1, 2. Kodi Pedhru apfundzanji pidamala iye kuphuphudza na kusodza?

ANYAKUPFUNDZA anomwe a Yezu aphuphudza masiku amumphu toera kupha ntsomba m’Bara ya Galileya. Mbwenye nee ntsomba ibodzi idapha iwo. Pakuca kunja Yezu alimira pagombe, mbakaayang’ana. Buluka penepo, iye aapanga: ‘Ponyani kokota kukhundu ya nkono wamadyo wa mwadiya, munadzapha ntsomba. Natenepa iwo aiponya mbacimwana kuikwewa thangwi yakunjipa kwa ntsomba.’—Jwau 21:1-6.

² Yezu apasa anyakupfundzace nkate na ntsomba toera adye cakudya camacibese. Buluka penepo iye ayang’ana Simau Pedhru mbambvundza: ‘Simau mwana wa Jwau, usandifuna kakamwe kupiringana ntsomba izi?’ Yezu akhadziwa kuti Pedhru akhafuna ntsomba. Na thangwi ineyi Yezu abvundza Pedhru khala akhafuna Yezu na pikhapfundzisa iye kupiringana malonda ace akugulisa ntsomba. Pedhru atawira Yezu: ‘Mbuya, musadziwa kuti ine ndisakufunani kakamwe.’ (Jwau 21:15) Kutomera ntsiku ineyi, Pedhru adzindikira kuti  Yezu akhafuna kulonganji. Iye apangiza ufuni wace kuna Kristu mukupitiriza m’basa yakumwaza mphangwa, mbadzakhala wakufunika kakamwe mu mpingo Wacikristu.

3. Thangwi yanji Akristu asafunika kucita mphole-mphole?

³ Tisapfundzanji kubulukira m’mafala adalonga Yezu kuna Pedhru? Tisafunika kucita mphole-mphole toera ufuni wathu kuna Kristu ukhonde kufewa. Yezu akhadziwa kuti umaso m’makhaliro ano a pinthu mbudakhala wakunentsa, pontho mbatidathimbana na pinentso pizinji. Mu nsangani wace wa nyakubzwala, Yezu alonga kuti anthu anango mbadatawira ‘mphangwa za Umambo’ mbakhala aphinga pakutoma. Mbwenye mukupita kwa ndzidzi, thangwi ‘yakunyerezera kakamwe pinthu pyapantsi pano na pyampfuma,’ mafala a Mulungu nee mbadakhalabve na mphambvu kwa iwo, pontho mbadaluza phinga yawo. (Mateo 13:19-22; Marko 4:19) Tingakhonda kucita mphole-mphole, pinentso pya ntsiku na ntsiku pinapingiza basa yathu yakutumikira Yahova. Natenepa Yezu acenjeza anyakupfundzace: ‘Cenjerani, gopa mitima yanu inadzafewa na kudyesa, kuledzera na kutsamali pya umaso uno.’—Luka 21:34.

4. Ninji pinafuna kutiphedza toera kudziwa khala ufuni wathu kuna Kristu ndi wakuwanga? (Onani cithundzithundzi cakutoma.)

⁴ Ninga Pedhru, ife tinapangiza kuti tisafuna Kristu mukuikha basa yakumwaza mphangwa pa mbuto yakutoma mu umaso wathu. Tinakhala tani na cinyindiro cakuti tinapitiriza kucita basa ineyi? Tinakwanisa kubvundzika: ‘Ndi cinthu cipi cinakomerwa na ine kakamwe mu umaso? Ndisatsandzaya thangwi yakutumikira Yahova peno mabasa anango?’ Toera kugumana matawiro a mibvundzo ineyi, tendeni tidinge makhundu matatu akuti anafewesa ufuni wathu kuna Kristu. Makhundu anewa ndi basa yakudziko, ubalangazi na pinthu pyakumanungo.

