KODI imwe musanentseka toera kucita pfundziro yanu ya munthu paekha mwakutsandzaya? Pyenepi pisacitika kuna ife tonsene midzidzi inango. Nyerezerani pinthu pinango pinacita ife ntsiku zonsene, ninga kusamba. Kusamba kusaphemba ndzidzi na kuwangisira, mbwenye tingamala kusamba, tisapibva mwadidi. Kupfundza Bhibhlya kunakwanisambo kuticitisa kupibva mwadidi. (Aef. 5:26) Onani pinthu pingasi pinafuna kutiphedza:

• Khazikisani ndzidzi. Ife tisadziwa kuti pfundziro ya Bhibhlya ya munthu paekha ndi cibodzi mwa ‘pinthu pyakufunika kakamwe’ pyakuti tisafunika kupicita. (Afil. 1:10) Toera mukhonde kuduwala ndzidzi wanu wakupfundza, lembani pa tsamba ntsiku na ndzidzi unafuna imwe kupfundza, buluka penepo ikhani tsamba ineyi pa mbuto yakuti munakwanisa kuiona mwakukhonda nentsa. Peno munakwanisa kuikha alarme mu ntokodzi wanu toera kukukumbusani ungafika ndzidzi wanu wakupfundza.

• Nyerezerani pinthu pinafuna kukuphedzani toera mukhonde kudzudzumika mu ndzidzi wakupfundza. Ndi pinthu pipi pinakuphedzani toera mubvesese mwadidi pinthu pinapfundza imwe? Mwacitsandzo, musaona kuti ndi pyakukhonda nentsa kubvesesa pinapfundza imwe mungaphatisira ora ibodzi toera kupfundza? Peno musakomerwa na kupfundza mphindi zakucepa, mbwenye mwakubwereza-bwereza? Imwe musadziwa mwadidi pinthu pinakuphedzani. Natenepa citani masasanyiro toera kupfundza mbamunyerezera pyenepi. Mungakhonda kukhala na cifuno cakupfundza pa ndzidzi udakhazikisa imwe, munakwanisa kuyesera kupfundza basi ene mu mphindi khumi. Maseze mupfundze mu mphindi khumi, imwe munakwanisa kupfundza pinthu pizinji. Pontho panango pakumala mphindi khumi, munakomerwa kakamwe na pinapfundza imwe mbamufuna kupitiriza kupfundza.—Afil. 2:13.

• Sankhulani pinthu pinafuna imwe kupfundza. Munganyerezera pinthu pinafuna imwe kupfundza basi ene mu ndzidzi wakupfundza, panango nee ‘munaphatisira mwadidi ndzidzi wanu.’ (Aef. 5:16) Yeserani kulemba pinthu pingasi pinafuna imwe kupfundza. Mwacitsandzo, mungakhala na mbvundzo thangwi ya pinthu pyakuti nee musapibvesesa mwadidi, lembani mbvundzo unoyu. Pontho pakumala kwa pfundziro yanu ya munthu paekha, panango munakhala na mibvundzo inango yakuti munailemba toera kuipfundza ntsiku inango.

• Khalani dzololo toera kucita macinjo. Cinthu cakufunika kakamwe ndi kupfundza masumana onsene. Toera mukwanise kucita pyenepi, midzidzi inango munafunika kucinja ntsiku na ndzidzi wakupfundza, ndzidzi unafuna imwe kuphatisira toera kupfundza na pinthu pinafuna imwe kupfundza.

Ife tisaphedzeka kakamwe tingapfundza masumana onsene. Tisakhala na uxamwali wakuwanga na Yahova, tisakwanisa kucita pisankhulo pyadidi, pontho tisawangiswa.—Yos. 1:8.