NSOLO WA PFUNDZIRO 42
NYIMBO 103 Akulu a Mpingo Ndi Miyoni Mwa Anthu
Perekani Takhuta Thangwi ya Amuna Anaphatisira Yahova na Yezu mu Mpingo
‘Pidakwira iye kudzulu, apereka amuna ninga miyoni.’—AEF. 4:8.
PINAFUNA IFE KUPFUNDZA
Tinaona kuti atumiki akutumikira, akulu a mpingo na ayang’aniri a cisa asatiphedza tani, pontho tinapangiza tani kupereka takhuta kuna iwo thangwi ya mabasa anacita iwo.
1. Ndi miyoni ipi idatipasa Yezu?
NKHABEPO munthu unango adacita pinthu pizinji kakamwe toera kuphedza anango kupiringana pidacita Yezu. Pikhali iye pa dziko yapantsi, acita pirengo pizinji toera kuphedza anthu. (Luka 9:12-17) Pontho iye apereka umaso wace thangwi ya ife wakuti ndi muoni ukulu kakamwe kupiringana pyonsene. (Juw. 15:13) Pakumala kulamuswa muli akufa, Yezu apitiriza kuphedza anthu. Iye akhadalonga kuti mbadaphemba Yahova toera atumize nzimu wakucena kuti utipfundzise na kutibalangaza. Pontho iye acita pyenepi. (Juw. 14:16, 17, cidzindikiro capantsi; 16:13) Kubulukira pa misonkhano, Yezu asapitiriza kutipfundzisa toera tikwanise kucita anyakupfundza pa dziko yonsene yapantsi.—Mat. 28:18-20.
2. Ndi api “amuna ninga miyoni” analongwa pa Aefesi 4:7, 8?
2 Onani muoni unango udatipasa Yezu. Mpostolo Paulu alemba kuti pidaenda Yezu kudzulu, ‘iye apereka amuna ninga miyoni.’ (Lerini Aefesi 4:7, 8.) Paulu afokotoza kuti Yezu apereka miyoni ineyi toera kuphedza mpingo munjira zizinji. (Aef. 1:22, 23; 4:11-13) Lero, “amuna ninga miyoni” ndi atumiki akutumikira, akulu a mpingo na ayang’aniri a cisa. a Ndimomwene kuti amuna anewa ndi akusowa ungwiro, pontho asacita madodo. (Tiya. 3:2) Mbwenye Mbuyathu Yezu Kristu asaphatisira abale anewa toera kutiphedza. Pontho iwo ndi miyoni kuna ife.
3. M’bodzi na m’bodzi wa ife anaphedza tani “amuna ninga miyoni”?
3 Yezu akhazikisa “amuna ninga miyoni” toera kuwangisa mpingo. (Aef. 4:12) Mbwenye m’bodzi na m’bodzi wa ife anakwanisa kucita khundu yace toera kuphedza abale anewa kucita mwadidi mabasa awo. Toera kubvesesa mwadidi pyenepi, nyerezerani: Anango a ife asamanga Nyumba ya Umambo. Anangombo asaphedzera mabasa anango ninga kuphika cakudya na kukwata anyakuphata basa peno pinthu pyakuphata napyo basa. Munjira ibodzi ene, kubulukira mu pinthu pinalonga ife na pinacita ife, tonsene tinakwanisa kuphedzera mabasa anacita atumiki akutumikira, akulu a mpingo na ayang’niri a cisa. Tendeni tione kuti mabasa awo asatiphedza tani, pontho tinapereka tani takhuta kuna iwo na kuna Yezu, adatipasa ‘amuna anewa ninga miyoni.’
ATUMIKI AKUTUMIKIRA ASAPHEDZA
4. Ndi api mabasa anango akhacita atumiki akutumikira mu ndzidzi wa apostolo?
4 Mu ndzidzi wa apostolo, abale anango akhakhazikiswa ninga atumiki akutumikira. (1 Tim. 3:8) Panango Paulu akhalonga pya atumiki akutumikira pa 1 Akorinto 12:28, pidalemba iye kuti “ale anaphedza anango.” Pyenepi pisapangiza kuti atumiki akutumikira akhacita mabasa akufunika kakamwe toera akulu a mpingo akwanise kuikha manyerezero awo m’basa yakuwangisa abale na kupfundzisa. Mwacitsandzo, panango atumiki akutumikira akhaphedza basa yakucita makopya a Malemba, peno akhaphatisirwa toera kubweresa pinthu pyakucita napyo makopya anewa.
