NSOLO WA PFUNDZIRO 15
Tisapfundzanji na Pirengo Pidacita Yezu?
‘Iye akhafamba cisa consene mbacita pinthu pyadidi, pontho akhawangisa anthu.’—MABASA 10:38.
NYIMBO 13 Kristu Ndi Citsandzo Cathu
PINAFUNA IFE KUPFUNDZA a
1. Ninji pidacitika mu ndzidzi udacita Yezu cirengo cace cakutoma?
NYEREZERANI pinthu pidacitika mu caka 29 mu ndzidzi udatoma Yezu utumiki wace. Yezu na mai wace pabodzi na anyakupfundzace anango acemerwa ku phwando yakumanga banja ku Kana, nzinda wakuti ukhali cifupi na Nazareti. Mariya akhali xamwali wa acibale a anthu akhamanga banja ntsiku ineyi, pontho pisaoneka kuti iye akhaphedzera basa yakutsalakana alendo. Mbwenye mu ndzidzi wa phwando pacitika cinthu cakuti mbacidapasa manyadzo acibale na anthu akhamanga banja ntsiku ineyi, thangwi vinyu ikhadamala. b Vinyu ineyi yamala panango thangwi anthu akhadanjipa kakamwe. Mwakucimbiza, Mariya aenda kuna mwanace mbampanga: “Iwo nkhabebve vinyu.” (Juwau 2:1-3) Kodi Yezu acitanji? Iye acita cirengo ca kucinja madzi kudza “vinyu yadidi.”—Juwau 2:9, 10.
2-3. (a) Ndi pirengo pipi pidacita Yezu? (b) Tinaphedzeka tani tingapfundza pirengo pidacita Yezu?
2 Yezu acita pirengo pinango pizinji mu utumiki wace. c Iye acita pirengo pyenepi toera kuphedza anthu azinji kakamwe. Mwacitsandzo, iye acita cirengo mbadyesa amuna 5.000, pontho ulendo unango adyesa amuna 4.000. Tingabvungaza anthu onsene adagumanika m’mbuto zenezi kuphataniza akazi na anapiana, panango akhali akupiringana 27.000. (Mat. 14:15-21; 15:32-38) M’maulendo anewa mawiri, Yezu awangisambo atenda azinji. (Mat. 14:14; 15:30, 31) Anthu anewa atsandzaya kakamwe thangwi yakuwangiswa na kudyeswa na Yezu!
3 Ife tinakwanisa kupfundza pizinji na pirengo pidacita Yezu. Mu nsolo uno tinaona pingasi mwa pinthu pyenepi pyakuti pinawangisa cikhulupiro cathu. Kusiyapo pyenepi, tinaonambo kuti tinatowezera tani kucepeseka kwa Yezu na kubvera kwace ntsisi anthu mu ndzidzi ukhacita iye pirengo.
TISAPFUNDZANJI THANGWI YA YAHOVA NA YEZU?
4. Pirengo pidacita Yezu pisatipfundzisa pinthu thangwi ya ani?
4 Pirengo pidacita Yezu pisatipfundzisa pinthu pizinji kakamwe thangwi ya iye na Babace, pontho pyenepi pisawangisa cikhulupiro cathu. Thangwi ndi Yahova akhampasa mphambvu toera kucita pirengo pyenepi. Lemba ya Mabasa 10:38 isalonga: “Mulungu andzodza [Yezu] na nzimu wakucena mbampasa mphambvu. Iyembo akhafamba cisa consene mbacita pinthu pyadidi, pontho akhawangisa anthu onsene akhathabuswa na Dyabo, thangwi Mulungu akhali na iye.” Kumbukanimbo kuti Yezu akhatowezera mwadidi kakamwe manyerezero na mabvero a Babace mu pinthu pyonsene pikhalonga iye na pikhacita iye, kuphatanizambo pirengo pikhacita iye. (Juwau 14:9) Onani pinthu pitatu pinafuna ife kupfundza na pirengo pidacita Yezu.
