1-3. Ninji pidakhonda kucita mprofeta wa ku Yuda, mphapo ninji pidacitika? (Onani cithundzithundzi cakutoma.)

Mambo Yerobhoamu wa ku Israeli akhadamanga guwa toera kulambira alungu authambi mu nzinda wa Bhetelehemu. Yahova atuma mprofeta wace buluka ku Yuda toera kalonga mphangwa zakutonga kuna Yerobhoamu. Mprofeta unoyu wakucepeseka abvera Yahova mbaenda kalonga mphangwa. Mambo aipirwa na mprofeta, mbwenye Yahova antsidzikiza.—1 Amambo 13:1-10.

² Yahova akhadapanga mprofeta toera akhonde kudya peno kumwa mu Israeli, pontho abwerere kunyumba na njira inango. Pakubwerera, mprofeta unoyu agumanikana na mamuna wakukalamba adan’nyengeza kuti iye akhali na mphangwa za Yahova. Nkhalamba unoyu aphemba mprofeta toera kuenda kunyumba kwace kadya na kumwa. Mprofeta akhonda kubvera Yahova mbaenda na nkhalamba. Yahova nee akomerwa. Pakubwerera kwace kunyumba, iye adyiwa na nkhalamu.—1 Amambo 13:11-24.

 ³ Ife nkhabe dziwa kuti thangwi yanji mprofeta abvera nkhalamba unoyu, m’mbuto mwakubvera Yahova. Mbwenye pinadziwa ife ndi pyakuti iye nee apitiriza ‘kufamba mwakucepeseka’ na Yahova. (Lerini Mikeya 6:8.) M’Bhibhlya, kufamba na Yahova pisaphataniza kunyindira Yahova, kutowezera pitsogolero pyace na kumbvera. Munthu wakucepeseka asadziwa kuti asafunika kucita phembero ntsiku zonsene. Mprofeta mbadakhala wakucepeseka, mbadaphemba Yahova toera kudziwa khala pitsogolero pyace pyacinja peno nkhabe. Midzidzi inango, tinafunambo kucita pisankhulo pyakunentsa mbitikhonda kudziwa pinafuna Yahova. Mbwenye tingakhala akucepeseka, tinadzaphemba citsogolero ca Yahova toera kucalira kucita madodo makulu.

4. Tinapfundzanji mu nsolo uno?

⁴ Mu nsolo udamala, tapfundza kuti pisaphatanizanji kukhala wakucepeseka, pontho thangwi yanji ndi kwakufunika kwa ife lero. Mphapo tinakwanisa tani kukhala akucepeseka kakamwe? Ndi makhaliro api akuti anakwanisa kuyesera kucepeseka kwathu, toera kuona khala ndife akucepeseka peno nkhabe? Tendeni tidinge matatu mwa makhaliro anewa.—Misangani 11:2.

5, 6. Kodi Bharzilai apangiza tani kuti akhali wakucepeseka?

⁵ Pinacita ife mu ndzidzi unacinja makhaliro athu peno mabasa athu pisapangiza khala ndife akucepeseka peno nkhabe. Tinakwanisa kupfundza kubulukira mu citsandzo ca Bharzilai, xamwali wakukhulupirika wa Mambo Dhavidhi. Pikhali Bharzilai na pyaka 80 pyakubalwa, Dhavidhi amphemba toera kukhala naye kunyumba kwace. Maseze unoyu ukhali mwai ukulu, Bharzilai alonga kuti pikhali pyadidi kakamwe kupasa mwai unoyu mamuna anacemerwa Kamaani, wakuti panango akhali mwanace.—2 Samwele 19:31-38.

⁶ Thangwi yanji Bharzilai nee atawira phembo ineyi? Kodi akhafuna kucalira basa peno kukhala na umaso wakukhonda nentsa? Nkhabe, thangwi Bharzilai akhali wakucepeseka. Iye adzindikira kuti makhaliro ace akhadacinja, natenepa iye aona kuti nee mbadakwanisa. (Lerini Agalata 6:4, 5.) Ninga Bharzilai, tisafunika kukhala akucepeseka. M’mbuto mwakunyerezera pinafuna ife peno kulandanisa pinacita ife na anango, tisafunika kunyerezera kupasa Yahova pinakwanisa ife. Pyenepi ndi pyakufunika kakamwe kupiringana basa yakupambulika peno kudziwika kakamwe. (Agalata 5:26) Tingakhala akucepeseka, tinadzaphata basa pabodzi na abale athu toera kusimba Yahova na kuphedza anango.—1 Akorinto 10:31.