5. Ndi mabasa api anango anacita atumiki akutumikira lero?
5 Onani mabasa anango anacita atumiki akutumikira mu mpingo mwanu. (1 Ped. 4:10) Panango iwo asatsalakana makonta, cisa cinamwaza mphangwa mpingo, kuphemba mabukhu na kuagawira. Anango asatsalakana audhyu vidhyu pa misonkhano, anango ndi akalindi peno asaphedzera mabasa akusasanyira Nyumba ya Umambo. Mabasa anewa onsene ndi akufunika toera pinthu pifambe mwadidi mu mpingo. (1 Akor. 14:40) Kusiyapo pyenepi, atumiki akutumikira anango asacita makhundu pa misonkhano ya Umaso Wathu Wacikristu na Utumiki, pontho asacita nkhani za pakweca. Ntumiki wakutumikira anakwanisa kusankhulwa toera kuphedza muyang’aniri wa nsoka wa basa ya m’munda, pontho midzidzi inango atumiki akutumikira asaphembwa na akulu a mpingo toera kuenda nawo pabodzi kacedzera abale.
6. Thangwi yanji tisafunika kupereka takhuta thangwi ya mabasa anacita atumiki akutumikira?
6 Onani pidalonga anthu anango thangwi ya ciphedzo cinapereka atumiki akutumikira pa mpingo. Mulongo unango wa ku Bolívia anacemerwa Beberly b alonga: “Ine ndisakwanisa kuphindula kakamwe pa misonkhano thangwi ya ciphedzo ca atumiki akutumikira. Thangwi ya mabasa anacita iwo, ine ndisakwanisa kuimba, kupereka mitawiro, kubvesera nkhani, kuona mavidhyu na mafoto anapangizwa pa misonkhano. Iwo asaonera Nyumba ya Umambo mu ndzidzi wa misonkhano, pontho asaphedza ale anabvesera misonkhano mukuphatisira vidhyukonferensya. Misonkhano ingamala, iwo asakhala akutoma kucenesa Nyumba ya Umambo, kutsalakana makonta na kutipasa mabukhu anafuna ife. Ndisapereka takhuta kakamwe thangwi ya mabasa anacita iwo!” Mulongo Leslie, nkazi wa nkulu wa mpingo anakhala ku Kolombya alonga: “Mamunanga asaphedzwa kakamwe na atumiki akutumikira. Mbadakhonda kuphedzwa na iwo, iye mbadakhala na mabasa mazinji kakamwe. Natenepa ine ndisapereka takhuta thangwi ya ciphedzo cawo.” Panango imwe musapibvambo munjira ibodzi ene thangwi ya mabasa anacita atumiki akutumikira mu mpingo mwanu.—1 Tim. 3:13.
7. Tinapangiza tani kuti tisapereka takhuta thangwi ya atumiki akutumikira? (Onanimbo foto.)
7 Maseze ife tisapereka takhuta thangwi ya mabasa anacita atumiki akutumikira, Bhibhlya isatipangambo kuti tisafunika kupangiza kuna iwo kuti tisapereka takhuta kakamwe. (Akol. 3:15) Nkulu wa mpingo wa ku Finlandiya anacemerwa Cristóvão alonga kuti asapangiza tani kupereka kwace takhuta: “Ine ndisalemba tsamba peno ndisatumiza mphangwa na lemba ya Bhibhlya mbandilonga cinthu cidacita ntumiki wakutumikira unoyu cakuti candiwangisa peno ndisapereka takhuta thangwi ya pinthu pinacita iye.” Pascal na Jael, anakhala ku Nova Caledónia asacita phembero thangwi ya atumiki akutumikira. Cincino ife tisacita phembero na kudembetera, pontho tisapereka takhuta kuna Yahova thangwi yakukhala na atumiki akutumikira mu mpingo mwathu.” Mwakukhonda penula, Yahova asabva maphembero athu pontho asaatawira, natenepa, onsene mu mpingo asaphedzeka.—2 Akor. 1:11.
