1. Thangwi yanji tisatawira pa misonkhano?

 THANGWI yanji tisagumanika pa misonkhano ya mpingo? Thangwi yakutoma ndi toera kusimba Yahova. (Mas. 26:12; 111:1) Thangwi inango ndi yakuti tingagumanika pa misonkhano tisakwanisa kuwangisana unango na ndzace m’midzidzi ino yakunentsa. (1 Ates. 5:11) Natenepa, tingatawira pa misonkhano, ife tisacita pinthu pyenepi piwiri.

2. Ndi miyai ipi iri na ife toera kutawira pa misonkhano yathu?

² Masumana onsene, ife tisakhala na miyai yakutawira pa misonkhano yathu. Mwacitsandzo, pa misonkhano yakumala kwa sumana, tiri na mwai wakutawira mu ndzidzi wa Pfundziro ya Ncenjezi. Pa misonkhano yapakati pa sumana, tiri na mwai wakutawira pa khundu ya Mpfuma Zauzimu, Pfundziro ya Bhibhlya ya Mpingo na makhundu anango.

3. Ndi pinentso pipi pyakuti panango tinathimbana napyo, pontho lemba ya Ahebheri 10:24, 25 inatiphedza tani?

³ Tonsene tisafuna kusimba Yahova na kuwangisa abale na alongo athu. Mbwenye pakufuna kutawira, panango tinathimbana na pinentso. Panango tinagopa kutawira peno panango tinafuna kakamwe kutawira, mbwenye midzidzi inango nee tinapaswa mwai toera kucita pyenepi. Tinakunda tani pinentso pyenepi? Mphangwa zidalemba mpostolo Paulu kuna Ahebheri zinatiphedza toera kutawira mbvundzo unoyu. Mu ndzidzi ukhalonga iye pya kufunika kwa kusonkhana, iye alonga kuti tisafunika ‘kuwangisana unango na ndzace.’ (Lerini Ahebheri 10:24, 25.) Tingakumbuka kuti anango anaphedzeka na ntawiro wathu, maseze ukhale wacigwagwa, ife tinakhala akusudzuka toera kutawira pa misonkhano. Pontho tingakhonda kupaswa mwai toera kutawira, ife tisafunika kukhala akutsandzaya thangwi anango  mu mpingo anakhalambo na mwai wakutawira.—1 Ped. 3:8.

4. Tinapfundzanji mu nsolo uno?

⁴ Mu nsolo uno, pakutoma tinapfundza kuti tinawangisana tani unango na ndzace mu mpingo ung’ono wakuti anthu anafuna kupereka mitawiro ndi akucepa. Buluka penepo, tinaona kuti tinawangisana tani unango na ndzace mu mpingo ukulu wakuti anthu azinji asalamusa manja toera kutawira. Pakumalisa, tinaona kuti tinawangisa tani anango na mitawiro yathu.

5. Tinawangisana tani unango na ndzace khala tiri kusonkhana mu mpingo ung’ono?

⁵ Mu mpingo ung’ono peno nsoka, nee musakhala na anthu azinji toera kupereka mitawiro. Midzidzi inango, panango m’bale anacitisa khundu asafunika kudikhira toera munthu athukule manja kuti atawire. Pyenepi pingacitika panango nsonkhano unaoneka ninga nee ndi wakutsandzayisa na wakuwangisa. Mphapo munacitanji? Khunganyikani toera kulamusa manja anu kazinji kene. Mungacita pyenepi, imwe munakulumizambo anango toera atawire kazinji kene.

6-7. Tisafunika kucitanji toera kupungula kugopa kutawira pa misonkhano?

⁶ Ndiye tani khala musagopa kakamwe kutawira? Anthu azinji asagopambo. Mbwenye toera mukwanise kuwangisa abale na alongo anu, pinakhala mwadidi kusaka njira zakuti zinakuphedzani toera kupungula kugopa kweneku. Munacita tani pyenepi?

⁷ Panango pinakhala pyadidi kuna imwe kuona pontho maonero mangasi anagumanika m’marevista a Ncenjezi a nduli. b Mwacitsandzo, khunganyikani mwadidi. (Mis. 21:5) Mungadziwa mwadidi mphangwa zinafuna kupfundza imwe pa misonkhano ntsiku ineyi, pinakhala pyakukhonda nentsa toera kutawira. Kusiyapo pyenepi, perekani ntawiro wacigwagwa. (Mis. 15:23; 17:27) Ntawiro wacigwagwa unakuphedzani toera mukhonde kugopa pakutawira. Pontho ntawiro unoyu wa mafala akucepa, unaphedza abale na alongo toera kubvesesa mwadidi pinalonga imwe kupiringana ntawiro wakulapha kakamwe. Mungapereka ntawiro wacigwagwa mukuphatisira mafala anu ene, munapangiza kuti mwakhunganyika mwadidi, pontho mwabvesesa mwadidi mphangwa zinapfundzwa.

