NSOLO WA PFUNDZIRO 46
NYIMBO 49 Tikomerese Ntima wa Yahova
Abale, Kodi Muli Kuwangisira Toera Kukhala Ntumiki Wakutumikira?
“Kupasa kusatsandzayisa kakamwe kupiringana kutambira.” —MABASA 20:35.
PINAFUNA IFE KUPFUNDZA
Nsolo uno unakulumiza abale akubatizwa toera awangisire kuti akhale atumiki akutumikira.
1. Ndi mabvero api akhali na Paulu thangwi ya atumiki akutumikira?
ATUMIKI akutumikira asaphedza kakamwe m’mipingo. Mpostolo Paulu akhapereka takhuta kakamwe kuna amuna anewa akukhulupirika. Cibodzi mwa pinthu pinapangiza pyenepi ndi cakuti mu ndzidzi udalembera iye tsamba Akristu a ku Filipi, iye apereka mwanyikiro kuna atumiki akutumikira pabodzi na akulu a mpingo.—Afil. 1:1.
2. M’bale Luis asapibva tani thangwi yakukhala ntumiki wakutumikira?
2 Abale azinji akubatizwa a mathunga akusiyana-siyana asatsandzaya thangwi yakuphedza mpingo ninga atumiki akutumikira. Mwacitsandzo, m’bale Devan akhali na pyaka 18 pyakubalwa pidakhazikiswa iye ninga ntumiki wakutumikira. M’bale unango anacemerwa Luis akhazikiswa ninga ntumiki wakutumikira pikhali iye na pyaka pyakupiringana 50. Iye alonga: “Kuna ine ndi mwai ukulu kuphedza mpingo ninga ntumiki wakutumikira, makamaka ndinganyerezera ufuni unapangiza abale na alongo kuna ine.” Atumiki akutumikira azinji ali na mabvero mabodzi ene.
3. Ndi mibvundzo ipi inafuna kutawira ife mu nsolo uno?
3 Khala imwe mwabatizwa, pontho mudzati kukhala ntumiki wakutumikira, kodi munakwanisa kukhala na cifuno ceneci? Ninji pinafuna kukuphedzani toera kukhala na cifuno ceneci? Ndi pinthu pipi pinalonga Bhibhlya pyakuti musafunika kupicita toera kukhala ntumiki wakutumikira? Mu nsolo uno tinaona mitawiro ya mibvundzo ineyi. Mbwenye pakutoma tendeni tione mabasa anacita atumiki akutumikira.
NDI MABASA API ANACITA ATUMIKI AKUTUMIKIRA?
4. Ndi mabasa api anacita atumiki akutumikira? (Onanimbo foto.)
4 Atumiki akutumikira anango asatsalakana cisa cinamwaza mphangwa mpingo na mabukhu anaphatisira ife m’basa yakumwaza mphangwa. Anango asaphedzera basa yakucenesa Nyumba ya Umambo na kuisasanyira. Iwo asatumikirambo ninga akalindi, pontho asatsalakana pinthu pinaphatisirwa pa audhyu vidhyu mu ndzidzi wa misonkhano. Atumiki akutumikira asafuna Yahova, pontho asakhala m’maso mwakubverana na pinapfundzisa Bhibhlya. Iwo asafunambo abale na alongo mu mpingo. (Mat. 22:37-39) Mphapo m’bale asafunika kucitanji toera akhale ntumiki wakutumikira?
Atumiki akutumikira asatowezera Yezu pakutumikira anango (Onani ndima 4)
5. Ninji pinafuna kukuphedzani toera mukhazikiswe ninga ntumiki wakutumikira?
5 Bhibhlya isapangiza pinthu pyakuti m’bale asafunika kupicita toera akhazikiswe ninga ntumiki wakutumikira. (1 Tim. 3:8-10, 12, 13) Imwe munakwanisa kupfundza pinthu pyenepi mbamuwangisira toera kupiphatisira. Pyenepi pinakuphedzani toera mukhale na mwai wakukhazikiswa ninga ntumiki wakutumikira. Mbwenye pakutoma musafunika kunyerezera mwadidi mathangwi anakucitisani kufuna kukhala ntumiki wakutumikira.
