1-3. (a) Kodi Akristu asapangiza tani kuti asafuna kakamwe kugumanika pa misonkhano? (Onani cithundzithundzi cakutoma.) (b) Tinadzadinganji mu nsolo uno?

PIKHALI Corinna na pyaka 17 pyakubalwa, mai wace akwatwa mbaendeswa ku mazunde a ku Sovietika. Mukupita kwa ndzidzi, Corinna aendeswa ku Siberya, kutali kakamwe na kunyumba kwawo. Iye akhatsalakanwa ninga bitcu, midzidzi inango akhakakamizwa toera kuphata basa kunja, mu ndzidzi wakutonthola kakamwe mbakhonda kukhala na nguwo za kupha mphepo. Mwakukhonda tsalakana makhaliro anewa akunentsa, Corinna na mulongo unango akhadatonga kugumanika pa misonkhano ya mpingo.

² Corinna afokotoza: “Tabuluka pa mbuto ikhaphata ife basa namasiku, mbatifamba makilometru 25 kuenda ku xitexi. Xitima yabuluka pa ndzidzi uwiri wa kumasiku, tamala midzidzi mitanthatu mbatidzati kutcita, pidatcita ife tafamba makilometru 10 toera kufika pa mbuto ya misonkhano.” Kodi ulendo ukhali wakuphindulisa? Corinna alonga: “Pa misonkhano tapfundza Ncenjezi mbatiimba nyimbo za Umambo. Pikhali pyakutsandzayisa kakamwe na pyakuwangisa cikhulupiro kwa ife.” Maseze iwo nee aenda kaphata basa mu ntsiku zitatu,  nyakuonera zunde nee adzindikira kuti Corinna na ndzace akhadabulukapo.

³ Ndzidzi onsene atumiki a Yahova asapasa ntengo misonkhano Yacikristu. Pidamala kwene kukhazikiswa mpingo Wacikristu, atowereri a Yezu atoma “kusonkhana pabodzi pene.” (Mach. 2:42, NM) Mwandimomwene, imwe musafunambo kakamwe kugumanika pa misonkhano mwakukhonda phonya. Mbwenye Akristu onsene asathimbana na pinentso. Midzidzi inango pinanentsa kugumanika pa misonkhano thangwi ya basa yakudziko, kunjipirwa na pyakucita, peno kuneta thangwi ya mabasa a ntsiku na ntsiku. Mphapo ninji cinafuna kutiphedza toera kukunda pinentso pyenepi mbatigumanika pa misonkhano mwakukhonda phonya? ^[1] Tinaphedza tani anyakupfundza athu a Bhibhlya na anango toera aone kufunika kwa kugumanika pa misonkhano? Mu nsolo uno tinadzadinga mathangwi masere anapangiza kuti thangwi yanji tisafunika kusonkhana toera kulambira. Tinakwanisa kugawa mathangwi anewa m’makhundu matatu: (1) misonkhano ndi yadidi kwa ife, (2) misonkhano isaphedza anango, (3) Yahova asakomerwa mungagumanika pa misonkhano. ^[2]

4. Kodi misonkhano isatiphedza tani toera kupfundza pya Yahova?

⁴ Misonkhano isatipfundzisa. Misonkhano yonsene ya mpingo isatiphedza toera kupfundza pya Yahova Mulungu. Mwacitsandzo, cifupi na pyaka piwiri pidapita, mipingo mizinji yapfundza bukhu Achegue-se a Jeová pa Pfundziro ya Bhibhlya ya Mpingo. Kodi kupfundza makhaliro a Yahova, kuphatanizambo matawiro akuwangisa a abale na alongo, nee pyawangisa ufuni wanu kuna Babanu wakudzulu? Tathimizirambo cidziwiso cathu thangwi ya Mafala a Mulungu mu kubvesera mwacidikhodikho nkhani, kulerwi kwa Bhibhlya na kuona pitsandzo. (Neh. 8:8, NM) Pontho, nyerezerani pya mpfuma zizinji zauzimu zidagumana ife mu ndzidzi ukakhunganyika ife na kubvesera ntsonga zikulu za kulerwi kwa Bhibhlya!

5. Kodi misonkhano isakuphedzani tani toera kuphatisira pinapfundza imwe m’Bhibhlya na kuthimizira maluso anu akumwaza mphangwa?