5. Ndi basa ipi idapaswa misolo ya mabanja?

⁵ Basa yakumedza nee cikhali cinthu cakutsandzayisa kwa Pedhru. Basi ene akhacita basa ineyi toera kutsalakana banjace. Lero, Yahova apasambo misolo ya mabanja basa yakutsalakana mabanja awo. (1 Timoti 5:8) Iwo asafunika kuwangisira kakamwe toera kucita pyenepi. Mbwenye ntsiku zino zakumalisa, basa yakudziko inakwanisa kudzudzumisa kakamwe.

6. Thangwi yanji mabasa akudziko ndi akunentsa kakamwe?

⁶ Pana anthu azinji akuti asafuna mabasa, mbwenye mabasa ndi akucepa kakamwe. Na thangwi ineyi, anthu asacita mapika toera kugumana basa. Azinji asatawira kuphata basa ndzidzi uzinji, maseze atambire kobiri yakucepa. Makomponi asayesera kucita pinthu pizinji pyadidi mukuphatisira anyabasa akucepa. Natenepa, anyabasa asakhala akuipirwa, akuneta ngakhale kuphatwa na utenda. Azinji asagopa kuluza basa yawo mbawangisira kucita pyonsene pinapangwa iwo na patrau wawo.

7, 8. (a) Kodi tisafunika kukhala akukhulupirika kuna ani? (b) Kodi m’bale wa ku Tailândia apfundzanji thangwi ya basa yace?

⁷ Ninga Akristu, tisakhala akukhulupirika  kwa Yahova kupiringana pyonsene, kuphatanizambo patrau wathu. (Luka 10:27) Basa yathu yakudziko ndi njira toera kutsalakana pyakufuna pyathu na kuphedzera utumiki wathu. Mbwenye tingakhonda kucita mphole-mphole, basa ineyi inakwanisa kupingiza ulambiri wathu. Ife tinakwanisa kupfundza kubulukira ku citsandzo ca m’bale wa ku Tailândia. Iye alonga: “Basa yanga yakudziko yakusasanyira mitcini ya ndzeru ikhali basa yakufunika kakamwe kwa ine, mbwenye ikhaphemba ndzidzi uzinji. Natenepa, ikhandipingiza toera kucita pinthu pyauzimu. Mukupita kwa ndzidzi ndadzindikira kuti toera kuikha Umambo pa mbuto yakutoma, ndikhafunika kucinja basa yanga.” Kodi m’bale unoyu acitanji?

⁸ Iye afokotoza: “Pakumala kusasanyira pifuno pyanga caka cibodzi, ndatonga kuphata basa yakugulisa sorvete mu nseu. Pakutoma, ndikhatsukwala thangwi nee ndikhagumana kobiri yakukwana. Ndingagumanikana na andzanga akhaphata na ine basa, akhandiseka mbandibvundza kuti thangwi yanji usanyerezera kuti kugulisa sorvete ndi kwadidi kupiringana basa ikhaphata iwe yakusasanyira mitcini ya ndzeru pa nthundzi. Ndaphembera kuna Yahova, toera andiphedze kuthimbana na nkandzo unoyu na kukwanirisa mabasa anga auzimu. Mukupita kwa ndzidzi, pinthu pyatoma kufamba mwadidi. Ndadzolowera basa yanga mbandikhala na maluso akucita mwadidi sorvete. Mukupita kwa ndzidzi, ndikhagulisa sorvete wanga onsene ntsiku ibodzi. Cincino, ndiri na kobiri yakukwana kupiringana ndzidzi ukhasasanyira ine mitcini ya ndzeru. Pyenepi pyandicitisa kukhala wakutsandzaya kakamwe thangwi nee ndisadzudzumika ninga pikhacita ine na basa ikhaphata ine. Kusiyapo pyenepi, cincino ndisapibva kuti ndiri cifupi na Yahova.”—Lerini Mateo 5:3, 6.