THANGWI YANJI MUSAFUNA KUKHALA NTUMIKI WAKUTUMIKIRA?
6. Ninji pinafunika kukukulumizani toera kuphedza anango? (Mateu 20:28; onanimbo iri pa tsamba yakutoma.)
6 Yezu Kristu ndi citsandzo cadidi kakamwe kuna ife, pontho pinthu pyonsene pikhacita iye akhakulumizwa na ufuni kuna Babace na kuna anthu. Ufuni wacitisa Yezu kuwangisira toera kuphedza anango na kucita mabasa akhaoniwa ninga akupwazika. (Lerini Mateu 20:28; Juw. 13:5, 14, 15) Imwe mungacita pinthu pyonsene thangwi ya kufuna Yahova, iye anakupasani nkhombo, pontho anakuphedzani toera kukhala ntumiki wakutumikira.—1 Akor. 16:14; 1 Ped. 5:5.
Thangwi yakutsuka miyendo ya apostolo ace, Yezu aapfundzisa kufunika kwa kukhala akucepeseka na kutumikira anango, m’mbuto mwakufuna kukhala na pidzo (Onani ndima 6)
7. Thangwi yanji m’bale nee asafunika kuoneka ninga wakufunika kakamwe kupiringana anango?
7 Anthu a dziko asakomerwa na ale anaoneka ninga akufunika kakamwe kupiringana anango. Mbwenye atumiki a Yahova asiyana na anthu anewa. M’bale anatumikira anango thangwi ya ufuni, ninga pidacita Yezu, nee asafuna kutonga anango, pontho nee asafuna kukhala wakufunika kakamwe kupiringana anango. Munthu anaoneka ninga wakufunika kupiringana anango angakhazikiswa ninga ntumiki wakutumikira, panango iye anakhonda kucita mabasa anango akupwazika akuti ndi akufunika pakutsalakana mabira a Yahova. Panango iye ananyerezera kuti nee asafunika kucita mabasa anewa thangwi ya cidzo ciri na iye. (Juw. 10:12) Yahova nee asapasa nkhombo anthu anacita pinthu mwakudzikuza peno anaoneka ninga akufunika kakamwe kupiringana anango.—1 Akor. 10:24, 33; 13:4, 5.
8. Ndi uphungu upi udapereka Yezu kuna apostolo 12?
8 Midzidzi inango, ngakhale axamwali a Yezu akhafuna kukhala na miyai yakutumikira na mathangwi akuipa. Onani pinthu pidacita mpostolo Tiyago na Juwau. Iwo aphemba Yezu toera akhale na mbuto yakufunika kakamwe mu Umambo. Yezu nee aasimba thangwi ya cifuno ceneci cakukhala akufunika kakamwe kupiringana anango. M’mbuto mwace, iye alonga tenepa kuna apostolo 12: “Ule anafuna kukhala nkulu pakati panu asafunika kukhala ntumiki wanu, pontho ule anafuna kukhala wakutoma pakati panu asafunika kukhala bitcu wa onsene.” (Marko 10:35-37, 43, 44) M’bale angawangisira toera kukhala ntumiki wakutumikira na mathangwi adidi, iye asaphedza kakamwe mpingo.—1 Ates. 2:8.
MUNATHIMIZIRA TANI CIFUNO CAKUTUMIKIRA ANANGO?
9. Munathimizira tani cifuno cakutumikira anango?
9 Mwakukhonda penula, imwe musafuna Yahova, pontho musafuna kutumikira anango. Ngakhale tenepo, panango nee munafuna kukhala ntumiki wakutumikira, thangwi musadziwa kuti ntumiki wakutumikira asacita mabasa mazinji. Mphapo munathimizira tani cifuno cakutumikira anango? Njira ibodzi ndi kunyerezera kutsandzaya kunakhala na ife tingaphedza abale na alongo athu. Yezu alonga: “Kupasa kusatsandzayisa kakamwe kupiringana kutambira.” (Mabasa 20:35) Yezu acita pyenepi pikhali iye pa dziko yapantsi. Iye akhali wakutsandzaya kakamwe thangwi yakutumikira anango, pontho imwe munakhalambo akutsandzaya mungacita pyenepi.