⁵ Misonkhano isatipfundzisa toera kuphatisira midida ya Bhibhlya m’makhundu onsene a umaso wathu. (1 Ates. 4:9, 10) Mwacitsandzo, Pfundziro ya Ncenjezi isakhunganywa toera kukwanirisa pyakufuna pya atumiki a Mulungu. Kodi ulipo nsolo wa Ncenjezi udakuwangisani toera kucita pizinji m’basa ya Yahova, kulekerera Nkristu ndzanu, peno kuthimizira ntundu wa maphembero anu? Misonkhano ya pakati pa sumana isatikhunganya toera kuenda mu utumiki. Isatipfundzisa kuti tinamwaza tani mphangwa, pontho tinapfundzisa tani midida ya Bhibhlya mwakuphata ntima.​—Mat. 28:18, 19.

6. Kodi misonkhano yathu isatiwangisa tani na kutiphedza toera kupitiriza kukhala akuwanga?

⁶ Misonkhano isatiwangisa. Dziko ya Sathani isayesera kufewesa cikhulupiro cathu, kutidzudzumisa na kutifewesa manungo. Mbwenye misonkhano ya mpingo isatiwangisa na kutipasa mphambvu toera kupitiriza kutumikira Yahova. (Lerini Machitiro 15:30-32.) Kazinji kene, pa misonkhano yathu tisadinga kukwanirisika kwa maprofesiya. Pyenepi pisatiphedza toera kuwangisa cinyindiro cathu cakuti maprofesiya a Yahova a ntsogolo anadzakwanirisikambo. Abale na alongo asatiwangisa, tayu basi angacita nkhani, mbwenye mu ndzidzi unapereka iwo matawiro na kusimba Yahova pakuimba nyimbo na ntima onsene. (1 Akor. 14:26) Pontho, tingacedza na abale na alongo misonkhano mbidzati kutoma na pakumala kwa misonkhano, tisawangisana na kubalangazana unango na ndzace.​—1 Akor. 16:17, 18.

7. Thangwi yanji mphyakufunika kakamwe kugumanika pa misonkhano yathu?

⁷ Pa misonkhano, tisatambira ciphedzo ca nzimu wakucena wa Mulungu. Yezu Kristu asaphatisira nzimu wakucena toera kutsogolera mipingo. Iye  asatipanga kuti tisafunika ‘kubvesera pinalonga nzimu wakucena ku mipingo.’ (Apok. 2:7) Ife tisafuna nzimu wakucena toera utiphedze pakuthimbana na mayesero, m’basa yakumwaza mphangwa na pakucita pisankhulo. Na thangwi ineyi, tisafunika kucita pyonsene pinakwanisa ife toera kugumanika pa misonkhano, mbatitambira ciphedzo ca nzimu wakucena wa Mulungu.

8. Kodi kugumanika kwathu pa misonkhano, matawiro athu na kuimba kwathu nyimbo pisaphedza tani Akristu andzathu? (Onanimbo bokosi, “Ndzidzi Onsene Iye Asabuluka Pa Misonkhano Mwakutsandzaya.”)

⁸ Misonkhano isatipasa miyai toera kupangiza kuna abale athu kuti tisaafuna. Abale na alongo azinji m’mipingo yathu, asapirira pinentso pizinji. Mpostolo Paulu alemba: “Titsalakanane [tidzudzumike thangwi ya] unango na ndzace”! Buluka penepo, Paulu afokotoza kuti tinakwanisa kupangiza citsalakano cathu ‘mu kukhonda kudjomba pa misonkhano yathu.’ (Aheb. 10:24, 25, NM) Kugumanika kwanu pa misonkhano musapangiza kuti abale anu athema kupaswa ndzidzi wanu na citsalakano canu. Pontho, matawiro anu akubulukira muntima na kuimba nyimbo pisawangisa Akristu andzanu.​—Akol. 3:16.

9, 10. (a) Fokotozani kuti mafala a Yezu anagumanika pa Jwau 10:16 asatiphedza tani toera kubvesesa kufunika kwa kusonkhana na abale athu? (b) Tingagumanika pa misonkhano mwakukhonda phonya, tinaphedza tani ale adakhondwa na acibale awo?

