• “Ine ndisapibva ninga mamunanga asacita upombo mwakubwereza-bwereza.”

• “Ine ndisapibva ninga munthu wakupwazika na wakusowa basa.”

• “Ine nee ndikhapanga munthu unango thangwi ya pyenepi. Mbwenye ndikhathabuka napyo ndekhene muntima.”

• “Ndikhapibva ninga Yahova nee asanditsalakana.”

Mafala anewa asapangiza kuti nkazi asatsukwala kakamwe mamunace angaona ucipezipezi. Pontho mamuna angaona ucipezipezi mwacibisobiso mu miyezi mizinji peno pyaka pizinji, nkazace panango anapibva ninga nee asanyindirwabve na mamunace. Nkazi m’bodzi alonga tenepa: “Ine ndisapibva ninga nee ndisadziwa mamunanga. Ndisabvundzika khala pana pinthu pinango pinandibisira iye.”

Nsolo uno wacitirwa akazi akuti amunawo ali na nsambo wakuona ucipezipezi. a Iwo unafokotoza midida ya Bhibhlya yakuti inaabalangaza, inaapasa cinyindiro cakuti Yahova asaafuna, pontho inaaphedza toera apitirize kukhala na uxamwali wakuwanga na Yahova. b

Maseze nee munakwanisa kuonera mamunanu pinthu pyonsene pinacita iye, pana pinthu pingasi pyakuti munakwanisa kupicita toera mukhale muntendere. Pinthu pyace ndi ipi:

Calirani kupasika mulando. Nkazi panango ananyerezera kuti ciripo cinaipisa iye toera mamunace aone ucipezipezi. Danielle c alonga: “Ine ndikhaona kuti ndikhafudza banja yanga thangwi ndikhaipirwa kakamwe.” Alice akhaona ninga kuti nee ndi nkazi wadidi kuna mamunace. Iye akhabvundzika: ‘Thangwi yanji mamunanga asakomerwa na kuyang’ana akazi anango m’mbuto mwa kuyang’ana ine?’

Khala imwe musapibvambo munjira ibodzi ene, dziwani kuti Yahova nee asakupasani mulando thangwi ya pinthu pinacita mamunanu. Lemba ya Tiyago 1:14 isalonga: “M’bodzi na m’bodzi asayeserwa thangwi yakukwatika mbapeuswa na kusirira kwace.” (Aroma 14:12; Afil. 2:12) M’mbuto mwakukupasani mulando,  Yahova asakomerwa thangwi yakukhulupirika kwanu kuna iye.—2 Kro. 16:9.

Nkazi panango ananyerezera kuti mamunace asaona ucipezipezi thangwi iye nee ndi nkazi wadidi. Mbwenye unoyu nee ndi undimomwene. Anyakudziwisa asalonga kuti kuona ucipezipezi kusacitisa munthu kukhala na cifuno cakupita m’mabonde munjira yakuti nkhabepo nkazi anakwanisa kunkomeresa.

Calirani kudzudzumika kakamwe. Catherine alonga kuti ndzidzi onsene akhanyerezera ucipezipezi ukhaona mamunace. Frances alonga: “Ine ndikhadzudzumika kakamwe ndingakhonda kudziwa kunagumanika mamunanga. Ine ndikhadzudzumika ntsiku yamumphu.” Alongo anango akumanga banja alonga kuti asakhala na manyadzo angakhala pabodzi na abale na alongo anadziwa kuti amunawo asaona ucipezipezi. Anango asaona ninga ali okhene thangwi asanyerezera kuti nkhabepo munthu anabvesesa nyatwa zawo.

Nee ndi pyakuipa kukhala na mabvero anewa. Mbwenye ndzidzi onsene mungakhala na mabvero anewa, munakhala wakudzudzumika kakamwe. Natenepa, yeserani kunyerezera pinthu pyakuti pinawangisa uxamwali wanu na Yahova. Kucita pyenepi kunakuphedzani toera kupirira.—Mas. 62:2; Aef. 6:10.