5. Ninji pikhakulumiza Yezu toera kucita pirengo? (Mateu 20:30-34)
5 Cakutoma, Yezu na Babace asatifuna kakamwe. Pikhali iye pa dziko yapantsi, Yezu apangiza ufuni unoyu kuna anthu mukucita pirengo toera kuaphedza. Paulendo unango, maboliboli awiri adembetera kuna Yezu toera aphedzwe. (Lerini Mateu 20:30-34.) Natenepa Yezu “aabvera ntsisi” mbaawangisa. Fala Yacigerego idaphatisirwa toera kulonga “kubvera ntsisi” isapangiza mabvero akuwanga kakamwe anakulumiza munthu toera kubvera ntsisi anango. Mabvero anewa a ntsisi akuti ndi njira yakupangiza ufuni, akulumizambo Yezu toera kudyesa anthu akhabva njala na kuwangisa anyamatanya. (Mat. 15:32; Marko 1:41) Ife tinakwanisa kukhala na cinyindiro cakuti Yahova, Mulungu wa “ntsisi zikulu” na Mwanace asatifuna kakamwe, pontho asatsukwala angationa mbatithabuka. (Luka 1:78; 1 Ped. 5:7) Mwandimomwene iwo asafuna kakamwe kumalisa nyatwa zonsene zinatamba anthu!
6. Mulungu apasa mphambvu Yezu toera kucitanji?
6 Caciwiri, Mulungu apasa mphambvu Yezu toera kumalisa nyatwa zonsene za anthu. Kubulukira mu pirengo pidacita iye, Yezu apangiza kuti ali na mphambvu toera kumalisa nyatwa zakuti nee tinakwanisa kuzimalisa tekhene. Mwacitsandzo, iye ali na mphambvu toera kumalisa madawo na nyatwa zonsene zinaoneka thangwi ya madawo anewa, kuphatanizambo mautenda na kufa. (Mat. 9:1-6; Aroma 5:12, 18, 19) Pirengo pidacita iye pyapangiza kuti iye anakwanisa kuwangisa “ntundu onsene” wa utenda, ngakhale kulamusa anthu muli akufa. (Mat. 4:23; Juwau 11:43, 44) Kusiyapo pyenepi, iye alimbo na mphambvu toera kumalisa pyondzi na kukunda mizimu yakuipa. (Marko 4:37-39; Luka 8:2) Ndi pyakuwangisa kakamwe kudziwa kuti Yahova apasa mphambvu Mwanace toera kucita pinthu pyenepi!
7-8. (a) Pirengo pidacita Yezu pisatipasa cinyindiro cipi? (b) Ndi pirengo pipi pinadikhira imwe toera picitike n’dziko ipswa?
7 Cacitatu, ife tinakwanisa kukhala na cinyindiro cakuti nkhombo zinafuna kubweresa Umambo wa Mulungu ndi zandimomwene. Pirengo pidacita Yezu pikhali iye pa dziko yapantsi pisapangiza kuti iye anadzacita pinthu pyenepi pa dziko yonsene, thangwi iye ndi Mambo wa Umambo wa Mulungu. Onani nkhombo zinafuna kukhala na ife Kristu angadzatonga pa dziko yapantsi. Ife tinadzakhala na ungumi wadidi, thangwi iye anadzamalisa mautenda onsene na kuwangisa anthu akulamala. (Iza. 33:24; 35:5, 6; Apok. 21:3, 4) Cipo tinadzakhala pontho na njala peno kuthabuka na pidengwa pyacibaliro. (Iza. 25:6; Marko 4:41) Ife tinadzatsandzaya kakamwe na kutambira abale athu adafa akuti ali “munthumbi zakukumbukirwa.” (Juwau 5:28, 29) Ndi pinthu pipi pinadikhira imwe kakamwe toera picitike n’dziko ipswa?
8 Mu ndzidzi ukhacita iye pirengo, Yezu apangiza kucepeseka na kubvera ntsisi anthu. Ife tisafunikambo kutowezera makhaliro anewa. Tendeni tione pitsandzo piwiri. Pakutoma tinaona pidacitika pa phwando yakumanga banja ku Kana.
TISAPFUNDZANJI NA KUCEPESEKA KWA YEZU?
9. Yezu acitanji pa phwando yakumanga banja? (Juwau 2:6-10)
9 Lerini Juwau 2:6-10. Pidamala vinyu pa phwando yakumanga banja, kodi Yezu akakamizwa toera kucita cirengo? Nkhabe. Thangwi nkhabe profesiya inalonga kuti Mesiya mbadacinja madzi kudza vinyu. Mbwenye nyerezerani kuti imwe muli kumanga banja, pontho pyakumwa pyamala. Pisaoneka kuti Yezu abvera ntsisi banja ineyi, makamaka mamuna na nkazi akhamanga banja, pontho iye akhafuna kumalisa manyadzo awo. Natenepa iye acita cirengo, ninga pidalongwa pa ndima yakutoma. Iye acinja madzi cifupi na malitru 390 mbadza vinyu yadidi kakamwe. Panango iye acita vinyu ineyi izinji toera ingasala, mamuna na nkazi akhamanga banja ntsiku ineyi agulise kuti akhale na kobiri. Panango iwo apereka takhuta kakamwe.
