NSOLO WA PFUNDZIRO 19
Tinawangisa Tani Cikhulupiro Cathu ku Mapikiro a Yahova a Dziko Ipswa?
“Kodi [Yahova] angalonga cinthu, nee asacicita?”—NUM. 23:19.
NYIMBO 142 Tiri na Cidikhiro Cakuwanga
PINAFUNA IFE KUPFUNDZA a
1-2. Tisafunika kucitanji mu ndzidzi unadikhira ife dziko ipswa?
IFE tisapereka takhuta kakamwe kuna Yahova thangwi ya pikiro yace yakucinja dziko ino yakuipa mbikhala dziko ipswa yakulungama. (2 Ped. 3:13) Maseze nee tisadziwa kuti pyenepi pinacitika lini, mbwenye pinthu pinacitika lero pisapangiza kuti ndzidzi unoyu uli dhuzi kakamwe.—Mat. 24:32-34, 36; Mabasa 1:7.
2 Mwakukhonda tsalakana khala tadziwa undimomwene kale peno cincino, tonsene tisafunika kuwangisa cikhulupiro cathu ku pikiro ineyi. Thangwi yanji? Thangwi maseze tikhale na cikhulupiro cakuwanga, ico cinakwanisa kufewa. Mpostolo Paulu alonga kuti kusowa cikhulupiro ndi “madawo akuti asatimanga mwakukhonda nentsa.” (Aheb. 12:1) Toera kuwangisa cikhulupiro cathu, ndzidzi onsene tisafunika kunyerezera pinthu pinapangiza kuti dziko ipswa iri cifupi.—Aheb. 11:1.
3. Tinapfundzanji mu nsolo uno?
3 Mu nsolo uno tinapfundza pinthu pitatu pyakuti pinawangisa cikhulupiro cathu ku pikiro ya Yahova ya dziko ipswa: (1) kunyerezera ciomboli, (2) kunyerezera mphambvu za Yahova na (3) kukhala na ndzidzi wakucita mabasa auzimu. Buluka penepo tinapfundza kuti mphangwa zidalonga Yahova kuna Abhakuki zinawangisa tani cikhulupiro cathu lero. Mbwenye pakutoma tendeni tione pinthu pingasi pyakuti panango tinathimbana napyo cincino, pontho toera kupirira pinthu pyenepi tisafunika kukhala na cikhulupiro cakuwanga ku pikiro ya dziko ipswa.
PINTHU PYAKUTI PISAPHEMBA CIKHULUPIRO CAKUWANGA
4. Ndi pisankhulo pipi pinaphemba cikhulupiro cakuwanga?
4 Ntsiku zonsene ife tisacita pisankhulo pyakuti pisaphemba cikhulupiro cakuwanga. Mwacitsandzo, ife tisacita pisankhulo thangwi ya uxamwali, ubalangazi, khala tisafunika kupfundza kakamwe peno kupfundza pang’ono, kumanga banja, kubala ana na basa. Natenepa tisafunika kubvundzika: ‘Pisankhulo pyanga pisapangiza kuti ndiri na cinyindiro cakuti mwakukhonda dembuka dziko ino inapitirwa mbuto na dziko ipswa ya Mulungu? Peno ndisacita pisankhulo ninga pinacita anthu anakhulupira kuti kufa ndi kumala kwa pyonsene?’ (Mat. 6:19, 20; Luka 12:16-21) Ife tinacita pisankhulo pyadidi tingawangisa cikhulupiro cathu cakuti dziko ipswa iri dhuzi kakamwe.
5-6. Thangwi yanji tisafunika kukhala na cikhulupiro cakuwanga m’midzidzi inathimbana ife na pinentso? Perekani citsandzo.
