N’khaliro wa Mulungu Wakuti Ndi Wakufunika Kakamwe Kupiringana Diamante
Anthu asaona diamante ninga mwala wa ntengo ukulu kakamwe. Mitundu inango ya diamante iri na ntengo ukulu wa mamiliyau a madolari. Kodi m’maonero a Mulungu, ciripombo cinthu ca ntengo ukulu kakamwe kupiringana diamante peno miyala inango ya ntengo ukulu?
Haykanush wakuti ndi m’mwazi mphangwa wakukhonda batizwa ku Armenia, alokota cikhwama cikhali na pasaporti cifupi na panyumba pawo. Nkati mwa pasaporti mukhali maphaso a ku banku na kobiri izinji kakamwe. Iye adziwisa mamunace wakuti akhalimbo m’mwazi mphangwa wakukhonda batizwa.
Banja ineyi ikhanentseka kakamwe thangwi yakusowa kobiri, pontho iwo akhali na mangawa. Mbwenye iwo atonga kuenda kasiya cikhwama ku mbuto idapangizwa mu pasaporti. Mamuna adaluza cikhwama pabodzi na banja yace adzumatirwa kakamwe. Haykanush na mamunace afokotoza kuti iwo akhali akukhulupirika thangwi ya pikhapfundza iwo m’Bhibhlya. Iwo aona kuti akhafunika kukhala anthu akuona ntima, mbaphatisira mwai unoyu toera kulonga pya Mboni za Yahova na kugawira mabukhu mangasi banja ineyi.
Banja ineyi ikhafuna kupungula kobiri toera kupasa Haykanush ninga cipangizo cakupereka kwawo takhuta, mbwenye iye akhonda. Mangwana mwace, nkazi wa mamuna adaluza kobiri aenda kunyumba kwa Haykanush, ninga cipangizo cakupereka kwawo takhuta, iye akakamiza Haykanush toera kutawira mphete ya diamante.
Ninga banja ikhadaluza cikhwama, anthu azinji mbadadzuma pya makhaliro adidi adapangiza Haykanush na mamunace. Kodi Yahova mbadadzudzumikambo na pyenepi? Mbadaona tani kukhulupirika kwawo? Kodi kukhulupirika kwawo kwabweresa maphindu?
MAKHALIRO ADIDI KAKAMWE KUPIRINGANA PINTHU PYAMPFUMA
Matawiro a mibvundzo ineyi si akunentsa tayu. Thangwi atumiki a Yahova asanyindira kuti kupangiza makhaliro a Yahova ndi pyakufunika kakamwe kwa iye kupiringana diamante, miyala ya ndalama peno cinthu cinango ca mpfuma. Inde, pinaona Yahova ninga pyakufunika kakamwe ndi pyakusiyana kakamwe na pinanyerezera anthu. (Iza. 55:8, 9) Pontho, atumiki ace asaona kuti kutowezera makhaliro a Yahova ndi cinthu cakufunika kakamwe.
Tisaona pyenepi mwakubverana na pinalonga Bhibhlya thangwi ya luso yakudzindikira na udziwisi. Lemba ya Misangani 3:13-15 isalonga: ‘Mbatsandzaye munthu ule ana udziwisi na ndzeru, thangwi ipi pina ntengo ukulu kakamwe kupiringana prata na ndalama. Udziwisi ndi wa ntengo ukulu kakamwe kupita miyala ya ntengo ukulu na pinango pyonsene.’ Mwakukhonda penula, Yahova asapasa ntengo kakamwe makhaliro anewa kupiringana pinthu pinango pyonsene pyampfuma.
Ndiye tani pya kukhulupirika peno kuona ntima?