Towezerani citsandzo ca Yezu mukukhonda kupasika mbiri thangwi ya pinthu pinacita imwe (Onani ndima 10-11) e
10. Ndi pinthu pipi pinango pyakufunika pidalembwa pa Juwau kapitulu 2? (Onanimbo foto.)
10 Onani pinthu pingasi pyakufunika kakamwe pidalembwa pa Juwau kapitulu 2. Yezu nee adzadza ekha nkhali za madzi. Mbwenye apanga anthu toera acite pyenepi. (Vesi 6, 7) Pontho pidamala iye kusanduza madzi kudza vinyu, Yezu nee akwata pang’ono vinyu mbaenda kapasa muimiriri wa phwando. Mbwenye iye apanga ale akhaphedzera mabasa toera kucita pyenepi. (Vesi 8) Yezu nee akwata kopo ya vinyu mbaenda nayo patsogolo pa anthu akhali pa phwando mbalonga mwakudzikuza: ‘Lawirani vinyu idacita ine!’
11. Tisapfundzanji na cirengo cidacita Yezu?
11 Tisapfundzanji na cirengo cidacita Yezu ca kucinja madzi kudza vinyu? Tisapfundza kufunika kwa kukhala akucepeseka. Yezu nee adzikuza na cirengo ceneci cidacita iye, pontho cipo adzikuza na pinthu pinango pikhacita iye. Mbwenye mwakucepeseka, pontho mwakubwereza-bwereza, iye akhapasa mbiri Babace. (Juwau 5:19, 30; 8:28) Tingakhala akucepeseka ninga Yezu, ife nee tinadzikuza thangwi ya pinthu pinacita ife. Mwakukhonda tsalakana pinacita ife m’basa ya Yahova, nee tisafunika kudzikuza thangwi ya pinthu pinacita ife, mbwenye thangwi ya mwai uli na ife wakutumikira Yahova. (Yer. 9:23, 24) Tisafunika kumpasa mbiri thangwi iye ndi wakuthema kupaswa mbiri. Mwandimomwene mbatidasowa ciphedzo ca Yahova, ife nee mbatidakwanisa kucita nee cinthu cibodzi cadidi.—1 Akor. 1:26-31.
12. Ndi njira ipi inango yakuti tinakwanisa kutowezera kucepeseka kwa Yezu? Perekani citsandzo.
12 Onani njira inango yakuti tinakwanisa kutowezera kucepeseka kwa Yezu. Nyerezerani kuti nkulu wa mpingo amala ndzidzi uzinji mbakaphedza ntumiki wakutumikira toera kukhunganyika nkhani yace yapakweca. Na ciphedzo ceneci, ntumiki wakutumikira acita nkhani yakuwangisa kakamwe, pontho abale na alongo mu mpingo akomerwa. Pakumala kwa misonkhano, abale anango asaenda kuna nkulu wa mpingo unoyu mbalonga: ‘M’bale Ngana acita nkhani yadidi kakamwe.’ Kodi nkulu wa mpingo asafunika kulonga: ‘Inde, acita nkhani yadidi, mbwenye ine ndamala ndzidzi uzinji mbandikamphedza.’ Peno asafunika kulonga mwakucepeseka kuti: ‘Inde, acita nkhani yadidi. Pontho ndiri wakutsandzaya kakamwe na pyenepi?’ Tingakhala akucepeseka, nee tinafuna kupaswa mbiri na pinthu pyadidi pinacitira ife anango. Thangwi ife tisakomerwa na kudziwa kuti Yahova asaona, pontho asakomerwa na pinacita ife. (Onani Mateu 6:2-4; Aheb. 13:16) Mwandimomwene, ife tisakomeresa Yahova tingatowezera Yezu mbatikhala akucepeseka.—1 Ped. 5:6.
TISAPFUNDZANJI THANGWI YAKUBVERA NTSISI ANANGO?
