1, 2. Thangwi yanji Yahova akhonda Sauli? (Onani cithundzithundzi cakutoma.)

MU NDZIDZI udasankhula Yahova Sauli toera kukhala mambo, Sauli akhali wakucepeseka. (1 Samwele 9:1, 2, 21; 10:20-24) Mbwenye pidakhala iye mambo, Sauli adzakhala wakudzikuza. Ndzidzi unango Afilisti aenda kacita nkhondo na Aisraeli. Mprofeta Samweli akhadapanga Sauli kuti mbadabwera toera kupereka ntsembe kuna Yahova. Mbwenye Samweli mbadzati kufika, Aisraeli akhadatoma kugopa na azinji a iwo akhathawa Sauli. M’mbuto mwakudikhira Samweli, iye acimwana kupirira mbapereka ntsembe. Sauli nee akhali na cidzo cakupereka ntsembe, pontho Yahova aipirwa napyo.—1 Samwele 13:5-9.

² Pidafika Samweli, asandika Sauli thangwi yakukhonda kubvera Yahova. Mbwenye Sauli nee adzindikira kuti akhadacita cinthu cakuipa. Iye asaka mathangwi toera kulekererwa, ngakhale kupasa mulando anango thangwi ya madodo ace. (1 Samwele 13:10-14) Kutomera penepo, Sauli acita pinthu pizinji mwakudzikuza. Natenepa Yahova ankhonda toera kupitiriza  ninga mambo. (1 Samwele 15:22, 23) Umaso wa Sauli watoma mwadidi, mbwenye pakumalisa wadzakhala wakuipa.—1 Samwele 31:1-6.

3. (a) Kodi anthu azinji asanyerezeranji thangwi yakucepeseka? (b) Ndi mibvunzo ipi inafuna kudzatawira ife?

³ Anthu azinji lero asaona kuti nee anakwanisa kukhala akucepeseka mu ndzidzi ubodzi ene mbakhala na umaso wakutsandzaya peno kukhala na basa. Iwo asadzikuza toera kuoneka ninga anthu apadzulu kupiringana anango. Mwacitsandzo, nyakutsogolera pinthu pya masendzekero na pinthu pyandale alonga: “Fala yakucepeseka nkhabe kuphata basa kwa ine—cipo inadzaphata basa.” Mphapo thangwi yanji Nkristu asafunika kukhala wakucepeseka? Kodi kucepeseka ninji? Mu nsolo uno, tinadzatawira mibvundzo ineyi. Nsolo unatowera, tinadzaona kuti tinapitiriza tani kukhala akucepeseka ngakhale m’makhaliro akunentsa.

4. Kodi macitiro akudzikuza ninji?

⁴ Bhibhlya isapangiza kuti kudzikuza ndi kwakusiyana na kucepeseka. (Lerini Misangani 11:2.) Dhavidhi adembetera Yahova: ‘Khondesani ntumiki wanu kucita pinthu mwakudzikuza.’ (Masalmo 19:13) Kodi macitiro akudzikuza ninji? Ndikucita pinthu pyakuti ife nkhabe cidzo cakupicita, panango thangwi ndife anthu akukhonda pirira peno akudzikuza. Midzidzi inango tonsene tisacita pinthu mwakudzikuza thangwi ndife akusowa ungwiro. Ninga pidapfundza ife mu citsandzo ca Sauli, kudzikuza kungakhala nsambo, Yahova nee anadzakomerwa. Lemba ya Masalmo 119:21 isalonga kuti Yahova ‘anadzasandika anthu akudzikuza.’ Thangwi yanji Yahova asacita pyenepi?

