Bhibhlya Ndi Bukhu Yakunyindirika ya Undimomwene
Mu pyaka pizinji, anthu azinji asaona Bhibhlya ninga bukhu yakunyindirika ya undimomwene. Lero, anthu azinji asatowezera pinapfundzisa Bhibhlya. Anango asaona Bhibhlya ninga yakusowa basa peno yauthambi. Ndi api maonero anu? Kodi munakwanisa kugumana undimomwene m’Bhibhlya?
THANGWI YANJI MUSAFUNIKA KUNYINDIRA BHIBHLYA
Munadziwa tani khala Bhibhlya yathema kunyindirwa? Mwacitsandzo: Xamwali wanu wakuti ndzidzi onsene asakupangani undimomwene, mwakukhonda penula mbamudamuona kukhala wakunyindirika. Bhibhlya yalandana na xamwali unoyu wakunyindirika, kodi iyo isalonga undimomwene ndzidzi onsene? Onani pitsandzo pingasi.
Kunyindirika Kwa Anyakulemba Bhibhlya
Anyakulemba Bhibhlya akhali akuona ntima, kazinji kene iwo alemba madodo awo. Mwacitsandzo, mprofeta Yona alemba thangwi yakukhonda kwace kubvera. (Yona 1:1-3) Natenepa, iye amalisa kulemba bukhu yace ya m’Bhibhlya mbapangiza kuti Mulungu ansandika tani, pontho acinja tani makhaliro ace. (Yona 4:1, 4, 10, 11) Mwakuona ntima, anyakulemba Bhibhlya onsene apangiza kuti akhakomerwa kakamwe kulonga undimomwene.
Undimomwene Usaphedza
Kodi ndzidzi onsene Bhibhlya isapereka uphungu wakuti usaphedza? Inde. Onani pinalonga Bhibhlya thangwi ya kukhala na uxamwali wadidi: “Pinthu pyonsene pinafuna imwe kuti anthu akucitireni, imwe musafunikambo kuacitira pibodzi pyene.” (Mateu 7:12) ‘Kutawira mphole-mphole kusathondolesa ukali, mbwenye kulonga mwakuxola kusausosesa pontho.’ (Misangani 15:1) Inde, undimomwene wa m’Bhibhlya usapitiriza kuphata basa lero ninga mu ndzidzi idalembwa iyo.
Mbiri ya Ndimomwene
Anyakufufudza azinji, adzindikira mu pyaka pizinji kuti pana anthu na mbuto zizinji zidacitika pinthu pinalongwa m’Bhibhlya. Onani citsandzo cibodzi cakudziwika kakamwe. Bhibhlya isalonga kuti mu ndzidzi wa Neemiya, anthu a ku Tiro (Afenisya adabuluka ku Tiro) akuti akakhala mu Yerusalemu ‘akhabweresa nyama za m’madzi na ntundu onsene wa malonda.’—Nehemiya 13:16.
Pana pinthu pinango pinaphedzera vesi ineyi ya Bhibhlya? Inde piripo. Anyakufufudza agumana pinthu pya ku Fenisya mu nzinda wa Izraeli, pyenepi pikhapangiza kuti madzindza anewa akhabverana mu pinthu pya malonda. Kusiyapo pyenepi, Anyakufufudza akumba mu Yerusalemu mbagumana nyama za m’madzi za mu nkulo wa Medhiteraneo. Anyakufufudza asakhulupira kuti nyama zenezi zabwereswa na anyamalonda. Pakumala kupfundza mwadidi pidacitika, nyakudziwisa m’bodzi alonga: “Pyonsene pisapangiza kuti mafala anagumanika pa [Nehemiya] 13:16 akuti anthu a ku Tiro akhagulisa nyama za m’madzi mu Yerusalemu ndi andimomwene.”
Undimomwene wa Asiyentista
Bhibhlya ndi bukhu yakutoma inaphatisirwa na mauphemberi, pontho ndi bukhu ya mbiri. Mbwenye ingalonga pya siyensiya isabverana na undimomwene. Onani citsandzo ici.
Cifupi na pyaka 3.500 nduli, Bhibhlya yalonga kuti dziko yalikhiswa pa mbuto ‘yakusowa pinthu.’ (Yobe 26:7) Pyenepi pikhali pyakusiyana na uthambi ukhalongwa mu ndzidzi unoyu wakuti anthu akhakhulupira kuti dziko iri padzulu pa madzi peno iri padzulu pa kamba wankulu kakamwe. Mukupita pyaka pingasi, Yobe mbadamala kale kulemba bukhu yace, anthu akhapitiriza kukhulupira kuti dziko nee yalikhiswa pa cinthu. Mbwenye pakhadasala cinthu cinango. Mukupita pyaka 100 basi, mu caka 1687, Isaac Newton alonga kuti dziko yalikhiswa na mphambvu zakukhonda kuoneka. Maonero anewa aphedzera pidalonga Bhibhlya mu pyaka pyakupiringana 3.000 nduli!
Maprofesiya Andimomwene
Maprofesiya mazinji a Bhibhlya akwanirisika tani? Onani citsandzo cibodzi: Profesiya ya Izaiya inalonga pya kufudzwa kwa Bhabhilonya.
Profesiya: Mu caka 700 Kristu Mbadzati Kubalwa bukhu ya Izaiya yalonga kuti Bhabhilonya, nzinda wakuti mbudakhala utongi ukulu kakamwe, mbudadzafudzwa, pontho anthu nee mbadakhalabve mu nzinda unoyu. (Izaiya 13:17-20) Izaiya alembambo pya dzina ya mamuna akhafuna kuufudza—Siro. Iye alongambo kuti Siro mbadatoma kuumisa madzi a nkulo. Buluka penepo, iye alonga kuti misuwo ya mu nzinda nee mbidafungwa.—Izaiya 44:27–45:1.
Kukwanirisika: Pakupita pyaka 200 Izaiya mbadamala kale kulemba profesiya ineyi, mambo wa ku Persya apomokera Bhabhilonya. Dzina yace mbani? Siro. Nakuti ukhali nzinda wakuwanga, mbapidakhala pyakunentsa kupita mu nzinda wa Bhabhilonya, natenepa Siro aphatisira nkulo wa Eufrate toera kupita mu nzinda. Anyankhondo ace apeusa madzi a nkulo mbawambuka. Kupwa kwa madzi a nkulo mpaka ntcafu kwacitisa anyankhondo a Siro kuwambuka mpaka kufika pa mpanda. Mwakudzumatirisa, Abhabhilonya akhadasiya misuwo bwandzu! Anyankhondo a Siro apita na pa nsuwo mbafudza nzinda.
Kodi nzinda wa Bhabhilonya wadzakhala madembe? Mukupita pyaka pingasi, anthu akhapitiriza kukhala mu nzinda unoyu. Mbwenye lero, madembe a Bhabhilonya anagumanika dhuzi na Bhagidhadhi mu Iraki asapangiza kuti profesiya ya Izaiya yakwanirisika mwakukwana. Inde, Bhibhlya ndi yakunyindirika ngakhale ingalonga pinthu pya ntsogolo.
