1. Kodi Yahova aticita na maluso api akupambulika?

YAHOVA acita anthu na maluso akupambulika kakamwe. Iye atipasa luso yakunyerezera, yakuti isatiphedza toera kutsalakana mikandzo na kusasanyira tsogolo yathu. (Misangani 2:11) Iye atipasa mphambvu toera tikwanise kucita pinthu pinafuna ife. (Afilipi 2:13) Iye atipasambo cikumbuntima, cakuti cisatiphedza kudzindikira cinthu cadidi na cakuipa. Cikumbuntima cathu cisatiphedza toera kucalira kucita madawo na kusasanyira madodo athu.—Aroma 2:15.

2. Kodi Yahova asadikhira kuti tiphatisire tani maluso athu?

² Yahova asadikhira kuti tiphatisire maluso athu munjira yadidi. Thangwi yanji? Thangwi iye asatifuna na asadziwa kuti tinadzakhala akutsandzaya tingaphatisira mwadidi maluso anewa. Mwacitsandzo, Bhibhlya isalonga kuti pinanyerezera munthu waphinga, pisafamba mwadidi. Pontho isapangiza  kuti tingacita cinthu, tisafunika kucicita na mphambvu zathu zonsene. (Misangani 21:5; Koelete 9:10) Kusiyapo pyenepi, Bhibhlya isalonga kuti tisafunika kucita pinthu pyadidi kuna anthu onsene na kuphatisira maluso athu toera kuphedza anango. (Agalata 6:10; 1 Pedro 4:10) Pyenepi pisapangiza kuti Yahova asafuna kuti tiphindule na maluso athu na kuphindulisambo anango.

3. Ndi pinthu pipi pyakuti ife nkhabe kwanisa kupicita?

³ Yahova asafuna kuti tiphatisire maluso athu, mbwenye asadziwa kuti nee tisakwanisa pyonsene. Mwacitsandzo, ife nkhabe kwanisa kumalisa kusowa kwathu ungwiro, madawo na kufa. (1 Amambo 8:46) Pontho, ife nkhabe kwanisa kuonera pyonsene pinacita anthu, thangwi munthu onsene ali na ufulu wakusankhula. Mwakukhonda tsalakana pinthu pinakwanisa ife kucita peno maluso ali na ife, cipo tinadzakhala akulandana na Yahova.—Izaiya 55:9.

4. Kodi tinadzadinganji mu nsolo uno?

⁴ Tisafunika kusaka ciphedzo ca Yahova ndzidzi onsene, mbitinyindira kuti iye anatitsalakana na kuticitira pinthu pinacimwana ife. Mbwenye, Yahova asafunambo kuti ticite pyonsene pinakwanisa ife toera kutsalakana mikandzo na kuphedza anango. (Lerini Masalmo 37:3, Tradução do Novo Mundo) Tisafunika ‘kunyindira Yahova mbaticita pinthu pyadidi.’ Tinacita tani pyenepi? Tendeni tidinge citsandzo ca Nowa, Dhavidhi na atumiki anango akukhulupirika a Yahova akuti akhan’nyindira. Tinadzaona pinthu pikhakwanisa iwo  kucita na pikhacimwana iwo, mbaikha manyerezero awo mu pinthu pikhakwanisa iwo kucita.

5. Fokotozani makhaliro a mu ndzidzi wa Nowa.

⁵ Nowa akakhala n’dziko yakudzala na uphanga na makhaliro aulukwali. (Genesi 6:4, 9-13) Ngakhale tenepo, iye akhadziwa kuti Yahova mbadafudza dziko ineyi yakuipa. Nowa nee akhakomerwa na pinthu pyakuipa pikhacita anthu. Mbwenye, iye adzindikira pinthu pikhacimwana iye kucita na pikhakwanisa iye.

6, 7. (a) Ninji pikhacimwana kucita Nowa? (b) Kodi makhaliro athu alandana tani na a ntsiku za Nowa?