5 Ife tisafunikambo kukhala na cikhulupiro cakuwanga thangwi tisathimbana na pinentso. Mwacitsandzo, panango tinatcingwa, kuthimbana na utenda wakukhonda wanga peno pinthu pinango pyakuti pinaticitisa kutsukwala. Pakutoma, panango tinaona kuti tinakwanisa kupirira pinentso pyenepi. Mbwenye pinentso pyenepi pingapitiriza mu ndzidzi uzinji, ife tinafunika kukhala na cikhulupiro cakuwanga toera tikwanise kupirira mbatipitiriza kutumikira Yahova mwakutsandzaya.—Aroma 12:12; 1 Ped. 1:6, 7.
6 Mu ndzidzi unathimbana ife na nyatwa, panango tinanyerezera kuti dziko ipswa ya Yahova nee inabwera. Kodi pyenepi pisabveka kuti nee tiri na cikhulupiro cakuwanga? Nkhabe. Mwacitsandzo, mu ndzidzi wakuthondola kakamwe panango tinanyerezera kuti ndzidzi wakupisa nee unafika. Ngakhale tenepo, ndzidzi wakupisa usafika. Munjira ibodzi ene, tingatsukwala kakamwe panango tinanyerezera kuti dziko ipswa nee inabwera. Mbwenye thangwi yakukhala na cikhulupiro cakuwanga, ife tisadziwa kuti mapikiro a Mulungu anadzakwanirisika. (Mas. 94:3, 14, 15; Aheb. 6:17-19) Tingakhala na cikhulupiro ceneci, ife tinapitiriza kuikha kulambira kwathu Yahova pa mbuto yakutoma.
7. Ndi pinthu pipi pinafunika ife kucalira?
7 Cinthu cinango cakuti cisaphemba cikhulupiro cakuwanga ndi basa yakumwaza mphangwa. Anthu azinji anamwazira ife mphangwa asaona kuti “mphangwa zadidi” zinalonga pya dziko ipswa ya Mulungu nee ndi zandimomwene. (Mat. 24:14; Ezek. 33:32) Ife tisafunika kucita mphole-mphole toera tikhonde kupenula pinthu pinatipfundzisa Yahova ninga pinacita anthu anewa. Toera tikwanise kucita pyenepi tisafunika kupitiriza kuwangisa cikhulupiro cathu. Tendeni tione pinthu pitatu pinafuna kutiphedza toera kucita pyenepi.
NYEREZERANI CIOMBOLI
8-9. Kunyerezera ciomboli kunawangisa tani cikhulupiro cathu?
8 Cinthu cibodzi cinafuna kutiphedza toera kuwangisa cikhulupiro cathu ndi kunyerezera ciomboli. Ciomboli cisatipasa cinyindiro cakuti mapikiro a Mulungu anakwanirisika. Tinganyerezera mwadidi kuti thangwi yanji Mulungu apereka mwanace, tinawangisa cikhulupiro cathu cakuti pikiro ya Mulungu yakukhala na umaso wakukhonda mala n’dziko yadidi kakamwe inadzakwanirisika. Thangwi yanji tisalonga tenepo?
9 Yahova acitanji toera kupereka ciomboli? Iye atuma Mwanace wautombo, pontho wakufunika kakamwe toera abalwe pa dziko yapantsi ninga munthu waungwiro. Pikhali iye pa dziko yapantsi, Yezu apirira nyatwa zizinji kakamwe. Buluka penepo athabuswa mbaphiwa. Mukucita pyenepi, Yahova alipa ntengo ukulu kakamwe. Mulungu wathu waufuni nee mbadatawirisa kuti Mwanace athabuke basi ene toera tikhali na umaso wadidi mu ndzidzi wakucepa. (Juwau 3:16; 1 Ped. 1:18, 19) Thangwi yakulipa ntengo ukulu kakamwe, Yahova atipasa cinyindiro cakuti tinadzakhala na umaso wa kwenda na kwenda n’dziko ipswa.