13. Ndi pinthu pipi pidaona Yezu mu nzinda wa Naini, pontho iye acitanji? (Luka 7:11-15)
13 Lerini Luka 7:11-15. Nyerezerani pinthu pidacitika mu ndzidzi wa utumiki wa Yezu. Iye akhabuluka ku Naini, nzinda wa Galileya cifupi na Sunemu, cisa cidalamusa Elizeu mwana wa nkazi wa ku Sunemu pyaka 900 Yezu mbadzati kubalwa. (2 Ama. 4:32-37) Pidafika iye pa nsuwo wa nzinda, iye aona anthu akhabuluka mu nzinda na munthu wakufa. Pinthu pyenepi pikhali pyakutsukwalisa kakamwe, thangwi nkazi wa nzice akhadaferwa na mwanace m’bodzi basi akhali na iye. Mbwenye nkazi unoyu akhaperekerwa na anthu azinji kakamwe a mu nzinda. Yezu alimirisa anthu anewa, pontho acita cinthu cakutsandzayisa kakamwe kuna nkazi unoyu akhadaferwa na mwanace. Iye alamusa mwanace muli akufa! Unoyu ndi ulendo wakutoma mwa maulendo matatu adalamusa Yezu anthu muli akufa analongwa m’bukhu ya Mateu, Marko, Luka na Juwau.
Towezerani citsandzo ca Yezu mukubvera ntsisi ale adaferwa (Onani ndima 14-16)
14. Ndi pinthu pipi pyakufunika kakamwe pidalembwa pa Luka kapitulu 7? (Onanimbo foto.)
14 Onani pinthu pinango pyakufunika kakamwe pidalembwa pa Luka kapitulu 7. Yezu ‘aona’ nzice adaferwa na mwanace, buluka penepo “ambvera ntsisi.” (Vesi 13) Natenepa panango pidaona iye nkazi unoyu mbakalira mu ndzidzi ukhathukula anthu manungo a mwanace, Yezu ambvera ntsisi kakamwe. Kusiyapo pyenepi, iye acita pinthu pidapangiza kuti ambvera ntsisi. Iye ampasa cinyindiro mu ndzidzi udampanga iye mwakukhurudzika kuti: “Leka kulira.” Iye acita pinthu toera kum’phedza. Iye alamusa mwanace muli akufa, pontho “ampereka kuna mai wace.”—Vesi 14, 15.
15. Tisapfundzanji na cirengo cidacita Yezu?
15 Tisapfundzanji na cirengo cidacita Yezu cakulamusa mwana wa nzice? Tisapfundza kuti tisafunika kubvera ntsisi anthu adaferwa. Ndimomwene kuti ife nee tinakwanisa kulamusa muli akufa anthu ninga pidacita Yezu. Mbwenye ninga Yezu, ife tinakwanisa kukulisa n’khaliro wakubvera ntsisi anthu adaferwa mukuyang’ana mwadidi pinthu pinacitika na abale na alongo athu. Ife tinakwanisa kupangiza kuti tisaabvera ntsisi mukulonga na kucita pinthu pinakwanisa ife toera kuaphedza na kuabalangaza. d (Mis. 17:17; 2 Akor. 1:3, 4; 1 Ped. 3:8) Ngakhale kulonga mafala akucepa na kucita pinthu pyakucepa, pyenepi pinabalangaza kakamwe abale na alongo athu.
16. Ninga pinapangizwa pa foto, mwapfundzanji na citsandzo ca mulongo adaferwa na mwanace?
16 Onani citsandzo cibodzi. Pyaka pingasi nduli, mu ndzidzi ukhaimbwa nyimbo pa misonkhano ya mpingo, mulongo m’bodzi aona mulongo unango wakuti akhali dhuzi na iye mbakalira. Nyimbo ineyi ikhalonga pya cidikhiro cakulamuswa kwa anthu muli akufa, pontho mulongo akhalira akhadaferwa na mwanace wantsikana. Nakuti mulongo unango akhadziwa pyenepi, iye anfendedzera mbankhumbatira, pontho apitiriza kuimba naye pabodzi. Mukupita kwa ndzidzi, mulongo unoyu akhalira alonga: “Ine ndaona kuti abale na alongo asandifuna kakamwe.” Iye akomerwa kakamwe thangwi ya kuenda ku misonkhano ntsiku ineyi. Iye alonga: “Ife tisagumana ciphedzo pa Nyumba ya Umambo.” Ife tinakwanisa kukhala na cinyindiro cakuti Yahova asaona, pontho asakomerwa na pinthu pinacita ife toera kupangiza kuti tisabvera ntsisi anthu ‘akutsukwala’ thangwi yakuferwa.—Mas. 34:18.