⁶ Pinthu pikhacimwana Nowa kucita: Nowa akhamwaza mphangwa za Yahova thangwi ya Cigumula, mbwenye nee mbadakakamiza anthu toera azitawire. Pontho nee mbadakwanisa kucitisa Cigumula kucitika mwakucimbiza. Nowa akhanyindira kuti Yahova mbadakwanirisa pikiro Yace yakumalisa uipi, pontho akhakhulupira kuti Mulungu mbadapicita mu ndzidzi wakuthema.—Genesi 6:17.

⁷ Ife tikukhalambo n’dziko yakudzala na uipi, mbwenye tisadziwa kuti Yahova apikira kuifudza. (1 Jwau 2:17) Tisadziwambo kuti nee tinakwanisa kukakamiza anthu toera atawire ‘mphangwa zadidi za Umambo.’ Pontho nkhabe kwanisa kucitisa kuti ‘nyatwa ikulu’ itome mwakucimbiza. (Mateo 24:14, 21) Ninga Nowa, ife tisafunika kukhala na cikhulupiro cakuwanga, mbatinyindira kuti Mulungu anamalisa uipi onsene mwakukhonda dembuka. (Masalmo 37:10) Ife tiri na cinyindiro cakuti Yahova  nee anatawirisa kuti dziko yakuipa ipitirize.—Habakuki 2:3.

8. Tisapfundzanji na citsandzo ca m’bale Malcolm?

⁸ Pinthu pikhakwanisa Nowa kucita: M’mbuto mwakubwerera nduli thangwi ya pikhacimwana iye kucita, Nowa aikha manyerezero ku pinthu pikhakwanisa iye. Nowa akhamwaza mphangwa za Yahova thangwi ya Cigumula. (2 Pedro 2:5) Basa ineyi yamphedza toera kukhala na cikhulupiro cakuwanga. Kusiyapo kumwaza mphangwa, iye akhatowezera pitsogolero pya Yahova toera kumanga bote.—Lerini Ahebere 11:7.

9. Tinatowezera tani citsandzo ca Nowa?

⁹ Ninga Nowa, ife tiri na pinthu pizinji toera kucita ‘m’basa ya Mbuya.’ (1 Akorinto 15:58) Mwacitsandzo, ife tinakwanisa kuphedzera basa yakumanga na kusasanyira Nyumba zathu za Umambo na za Misonkhano, kuphedzera pa misonkhano ya cisa na ya gawo, kutumikira pa Bheteli na pa ofesi yakuthumburuzira mabukhu. Kusiyapo pyenepi, ife tiri na basa yakumwaza mphangwa yakuti isawangisa cidikhiro cathu thangwi ya ntsogolo. Mulongo unango alonga kuti angalonga na anango thangwi ya nkhombo za Umambo wa Mulungu, asaona kuti anthu nee ali na cidikhiro, pontho asaona nyatwa zawo ninga za kwenda na kwenda. Ninga pidalonga mulongo unoyu, ife tiri na cidikhiro, pontho cisakhala cakuwanga tingadziwisambo anango. Ico cisatiphedzambo toera kupitiriza kufamba munjira ya umaso!—1 Akorinto 9:24.

10. Fokotozani pinthu pyakuipa pidacita Dhavidhi.

¹⁰ Mambo Dhavidhi akhali mamuna wakukhulupirika, pontho Yahova akhanfuna kakamwe. (Machitiro 13:22) Ngakhale tenepo, Dhavidhi acita madawo makulu mukupita m’mabonde na Bateseba. Kusiyapo pyenepi, iye ayesera kubisa madawo ace mukucita masasanyiro toera kuphesa mamunace Bateseba kunkhondo. Dhavidhi aphatisira Uriya toera kukwata tsamba ikhalonga pya kuphiwa kwace! (2 Samwele 11:1-21) Mukupita kwa ndzidzi, madawo a Dhavidhi adzadziwika. (Marko 4:22) Buluka penepo, Dhavidhi acitanji?

11, 12. (a) Ninji pikhacimwana kucita Dhavidhi pakumala kudawa? (b) Kodi Yahova anacitanji kwa ife tingatcunyuka?