NYEREZERANI MPHAMBVU ZA YAHOVA
10. Mwakubverana na Aefesi 3:20, ndi pinthu pipi pyakuti Yahova anakwanisa kupicita?
10 Cinthu caciwiri cinafuna kutiphedza toera kuwangisa cikhulupiro cathu ndi kunyerezera mphambvu za Yahova. Iye ali na mphambvu toera kucita pinthu pyonsene pinapikira iye. Ndimomwene kuti pikiro yakukhala na umaso wakukhonda mala n’dziko ipswa panango inaoneka ninga yakukhonda kwanisika kuna anthu. Mbwenye Yahova kazinji kene asapikira pinthu pyakuti anthu nee anakwanisa kupicita. Iye anakwanirisa pikiro ineyi thangwi ndi Mulungu Wamphambvu Zonsene. (Yobe 42:2; Marko 10:27) Natenepa ife nee tisadzumatirwa na pinthu pyadidi pinapikira iye.—Lerini Aefesi 3:20.
11. Perekani citsandzo cibodzi ca mapikiro akudzumatirisa a Mulungu. (Onani bokosi ya nsolo wakuti “ Mapikiro Mangasi Akudzumatirisa Adakwanirisika.”)
11 Onani pinthu pingasi pidapikira Yahova atumiki ace pyakuti pikhaoneka ninga pyakukhonda kwanisika. Iye apanga Abhrahamu na Sara kuti mbadabala mwana mu ndzidzi ukhali iwo ankhalamba. (Gen. 17:15-17) Pontho apanga Abhrahamu kuti dzindza yace mbidapaswa dziko ya Kanani. Mu pyaka pizinji, Aizraeli akuti akhali a dzindza ya Abhrahamu akhala ninga mabitcu ku Ejitu, pontho pikhaoneka ninga pikiro ya Mulungu nee mbidakwanirisika. Mbwenye pikiro ineyi yakwanirisika. Mukupita kwa ndzidzi, Yahova alonga kuti Elizabheti wakuti akhadakalamba mbadabala mwana. Iye apangambo Mariya wakuti akhali mwali kuti mbadabala Mwana wa Yahova. Pontho pyenepi mbapidakwanirisa pikiro idacita Yahova pyaka pizinji kakamwe nduli m’munda wa Edheni!—Gen. 3:15.
12. Yoswa 23:14 na Izaiya 55:10,11 asatipasa cinyindiro cipi thangwi ya mphambvu za Yahova?
12 Tinganyerezera mapikiro onsene adacita Yahova na njira idakwanirisika iwo, tinabvesesa kuti iye ndi wamphambvu kakamwe. Pontho pyenepi pinawangisa cikhulupiro cathu ku pikiro idacita iye yakubweresa dziko ipswa. (Lerini Yoswa 23:14; Izaiya 55:10, 11.) Pyenepi pisaticitisa kukhala akukhunganyika toera kuphedza anango kubvesesa kuti pikiro ya dziko ipswa ndi yandimomwene. Yahova alonga tenepa thangwi ya kudzulu kupswa na dziko yapantsi ipswa: “Mafala anewa ndi akunyindirika na andimomwene.”—Apok. 21:1, 5.
KHALANI NA NDZIDZI WAKUCITA MABASA AUZIMU
MISONKHANO YA MPINGO
Kucita pinthu pyenepi kunawangisa tani cikhulupiro canu? (Onani ndima 13)
13. Misonkhano ya mpingo inawangisa tani cikhulupiro cathu? Fokotozani.
13 Cinthu cacitatu cakuti cinatiphedza toera kuwangisa cikhulupiro cathu ndi kukhala na ndzidzi wakucita mabasa auzimu. Onani citsandzo cinapangiza kuti tisaphedzeka tani na misonkhano ya mpingo. Ana, wakuti amwaza mphangwa mu ndzidzi uzinji na munjira zakusiyana-siyana alonga: “Misonkhano isandiphedza toera ndipitirize kukhala na cikhulupiro cakuwanga. Maseze nyakucita nkhani nee ali na luso yakupfundzisa peno akhonde kulonga pinthu pipswa, kazinji kene ine ndisabvesera cinthu cakuti cisandiphedza toera ndibvesese undimomwene wa Bhibhlya, pontho pyenepi pisawangisa cikhulupiro canga.” b Mwakukhonda penula, ife tisaperekambo takhuta thangwi ya mitawiro yakuwangisa ya abale na alongo.—Aroma 1:11, 12; 10:17.