10. Ninji cinapangiza kuti Yezu akhatsandzaya na kutumikira anango? (Marko 6:31-34)
10 Onani citsandzo cinapangiza kuti Yezu akhatsandzaya thangwi yakutumikira anango. (Lerini Marko 6:31-34.) Ntsiku inango, Yezu na apostolo ace akhadaneta kakamwe, pontho akhaenda pa mbuto yawo okha toera kupuma. Mbwenye mwinji wa anthu watoma kufika pa mbuto ineyi mbadikhira Yezu. Iwo akhafuna kupfundziswa na Yezu. Iye mbadakwanisa kukhonda, thangwi iye na apostolo “nee akhali na ndzidzi wakupuma, ngakhale wakudya.” Peno Yezu mbadakwanisa kuapfundzisa pang’ono, buluka penepo mbaapanga toera abwerere. Mbwenye iye akhafuna anthu. Na thangwi ineyi, “atoma kuapfundzisa pinthu pizinji.” Iye apitiriza kuapfundzisa mpaka ‘dzuwa kudoka.’ (Marko 6:35) Yezu nee acita pyenepi thangwi yakukakamizwa, mbwenye thangwi ‘akhabvera ntsisi anthu.’ Iye akhafuna kupfundzisa anthu thangwi akhaafuna. Kucita pyenepi kukhatsandzayisa kakamwe Yezu.
11. Yezu acitanji pontho toera kuphedza mwinji wa anthu? (Onanimbo foto.)
11 Kusiyapo kuapfundzisa pinthu pizinji, Yezu atumikirambo mwinji unoyu wa anthu munjira inango. Iye acita cirengo cakuthimizira mikate na ntsomba, buluka penepo aphemba anyakupfundzace toera apereke cakudya ceneci kuna mwinji wa anthu. (Marko 6:41) Munjira ineyi, Yezu apfundzisa anyakupfundzace toera kutumikira anango. Iye apangizambo kuti ndi pyakufunika kucita pinthu toera kuphedza anango, pontho ndi pyenepi pinafunika kucita atumiki akutumikira. Nyerezerani kutsandzaya kudakhala na apostolo thangwi yakuphedza Yezu kugawira cakudya ceneci mpaka ‘anthu onsene kudya mbakhuta.’ (Marko 6:42) Nee ndi ulendo unoyu basi udaikha Yezu pifuno pya anango pa mbuto yakutoma. Iye acita pyenepi mu umaso wace onsene pa dziko yapantsi. (Mat. 4:23; 8:16) Kupfundzisa anango na kucita pinthu toera kuaphedza kukhatsandzayisa kakamwe Yezu. Mwakukhonda penula, imwe munatsandzayambo kakamwe mungaikha pifuno pya anango pa mbuto yakutoma mbamuwangisira toera kukhala ntumiki wakutumikira.
Kufuna Yahova na kufuna anango kunakukulumizani toera kuwangisira kuphedza anango mu mpingo (Onani ndima 11) a
12. Thangwi yanji nee tisafunika kunyerezera kuti nee tiri na maluso toera kuphedza mpingo?
12 Anthu anango asanyerezera kuti nee ali na maluso toera kuphedza mpingo. Khala musanyerezera tenepo, lekani kutsukwala. Imwe muli na maluso akuti anakhala akuphedza kakamwe kuna abale na alongo. Imwe munaphedzeka mungaleri mafala a Paulu anagumanika pa 1 Akorinto 12:12-30 mbamucita phembero thangwi ya pyenepi. Pa lemba ineyi, Paulu apangiza kuti m’bodzi na m’bodzi wa atumiki a Yahova, ndi wakufunika kakamwe mu mpingo, kuphatanizambo imwe. Natenepa, khala cincino nee muli na makhaliro anafunika toera kukhala ntumiki wakutumikira, lekani kubwerera nduli. M’mbuto mwace, citani pinakwanisa imwe toera kutumikira Yahova na kuphedza abale na alongo. Pontho khalani na cinyindiro cakuti akulu a mpingo anakupasani mabasa mwakubverana na maluso ali na imwe.—Aroma 12:4-8.