Imwe munaphedzeka kakamwe mungaleri Bhibhlya na kunyerezera pidaleri imwe thangwi ya akazi akutsukwala adagumana cibalangazo thangwi yakucita phembero kuna Yahova. Kazinji kene Yahova nee amalisa nyatwa zawo, mbwenye aaphedza toera kukhala akukhurudzika. Mwacitsandzo, Yana akhali “wakutsukwala kakamwe” thangwi ya nyatwa zace. Mbwenye pidamala iye kucita “phembero kuna Yahova mu ndzidzi uzinji,” iye akhurudzika, maseze nee akhadziwa kuti nyatwa zace mbazidamala tani.—1 Sam. 1:10, 12, 18; 2 Akor. 1:3, 4.

Sakani ciphedzo ca akulu a mpingo. Iwo anakwanisa kukhala ninga ‘mbuto yakuthawira mphepo mu ndzidzi wa condzi.’ (Iza. 32:2) Panango iwo anakupangani toera mucedze na mulongo wakuti munakwanisa kumpanga nyatwa zanu mbakubalangazani.—Mis. 17:17.

Panango munakwanisa kuphedza mamunanu toera asiye nsambo wakuona ucipezipezi. Bhibhlya isalonga kuti toera kumalisa nyatwa peno kukunda nyamalwa, “mphyadidi kakamwe kukhala awiri kupiringana m’bodzi.” (Ekl. 4:9-12) Anyakudziwisa asalonga kuti kazinji kene pinthu pisafamba mwadidi banja ingaphata pabodzi toera kumalisa nsambo  wakuona ucipezipezi, pontho isanyindirana unango na ndzace.

Mwandimomwene, pizinji pisanyindira kuwangisira kwa ndzanu wa m’banja toera kusiya nsambo wakuona ucipezipezi. Kodi iye asaphemba ciphedzo kuna Yahova na kuna akulu a mpingo? (2 Akor. 4:7; Tiya. 5:14, 15) Kodi piripo pinacita iye toera akhonde kuona ucipezipezi? Mwacitsandzo, kodi iye asacalira kuphatisira kazinji kene komputadhori, thabhuleti peno ntokodzi? (Mis. 27:12) Kodi iye ali dzololo toera kutawira ciphedzo canu mbakupangani pinthu pyonsene? Khala ndi tenepo, panango imwe munakwanisa kumphedza.

Munacita tani pyenepi? Onani citsandzo ici: “Felicia amanga banja na Ethan, wakuti akhali na nsambo wakuona ucipezipezi pikhali iye mwana. Felicia apanga mamunace kuti angakhala na cifuno cakuona ucipezipezi akhafunika kumpanga.” Ethan alonga: “Ine ndapanga nkazanga pyonsene pikhandicitikira. Iye andiphedza mwaufuni toera ndicalire mayesero anewa, pontho kazinji kene akhandibvundzisa kuti pinthu pikufamba tani. Kusiyapo pyenepi, iye andiphedza toera ndikhonde kupita mu interneti kazinji kene.” Mwandimomwene, Felicia asatsukwala thangwi yakudziwa kuti Ethan asafuna pontho kuona ucipezipezi. Iye alonga: “Mbwenye kutsukwala kwanga na kuipirwa kwanga nee pisamphedza toera kucalira nsambo unoyu. Pidamala ife kucedza thangwi ya pyenepi, iye ali dzololo toera kundiphedza toera ndikunde kutsukwala kwanga.”

Kucedza kweneku nee kunaphedza basi ene mamuna toera kusiya kuona ucipezipezi, mbwenye kunaphedzambo nkazace toera atome pontho kun’nyindira. Kusiyapo pyenepi, mamuna angakhala wakusudzuka toera kupanga nkazace cipendamiro cace cakucita pinthu pyakuipa, kunenda iye na pinthu pinacita iye, pinakhala pyakukhonda nentsa toera nkazace atome pontho kun’nyindira.