BASA YAKUMWAZA MPHANGWA
Kucita pinthu pyenepi kunawangisa tani cikhulupiro canu? (Onani ndima 14)
14. Basa yakumwaza mphangwa isawangisa tani cikhulupiro cathu?
14 Ife tisawangisambo cikhulupiro cathu tingacita basa yakumwaza mphangwa. (Aheb. 10:23) Mulongo Barbara, anatumikira Yahova mu pyaka pyakupiringana 70 alonga: “Ndzidzi onsene ndisaona kuti basa yakumwaza mphangwa ndi yakuwangisa cikhulupiro. Ndingacedza kakamwe na anango thangwi ya mapikiro akutsandzayisa a Yahova, cikhulupiro canga cisakhalambo cakuwanga kakamwe.”
PFUNDZIRO YA MUNTHU PAEKHA
Kucita pinthu pyenepi kunawangisa tani cikhulupiro canu? (Onani ndima 15)
15. Pfundziro ya munthu paekha inawangisa tani cikhulupiro cathu? (Onanimbo foto.)
15 Cinthu cinango cakuti cinawangisa cikhulupiro cathu ndi pfundziro ya munthu paekha. Mulongo Suzana aona kuti ndi pyakuphedza kukhala na ndandanda yakupfundza. Iye alonga: “N’dimingu ine ndisapfundza nsolo wa pfundziro ya Ncenjezi wa sumana inatowera. N’ciposi na n’Cipiri ndisakhunganyika misonkhano ya pakati pa sumana. Ntsiku zinango za sumana ndisacita pfundziro ya munthu paekha.” Thangwi yakukhala na ndandanda ineyi yakupfundza, Suzana asapitiriza kuwangisa cikhulupiro cace. Irene, anatumikira ku ofesi ikulu ya Mboni za Yahova, aona kuti kupfundza maprofesiya a Bhibhlya kusawangisa kakamwe cikhulupiro cace. Iye alonga: “Ndisadzumatirwa kakamwe thangwi yakuona kuti maprofesiya a Yahova asakwanirisika ngakhale mu pinthu ping’ono.” c
“MWAKUKHONDA PENULA, MASOMPHENYA ANEWA ANADZAKWANIRISIKA”
16. Thangwi yanji mafala adalonga Yahova kuna Abhakuki ndi akufunika kuna ife lero? (Ahebheri 10:36, 37)
16 Atumiki anango a Yahova asadikhira kumala kwa dziko ino mu ndzidzi uzinji kakamwe. Kuna anthu, panango pinaoneka ninga mapikiro a Yahova ali kudembuka toera kukwanirisika. Mbwenye Yahova asadziwa mabvero anakhala na atumiki ace. Na thangwi ineyi, iye apanga Abhakuki kuti: “Pana ndzidzi udakhazikiswa toera masomphenya anewa akwanirisike, ndzidzi unoyu unadzafika mwakucimbiza, pontho masomphenya anewa nee anadzakhala authambi. Maseze aoneke ninga akudembuka, pitiriza na kuadikhira! Thangwi mwakukhonda penula, masomphenya anewa anadzakwanirisika. Iwo nee anadzadembuka!” (Abha. 2:3) Kodi Yahova alonga mafala anewa toera kupasa cinyindiro basi ene Abhakuki? Peno mafala anewa asatipasambo cinyindiro lero? Yahova atsogolera mpostolo Paulu toera alonge mafala mabodzi ene kuna Akristu akhadikhira dziko ipswa. (Lerini Ahebheri 10:36, 37.) Natenepa tinakwanisa kukhala na cinyindiro cakuti maseze profesiya ineyi ioneke ninga iri kudembuka, ‘iyo inadzakwanirisika. Iyo nee inadzadembuka.’