7, 8. Kodi kucepeseka kunatiphedza tani toera kucalira kudzinyindira?

⁷ Panango pinakhala pyakunentsa kucepeseka tingapaswa mabasa akuthimizirika peno cidzo. Tinakwanisa kupfundza mu citsandzo ca Nehemiya. Pidabva iye kuti anthu a ku Yerusalemu akhanentseka kakamwe, iye aphemba ciphedzo ca Yahova. (Nehemiya 1:4, 11) Yahova atawira phembero ya Nehemiya. Mambo Artaksersi akhazikisa Nehemiya ninga ntongi. Maseze Nehemiya akhali ntongi na nyakupfuma, iye nee akhadzinyindira. Iye akhasaka citsogolero ca Yahova mbaleri Mwambo wace  ntsiku zonsene. (Nehemiya 8:1, 8, 9) Nehemiya akhatonga anthu azinji. Mbwenye cipo aphatisira utongi wace toera kuphindulisa umaso wace peno kutsalakana anango mwakuipa.—Nehemiya 5:14-19.

⁸ Ninga Nehemiya, tingatambira miyai yakuthimizirika peno tingacinjwa basa, tisafunika kucita pyonsene toera kukhala akucepeseka. Nee tisafunika kunyindira maluso athu peno pyakugumana napyo pyathu. Kodi munthu anatoma tani kudzinyindira? Mwacitsandzo, nkulu wa mpingo panango anatsalakana mabasa a mpingo mwakukhonda kucita phembero. M’bale peno mulongo panango anatoma kucita cisankhulo buluka penepo mbaphemba Yahova toera kupasa nkhombo cisankhulo cace. Mbwenye munthu wakucepeseka nee asadzinyindira, maseze acite pinthu pyakuti asapidziwa. Iye ndzidzi onsene asadziwa kuti maluso ace nee alandana na a Yahova. (Lerini Misangani 3:5, 6.) Lero, anthu azinji asacita pinafuna iwo na asayesera kupitira anango patsogolo. Mbwenye atumiki a Yahova ndi akusiyana. Ife nkhabe kunyerezera kuti kukhala na maluso mazinji kunaticitisa kukhala anthu adidi kupiringana anango a m’banja mwathu peno mu mpingo. M’mbuto mwace, tisafunika kukumbuka pinadikhira Mulungu kwa ife mbatiphata basa pabodzi na abale na alongo athu.—1 Timoti. 3:15.

9, 10. Kodi kucepeseka kunatiphedza tani tingapwazwa na anango?

⁹ Tinakwanisa kukhala akutsukwala tingapwazwa na anango. Pyenepi pyacitika na Yana. Maseze mamunace akhanfuna kakamwe, Yana akhatsukwala thangwi Penina, nkhazibace, akhansingirira ndzidzi onsene. Yana akhafuna kubala, mbwenye pikhacimwanika. Ntsiku inango Yana akhali wakutsukwala kakamwe, natenepa iye aenda ku tabhernakulu toera kacita phembero. Nyantsembe Wankulu Eli, amuona akulira mbampumpha kuti akhadaledzera! Yana mbadatsukwala pontho kakamwe. Mbwenye iye atawira Eli mwacilemedzo. Buluka penepo, Yana acita phembero inapangiza kuti akhakhulupira Yahova na kunfuna.—1 Samwele 1:5-7, 12-16; 2:1-10.

¹⁰ Kucepeseka kunatiphedza toera kupitiriza kukunda pyakuipa mukucita pyadidi. (Aroma 12:21) Dziko ya Sathani yadzala na pinthu pyakuipa. Natenepa nee tisafunika kudzudzumika tingatsalakanwa mwakuipa. (Masalmo 37:1) Panango pinatitsukwalisa kakamwe tingakhala na mikandzo na abale na alongo athu mu mpingo. Pyenepi pingacitika, tisafunika kutowezera Yezu. Bhibhlya isalonga: ‘Pakutikanwa, nee abwezerambo.’ M’mbuto mwace, ‘iye akhaperekeka kuna Ule anatonga mwaulungami.’ (1 Pedro 2:23) Yezu akhali  wakucepeseka na akhadziwa kuti Yahova mbadamalisa uipi onsene. (Aroma 12:19) Ife tisafunikambo kukhala akucepeseka ‘mbitikhonda kubwezera pyakuipa na pyakuipa.’—1 Pedro 3:8, 9.