AKULU A MPINGO ‘ASAPHATA BASA MWAKUWANGA’
8. Thangwi yanji Paulu alemba kuti akulu a mpingo ‘akhaphata basa mwakuwanga’? (1 Atesalonika 5:12, 13)
8 Mu ndzidzi wa apostolo, akulu a mpingo akhaphata basa mwakuwanga toera kuphedza mpingo. (Lerini 1 Atesalonika 5:12, 13; 1 Tim. 5:17) Iwo ‘akhatsogolera’ mpingo, misonkhano, pontho akhacita pisankhulo pabodzi na akulu a mpingo anango. Iwo ‘akhapasa uphungu’ abale na alongo mwaufuni na cifuniro cakutsidzikiza mpingo. (1 Ates. 2:11, 12; 2 Tim. 4:2) Kusiyapo pyenepi, amuna anewa akhafunika kuphata basa toera kutsalakana mabanja awo, pontho akhafunika kuwangisa uxamwali wawo na Yahova.—1 Tim. 3:2, 4; Tito 1:6-9.
9. Ndi mabasa api anango anaphata akulu a mpingo?
9 Lero akulu a mpingo asaphatambo mabasa mazinji. Iwo ndi amwazi mphangwa. (2 Tim. 4:5) Akulu a mpingo asapangiza citsandzo cadidi cakumwaza mphangwa mwaphinga. Iwo asacita masasanyiro akumwaza mphangwa mu cisa ca mpingo, pontho asatipfundzisa toera tikhale apfundzisi na amwazi mphangwa adidi. Akulu a mpingo asatumikirambo ninga anyakutonga miseru antsisi na akusowa tsankhulo. Munthu angacita madawo, akulu a mpingo asawangisira toera kumphedza kuti akhale pontho na uxamwali na Yahova. Pontho, iwo asacita pyonsene toera mpingo upitirize kukhala wakucena. (1 Akor. 5:12, 13; Agal. 6:1) Kusiyapo pyonsene, akulu a mpingo asadziwika ninga akumbizi. (1 Ped. 5:1-3) Iwo asakhunganyika mwadidi nkhani zinacita iwo zakubuluswa m’Bhibhlya. Asawangisira toera kudziwa m’bodzi na m’bodzi mu mpingo, pontho asacedzera amwazi mphangwa. Akulu a mpingo anango asaphedzera basa yakumanga na kusasanyira Nyumba za Umambo, asaphedzera pa kukhunganya misonkhano ya gawo na ya cisa, Makomiti Anapita Ncibverano na Nyumba za Ungumi, Misoka Inacedzera Atenda na mabasa anango. Mwandimomwene akulu a mpingo asaphata basa kakamwe!
10. Thangwi yanji tisafunika kupereka takhuta thangwi ya basa inacita akulu a mpingo?
10 Yahova apikira kuti mbadapasa atumiki ace akumbizi akuti mbadaatsalakana mwadidi, natenepa iwo ‘nee akhafunika kugopabve nee kutetemera.’ (Yer. 23:4) Ndi pyenepi pidacitikira mulongo Johanna wa ku Finlandiya, mu ndzidzi wakuti mai wace akhaduwala kakamwe. Iye alonga: “Ine ndisanentseka kakamwe toera kulonga mabvero anga kuna anthu anango, mbwenye nkulu wa mpingo m’bodzi wakuti nee ndikhandziwa mwadidi andibvesera mwakupirira, acita phembero pabodzi na ine, pontho andipangiza kuti Yahova asandifuna kakamwe. Ine nee ndisakumbukabve mafala adalonga iye, mbwenye ndisakumbuka kuti ndakhala wakukhurudzika. Ine ndiri na cinyindiro cakuti Yahova antuma toera kundiphedza pa ndzidzi wakuthema.” Akulu a mpingo wanu akuphedzani tani?
11. Tinapereka tani takhuta kuna akulu a mpingo? (Onanimbo foto.)
11 Yahova asakomerwa tingapereka takhuta kuna akulu a mpingo “thangwi ya basa yawo.” (1 Ates. 5:12, 13) Mulongo Henrietta anakhala ku Finlandiya, alonga: “Ndzidzi onsene akulu a mpingo ali dzololo toera kutiphedza, mbwenye pyenepi nee pisabveka kuti iwo nee ali na pinthu pinango toera kucita peno nee asathimbanambo na nyatwa. Midzidzi inango, ine ndisapanga nkulu wa mpingo kuti: ‘Ine ndisafuna mudziwe kuti ndimwe nkulu wa mpingo wadidi.’” Mulongo unango wa ku Turquia anacemerwa Sera alonga: “Akulu a mpingo asafunika kuwangiswa toera apitirize kucita basa yawo. Tinakwanisa kuawangisa tingaalembera tsamba yakupereka takhuta, tingaacemera toera abwere kadya pabodzi na ife peno kumwaza mphangwa pabodzi na iwo.” Kodi pali na nkulu wa mpingo wakuti musakomerwa kakamwe na basa inacita iye mwaphinga? Pangizani kuti musapereka takhuta thangwi ya basa inacita iye.—1 Akor. 16:18.