17. Mulongo unango aphatisira tani uphungu udapereka Yahova kuna Abhakuki?
17 Atumiki azinji a Yahova asabvera uphungu wakuti ‘pitiriza kudikhira.’ Anango asacita pyenepi mu pyaka pizinji. Mwacitsandzo, mulongo Louise atoma kutumikira Yahova mu caka ca 1939. Iye alonga: “Mu ndzidzi unoyu ndikhanyerezera kuti Armajedhoni anabwera mbandidzati kumalisa xikola. Mbwenye pyenepi nee pyacitika. Kuleri mphangwa za m’Bhibhlya thangwi ya anthu adadikhira Yahova toera kukwanirisa mapikiro ace kusandiphedza toera kudikhira Yahova toera akwanirise mapikiro ace. Ine ndisaleri thangwi ya Nowa, Abhrahamu, Zuze na anango akuti adikhira mu ndzidzi uzinji nkhombo zidapikira Yahova. Kupitiriza kunyindira kuti mapikiro a Yahova anadzakwanirisika kusaphedza ine na anango toera kukhala na cinyindiro cakuti dziko ipswa iri dhuzi.” Anthu azinji anatumikira Yahova mu pyaka pizinji asaonambo tenepo!
18. Kuona pinthu pidacita Yahova kunawangisa tani cikhulupiro cathu ku pikiro ya dziko ipswa?
18 Ndimomwene kuti dziko ipswa idzati kufika. Mbwenye nyerezerani pinthu pinango pyakuti musakwanisa kupiona ninga nyenyezi, miti pinyama na anthu. Nee m’bodzi wa ife asapenula kuti pinthu pyenepi piripo, ngakhale kuti pakutoma nee pikhalipo. Cincino pinthu pyenepi piripo thangwi Yahova apicita. (Gen. 1:1, 26, 27) Mulungu wathu asafunambo kubweresa dziko ipswa. Pontho iye anakwanirisa pikiro ineyi. Mu dziko ipswa, anthu anatsandzaya kwenda na kwenda, pontho anakhala na ungumi wadidi. Ife tinakwanisa kukhala na cinyindiro cakuti pa ndzidzi wakuthema wa Mulungu, ife tinadzakhala mu dziko ineyi ipswa.—Iza. 65:17; Apok. 21:3, 4.
19. Munawangisa tani cikhulupiro canu?
19 Mu ndzidzi unadikhira imwe, phatisirani miyai iri na imwe toera kuwangisa cikhulupiro canu. Ndzidzi onsene perekani takhuta thangwi ya ciomboli. Nyerezerani mphambvu za Yahova. Khalani na ndzidzi wakucita pinthu pinawangisa uxamwali wanu na Yahova. Mungacita pyenepi, imwe munakhalambo mu nsoka wa “ale akuti kubulukira mu cikhulupiro na kupirira, atambira pinthu pidapikirwa.”—Aheb. 6:11, 12; Aroma 5:5.
NYIMBO 139 Nyerezerani Kuti Muli mu Dziko Ipswa
a Anthu azinji lero nee asakhulupira mapikiro analonga Bhibhlya thangwi ya dziko ipswa. Iwo asaona mapikiro anewa ninga ndoto, mbanyerezera kuti nee anakwanirisika. Mbwenye ife tisakhulupira kuti mapikiro onsene a Yahova anadzakwanirisika. Ngakhale tenepo, ife tisafunika kucita pinthu toera tipitirize kukhala na cikhulupiro cakuwanga. Tinawangisa tani cikhulupiro cathu? Nsolo uno unafokotoza pyenepi.
b Madzina anango acinjwa.
c Imwe munakwanisa kugumana misolo mizinji inalonga pya maprofesiya a Bhibhlya pa nsolo wakuti “Profecias” mu Índice das Publicações da Torre de Vigia. Mwacitsandzo, onani nsolo wakuti “O que Jeová prediz se cumpre” mu A Sentinela ya 1 de Janeiro de 2008.