13. Ndi ipi thangwi inango iri na imwe toera kuwangisira kuti mukhale ntumiki wakutumikira?
13 Thangwi inango toera kuwangisira kuti mukhale ntumiki wakutumikira ndi yakuti pinthu pyonsene pinafunika imwe kucita toera mukhale ntumiki wakutumikira ndi pinthu pyakuti Akristu onsene asafunika kupicita. Mwacitsandzo, Akristu onsene asafunika kuwangisa uxamwali wawo na Yahova na kutumikira anango mwakutsandzaya mbapangiza citsandzo cadidi na makhaliro awo. Natenepa, panango imwe muli na makhaliro mazinji anafunika toera kukhala ntumiki wakutumikira. Mphapo ndi pinthu pipi pyakuti m’bale anafuna kutumikira ninga ntumiki wakutumikira asafunika kupicita?
MUSAFUNIKA KUCITANJI TOERA KUKHALA NTUMIKI WAKUTUMIKIRA?
14. Pisabvekanji “kukhala akulemedzeka”? (1 Timoti 3:8-10, 12)
14 Cincino tinapfundza pinthu pinango pinalonga Bhibhlya pyakuti m’bale asafunika kupicita toera akhale ntumiki wakutumikira, pinagumanika pa 1 Timoti 3:8-10, 12. (Lerini.) Atumiki akutumikira asafunika “kukhala akulemedzeka.” Fala ineyi inakwanisambo kuthumburuzwa “kuthema kulemedzwa na anango,” “kukhala akunyindirika” peno “kucita pinthu munjira yakuti anango asaalemedza.” Pyenepi nee pisabveka kuti iwo nee asafunika kuseka. (Ekle. 3:1, 4) Mbwenye pisabveka kuti iwo asafunika kutsalakana mwadidi mabasa awo. Ale anafuna kukhala atumiki akutumikira angacita mwadidi mabasa awo mu mpingo, abale na alongo anaanyindira na kualemedza.
15. Pisabvekanji ‘kukhala wakukhonda kunyengeza pakulonga’ na ‘wakukhonda kuwina pinthu munjira yakukhonda kulungama’?
15 ‘Kukhala wakukhonda kunyengeza pakulonga’ kusabveka kuti imwe ndimwe wakunyindirika, pontho musalonga undimomwene ndzidzi onsene. Mungapikira cinthu, imwe musacicita, pontho nee musanamiza anango. (Mis. 3:32) ‘Kukhala wakukhonda kuwina pinthu munjira yakukhonda kulungama’ kusabveka kuti ndimwe wakunyindirika pabasa, pontho ndimwe wakunyindirika munjira inatsalakana imwe kobiri. Imwe nee munaphatisira axamwali anu mu mpingo basi ene toera kuwina kobiri.
16. (a) Pisabvekanji ‘kukhonda kumwa kakamwe vinyu’? (b) Pisabvekanji ‘kukhala na cikumbuntima cakucena’?
16 ‘Kukhonda kumwa kakamwe vinyu’ kusabveka kuti imwe nee musamwa mwakupiringana midida, pontho nee musadziwika ninga nyamwera. Kukhala na ‘cikumbuntima cakucena’ kusabveka kuti imwe musabvera mitemo ya Yahova. Ndimomwene kuti imwe ndimwe wakusowa ungwiro, mbwenye musakhala na uxamwali wakuwanga na Yahova, pontho pyenepi pisakupasani ntendere wa m’manyerezero.