Imwe munakwanisa kuwangisa atumiki akutumikira, akulu a mpingo na ayang’aniri a cisa toera apitirize kucita mwadidi mabasa awo (Onani ndima 7, 11, 15)
AYANG’ANIRI A CISA ASAWANGISA MIPINGO
12. Yezu akhaphatisira ani toera kuwangisa mipingo mu ndzidzi wa apostolo? (1 Atesalonika 2:7, 8)
12 “Amuna ninga miyoni” anango adakhazikiswa na Yezu asatumikira munjira inango. Yezu aphatisira akulu a mpingo mu Yerusalemu toera kutuma Paulu, Bharnabhe na anango ninga ayang’aniri a cisa. (Mabasa 11:22) Thangwi yanji? Ninga atumiki akutumikira na akulu a mpingo, ayang’aniri a cisa asawangisa mipingo. (Mabasa 15:40, 41) Amuna anewa asawangisira kakamwe toera kucita basa ineyi. Midzidzi inango iwo asaikha umaso wawo pangozwi toera kupfundzisa anango na kuawangisa.—Lerini 1 Atesalonika 2:7, 8.
13. Ndi mabasa api anango anacita muyang’aniri wa cisa?
13 Ayang’aniri a cisa ndzidzi onsene asacita maulendo. Anango asacita ulendo wa nsindzo wakulapha kakamwe kubuluka pa mpingo ubodzi mbaenda pa mpingo unango. Masumana onsene, muyang’aniri wa cisa asacita nkhani zizinji, asacedzera abale na alongo, asatsogolera nsonkhano wa apainiya, nsonkhano wa akulu a mpingo na misonkhano ya basa ya m’munda. Iye asakhunganyika nkhani, pontho asacita masasanyiro a misonkhano ya cisa na ya gawo. Pyaka pyonsene, iye asakhala mpfundzisi wa xikola ya apainiya, pontho asatsogolera nsonkhano wakupambulika wa apainiya a mucisa cace. Kusiyapo pyenepi, iye asacita mabasa anango akufunika, pontho midzidzi inango asafunika kucita mabasa anewa mwakucimbiza.
14. Thangwi yanji tinakwanisa kulonga kuti ayang’aniri a cisa ndi miyoni kuna mipingo?
14 Thangwi yanji tinakwanisa kulonga kuti ayang’aniri a cisa ndi miyoni kuna mipingo? M’bale unango wa ku Turquia alonga tenepa thangwi ya ayang’aniri a cisa: “Ndzidzi onsene unaticedzera iwo, ine ndisafuna kakamwe kuphedza abale na alongo a mu mpingo wathu. Ine ndadziwa ayang’aniri a cisa azinji, mbwenye nee m’bodzi wa iwo akhaoneka ninga ali na mabasa mazinji kakamwe peno ninga nee akhafuna kucedza.” Mulongo Johanna adalongwa pakutoma amwaza mphangwa pabodzi na muyang’aniri wa cisa, mbwenye iwo nee akwanisa kulonga na munthu. Mulongo Johanna alonga: “Ngakhale tenepo, ine ndisakumbuka ntsiku ineyi. Abale anga awiri akazi akhadafuluka mbaenda kakhala kutali, pontho ine ndikhadaatsuwa kakamwe. Muyang’aniri wa cisa andiwangisa, pontho andiphedza toera kuona kuti nsindzo unoyu ukhali wa ndzidzi wakucepa. Cincino panango nee tinakwanisa kukhala pabodzi na acibale athu na axamwali athu, mbwenye mu dziko ipswa tinakhala pabodzi na iwo kwenda na kwenda.” Pyenepi basi ene ndi pingasi mwa pitsandzo pinapangiza kuti ayang’aniri a cisa ndi nkhombo kuna ale anacedzera iwo.—Mabasa 20:37–21:1.
15. (a) Mwakubverana na 3 Juwau 5-8, tinapangiza tani kupereka takhuta kuna muyang’aniri wa cisa? (Onanimbo foto.) (b) Thangwi yanji tisafunika kupereka takhuta kuna akazi a abale anatsogolera mu mpingo, pontho tinacita tani pyenepi? (Onani bokosi ya nsolo wakuti “ Kumbukani Akazi Awo.”)