5. Thangwi yanji kucita pinthu mwakudzikuza ndi nkandzo ukulu?

⁵ Cakutoma, tingacita pinthu mwakudzikuza, tisapangiza kusowa cilemedzo kuna Yahova Mulungu, Ntongi wathu. Caciwiri, tingacita pinthu pyakuti ife nkhabe cidzo cakupicita, mwakukhonda penula tinaketesana pontho nee tinabverana na anango. (Misangani 13:10) Cacitatu, panango tinaoneka ninga dzemwa anango angadzindikira kuti tacita pinthu mwakudzikuza. (Luka 14:8, 9) Mwandimomwene, tisakwanisa kuona kuti thangwi yanji Yahova asafuna kuti tikhale akucepeseka.

6, 7. Kodi kucepeseka kusaphatanizanji?

⁶ Nkristu wakucepeseka nee asadzikuza mbwenye asaona anango kukhala apadzulu kupiringana iye. (Afilipi 2:3) Munthu wakucepeseka ndzidzi onsene asacita pinthu mwakucepeseka. Iye asadzindikira kuti ali na madire, pontho angadawa asaphemba kulekererwa. Iye asabvesera na ntima onsene maonero a anango mbapfundza kubulukira kwa iwo. Munthu wakucepeseka asakomeresa Yahova mwakukwana.

⁷ Bhibhlya isalonga kuti munthu wakucepeseka asadziwa na asadzindikira kuti pana  pinthu pinango pyakuti iye nkhabe kwanisa kupicita peno kutawiriswa kupicita. Pyenepi pisamphedza toera akwanise kulekerera anango mbaatsalakana mwadidi.

8. Ndi manyerezero api asafunika ife kucalira toera kukhala akucepeseka?

⁸ Mbwenye panango tinatoma kucita pinthu munjira yakudzikuza mwakukhonda dziwa. Pyenepi pinacitika tani? Tingatoma kupibva kuti ndife akufunika kakamwe kupiringana anango thangwi ife peno ale akuti tisaadziwa mwadidi, ali na miyai yakutumikira mu mpingo. (Aroma 12:16) Peno panango tinatoma kunyerezera kakamwe pya ife basi. (1 Timoti 2:9, 10) Kusiyapo pyenepi, tinatoma kucitira anango pisankhulo.—1 Akorinto 4:6.

9. Thangwi yanji anango atoma kudzikuza? Perekani citsandzo.

⁹ Tinakwanisambo kutoma kucita pinthu mu njira yakudzikuza khala nee tisatonga pifuno pyathu pyakuipa. Azinji atoma kudzikuza thangwi akhafuna kupasika mbiri, akhacitira ntcanje anango, peno akhaipirwa. Pyenepi pyacitika na anthu anango analongwa m’Bhibhlya, ninga Absaloni, Uziya na Nabukodonozore. Yahova aapangiza mwapakweca kuti akhafunika kukhala akucepeseka.—2 Samwele 15:1-6; 18:9-17; 2 Pya dziko ya Israele 26:16-21; Danyele 5:18-21.

10. Thangwi yanji tisafunika kucalira kutonga maonero a anango? Perekani citsandzo.

¹⁰ Panakwanisambo kukhala mathangwi anango anacitisa anthu kukhala akudzikuza midzidzi inango. Nyerezerani citsandzo ca Abhimeleke na Pedhru. (Genesi 20:2-7; Mateo 26:31-35) Kodi amuna anewa akhali akudzikuza? Panango nee akhadziwa pinthu pyonsene peno acita pinthu mwakukhonda nyerezera? Nakuti nee tinakwanisa kudziwa pya muntima, nee tisafunika kutonga maonero a anango.—Lerini Tyago 4:12.

11. Ninji pisafunika ife kudziwa?

¹¹ Munthu wakucepeseka asadziwa pinadikhirwa iye m’basa ya Mulungu. Yahova ndi Mulungu wakucita pinthu munjira yadidi. Iye apasa basa atumiki ace onsene mu mpingo. Tonsene ndife akufunika. Yahova apasa m’bodzi na m’bodzi miyoni, maluso na asatisiya kuti tinaaphatisira tani. Tingakhala akucepeseka, tinadzaphatisira miyoni yathu munjira inafunira Yahova. (Aroma 12:4-8) Tinadzindikira kuti Yahova asadikhira kuti tinaphatisira miyoni yathu toera kumulemedza na kuphedza anango.—Lerini 1 Pedro 4:10.

