“Pakucita phembero, leka kulonga pinthu pibodzi pyene mwakubwereza-bwereza.”—Mateu 6:7.

Yahova nkhabe funa kuti ticite maphembero adakoya ife mu nsolo peno ticite kualeri m’bukhu ya maphembero. Mbuto mwace, iye asafuna kuti mafala athu abuluke muntima. Imwe mbamudatsukwala khala xamwali wanu, pakulonga na imwe asaphatisira mafala mabodzi ene ndzidzi onsene. Axamwali andimomwene asalonga piri na iwo muntima mwakusudzuka kuna unango na ndzace. Tingacita phembero kuna Mulungu toera kulonga nyatwa zathu mbatiphatisira mafala athu ene, tisapangiza kuti tisafuna kukhala axamwali ace.

“Mungaphemba, nee musapaswa pinthu thangwi musaphemba na cifuniro cakuipa.”—Tiyago 4:3.

Nee tisafunika kudikhira kuti Mulungu atawire maphembero athu, khala tisaphemba pinthu pyakuti iye nee asakomerwa napyo. Mwacitsandzo, Bhibhlya isalonga pakweca kuti Yahova nkhabe kukomerwa na anthu anafuna pyonsene, pontho iye nee asafuna kuti tikhulupire mizimu. Mphapo munthu anagwa cabutha, mbaphemba kuti Yahova am’phedze toera awine, iye anatawira phembero ineyi? (Izaiya 65:11; Luka 12:15) Pisaonekeratu kuti nkhabe. Toera Mulungu atawire maphembero athu, tisafunika kuacita mwakubverana na pinalonga Bhibhlya.

 “Munthu wakuti asakhonda kubvera mwambo, maphembero ace ndi akunyanyasa.”—Misangani 28:9.

Mu ndzidzi wakale, Mulungu nee akhatawira maphembero a anthu akuti nee akhabvera mitemo yace yakulungama. (Izaiya 1:15, 16) Mulungu nee acinja. (Malakiya 3:6) Khala tisafuna kuti Mulungu atawire maphembero athu, tisafunika kuwangisira toera kubvera mitemo yace. Mphapo ndiye tani khala tikhadacita pinthu pyakuipa nduli? Kodi pyenepi pisabveka kuti Yahova nee anabveserabve maphembero athu? Nkhabe. Mulungu anatilekerera tingasiya kucita pinthu pyakuipa, mbatiwangisira toera kucita pinthu pyadidi.—Mabasa 3:19.