Cakutoma, Yahova ndi wakuona ntima, iye ‘nkhabe kulonga uthambi.’ (Tito 1:2) Iye apumira mpostolo Paulu toera kulemba mafala awa kwa Akristu Acihebere mu pyaka dzana yakutoma: ‘Pitirizani kutiphemberera, thangwi tisanyindira kuti tinakhala na cikumbuntima cakukhulupirika, thangwi tisafuna kucita pinthu pyonsene mwakuona ntima.’—Aheb. 13:18, Tradução do Novo Mundo.
Yezu Kristu apangiza citsandzo cadidi kakamwe ca kuona ntima. Mwacitsandzo, Nyantsembe Wankulu Kayifa abvundza Yezu kuti: ‘Ndinakudumbirisa pamaso pa Mulungu wandimomwene kuti utipange khala ndiwe Kristu Mwana wa Mulungu, peno siwe tayu!’ Mwakuona ntima, Yezu alonga undimomwene mbapangizika kuti iye ndi Mesiya. Iye alonga undimomwene maseze mbadaphiwa na anthu a mu Sinedriyu thangwi yakupambizirwa kuti atikana Mulungu.—Mat. 26:63-67.
Ndiye tani kwa ife? Tinapitiriza kukhala anthu akuona ntima maseze panango tinabulusa maphindu tingakhonda kulonga undimomwene onsene peno tingacinja pang’ono pinthu pinango?
PINACITISA ANTHU KUKHALA AKUKHONDA KUONA NTIMA
Mwandimomwene, pisanentsa kukhala akuona ntima mu ntsiku zino zakumalisa, mu ndzidzi wakuti anthu azinji ‘asafunika okhene, pontho asafuna kakamwe kobiri.’ (2 Tim. 3:2) Angathimbana na nyatwa yakusowa kobiri peno kusowa mabasa, anthu azinji asanyerezera kuti ali na mathangwi toera kuba, kunyengeza peno kucita cinthu cinango cinapangiza kukhonda kuona ntima. M’mbuto zizinji anthu ali na maonero anewa, natenepa iwo asacita pinthu pyakukhonda kuona ntima toera kuwina pinafuna iwo. Akristu anango acitambo pisankhulo ‘munjira yakuipa’ toera kuwina pinafuna iwo, mbaluza makhaliro awo adidi m’mpingo.—1 Tim. 3:8; Tito 1:7.
Mbwenye Akristu azinji asatowezera Yezu mbakhala akuona ntima ndzidzi onsene. Iwo asadziwa kuti kutowezera makhaliro a Mulungu ndi kwakufunika kakamwe kupiringana maphindu a mpfuma. Natenepa, aphale na atsikana Acikristu nkhabe kunyengeza (peno cabular) pakucita maprova akuxikola toera kubulusa valor yadidi. (Mis. 20:23) Ndimomwene kuti kukhala wakuona ntima nee kusabweresa maphindu adidi ndzidzi onsene ninga pidacitikira Haykanush. Ngakhale tenepo, kukhala munthu wakuona ntima ndi kwakufunika kakamwe pamaso pa Yahova, pontho kusatiphedza toera kupitiriza na cikumbuntima cakucena—cinthu ca ntengo ukulu kakamwe.
Citsandzo ca Gagik cisapangiza mwadidi pyenepi. Iye alonga: “Mbandidzati kukhala Nkristu, ndikhaphata pa kompanyia ikulu kakamwe, mwanaciro nee akhalipa misonkho yonsene, thangwi nee akhalonga maphindu akhawina iye. Ninga nkadamu wa kompanyia, ndikhafunika ‘kubverana’ na nyakulipisa misonkho mu kun’dyekera toera akhonde kuenda kalonga pinthu pyakuipa pikhacitika pa kompanyia. Natenepa, ndikhadziwika ninga munthu wakukhonda kuona ntima. Pidapfundza ine undimomwene, ndakhonda kupitiriza na macitiro anewa, maseze basa ineyi ikhandilipa mwadidi. M’mbuto mwace, ndafungula kompanyia yanga ene. Ndalembesa kompanyia yanga kubulukira pakutoma, mbandilipa misonkho yonsene.”—2 Akor. 8:21.