12, 13. Tisafunika kukumbukanji tingagumanikana na macinjo m’basa yathu yakutumikira Yahova?

¹² Pinacita ife m’basa ya Yahova mukupita kwa ndzidzi pinacinja. Mwacitsandzo, nyerezerani pya macinjo mazinji adacitikira Yezu. Pakutoma, iye akhali pabodzi na Babace. (Misangani 8:22) Buluka penepo, iye aphedza Yahova kucita aanju, kucita kudzulu na pantsi, pontho anthu. (Akolose 1:16) Buluka penepo, atumizwa pa dziko yapantsi. Iye abalwa ninga munthu mbakula. (Afilipi 2:7) Pakumala kufa, Yezu alamuswa mbabwerera kudzulu, pontho mu caka 1914 akhazikiswa Mambo wa Umambo wa Mulungu. (Ahebere 2:9) Ntsogolo, pakumala kutonga ninga Mambo mu pyaka cikwi, Yezu anadzapereka Umambo kuna Yahova toera ‘Mulungu akhale pyonsene kuna onsene.’—1 Akorinto 15:28.

 ¹³ Ifembo panango tinagumanikana na macinjo mazinji mu umaso wathu. Midzidzi inango umaso wathu unacinja thangwi ya pisankhulo pyathu. Mwacitsandzo, panango tikhali m’phale peno ntsikana, buluka penepo tasankhula kumanga banja. Peno kukhala na ana. Mukupita kwa ndzidzi, panango tasankhula kucita macinjo anango toera kutumikira Yahova m’basa ya ndzidzi onsene. Midzidzi inango mabasa athu anacinja thangwi ya makhaliro athu. Panango tinasankhula kucita pizinji, peno kucita pyakucepa. Mbwenye mwakukhonda tsalakana khala ndife m’phale peno tagwesera, aungumi peno nkhabe, Yahova asadziwa pinakwanisa ife kucita toera kuntumikira. Iye nkhabe kudikhira pinthu pyakuti ife nkhabe kupikwanisa. Pontho iye asakomerwa na pyonsene pinancitira ife.—Ahebere 6:10.

14. Kodi munthu wakucepeseka asacitanji?

¹⁴ Yezu akhali wakutsandzaya na mabasa onsene akhampasa Yahova, ife tinakwanisambo kutsandzaya. (Misangani 8:30, 31) Munthu wakucepeseka asakomerwa na mabasa ace na miyai iri na iye mu mpingo. Iye nkhabe kuikha manyerezero ace ku pinthu pinacita anango. M’mbuto mwace, iye asakomerwa na basa yace mu gulu ya Mulungu. Iye asaona basa ineyi kuti ndi yakubuluka kwa Yahova. Munthu wakucepeseka asalemedzambo anango mbaaphedzera mwakutsandzaya. Iye asadzindikira kuti Yahova aapasambo basa.—Aroma 12:10.

15. Kodi tisapfundzanji mu citsandzo ca Gidheoni?

¹⁵ Gidheoni ndi citsandzo cinango cadidi kakamwe ca kucepeseka. Mudapaswa iye basa na Yahova toera kupulumusa Aisraeli  kwa Amidhiani, Gidheoni alonga: ‘Dzindza yanga ndi ing’ono kakamwe mwa Manase, pontho ndine mwana kakamwe panyumba ya babanga.’ (Atongi 6:15) Mbwenye Gidheoni akhanyindira Yahova na atawira basa ineyi. Gidheoni adzindikira mwadidi pikhafuna Yahova kuna iye mbaphemba citsogolero cace. (Atongi 6:36-40) Gidheoni akhali mamuna wamphambvu na wacipapo, mbwenye akhalimbo wandzeru na wakucenjera. (Atongi 6:11, 27) Mukupita kwa ndzidzi, pikhanfuna anthu toera akhale ntongi wawo, iye akhonda. Pakumala kucita pidaphembwa iye na Yahova, abwerera kunyumba kwace.—Atongi 8:22, 23, 29.