17. Mafala akuti “kudingwa toera aoniwe khala athema” asabvekanji? (1 Timoti 3:10; onanimbo foto.)
17 Mafala akuti “kudingwa toera aoniwe khala athema” asabveka kuti akulu a mpingo asaona kuti imwe musatsalakana mwadidi mabasa adapaswa imwe, pontho anakwanisa kukunyindirani. Natenepa, akulu a mpingo angakuphembani toera kucita basa, bverani pitsogolero pyawo na pitsogolero pinapereka gulu yathu. Wangisirani toera kubvesesa pyonsene pinafunika imwe kucita na ndzidzi unafunika imwe kumalisa basa idapaswa imwe. Khala imwe musatsalakana mwadidi mabasa adapaswa imwe, anthu onsene mu mpingo anaona kuti imwe ndimwe wakunyindirika, pontho anaona kuti muli kuthambaruka. Akulu a mpingo, lekani siya kupfundzisa abale akubatizwa. (Lerini 1 Timoti 3:10.) Kodi mu mpingo mwanu muli na aphale akubatizwa akuti ali na pyaka 13, 14 peno pyakucepa? Iwo asacita pfundziro ya munthu paekha, pontho asakhunganyika mwadidi misonkhano? Asatawira pa misonkhano, pontho asamwaza mphangwa masumana onsene? Khala ntawiro wa mibvundzo ineyi ndi inde, apaseni mabasa akuti iwo anakwanisa kuacita, maseze ali na thunga yakucepa. Mungacita pyenepi, aphale anewa ‘anadingwa toera kuoniwa khala athema.’ Buluka penepo, angakhala na pyaka 17 peno 18, panango iwo anakhazikiswa ninga atumiki akutumikira.
Akulu a mpingo asafunika kupasa mabasa abale akubatizwa toera ‘aaone khala athema’ (Onani ndima 17)
18. Pisabvekanji ‘kusowa mathangwi akupambizirwa nawo’?
18 ‘Kusowa mathangwi akupambizirwa nawo’ kusabveka kuti anthu nee ali na mathangwi toera kulonga kuti mwacita pinthu pyakuipa. Ndimomwene kuti panango anthu anakupambizirani. Pyenepi pyacitikambo na Yezu, pontho iye alonga kuti atowereri ace anacitikirwambo na pyenepi. Mbwenye mungakhala na makhaliro adidi ninga Yezu, abale na alongo anakudziwani na makhaliro adidi.—Mat. 11:19.
19. Pisabvekanji “kukhala mamuna wa nkazi m’bodzi basi”?
19 “Mamuna wa nkazi m’bodzi basi.” Pidacita Yahova banja yakutoma, iye alonga kuti banja isafunika kukhala mamuna m’bodzi na nkazi m’bodzi. Pontho Akristu onsene asafunika kubvera pyenepi. (Mat. 19:3-9) Natenepa Nkristu nee asafunika kucita ulukwali. (Aheb. 13:4) Kusiyapo pyenepi, ale anafuna kukhala atumiki akutumikira asafunika kukhala akukhulupirika kuna akazi awo, pontho nee asafunika kusirira akazi anango.—Yobe 31:1.
20. Mamuna ‘anatsogolera tani mwadidi anace na anthu onsene a panyumba pace’?
20 “Atsogolere mwadidi anace na anthu onsene a panyumba pace.” Khala ndimwe nsolo wa banja, imwe musafunika kucita mwadidi mabasa anu. Citani kulambira kwa banja masumana onsene. Citani pyonsene pinakwanisa imwe toera kumwaza mphangwa pabodzi na nkazanu na ananu. Phedzani ananu toera akhale na uxamwali wakuwanga na Yahova. (Aef. 6:4) Mamuna anatsalakana mwadidi banjace asapangiza kuti anakwanisa kutsalakana mpingo.—Onani 1 Timoti 3:5.
21. Musafunika kucitanji khala mudzati kukhala ntumiki wakutumikira?
21 Khala mudzati kukhala ntumiki wakutumikira, taphata miyendo, pfundzani mwadidi nsolo uno, pontho citani phembero thangwi ya pyenepi. Pfundzanimbo pinthu pinalonga Bhibhlya thangwi ya atumiki akutumikira, pontho wangisirani toera kucita pinthu pyenepi. Nyerezerani ufuni wanu kuna Yahova na abale na alongo anu. Pyenepi pinakuphedzani toera kufuna kakamwe kuatumikira. (1 Ped. 4:8, 10) Mungakhala ntumiki wakutumikira, imwe munatsandzaya kakamwe thangwi yakutumikira abale na alongo mu mpingo. Pontho khalani na cinyindiro cakuti Yahova anakupasani nkhombo thangwi yakuwangisira kwanu toera kukhala ntumiki wakutumikira.—Afil. 2:13.
NYIMBO 17 ‘Ndisafuna’
a MAFALA ANAFOKOTOZA FOTO: Nkono wabzwere: Yezu ali kutumikira anyakupfundzace mwakucepeseka; nkono wamadyo: Ntumiki wakutumikira ali kuphedza m’bale wakukalamba.