⁹ Misonkhano isatiphedza toera kukhala akuphatana na Akristu andzathu. (Lerini Jwau 10:16.) Yezu alandanisika na nkumbizi, atowereri ace aalandanisa na nkumbi wa mabira. Mphapo nyerezerani ipi: Khala mabira mawiri ali padzulu pa phiri, anango mawiri ali mu gowa, inangombo iri kudya yokhene kukhundu inango, tinakwanisa kulonga kuti mabira maxanu anewa ndi nkumbi ubodzi? Nkhabe, thangwi nkumbi wa mabira usakhala pabodzi, mbutowerera nkumbizi wawo. Munjira ibodzi ene, nkhabe kwanisika kutowerera Nkumbizi wathu khala tisadjomba cakhomo pa misonkhano yathu. Tisafunika kusonkhana na Akristu andzathu toera kucita khundu ya “nkumbi ubodzi ene” mu kutsogolerwa na ‘nkumbizi m’bodzi.’

¹⁰ Tingagumanika pa misonkhano tisaphedzera kuphatana kwa nsoka onsene wa abale athu. (Sal. 133:1) Anango mwa Akristu andzathu asakhondwa na acibale awo peno anyakubala awo. Mbwenye Yezu apikira kuti anaapasa acibale auzimu akuti mbadaafuna na kuatsalakana. (Mko. 10:29, 30) Mungagumanika pa misonkhano mwakukhonda phonya, munadzakhala ninga baba, mama, m’bale wacimuna peno wacikazi kwa abale athu anewa akufunika! Kodi pyenepi nee pisatiwangisa toera kucita pyonsene pinakwanisa ife kuti tigumanike pa misonkhano?

11. Kodi kugumanika pa misonkhano kusatiphedza tani toera kupasa Yahova pinthu pidathema iye?

¹¹ Pa misonkhano tisapasa Yahova pinthu pidathema iye. Ninga Nciti wathu, Yahova athema  kusimbwa, kupaswa mbiri, kuperekerwa takhuta na kulemedzwa. (Lerini Apokalipse 7:12.) Tingacita phembero, kuimba nyimbo na kulonga pya Yahova pa misonkhano yathu, tisampasa pinthu pidathema iye​—ulambiri wathu. Ife tisapasa ntengo kakamwe mwai wakulemedza Yahova, adaticitira pinthu pizinji kakamwe.

12. Kodi Yahova asapibva tani tingabvera ntemo wace wa kugumanika pa misonkhano?

¹² Yahova athemambo kubverwa na ife. Iye asatiphemba toera tikhonde kudjomba pa misonkhano yathu, makamaka mu ntsiku zino zakumalisa. Tingabvera ntemo unoyu na ntima onsene, Yahova asakomerwa. (1 Jwau 3:22) Iye asaona mbapasa ntengo phinga inapangiza ife toera kugumanika pa misonkhano yonsene.​—Aheb. 6:10.

13, 14. Tisakulisa tani uxamwali na Yahova pabodzi na Yezu pa misonkhano?

¹³ Kugumanika pa misonkhano kusapangiza kuna Yahova kuti tisafuna kukhala na uxamwali na iye pabodzi na Mwanace. Pa misonkhano yathu, Yahova, Mpfundzisi wathu Wankulu, asatipfundzisa kubulukira m’Bhibhlya pinthu pisafunika ife kucita, pontho tinaphatisira tani umaso wathu. (Iza. 30:20, 21) Ngakhale anthu akuti nee asalambira Yahova, angagumanika pa misonkhano, asadzindikira kuti ‘mwandimomwene Mulungu ali na ife.’ (1 Akor. 14:23-25) Yahova asaphatisira nzimu wakucena toera kutsogolera misonkhano yathu, pontho pinapfundza ife pisabuluka kwa iye. Natenepa, tingagumanika pa misonkhano, tisabvesera pinalonga Yahova mbationa citsalakano cace caufuni. Ninga maphindu, tisakhala na uxamwali wakuwanga na iye.

¹⁴ Yezu alonga: ‘Panasonkhana anthu awiri peno atatu mu dzina yanga, ine ndiri pakati pawo.’ (Mat. 18:20) N’dida wa mafala anewa usagomezera pya misonkhano yathu. Ninga nsolo wa mpingo, Kristu ‘asafamba pakati’ pa mipingo ya atumiki a Mulungu. (Apok. 1:20–2:1) Nyerezerani basi: Yahova na Yezu asacita pyonsene toera kutiwangisa pa misonkhano yathu Yacikristu. Musanyerezera kuti Yahova asapibva tani angaona cifuno cathu cikulu cakukhala na uxamwali na iye pabodzi na Mwanace?