16, 17. Kodi munthu wakucepeseka anathambaruka tani?

¹⁶ Khala munthu atawira basa ipswa peno asafuna kucita pizinji mu mpingo, nee pisabveka kuti iye nee ndi wakucepeseka. Bhibhlya isalonga kuti ndi pyadidi kwa ntumiki wa Yahova kufuna kakamwe kutumikira abale ace mbathambaruka. (1 Timoti 4:13-15) Kodi ife tisafunika kutambira basa ipswa toera kuthambaruka? Nkhabe. Tonsene ninga Akristu tinakwanisa kuthambaruka na kuthimizira maluso adatipasa Yahova toera kuntumikira mwadidi na kuphedza anango.

¹⁷ Mbadzati kutawira basa, munthu wakucepeseka asatoma kunyerezera kuti basa ineyi isaphatanizanji. Iye asacita phembero mbanyerezera mwacidikhodikho khala anakwanisa kucita basa ineyi peno nkhabe. Kodi ndinadzakhala na ndzidzi na mphambvu toera kucita pinthu pinango pyakufunika? Khala nkhabe, ndinakwanisa kupungulira anango basa yanga? Pakumala kunyerezera pyenepi, munthu wakucepeseka asaona kuti nee ali dzololo toera kucita basa ipswa idapaswa iye. Khala ndife akucepeseka, tinakwanisa kulonga kuti nkhabe kwanisa.

18. (a) Kodi munthu wakucepeseka asacitanji angapaswa basa ipswa? (b) Kodi lemba ya Aroma 12:3 inatiphedza tani toera kukhala akucepeseka?

¹⁸ Yahova asafuna kuti tifambe na iye mwakucepeseka. (Mikeya 6:8) Natenepa tingapaswa basa ipswa, tisafunika kusaka citsogolero cace na kuphemba ciphedzo, ninga pidacita Gidheoni. Tisafunikambo kunyerezera mwadidi pinatipanga Yahova kubulukira m’Bhibhlya na mu gulu yace. Pontho tisafunika kukumbuka kuti pyonsene pinacita ife m’basa yace nee ndi thangwi ya maluso athu, mbwenye ndi thangwi yakucepeseka kwa Yahova na ciphedzo cisatipasa iye. (Masalmo 18:35) Munthu wakucepeseka nkhabe ‘kunyerezera kupita pinafunika kunyerezera.’—Lerini Aroma 12:3.

19. Thangwi yanji tisafunika kukhala akucepeseka?

¹⁹ Munthu wakucepeseka asadziwa kuti basi ene ndi Yahova adathema kutambira mbiri, thangwi iye ndi Nciti na ndi Wankulu Kakamwe kudzulu na pantsi. (Apokalipse 4:11) Tingakhala akucepeseka, tinadzakomerwa na pyonsene pinacita ife m’basa ya Yahova. Tinadzalemedza mabvero na maonero a abale na alongo athu, pontho pyenepi pinadzatiphedza toera kukhala akuphatana. Munthu wakucepeseka asanyerezera mwadidi mbadzati cita cinthu, natenepa iye asacalira kucita madodo makulu. Yahova asakomerwa kakamwe na anthu akucepeseka. Ndi thangwi yace, kucepeseka ndi kwakufunika kakamwe kwa atumiki a Mulungu. Nsolo unatowera, tinadzaona kuti tinapitiriza tani kukhala akucepeseka tingathimbana na makhaliro akunentsa.