11, 12. (a) Tinakwanisa tani kukhala akucepeseka anango angatisimba? (b) Tinapangiza tani kuti ndife akucepeseka m’mabvaliro na m’macitiro athu?

¹¹ Kucepeseka kwathu kunayeserwambo anango angatisimba. Estere asimbwa mwakubwereza-bwereza. Iye akhali m’bodzi wa akazi akubalika kakamwe mu utongi wa Persiya. Mu caka camumphu, iye pabodzi na akazi anango akhacita mapika akudzibalikisa toera kusankhulwa na mambo. Estere ndiye adasankhuliwa na mambo toera kukhala nyanyi. Mbwenye matsalakaniro onsene akhacitwa iye, nee acinja makhaliro ace, pontho nee akhanyerezera basi ene pya iye. Iye akhali wakucepeseka, wakukoma ntima na wacilemedzo.—Estere 2:9, 12, 15, 17.

¹² Tingakhala akucepeseka, tinabvala na kucita pinthu munjira inapangiza kuti tisalemedza anango na ife ene. M’mbuto mwakugaya peno kuyesera kudzumatirisa anango, tinadzakhala ‘akupfulika na akukhurudzika.’ (Lerini 1 Pedro 3:3, 4; Yeremiya 9:23, 24) Mukupita kwa ndzidzi mabvero athu anapangizika kubulukira m’malongero na m’macitiro athu. Mwacitsandzo, panango tinayesera kucitisa anango kunyerezera kuti ndife akupambulika thangwi ya pinthu pinacita ife, pinadziwa ife peno thangwi ya munthu anadziwa ife. Panango tinayeserambo kupangiza ninga tacita pinthu pyakufunika kakamwe, maseze taphedzwa na anango toera kucita pyenepi. Mbwenye nyerezerani basi pya Yezu. Iye mbadakwanisa kudzumatirisa anthu na udziwisi wace. Mbwenye kazinji kene akhalonga pinthu mukuphatisira Mafala a Mulungu. Iye nee akhafuna kuti anthu ampase mbiri. Ndzidzi onsene akhafuna kuti mbiri iende kuna Yahova.—Jwau 8:28.

13, 14. Kucepeseka kunatiphedza tani toera kucita pisankhulo pyadidi?

¹³ Tisafunika kukhala akucepeseka pakucita pisankhulo, peno anango angacita pisankhulo pinakhuya ife. Pikhali mpostolo Paulu ku Sezareya, iye akhafuna kuenda ku Yerusalemu toera kamalisa basa ikhadapaswa iye na Yahova. Mbwenye mprofeta Agabo apanga Paulu kuti angaenda, mbadamangwa, ngakhale kuphiwa. Natenepa abale adembetera Paulu toera akhonde kuenda. Mbwenye Paulu atonga kuenda ku Yerusalemu. Kodi ndi thangwi yakuti akhanyindira mphambvu zace? Nkhabe, Paulu akhali wakucepeseka na akhanyindira mwakukwana Yahova. Abale akhalimbo akucepeseka. Natenepa iwo aphedzera cisankhulo ca Paulu mbansiya toera aende.—Machitiro 21:10-14.

¹⁴ Kucepeseka kunatiphedza toera kucita pisankhulo pyadidi maseze nee tisadziwa pinafuna kucitika. Mwacitsandzo, panango tinanyerezera kutoma kupita m’basa ya ndzidzi onsene. Kodi ninji pinafuna citika tingaduwala? Ndiye tani anyakubala athu angaduwala mbafuna ciphedzo cathu? Tinadzacitanji tingakalamba? Nee tinakwanisa kutawira mibvundzo ineyi yonsene, maseze tiinyerezere na kucita phembero. (Koelete 8:16, 17) Mbwenye tinganyindira Yahova, tinadzindikira na kukomerwa na pinthu pinakwanisa ife. Tinadzadinga unyomonyomo onsene, kuphemba uphungu na kusaka citsogolero ca Yahova. Buluka penepo tisafunika  kutowezera citsogolero ca nzimu wa Yahova. (Lerini Koelete 11:4-6.) Yahova anakwanisa kupasa nkhombo pisankhulo pyathu, peno kutiphedza toera kucinja maonero athu.—Misangani 16:3, 9.