15. Kodi kugumanika pa misonkhano kusapangiza tani kuti tisafuna kubvera Yahova?

¹⁵ Kugumanika kwathu pa misonkhano kusapangiza kuti tisaphedzera utongi ukulu wa Yahova. Maseze Yahova asatiphemba toera kugumanika pa misonkhano, iye nkhabe kutikakamiza kucita pyenepi. (Iza. 43:23) Natenepa, tingasankhula kubvera phembo yace, tisapangiza kuti tisafuna Yahova, pontho kuti iye athema kutipanga pinafunika ife kucita. (Arom. 6:17) Mwacitsandzo, panango patrau wathu anapitiriza kutiphemba toera kucita pizinji pabasa mbaticimwana kuenda ku misonkhano. Panango utongi wa dziko yanu unalonga kuti ule anaphatwa mbakasonkhana na Mboni za Yahova, analipiswa, kufungirwa nkaidi peno kutcinyuswa munjira inango. Panango tinayeserwa toera kucita ubalangazi m’mbuto mwa kuenda ku misonkhano. M’makhaliro anewa, tisafunika kucita cisankhulo: Mbani anafuna ife kubvera? (Mach. 5:29) Tingasankhula kubvera utongi ukulu wa Yahova, tisakomeresa ntima wace.​—Mis. 27:11.

16, 17. (a) Tisadziwa tani kuti misonkhano ikhali yakufunika kakamwe kwa Akristu a pyaka dzana yakutoma? (b) Ndi mabvero api akhali na M’bale George Gangas thangwi ya misonkhano Yacikristu?

¹⁶ Akristu a pyaka dzana yakutoma nee asiya kusonkhana pidamala iwo kugumanyikana mu ndzidzi wakucepa mbatambira nzimu wakucena pa Pentekoste ya caka 33 N.W. M’mbuto mwace, “iwo apitiriza kuphatisira pipfundziso pya apostolo na kusonkhana pabodzi pene.” (Mach. 2:42, NM) Fala Yacigerego yakuti “apitiriza kuphatisira,” isabveka kupirira peno kuwangisira mwaphinga. Pikhali pyakunentsa kwa Akristu anewa kusonkhana pabodzi, thangwi akhali pantsi pa utongi Waciroma, pontho akhatcingwa na  atsogoleri Aciyuda. Ngakhale tenepo, iwo apirira.

¹⁷ Lero, atumiki azinji a Yahova asapasa ntengo kakamwe misonkhano Yacikristu. Mwacitsandzo, M’bale George Gangas adatumikira ninga m’bodzi wa Mathubo Akutonga mu pyaka 22, alonga: “Kwa ine, kusonkhana na abale ndi cinthu cakutsandzayisa kakamwe mu umaso, pontho cisandiwangisa. Ndisakomerwa kukhala m’bodzi wa ale anafika nakweru pa Nyumba ya Umambo, na kukhala m’bodzi wa ale anamalisira kubuluka, pingakwanisika. Ntima wanga usatsandzaya ndingacedza na atumiki a Mulungu. Ndingakhala pakati pawo, ndisabva ninga ndiri kunyumba pabodzi na acibale anga, mu paradhizu yauzimu.” Iye athimiza: “Ninga bhusula yakuti ndzidzi onsene isathonya kunkwiriro, manyerezero anga na mabvero anga ankati ndi kugumanika pa misonkhano.”

18. Ndi api mabvero anu thangwi ya misonkhano, mphapo muli wakutonga toera kucitanji?

¹⁸ Kodi muli na mabvero mabodzi ene thangwi ya kusonkhana toera kulambira Yahova? Natenepa, khalani wakutonga toera kupirira na kupitiriza na cifuno canu cakugumanika mwakukhonda phonya pa misonkhano. Mungacita pyenepi, munadzapangiza kuti muli na mabvero mabodzi ene ninga a Mambo Dhavidhi adalonga kuti: ‘Yahova, ine ndisafuna nyumba inakhala imwe.’​—Sal. 26:8.