15 Mpostolo Juwau apanga Gayo toera atambire ayang’aniri a cisa akhaenda kacedzera mipingo. Iye alemba: “Cita pyonsene pinakwanisa iwe toera uaphedze munjira yakuti inakomeresa Mulungu.” (Lerini 3 Juwau 5-8.) Ifembo tinacita tani pyenepi? Njira ibodzi ndi kucemera muyang’aniri wa cisa toera adzadye kunyumba kwathu. Njira inango ndi kuphedzera basa yakumwaza mphangwa pa sumana yakupambulika. Leslie adalongwa pa ndima yacitanthatu asapereka takhuta kuna ayang’angiri a cisa munjira zinango. Iye alonga: “Ine ndisacita phembero kuna Yahova toera atsalakane ayang’aniri a cisa. Ine na mamunanga talembambo matsamba akupereka takhuta thangwi ya kuticedzera na kuapanga kuti atiphedza tani.” Kumbukani kuti ayang’aniri a cisa asathimbanambo na pinentso, pontho asanetambo ninga ife. Midzidzi inango iwo asabva kupha, asadzudzumika, pontho asatsukwala. Kubulukira m’mafala athu adidi peno kuapasa muoni wakucepa, Yahova anakwanisa kutiphatisira toera kutawira maphembero a ayang’aniri a cisa!—Mis. 12:25.
TISAFUNA ABALE AZINJI TOERA KUTSOGOLERA
16. Mwakubverana na Misangani 3:27, ndi mibvundzo ipi yakuti m’bale m’bodzi na m’bodzi asafunika kubvundzika?
16 Pa dziko yonsene yapantsi, asafunika abale azinji toera kutsogolera mu mpingo. Khala ndimwe m’bale wakubatizwa, kodi imwe ‘munakwanisa kuphedza’? (Lerini Misangani 3:27.) Kodi imwe musafuna kutumikira ninga ntumiki wakutumikira? Khala imwe ndimwe ntumiki wakutumikira, musafuna kutumikira ninga nkulu wa mpingo toera kuphedza kakamwe abale na alongo mu mpingo? c Kodi imwe munakwanisa kucita macinjo mu umaso wanu toera kukurusari Xikola ya Amwazi Mphangwa a Umambo? Imwe munapfundza pizinji kakamwe ku xikola ineyi, pontho inakuphedzani toera muphatisirwe kakamwe na Yezu. Mungaona kuti nee munakwanisa kucita pinthu pyenepi, citani phembero kuna Yahova. Mphembeni toera akupaseni nzimu wakucena toera mukwanise kucita mwadidi mabasa anapaswa imwe.—Luka 11:13; Mabasa 20:28.
17. Abale anaphatisirwa toera kutitsogolera asapangizanji thangwi ya Mambo wathu Yezu Kristu?
17 Abale anaphatisirwa na Yezu toera kutitsogolera asapangiza pakweca kuti iye ali kupitiriza kutitsalakana mu ntsiku zino zakumalisa. (Mat. 28:20) Ife tisapereka takhuta kakamwe thangwi yakukhala na Mambo waufuni na wakupasa mwakudzala manja wakuti asadziwa pinafuna ife, pontho asatipasa abale toera kutiphedza. Natenepa sakani miyai toera kupangiza kuti musapereka takhuta kuna abale anewa anaphata basa mwakuwanga. Pontho lekani kuduwala kupereka takhuta kuna Yahova wakuti asatipasa “muoni onsene wadidi na wakulungama.”—Tiya. 1:17.
NYIMBO 99 Nsoka Ukulu wa Abale
a Akulu a mpingo anatumikira ninga Mathubo Akutonga, anyakuphedzera Mathubo Akutonga, abale a Komiti ya Filiali na ale anatsalakana mabasa anango mu gulu ya Yahova asacitambo khundu ya “amuna ninga miyoni.”
b Madzina anango acinjwa.
c Toera kudziwa pinafunika imwe kucita toera kutumikira ninga ntumiki wakutumikira peno nkulu wa mpingo, onani misolo yakuti “Abale, Kodi Muli Kuwangisira Toera Kukhala Ntumiki Wakutumikira?” na “Abale, Musafuna Kukhala Nkulu wa Mpingo?” mu Ncenjezi wa Novembro wa 2024.
