Anthu azinji nkhabe funa kulambira Mulungu thangwi iwo asalonga kuti ndiye anabweresa nyatwa.

Atsogoleri azinji a mauphemberi asapfundzisa mwapakweca kuti ndi Mulungu anacitisa nyatwa zathu. Mwacitsandzo anango asalonga:

• Pidengwa pyacibaliro pisabuluka kuna Mulungu.

• Anapiana asafa thangwi Mulungu asafuna kuthimizira aanju kudzulu.

• Mulungu asaphedzera nkhondo, pyenepi pisabweresa nyatwa zizinji.

Kodi pinapfundzisa atsogoleri a mauphemberi thangwi ya Mulungu mphyandimomwene? Mphapo thangwi yanji Mulungu asakhonda mauphemberi authambi?

Nee ndi Mulungu anacitisa nyatwa zinathimbana na ife.

Thangwi pyenepi mbapidakhala pyakusiyana na makhaliro ace analongwa m’Bhibhlya. Mwacitsandzo:

‘Pyonsene pinacita Mulungu ndi pyakulungama. Iye ndi wadidi na wakulungama.’—DEUTERONOMYO 32:4.

‘Mulungu wandimomwene nkhabe kucita cinthu cakuipa,Wamphambvu Zonsene cipo anacita cinthu cakukhonda kulungama!’—YOBE 34:10.

‘Wamphambvu Zonsene nkhabe kutonga mwakukhonda kulungama.’—YOBE 34:12.

Mulungu asakhonda mauphemberi anapfundzisa pyauthambi thangwi ya iye.

Pyenepi pisaphataniza mauphemberi anapfundzisa kuti ndi Mulungu anacitisa nyatwa na mauphemberi anaphedzera nkhondo na uphanga.

‘Aprofeta asalonga pyauthambi mu dzina ya Mulungu. Ine nee ndaatuma, nee ndaapanga peno kulonga nawo. Masomphenya analonga iwo si anga tayu, mbwenye ndi apezi basi.’—YEREMIYA 14:14.

Yezu alonga pakweca pya umpfakafaka wa mauphemberi.

“Si onsene tayu anandicemera: ‘Mbuya, Mbuya,’ anadzapita mu Umambo wakudzulu, mbwenye basi ene ule anacita pinafuna Babanga wakudzulu. Pa ntsiku ineyi azinji anadzalonga kuna ine: ‘Mbuya, Mbuya, kodi ife nee tikhali aprofeta mu dzina yanu, nee tabulusa madimonyo mbaticita pirengo pizinji mu dzina yanu?’ Mbwenye ine ndinadzaapanga: ‘Ine cipo ndakudziwani!Bulukani pamaso panga, imwe anyakucita pyakuipa!’”—MATEU 7:21-23.