Kodi imwe musaona kuti munakwanisambo kuphedza mamunanu munjira ibodzi ene? Khala ndi tenepo, musaona tani kuleri nsolo uno mbamucedza pabodzi pinaleri imwe? Mungacita pyenepi, mamunanu anakwanisa kusiya kuona ucipezipezi mbamutoma pontho kun’nyindira. M’mbuto mwakuipirwa na imwe thangwi yakulonga nyatwa zinathimbana na iye, iye anabvesesa kuti pinthu pinacita iye pisakukhuyani tani. Imwe musafunika kuphedzera kuwangisira kunacita iye toera kusiya nsambo wakuona ucipezipezi, mbamucita pinthu pinapangiza kuti musan’nyindira pontho. Uwiri wanu musafunika kupfundza pinthu pinacitisa anthu kuona ucipezipezi na pinthu pinafunika iwo kucita toera kusiya kuona ucipezipezi. d

Khala musagopa kuti nee munakwanisa kucedza na mamunanu mwakukhurudzika thangwi yakuona  ucipezipezi, phembani nkulu wa mpingo anaona imwe kuti musakhala naye wakusudzuka toera akhale pabodzi na imwe mu ndzidzi unacedza imwe. Dziwani kuti ngakhale ndzanu wa m’banja asiya kuona ucipezipezi, panango panapita ndzidzi toera mutome pontho kun’nyindira. Mbwenye lekani kubwerera nduli. Onani pinthu pyadidi pinawangisira ndzanu wa m’banja toera kucita. Khalani na cinyindiro cakuti thangwi yakupirira kwanu, mukupita kwa ndzidzi ndzanu anakwanisa kukunda nsambo wace wakuona ucipezipezi.—Ekl. 7:8; 1 Akor. 13:4.

Mamunanu angatoma pontho kuona ucipezipezi, nee pisabveka kuti iye ndi munthu wakukhonda tcunyuka peno nee anacinjabve. Khala iye ali na nsambo wakuona ucipezipezi, panango panapita ndzidzi uzinji toera iye asiye nsambo unoyu. Panango iye anaona pontho ucipezipezi maseze papita pyaka pizinji. Toera asiye nsambo wakuona ucipezipezi iye asafunika kuwangisira toera akhonde kuphatisira kazinji kene komputadhori, thabhuleti peno ntokodzi. Iye asafunika kupitiriza kucita pyenepi, maseze aone kuti asiya nsambo unoyu. (Mis. 28:14; Mat. 5:29; 1 Akor. 10:12) Iye asafunika kukulisa “mphambvu inatsogolera manyerezero” toera akwanise ‘kuida pinthu pyakuipa’ ninga kuona ucipezipezi na masturbação. (Aef. 4:23; Mas. 97:10; Aroma 12:9) Kodi iye asawangisira toera kucita pyenepi? Khala asawangisira, panango mukupita kwa ndzidzi anasiya kuona ucipezipezi. e

Mphapo ndiye tani khala mamunanu nee asawangisira toera kusiya kuona ucipezipezi? Panango imwe munatsukwala peno kuipirwa. Pangani Yahova pinthu pyonsene pinakudzudzumisani. Pyenepi pinakuphedzani toera kukhala wakukhurudzika. (1 Ped. 5:7) Pitirizani kucita phembero, kupfundza Bhibhlya na kunyerezera mwadidi pinapfundza imwe toera mupitirize kuwangisa uxamwali wanu na Yahova. Mungacita pyenepi, khalani na cinyindiro cakuti iye anakhalambo na uxamwali wakuwanga na imwe. Lemba ya Izaiya 57:15, isalonga kuti iye asakhala na ale “anathabuka, pontho a ntima wakucepeseka” mbaaphedza toera akhale pontho akutsandzaya. Wangisirani toera kukhala Nkristu wa citsandzo cadidi. Sakani ciphedzo ca akulu a mpingo. Pontho pitirizani kukhala na cidikhiro cakuti ntsogolo panango mamunanu anasiya kuona ucipezipezi.—Aroma 2:4; 2 Ped. 3:9.