¹¹ Pinthu pikhacimwana Dhavidhi kucita: Dhavidhi nee mbadakwanisa kufudza pikhadacita iye. Mwandimomwene, iye mbadathabuka mu umaso wace onsene thangwi ya madawo ace. (2 Samwele 12:10-12, 14) Na thangwi ineyi iye akhafunika kukhala na cikhulupiro. Iye akhafunika kunyindira kuti angatcunyuka, Yahova anamulekerera na kumphedza toera kupirira nyatwa za madawo ace.

 ¹² Nakuti ndife akusowa ungwiro, tonsene tisadawa. Mbwenye madawo anango ndi makulu kupiringana anango, pontho midzidzi inango nee tinakwanisa kufudza madawo athu. Ife panango tinathabukambo thangwi ya macitiro athu. (Agalata 6:7) Mbwenye tisanyindira pikiro ya Mulungu yakuti tingatcunyuka, iye anadzatiphedza m’midzidzi ya nyatwa, maseze zicitike thangwi ya macitiro athu.—Lerini Izaiya 1:18, 19; Machitiro 3:19.

13. Ninji pidacita Dhavidhi toera kukhala pontho xamwali wa Yahova?

¹³ Pinthu pikhakwanisa Dhavidhi kucita: Dhavidhi akhafuna kukhala pontho xamwali wa Yahova. Iye acita tani pyenepi? Dhavidhi atawira kuphedzwa na Yahova. Mwacitsandzo, iye atawira kusandikwa na Yahova kubulukira kwa mprofeta Natane. (2 Samwele 12:13) Pontho Dhavidhi aphembera kwa Yahova mbabweka madawo ace, kupangiza kuti iye akhafunadi kukhala pontho xamwali wa Yahova. (Masalmo 51:1-17) M’mbuto mwakupasika mulando, Dhavidhi apfundza thangwi ya madawo ace. Iye cipo acita pontho madawo anewa makulu. Mukupita kwa pyaka, iye alowa mbali wakukhulupirika, natenepa Yahova asankumbuka munjira ineyi.—Ahebere 11:32-34.

14. Tisapfundzanji kubulukira mu citsandzo ca Dhavidhi?

¹⁴ Tisapfundzanji kubulukira mu citsandzo ca Dhavidhi? Tingacita madawo makulu, tisafunika kutcunyuka na ntima onsene, kubweka madawo athu kuna Yahova, mbatiphemba kulekererwa. (1 Jwau 1:9) Tisafunika kulonga kuna akulu a mpingo, thangwi iwo anakwanisa kutiphedza toera kukhala pontho axamwali a Yahova. (Lerini Tyago 5:14-16.) Tingatawira ciphedzo ca Yahova, tinapangiza kuti tisanyindira pikiro yace yakuti anatilekerera. Kusiyapo pyenepi, tisafunika kupfundza kubulukira m’madawo athu mbatipitiriza kutumikira Yahova mwacinyindiro.—Ahebere 12:12, 13.

15. Kodi tisapfundzanji na citsandzo ca Yana?

¹⁵ Imwe panango musakumbuka atumiki akukhulupirika anango adalembwa m’Bhibhlya akuti akhanyindira Yahova, mbacita pyonsene pikhakwanisa iwo m’makhaliro akunentsa. Mwacitsandzo, nyerezerani pya Yana. Iye akhala ndzidzi uzinji nee kubala, pontho nee mbadacita cinthu toera kucinja makhaliro anewa. Mbwenye akhanyindira ciphedzo ca Yahova. Iye apitiriza kulambira pa tabhernakulu na kucita phembero kuna Yahova, mbampanga mabvero ace. (1 Samwele 1:9-11) Tisapfundzanji na citsandzo ca Yana? Tingakhala na nyatwa za ungumi peno nyatwa zinango zakuti nee tinakwanisa kuzicinja, tisafunika kuzisiya kuna Yahova mbitinyindira kuti iye anatitsalakana. (1 Pedro 5:6, 7) Pontho tisafunika kucita pyonsene pinakwanisa ife toera kuphindula na misonkhano ya mpingo na maprogramu  anango anapereka gulu ya Yahova.—Ahebere 10:24, 25.