9. Tinapitiriza tani kukhala na maonero akulinganira thangwi ya basa yakudziko?

⁹ Yahova asapasa ntengo tingaphata basa mwakuwanga. Basa yakuwanga ndi nkhombo. (Misangani 12:14) Mbwenye tisafunika kukhala na cinyindiro cakuti basa yakudziko nee ikukhala yakufunika kakamwe kwa ife kupiringana kutumikira kwathu Yahova. Yezu alonga: ‘Pitirizani kusaka Umambo na ulungami wace, pinango pyonsene munadzapibayirwa.’ (Mateo 6:33) Mphapo tinadziwa tani kuti tiri na maonero akulinganira thangwi ya basa yakudziko? Tinakwanisa kubvundzika: ‘Kodi ndisaona basa yanga ninga yakufunika kakamwe na yakutsandzayisa, mbindiona kutumikira kwanga Mulungu ninga cinthu cakukhonda funika peno cakunetesa?’ Kunyerezera mbvundzo unoyu kunatiphedza toera kuona kuti ndi pinthu pipi pisafuna ife kakamwe.

10. Ndi ntsonga ipi yakufunika kakamwe idapfundzisa Yezu?

¹⁰ Yezu atipfundzisa kuti ndi pinthu pipi pisafunika kuikhwa pa mbuto yakutoma mu umaso wathu. Ntsiku inango, iye aenda kaona alongo awiri, Mariya na Marta. Mu ndzidzi unoyu, Marta atoma kukhunganyira cakudya Yezu, mbwenye Mariya akhala  cifupi na Yezu mbabvesera pikhapfundzisa iye. Marta adungunya kuti Mariya nee akhamphedza. Yezu apanga Marta: ‘Mariya asankhula cinthu cadidi kakamwe, pontho nee anadzacipokoserwa.’ (Luka 10:38-42) Natenepa, Yezu apfundzisa ntsonga yakufunika kakamwe. Toera kukhonda kudzudzumika na pifuno pyathu na kupangiza ufuni wathu kuna Kristu, tisafunika kusankhula ‘cinthu cadidi kakamwe.’ Pyenepi pisabveka kuti ndzidzi onsene uxamwali wathu na Yahova usafunika kukhala cinthu cakufunika kakamwe mu umaso wathu.

11. Kodi Bhibhlya isalonganji thangwi yakupuma?

¹¹ Nakuti umaso wathu ndi wakunentsa kakamwe, midzidzi inango tisafunika kupuma. Bhibhlya isalonga: ‘Kusekera kwa munthu ndi kudya na kumwa mbatsandzaya na basa yace yakuwanga.’ (Koelete 2:24) Yezu akhadziwa kuti pikhali pyakufunika kwa anyakupfundzace kupuma. Mwacitsandzo, pakumala kucita basa yakuwanga yakumwaza mphangwa, Yezu aapanga: ‘Bwerani kuno, tiende pathu tekha toera mukapume pang’ono.’—Marko 6:31, 32.

12. Thangwi yanji tisafunika kucita mphole-mphole na ubalangazi peno masendzekero? Perekani citsandzo.

¹² Ubalangazi peno masendzekero pinakwanisa kutiphedza toera kupuma. Mbwenye tisafunika kucita mphole-mphole kuti pyenepi pikhonde kukhala pyakufunika kakamwe mu umaso wathu. Mu ndzidzi wa apostolo, azinji akhali na maonero anewa: ‘Tendeni tidye na kumwa, thangwi mangwana tinafa.’ (1 Akorinto 15:32) Anthu azinji lero ali na maonero mabodzi ene. Mwacitsandzo, m’phale unango wa ku Europa wakumadokero dzuwa atoma kusonkhana na Mboni za Yahova. Mbwenye iye akhakomerwa kakamwe na ubalangazi mpaka kusiya kusonkhana na Mboni za Yahova. Mukupita kwa ndzidzi, iye adzindikira kuti kufuna kakamwe ubalangazi kukhambweresera nyatwa zizinji. Iye atoma pontho kupfundza Bhibhlya na mukupita kwa ndzidzi, atoma basa yakumwaza mphangwa zadidi. Pakumala kubatizwa, iye alonga: “Ndisatsumbikika thangwi ndamala ndzidzi uzinji toera kudzindikira kuti kutumikira Yahova kusatsandzayisa kakamwe kupiringana ubalangazi unapereka dziko ino.”

