DANIEL NA MIRIAM amanga banja mwezi wa Nyendzi wa caka 2000, pontho iwo akhali na umaso wadidi kakamwe ku Barcelona, Espanya. Daniel alonga: “Basa yathu ikhatipasa mwai wakudya m’marestauranti adidi, kuenda madziko anango na kubvala nguwo zadidi kakamwe. Ife tikhamwazambo mphangwa mwakukhonda phonya.” Mbwenye mukupita kwa ndzidzi pinthu pyacinja.

Pa nsonkhano wa gawo mu caka 2006, Daniel abva nkhani ya mbvundzo wakuti: ‘Kodi tisacita pyonsene pinakwanisa ife toera kuphedza ale ‘anakwekwetiwa kuenda kathabuswa’ toera apite munjira ya ku umaso wakukhonda mala?’ (Misangani 24:11) Nkhani ineyi yafokotoza kuti ife tiri na basa yakumwaza mphangwa za Bhibhlya, thangwi anthu asanyindira mphangwa zenezi toera kupulumuka. (Machitiro 20:26, 27) Daniel asakumbuka: “Ndikhapibva ninga Yahova akulonga na ine.” Nkhani yafokotozambo kuti tisatsandzaya tingacita pizinji m’basa ya Yahova. Iye adzindikira kuti unoyu ukhali undimomwene thangwi Miriam akhali wakutsandzaya kakamwe pidatoma iye kutumikira ninga mpainiya.

Nkhani ineyi yakhuya kakamwe Daniel mbaona kuti unoyu ukhali ndzidzi wakucita macinjo makulu mu umaso wace. Iye atoma kuphata basa midzidzi yakucepa, atoma upainiya, pontho anyerezera kutsandzaya kukhafuna kukhala na iye na Miriam thangwi yakutumikira mbuto yakuti iri na kufuna kukulu kwa amwazi mphangwa a Umambo.

Mwezi wa Gonkho wa caka 2007, Daniel na Miriam asiya mabasa awo mbaenda ku Panamá, dziko ikhadziwa iwo kale. Cisa cawo cikhali na ntsuwa zizinji kakamwe mu Arquipélago Bocas del Toro ku Bara ya Karibe. Anthu azinji anakhala kweneku ndi a Guaymi. Daniel na Miriam akhanyerezera kuti mbadakhala ku Panamá basi ene miyezi misere thangwi ya kobiri ikhali na iwo.

Iwo akhafamba ntsuwa zenezi mukuphatisira bote na njinga. Asakumbuka ulendo wakutoma udacita iwo na njinga nsindzo wa makilometru 30 mbakakwira mapiri mu ndzidzi wakupisa kakamwe. Daniel akhafuna kukomoka thangwi ya kuneta. Mbwenye mabanja a Guaymi adagumana iwo akhali anthu akutambira alendo, makamaka pidadziwa Daniel na Miriam cilongero capacisa. Mwakukhonda dembuka iwo akhala na mapfundziro a Bhibhlya akukwana 23.

Ninji pidacitika pidamala kobiri yawo? Daniel alonga: “Tatoma kutsukwala kakamwe, mbitinyerezera kubwerera ku Espanya. Tanyerezerambo kuti tinasiya anyakupfundza athu a Bhibhlya.” Mbwenye pidamala mwezi ubodzi, iwo atambira mphangwa zakutsandzayisa. Miriam alonga: “Taphembwa toera kutumikira ninga apainiya akupambulika. Pikhali pyakutsandzayisa kakamwe kupitiriza m’basa yathu!”

Thangwi ya macinjo anaoneka mu gulu, Daniel na Miriam alimira kutumikira ninga apainiya akupambulika mu caka 2015. Kodi iwo acitanji? Iwo anyindira pikiro inagumanika pa Masalmo 37:5: ‘Ikha umaso wako m’manja mwa Yahova; khulupira iye, pontho iye anadzakuphedza.’ Iwo agumana basa yakuti isaaphedza mu ndzidzi unatumikira iwo ninga apainiya, pontho cincino asatumikira mu mpingo wa ku Veraguas, Panamá.

Daniel alonga: “Pidabuluka ife ku Espanya, nee tikhapidziwa khala mbatidakwanisa kukhala na umaso wakukhonda funa pizinji. Lero tisakwanisa, pontho nee tisasowa cinthu cakufunika kakamwe.” Ninji pinaacitisa kukhala akutsandzaya kakamwe? Iwo alonga: “Kuphedza anthu akucepeseka toera kudziwa Yahova ndi pyakutsandzayisa kakamwe kupiringana pyonsene!”