8. Yahova asaona tani kuwangisira kunacita ife?

⁸ Ndiye tani khala mwayesera kuphatisira maonero anewa mangasi mbwenye musapitiriza kugopa kutawira kazinji kene pa misonkhano? Khalani na cinyindiro cakuti Yahova asakomerwa na kuwangisira kwanu toera kucita pinakwanisa imwe. (Luka 21:1-4) Yahova nee asatiphemba toera kucita pinthu pyakuti nee tinakwanisa kupicita. (Afil. 4:5) Khazikisani cifuno ca pinthu pinakwanisa imwe kucita, pontho phembani Yahova toera akuphedzeni kuti mukhale wakukhurudzika. Pakutoma panango munakhazikisa cifuno cakupereka ntawiro ubodzi mwacigwagwa.

9. Thangwi yanji panango pinakhala pyakunentsa toera kutawira mu mpingo ukulu?

⁹ Khala mu mpingo mwanu muli na amwazi mphangwa azinji, panango munathimbana na cinentso cinango. Panango abale na alongo azinji asalamusa manja toera kutawira, pontho kazinji kene imwe nee musathonywa toera kutawira. Mwacitsandzo, mulongo Danielle ndzidzi onsene asakomerwa kakamwe na kutawira pa misonkhano. c Iye asaona  pyenepi ninga njira yakulambira Yahova, kuwangisa anango, pontho ninga njira yakuwangisa cikhulupiro cace ku undimomwene wa Bhibhlya. Mbwenye pidafuluka iye mbaenda ku mpingo unango ukulu, iye nee akhathonywa kazinji kene toera kutawira, pontho midzidzi inango akhathonywa basi ene kabodzi. Iye alonga: “Ine ndatsukwala, pontho ndikhapibva ninga ndaluza mwai. Pyenepi pingacitika mwakubwereza-bwereza, munthu asanyerezera kuti m’bale anatsogolera khundu ineyi asacita pyenepi mwakufuna.”

10. Ndi pinthu pipi pinafuna kutiphedza toera kukhala na miyai yakutawira pa misonkhano?

¹⁰ Kodi imwe mwakhalambo kale na mabvero ninga a mulongo Danielle? Khala ndi tenepo, panango munanyerezera kuti nee munatawirabve pa misonkhano. Mbwenye lekani kusiya kulamusa manja toera kutawira. Mphapo ninji pinafuna kukuphedzani? Panango pinakhala mwadidi kukhunganya mitawiro mizinji. Natenepa, mungakhonda kupaswa mwai toera kutawira ndima zakutoma, imwe munakhala na miyai toera kutawira ndima zinango peno makhundu anango. Mu ndzidzi unakhunganyika imwe Pfundziro ya Ncenjezi, nyerezerani kuti ndima ibodzi na ibodzi isabverana tani na nsolo unakhunganyika imwe. Mungacita pyenepi, imwe munakhala na mitawiro yadidi toera kutawira mu ndzidzi wa Pfundziro ya Ncenjezi. Cinthu cinango cinafuna kukuphedzani ndi kukhunganyika mitawiro mu ndima zakuti zisalonga pya undimomwene wa Bhibhlya wakuti ndi wakunentsa kuufokotoza. (1 Akor. 2:10) Thangwi yanji? Thangwi anthu azinji nee asathukula manja toera kutawira ndima zenezi. Mphapo ndiye tani khala musaphatisira maonero anewa, mbwenye musapitiriza kukhonda paswa mwai wakutawira pa misonkhano? Misonkhano mbidzati kutoma, imwe munakwanisa kucedza na m’bale anatsogolera pfundziro ya Ncenjezi toera kumpanga ndima inafuna imwe kutawira.

11. Lemba ya Afilipi 2:4 isatikulumiza toera kucitanji?

¹¹ Lerini Afilipi 2:4. Mpostolo Paulu akulumiza Akristu toera anyerezere pinafuna anango. Tinaphatisira tani uphungu unoyu pa misonkhano? Ife tisafunika kukumbuka kuti anango asafunambo kutawira pa misonkhano.

12. Ndi njira ipi yadidi kakamwe toera kuwangisa anango pa misonkhano? (Onanimbo foto.)

 ¹² Nyerezerani basi. Mungacedza na axamwali anu, kodi musalonga ndimwe basi mbamukhonda kuapasambo mwai toera alonge? Nkhabe. Imwe musafuna kuti iwo alongembo. Munjira ibodzi ene, ife tisafunambo kupasa mwai anthu azinji toera atawire pa misonkhano. Thangwi ibodzi mwa njira zadidi kakamwe zakuwangisa abale na alongo athu ndi kuapasa mwai toera alonge pinakhulupira iwo. (1 Akor. 10:24) Tendeni tione kuti tinacita tani pyenepi.

13. Tisafunika kucitanji toera kupasa mwai anango kuti atawire pa misonkhano?

¹³ Ife tinakwanisa kupereka ntawiro wacigwagwa toera anango akhalembo na mwai wakutawira. Akulu a mpingo na amwazi mphangwa anango a maluso asafunika kupangiza citsandzo cakucita pyenepi. Ngakhale pakupereka ntawiro wacigwagwa, musafunika kucalira kulonga ntsonga zizinji. Mungalonga pinthu pyonsene piri pa ndima, anango nee anakhalabve na pinthu toera kulonga. Mwacitsandzo, mu ndima ino mwaperekwa maonero mawiri: Kupereka ntawiro wacigwagwa na kucalira kulonga ntsonga zizinji. Khala ndimwe anafuna kutawira pakutoma ndima ino, yeserani basi ene kulonga ntsonga ibodzi.