15. Kodi kuikha manyerezero athu kuna Yahova kunatiphedza tani toera kukhala akucepeseka?

¹⁵ Tinakwanisa tani kukhala akucepeseka kakamwe? Tinadinga njira zinai. Yakutoma, tisafunika kuikha manyerezero athu kuna Yahova, mbatinyerezera mwacidikhodikho makhaliro ace. Tingalandanisika na Yahova, tinaona kuti ndife akucepa kakamwe na tisadziwa pinthu pyakucepa kakamwe. (Izaiya 8:13) Kumbukani kuti ife nee tikutumikira munthu peno anju, mbwenye Mulungu Wamphambvu Zonsene.—1 Pedro 5:6.

16. Kodi kunyerezera ufuni wa Mulungu kunatiphedza tani toera kukhala akucepeseka?

¹⁶ Njira yaciwiri toera kukhala akucepeseka kakamwe ndi kunyerezera kuti Yahova asatifuna kakamwe. Paulu alandanisa mpingo na manungo a munthu. Makhundu onsene a manungo a munthu adacita Yahova ndi akufunika. (1 Akorinto 12:23, 24) Ife tonsene ndife akufunikambo kwa Yahova. Iye nkhabe kutilandanisa na anango, pontho nee asasiya kutifuna tingadodoma. Tinakwanisa kukhala akutsidzikizika mukudziwa kuti Yahova asatifuna.

17. Tinaphindula tani tingayang’ana pinthu pyadidi mwa anango?

¹⁷ Yacitatu, tinakhala akucepeseka kakamwe tingayang’ana pinthu pyadidi mwa anango, ninga pisacita Yahova. Tingakhala akucepeseka nee tinadzakhala ninga tisadziwa pinthu kakamwe, nee kupanga anango pinafunika iwo kucita. Mbwenye tinadzaphemba maonero a anango na kuphatisira maonero awo. (Misangani 13:10) Tisakomerwa na abale na alongo athu angatambira miyai yakupambulika. Pontho tisapereka takhuta kuna Yahova, thangwi ya kutitawirisa kuntumikira.—1 Pedro 5:9.

18. Kodi kupfundzisa cikumbuntima cathu kunatiphedza tani toera kukhala akucepeseka kakamwe?

¹⁸ Njira yacinai, tinakhala akucepeseka kakamwe tingaphatisira midida ya Bhibhlya toera kupfundzisa cikumbuntima cathu. Midida ineyi isatipfundzisa kuti Yahova asabva na asanyerezera tani. Tingapfundza kuona pinthu ninga munapionera Yahova, tinacita pisankhulo pinankomeresa. Tingapfundza, kucita phembero na kuphatisira pinapfundza ife, tinadzakhala na cikumbuntima cakuwanga. (1 Timoti 1:5) Tinapfundza kuona anango ninga akulu. Tingacita pyenepi, Yahova asapikira kuti anadzamalisa kutipfundzisa na kutiphedza toera kukhala akucepeseka.—1 Pedro 5:10.

19. Ninji pinafuna kutiphedza toera kukhala akucepeseka kwenda na kwenda?

¹⁹ Musakumbuka mprofeta wa ku Yuda adadinga ife pakutoma kwa nsolo uno? Iye aluza umaso wace na uxamwali wace na Yahova thangwi yakukhonda kucepeseka. Mbwenye ife tinakwanisa kukhala akucepeseka ngakhale m’makhaliro akunentsa. Citsandzo ca atumiki azinji akukhulupirika a Yahova cisapangiza kuti pyenepi ndi pyakukwanisika. Munapitiriza ife kutumikira Yahova, tisapitirizambo kun’nyindira kakamwe. (Misangani 8:13) Mwakukhonda tsalakana makhaliro athu, tinakwanisa kupitiriza kufamba na Yahova. Unoyu ndi mwai ukulu kakamwe. Natenepa, tendeni ticite pyonsene pinakwanisa ife toera kukhala akucepeseka mbatifamba na Yahova kwenda na kwenda.