13. (a) Perekani citsandzo cinapangiza kuti kumala ndzidzi uzinji na ubalangazi nee ndi pyadidi. (b) Ninji pinafuna kutiphedza toera kukhala na maonero akulinganira thangwi ya ubalangazi peno masendzekero?

¹³ Ubalangazi usatiphedza toera kupuma mbitikhala na mphambvu zipswa. Mphapo tisafunika kumala ndzidzi ungasi na ubalangazi? Toera kutawira mbvundzo unoyu, tisafunika kunyerezera tenepa. Anthu azinji asakomerwa na kudya mabholo na masuwiti. Mbwenye ife tisadziwa kuti tingadya pinthu pyenepi ndzidzi onsene, tinaduwala napyo. Khala tisafuna ungumi wadidi, tisafunika kudya cakudya cakuti ndi cadidi kwa ife. Munjira ibodzi ene, tingamala ndzidzi uzinji na ubalangazi peno masendzekero, pinaphekesa uxamwali wathu na Yahova. Ninji pinafuna kutiphedza toera kudziwa kuti tiri na maonero akulinganira thangwi ya ubalangazi peno nkhabe? Cinthu cibodzi ndi kulemba midzidzi inaphatisira ife pasumana m’basa ya Yahova, ninga kugumanika pa misonkhano, basa yakumwaza mphangwa na kupfundza Bhibhlya. Buluka penepo tisafunika kulembambo midzidzi inabvunga ife na ubalangazi peno masendzekero, ninga kuona maprogramu a televizau, peno mavidyu game. Tingalandanisa midzidzi ineyi, tinaphedzeka toera kuona khala tisafunika kucita  macinjo peno nkhabe.—Lerini Aefesi 5:15, 16.

14. Ninji cinafuna kutiphedza toera kusankhula ubalangazi peno masendzekero adidi?

¹⁴ Yahova asatitawirisa kusankhula ubalangazi, pontho misolo ya mabanja inakwanisambo kusankhula ubalangazi kwa mabanjawo. M’Bhibhlya, Yahova atipasa midida inapangiza kuti iye asaona tani ubalangazi. Midida ineyi isatiphedza pakucita pisankhulo pyadidi. * (Onani cidzindikiro capantsi.) Ubalangazi wadidi ndi ‘muoni wa Mulungu.’ (Koelete 3:12, 13) Ndimomwene kuti anthu akusiyana asakomerwa na ubalangazi wakusiyana. (Agalata 6:4, 5) Mbwenye mwakukhonda tsalakana ubalangazi unasankhula ife, tisafunika kucita gaxugaxu. Yezu alonga: “Kunakhala mpfuma yako ndi kunakhala ntima wako.” (Mateo 6:21) Ufuni wathu kuna Mambo Yezu, unatikulumiza toera kunyerezera, kulonga na kucita pinthu munjira inapangiza kuti Umambo ndi wakufunika kakamwe kwa ife kupiringana cinthu consene.—Afilipi 1:9, 10.

15, 16. (a) Kodi mpfuma inakwanisa tani kukhala nsampha kwa ife? (b) Ndi uphungu upi wandzeru udapereka Yezu thangwi ya pinthu pyakumanungo?