14. Thangwi yanji tisafunika kukhala na maonero akulinganira pakulamusa manja toera kutawira? (Onanimbo foto.)

¹⁴ Khalani na maonero akulinganira pakulamusa manja toera kutawira. Thangwi tingalamusa manja kazinji kene, m’bale anatsogolera anapibva ninga ali kukakamizwa toera atithonye mwakubwereza-bwereza, maseze anango adzati kukhala na mwai wakutawira. Pyenepi pinacitisa anango kukhonda khala na cifuno cakuthukula manja.—Ekle. 3:7.

15. (a) Tisafunika kucitanji tingakhonda kuthonywa toera kutawira? (b) M’bale anatsogolera khundu ya mibvundzo na mitawiro asafunika kucitanji toera kupangiza citsalakano kuna anthu onsene? (Onani bokosi ya nsolo wakuti “ Khala Muli Kutsogolera.”)

¹⁵ Amwazi mphangwa azinji angalamusa manja toera kutawira mu ndzidzi wa pfundziro, panango nee tinakwanisa kutawira kazinji  kene ninga munafuna ife. Pontho midzidzi inango m’bale anacitisa khundu panango nee anakwanisa kutithonya toera titawire. Pyenepi panango pinakhala pyakutsukwalisa, mbwenye nee tisafunika kuipirwa tingakhonda kuthonywa.—Ekle. 7:9.

16. Tinawangisa tani ale anatawira pa misonkhano?

¹⁶ Khala imwe nee musakwanisa kutawira kazinji kene ninga munafuna imwe, bveserani mwadidi mu ndzidzi unatawira anango, pontho asimbeni pakumala kwa misonkhano thangwi ya mitawiro yawo. Mafala anu akusimba anawangisa kakamwe abale na alongo anewa ninga pikhafuna imwe kuawangisa na mitawiro yanu. (Mis. 10:21) Thangwi kusimba anango ndi njira inango ya kuwangisana unango na ndzace.

17. (a) Anyakubala anaphedza tani anawo pakukhunganyika mitawiro? (b) Mwakubverana na vidhyu, ndi pinthu pipi pinai pinafunika ife kucita pakukhunganyika ntawiro? (Onanimbo foto.)

¹⁷ Ndi njira zipi zinango zakuti tinakwanisa kuwangisana unango na ndzace pa misonkhano? Khala ndimwe nyakubala, phedzani mwananu toera kukhunganya ntawiro mwakubverana na thunga yace. (Mat. 21:16) Midzidzi inango, misolo inango isalonga pya nyatwa zinathimbana na anyakumanga banja peno kufunika kwa makhaliro adidi, mbwenye misolo ineyi panango inakhala na ndima zakucepa zakuti mwana anakwanisa kutawira. Kusiyapo pyenepi, phedzani ananu toera adziwe kuti  thangwi yanji nee anathonywa ndzidzi onsene unalamusa iwo manja toera kutawira. Kucita pyenepi kunaaphedza toera akhonde kutsukwala angakhonda kuthonywa toera kutawira.—1 Tim. 6:18. d

18. Tinacalira tani kulonga kakamwe thangwi ya ife mu ndzidzi unatawira ife? (Misangani 27:2)

¹⁸ Tonsene tinakwanisa kukhunganya mitawiro yakuti inasimba Yahova na kuwangisa abale na alongo athu. (Mis. 25:11) Panango midzidzi inango tinalonga mwacigwagwa pinthu pidaticitikira, mbwenye tisafunika kucalira kulonga kakamwe pinthu pyenepi. (Lerini Misangani 27:2; 2 Akor. 10:18) M’mbuto mwace, mitawiro yathu isafunika kusimba Yahova, kulonga pya Mafalace na atumiki ace. (Apok. 4:11) Mbwenye khala mbvundzo wa ndima usatiphemba toera kulonga pidaticitikira, tisafunika kucita pyenepi. Ndima inatowera inapangiza citsandzo ceneci.

19. (a) Ndi maphindu api anafuna kukhala na ife tingaikha pifuno pya anango pa mbuto yakutoma pa misonkhano? (Aroma 1:11, 12) (b) Thangwi yanji musakomerwa na kutawira pa misonkhano?

¹⁹ Maseze nkhabepo mitemo inalonga kuti tisafunika kutawira tani, tonsene tinakwanisa kuwangisira toera kupereka mitawiro yakuwangisa. Pyenepi pisabveka kuti midzidzi inango tinatawira kazinji kene, peno kukomerwa na miyai inapaswa ife toera kutawira na kutsandzaya anango angapaswa miyai toera kutawira. Tingaikha pifuno pya anango pa mbuto yakutoma pa misonkhano yathu, ‘tinawangisana unango na ndzace.’—Lerini Aroma 1:11, 12.