KUPFUNDZA PINTHU PINAWANGISA CIKHULUPIRO CATHU
17. Tapfundzanji mu nsolo uno?
17 Ife tinawangiswa kakamwe tingapfundza mphangwa za m’Bhibhlya zinalonga thangwi ya pirengo pidacita Yezu. Pirengo pyenepi pisatipfundzisa kuti Yahova na Yezu asatifuna kakamwe, pontho Yezu ali na mphambvu yakumalisa nyatwa zonsene zinathimbana na anthu. Kusiyapo pyenepi, pisatipasa cinyindiro cakuti mwakukhonda dembuka, Umambo wa Mulungu unabweresa nkhombo zizinji pa dziko yapantsi. Mu ndzidzi unapfundza ife mphangwa zenezi, tinakwanisa kunyerezera kuti tinatowezera tani makhaliro a Yezu. Panango pinakhala pyadidi kuna imwe kupfundza thangwi ya pirengo pidacita Yezu pa pfundziro yanu ya munthu paekha peno pakulambira kwanu kwa banja. Pfundzani mphangwa zenezi, pontho panganimbo anango pinapfundza imwe. Mungacita pyenepi imwe munakwanisa kucedza makani akuwangisa kakamwe anango.—Aroma 1:11, 12.
18. Tinapfundzanji mu nsolo unatowera?
18 Kunkhomo kwa utumiki wace pa dziko yapantsi, Yezu acita cirengo cakumalisa mwa pirengo pitatu pya kulamusa anthu muli akufa. Paulendo unoyu, iye alamusa xamwali wace muli akufa, pontho cirengo ceneci cikhali cakusiyana kakamwe na pirengo pinango pidacita iye. Tisapfundzanji na cirengo ceneci? Pontho tinawangisa tani cikhulupiro cathu ku cidikhiro cakulamuswa muli akufa? Tinapfundza pyenepi mu nsolo unatowera.
NYIMBO 20 Mwapereka Mwananu Wapantima
a Ndi pyakutsandzayisa kakamwe kuleri thangwi ya pirengo pidacita Yezu. Mwacitsandzo, iye amatamisa condzi, awangisa atenda, pontho alamusa anthu muli akufa. Pinthu pyenepi pidacita Yezu pyalembwa m’Bhibhlya, tayu basi ene toera kutibalangaza, mbwenye toera kutipfundzisa. Mu ndzidzi unaona ife pingasi mwa pirengo pyenepi, ife tinapfundza pinthu thangwi ya Yahova na Yezu pyakuti pinawangisa cikhulupiro cathu, pontho pinatiphedza toera kuona makhaliro akuti tisafunika kuakulisa.
b Nyakufufudza pya Bhibhlya unango alonga: “Midzidzi yakale anthu akhanyerezera kuti iwo akhafunika kukhala akutambira alendo, pontho anyakutambira alendo akhafunika kucita pyonsene toera akwanise kutambira mwadidi alendo awo. Anthu akhatambira mwadidi alendo makamaka pa phwando yakumanga banja, akhafunika kupasa alendo awo cakudya cizinji na pyakumwa pizinji.”
c Bukhu ya Mateu, Marko, Luka na Juwau isapangiza pirengo pyakupiringana 30 pidacita Yezu. Kusiyapo pyenepi, pana pirengo pinango pizinji pidacita Yezu pyakuti m’Bhibhlya nee pisalongwa cibodzi na cibodzi. Paulendo unango, “anthu onsene a mu nzinda” aenda kuna iye, pontho “iye awangisa anthu azinji akuti akhali na mautenda.”—Marko 1:32-34.
d Toera kudziwa pizinji thangwi ya pinthu pinafuna imwe kulonga peno kucita toera kubalangaza ale adaferwa, onani nsolo wakuti “Console os enlutados, assim como Jesus fez,” mu A Sentinela ya 1 de Novembro de 2010.
e FOTO TSAMBA 4: Yezu alimira kutali pang’ono mu ndzidzi unatsandzaya anthu na vinyu yadidi kakamwe.
