anditawira. Natenepa ndabvundzika: ‘Thangwi yanji ndisafunika kucita phembero?’” Ninga Steve, azinji asaonambo kuti maphembero awo nee asatawirwa, na thangwi ineyi, iwo asabvundzika khala ndi pyathema kucita phembero peno nkhabe.
Mbwenye pali na mathangwi anango anacitisa anthu kuona kuti phembero nkhabe phedza. Anango asanyerezera: Nakuti Mulungu asadziwa pinthu pyonsene, ife nee tisafunika kucita phembero toera kumpanga nyatwa zathu peno kum’phemba cinthu.
Anangombo asanyerezera kuti Mulungu asakhonda kubvesera maphembero awo thangwi ya madodo adacita iwo nduli. Jenny alonga: “Ine ndisatsukwala kakamwe, pontho ndisatsumbikika thangwi ya pinthu pizinji pyakuipa pidacita ine. Na thangwi ineyi, ine ndisapibva kuti nee ndathema kubveserwa na Mulungu.”
Mphapo imwe musanyerezeranji thangwi yakucita phembero? Khala imwe mwapibvambo ninga anthu anewa, munakomerwa kudziwa pinalonga Bhibhlya thangwi yakucita phembero. Ife tinakwanisa kunyindira pinalonga Bhibhlya, a thangwi iyo inakwanisa kutiphedza toera kugumana mitawiro ya mibvundzo yakusiyana-siyana ninga iyi:
-
Kodi Mulungu asabveseradi maphembero athu?
-
Thangwi yanji maphembero anango nee asatawirwa?
-
Ndisafunika kucitanji toera Mulungu abvesere maphembero anga?
-
Phembero inandiphedza tani?
a M’Bhibhlya muli na maphembero mazinji adacitwa na atumiki akukhulupirika a Mulungu, kuphatanizambo a Yezu Kristu. M’malemba Acihebheri akuti asadziwika na Unthaka Wakale musagumanika maphembero akupiringana 150.