¹⁵ Anthu azinji lero asapibva kuti asafunika kukhala na nguwo zipswa, mitokodzi, mitcini ya ndzeru na pinthu pinango. Iwo asaona kuti kukhala na mpfuma, kobiri ndi pinthu pyakufunika kakamwe kupiringana pyonsene. Ninga Nkristu, ndi cinthu cipi cakufunika kakamwe kwa imwe? Bvundzikani: ‘Ndisamala  ndzidzi uzinji mbindinyerezera kukhala na motokala upswa m’mbuto mwa kukhunganyika misonkhano ya mpingo? Kodi ndisaphatika na mabasa akudziko ntsiku yamumphu mbandisowa ndzidzi wakucita phembero na kuleri Bhibhlya?’ Tingakhonda kucita gaxugaxu, tinatoma kufuna kakamwe pinthu pyakumanungo kupiringana kufuna Kristu. Tisafunika kukumbuka mafala a Yezu: ‘Cenjerani mbamuleka kusirira upfumi.’ (Luka 12:15) Thangwi yanji iye alonga pyenepi?

¹⁶ Yezu alonga kuti ‘nkhabepo munthu anakwanisa kuphatira basa ambuya awiri.’ Iye athimiza: ‘Imwe nkhabe kwanisa kutumikira Mulungu na Mpfuma.’ Nkhabe kwanisika kutumikira Yahova na ntima onsene, mu ndzidzi ubodzi ene mbitifuna kakamwe pinthu pyakumanungo. Yezu afokotoza kuti ‘tinadzaida m’bodzi mbitifuna unango’ peno ‘tinadzabvera m’bodzi mbitipwaza unango.’ (Mateo 6:24) Nakuti ndife akusowa ungwiro, tisafunika kupitiriza kuthimbana na ‘pinasirira manungo athu,’ kuphatanizambo mpfuma.—Aefesi 2:3.

17. (a) Thangwi yanji anango asacimwana kukhala na maonero akulinganira thangwi ya pinthu pyakumanungo? (b) Ninji pinafuna kutiphedza toera kukunda manyerezero akufuna mpfuma?

¹⁷ Anthu azinji asafuna kakamwe pinasirira iwo na ubalangazi, pinthu pyakuti pisaapingiza toera kukhala na maonero akulinganira thangwi ya pyenepi. (Lerini 1 Akorinto 2:14.) Nakuti iwo nee asanyerezera mwadidi, pisakhala pyakunentsa kwa iwo kusiyanisa cadidi na cakuipa. (Ahebere 5:11-14) Kusirira kwawo pinthu pyakumanungo kusathimizirika kakamwe. Pontho angakwanisa pinafuna iwo, asafuna pinango. (Koelete 5:10) Mbwenye pana cinthu cakuti tinakwanisa kucicita toera kuthimbana na manyerezero anewa. Kuleri Mafala a Mulungu ntsiku zonsene kunadzatiphedza toera kukunda manyerezero akufuna mpfuma. (1 Pedro 2:2) Yezu akhanyerezera mwacidikhodikho udziwisi wa Yahova na pyenepi pyamphedza toera kukunda mayesero a Dyabo. (Mateo 4:8-10) Lero, khala tisafunambo kukunda manyerezero akufuna mpfuma, tisafunika kuphatisira udziwisi wa Yahova mu umaso wathu. Pyenepi pinadzapangiza kuti tisafuna kakamwe Yezu kupiringana pinthu pyakumanungo.

18. Kodi muli akutonga toera kucitanji?

¹⁸ Pidabvundza Yezu Pedhru, ‘Usandifuna kakamwe kupiringana ntsomba izi?’ iye akhapfundzisa Pedhru kuti kutumikira Yahova ndi kwakufunika kakamwe mu umaso wace. Ndi pyakudzumatirisa kuti dzina ya Pedhru isabveka, ‘Phindi ya Mwala.’ Makhaliro adidi a Pedhru anakwanisa kulandaniswa na mwala. (Machitiro 4:5-20) Lero, tisafunambo kuti ufuni wathu kuna Kristu ukhale wakuwanga. Natenepa tinakhala na cinyindiro cakuti basa yakudziko, ubalangazi na pinthu pyakumanungo pisafunika kukhala pa mbuto yace mu umaso wathu. Buluka penepo tinadzakhala ninga Pedhru adalonga: ‘Mbuya, musadziwa kuti ine ndisakufunani kakamwe.’