Gagik afokotoza: “Kobiri inawina ine lero ndi hafu ya ire ikhawina ine kale, natenepa, pisanentsa kutsalakana banja yanga. Mbwenye ndiri wakutsandzaya kakamwe lero. Ndiri na cikumbuntima cakucena pamaso pa Yahova. Ndine citsandzo cadidi kwa ananga awiri, pontho ndiri na miyai yakutumikira m’mpingo. Lero, anyakulipisa misonkho na anango anacita malonda na ine, asandidziwa ninga munthu wakuona ntima.”
YAHOVA ASATIPHEDZA
Yahova asafuna ale anatowezera makhaliro ace adidi kakamwe ninga kuona ntima, mbapasa mbiri dzina yace. (Tito 2:10) Iye apumira Mambo Dhavidhi toera kulemba mafala awa: ‘Ndine nkhalamba, mbwenye kubulukira mu uwana wanga, ndidzati kuona Yahova mbasiya munthu wadidi, peno kuti anace aenda kasundza pyakudya.’—Sal. 37:25.
Citsandzo ca Rute, nkazi wakukhulupirika cisagomezera pyenepi. M’mbuto mwakusiya Naomi wakuti akhadagwesera, iye apitiriza kukhala na mebzwalace. Rute aendambo ku Israele kwakuti mbadakwanisa kulambira Mulungu wandimomwene. (Rute 1:16, 17) Pikhali iye mu Israele, Rute apangiza kukhala munthu wakuona ntima na wakuphata basa mwakuwanga, mbaphalakatira mphendzi, mwakubverana na Mwambo. Mwakubverana na pidalemba Dhavidhi ntsogolo, Yahova nee asiya Rute na Naomi mbathabuka. (Rute 2:2-18) M’mbuto mwace, Yahova acita pizinji kuna Rute kupiringana kumpasa pinthu pyakumanungo. Iye ansankhula toera kukhala m’bodzi wa dzindza idabalwa Mambo Dhavidhi na Mesiya wakupikirwa!—Rute 4:13-17; Mat. 1:5, 16.
Kwa atumiki anango a Yahova, pisanentsa kakamwe kuwina kobiri yakukwana toera kutsalakana umaso wa ntsiku na ntsiku. M’mbuto mwakusaka kobiri munjira zakukhonda nentsa zinaphataniza kukhonda kuona ntima, iwo asaphata basa mwakuwanga na mwaphinga. Natenepa, iwo asapangiza kuti makhaliro adidi kakamwe a Mulungu, ninga kuona ntima, ndi a ntengo ukulu kakamwe kupiringana pinthu pyampfuma.—Ninga Rute, pa dziko yonsene Akristu asapangiza cinyindiro cakuti Yahova ali na mphambvu toera kuaphedza. Iwo asakhulupira na ntima onsene pikiro iyi: ‘Cipo ndinadzakusiya, nee kukukhonda.’ (Aheb. 13:5) Mwakubwereza-bwereza, Yahova asapangiza kuti iye asakwanisa kuphedza ale anapangiza kukhala akuona ntima, pontho iye anapitiriza kucita pyenepi ndzidzi onsene. Iye asapitiriza kukwanirisa pikiro yace yakuti anadzatsalakana pinthu pyakufunika mu umaso wa anthu.—Mat. 6:33.
Ndimomwene kuti anthu asapasa ntengo kakamwe diamante na miyala inango ya ntengo ukulu. Mbwenye tiri na cinyindiro consene cakuti Babathu wakudzulu asaona n’khaliro wathu wakuona ntima na makhaliro anango adidi anapangiza ife ninga cinthu ca ntengo ukulu kakamwe kupiringana miyala ya ntengo ukulu!
Tingakhala anthu akuona ntima, tinakwanisa kukhala na cikumbuntima cakucena, pontho tinakhala na ufulu wakulonga na anthu mu utumiki