16. Kodi anyakubala asapfundzanji na citsandzo ca Samweli?

¹⁶ Ndiye tani kwa anyakubala akukhulupirika akuti anawo asiya kutumikira Yahova? Mprofeta Samweli nee akakamiza anace toera akhale akukhulupirika kwa Mulungu. (1 Samwele 8:1-3) Iye asiya nkhani ineyi m’manja mwa Yahova. Mbwenye Samweli acita pyonsene pikhakwanisa iye toera kupitiriza kukhala wakukhulupirika na kukomeresa Yahova. (Misangani 27:11) Lero, anyakubala azinji Acikristu asathimbanambo na nkandzo ubodzi ene. Iwo asanyindira kuti ninga baba adalongwa mu nsangani wa Yezu, Yahova ndzidzi onsene ali dzololo toera kutambira anthu anatcunyuka mbabwerera kwa iye. (Luka 15:20) Mu ndzidzi ubodzi ene, anyakubala anakwanisa kuwangisira toera kupitiriza kukhala akukhulupirika kwa Yahova, mbadikhira kuti citsandzo cawo cinadzacitisa anawo kubwerera kwa Yahova.

17. Thangwi yanji nkazi wa nzice ndi citsandzo cadidi kwa ife?

¹⁷ Citsandzo cinango ndi ca nkazi wa nzice wa mu ntsiku za Yezu. (Lerini Luka 21:1-4.) Iye nee mbadakwanisa kusasanyira uipi ukhacitika pa templo, nee kucinja makhaliro ace aumphawi. (Mateo 21:12, 13) Mbwenye kunyindira kwace Yahova kwamphedza toera kuphedzera ulambiri wandimomwene. Iye apangiza kupasa mwakudzala manja mukupereka “kobiri ziwiri zing’ono” zikhali na iye. Natenepa nkazi unoyu wakukhulupirika apangiza kuti akhanyindira Yahova mwakukwana. Iye akhadziwa kuti angaikha basa ya Yahova pa mbuto yakutoma, mbadadzakhala na pinthu pikhafuna iye. Mu njira ibodzi ene, ife tisanyindira kuti tingaikha Umambo wa Mulungu pa mbuto yakutoma, Yahova anadzatipasambo pinafuna ife.—Mateo 6:33.

¹⁸ Abale na alongo athu azinji lero asapangizambo kunyindira Yahova mukuikha manyerezero awo mu pinthu pinakwanisa iwo, m’mbuto mwakubwerera nduli thangwi ya pinthu pinacimwana iwo. Dingani citsandzo ca m’bale Malcolm, wakuti akhali wakukhulupirika mpaka kufa kwace mu caka ca 2015. Iye na nkazace atumikira Yahova mu pyaka pizinji, mbwenye akhathimbanambo na pinentso. “Umaso midzidzi inango nkhabe nyindirika, nkhabe dziwika, pontho ndi wakunentsa. Mbwenye Yahova asapasa nkhombo ale anan’nyindira.” Iye athimiza, “Citani phembero toera mukwanise kukhala waphinga m’basa ya Yahova. Ikhani manyerezero anu mu pinthu pinakwanisa imwe kucita, tayu mu pinthu pinacimwana imwe.” *—Onani cidzindikiro capantsi.

19. (a) Thangwi yanji lemba ya caka ca 2017 ndi yakuthema kakamwe? (b) Munaphatisira tani lemba ineyi mu umaso wanu?

¹⁹ Dziko ino yakuipa ikupitiriza kutekera. Pontho tisadikhira kuti pinthu pinapitiriza kutekera kakamwe. (2 Timoti 3:1, 13) Ndi pyakufunika kakamwe kucalira kubwerera nduli thangwi ya nyatwa zinathimbana na ife. M’mbuto mwace, tisafunika kunyindira Yahova na kuikha manyerezero athu mu pinthu pinakwanisa ife kucita. Ndi thangwi yace lemba ya caka ca 2017 ndi yakuthema kakamwe: ‘Nyindirani Yahova mbamucita pinthu pyadidi’!—Masalmo 37:3.