1. Ninji pinafuna kutiphedza toera tikomerwe na kupfundza maprofesiya a Bhibhlya?

 M’BALE unango anacemerwa Ben alonga: “Ine ndisakomerwa na kupfundza maprofesiya a Bhibhlya.” Kodi imwe musakomerwambo na kupfundza maprofesiya a Bhibhlya? Peno musaona kuti maprofesiya a Bhibhlya ndi akunentsa kakamwe toera kuabvesesa? Panango musaona kuti kupfundza maprofesiya a Bhibhlya ndi kwakunetesa. Mbwenye mungabvesesa kuti thangwi yanji Yahova alembesa maprofesiya a Bhibhlya, panango munacinja manyerezero anu.

2. Tinapfundzanji mu nsolo uno?

² Nsolo uno unapangiza kuti thangwi yanji tisafunika kupfundza maprofesiya a Bhibhlya, pontho tinaapfundza tani. Buluka penepo tinapfundza maprofesiya mawiri anagumanika m’bukhu ya Dhanyeli toera kuona kuti kubvesesa maprofesiya anewa kunatiphedza tani cincino.

3. Tisafunika kucitanji khala tisafuna kubvesesa maprofesiya a Bhibhlya?

³ Ife tisafunika kuphemba ciphedzo khala nee tiri kubvesesa maprofesiya a Bhibhlya. Mwacitsandzo, nyerezerani kuti muli kuenda kaona mbuto yakuti nee musaidziwa mwadidi, mbwenye xamwali wanu anaenda na imwe asaidziwa mwadidi. Iye asadziwa mwadidi mbuto inagumanika imwe, pontho asadziwa kunenda nseu ubodzi na ubodzi. Mwakukhonda penula, imwe munatsandzaya thangwi yakucita ulendo na xamwali unoyu! Munjira ibodzi ene, Yahova ndi ninga xamwali unoyu, thangwi iye asadziwa mwadidi tsogolo yathu. Natenepa, toera tibvesese maprofesiya a Bhibhlya, mwakucepeseka tisafunika kuphemba ciphedzo ca Yahova.—Dhan. 2:28; 2 Ped. 1:19, 20.

4. Thangwi yanji Yahova alembesa maprofesiya a Bhibhlya? (Yeremiya 29:11) (Onanimbo foto.)

⁴ Ninga nyakubala wadidi, Yahova asafuna kuti anace akhale  na umaso wadidi ntsogolo. (Lerini Yeremiya 29:11.) Mbwenye mwakusiyana na anyakubala, Yahova anakwanisa kutipanga pinthu pinafuna kucitika ntsogolo, pontho pinthu pyenepi pisacitikadi. Iye alembesa maprofesiya a Bhibhlya toera tikwanise kudziwa pinthu pyakufunika mbapidzati kucitika. (Iza. 46:10) Maprofesiya a Bhibhlya ndi muoni wadidi udatipasa Babathu wakudzulu. Mphapo tinakwanisa tani kukhala na cinyindiro cakuti pinthu pinalonga Bhibhlya pinadzacitikadi?

5. Aphale na atsikana anapfundzanji na citsandzo ca Max?

⁵ Kuxikola, aphale na atsikana kazinji kene asakhala na anthu akuti nee asalemedza pinalonga Bhibhlya. Malongero awo na makhaliro awo anakwanisa kucitisa aphale na atsikana akuti ndi Mboni za Yahova apenule pinakhulupira iwo. Onani pidacitikira m’bale anacemerwa Max. Iye alonga: “Pikhali ine m’phale, ndatoma kupenula pikhandipfundzisa anyakubalanga thangwi ya ulambiri wandimomwene, pontho ndikhapenula khala Bhibhlya yalembeswa na Mulungu.” Kodi anyakubalace acitanji? Iye alonga: “Iwo acita pinthu mwakukhurudzika, maseze ine ndikhadziwa kuti iwo akhali akudzudzumika.” Anyakubala a Max atawira mibvundzo yace mukuphatisira Bhibhlya. Mbwenye Max acitambo cinthu cinango. Iye alonga: “Ine ndapfundza ndekhene maprofesiya a Bhibhlya, pontho ndikhapangambo anango pikhapfundza ine.” Ninji pidacitika? Max alonga: “Ine ndakhala na cinyindiro cakuti Bhibhlya yalembeswa na Mulungu!”

6. Musafunika kucitanji khala musapenula pinalonga Bhibhlya, pontho thangwi yanji?

⁶ Khala imwe mwatoma kupenula undimomwene wa Bhibhlya ninga Max, nee musafunika kukhala na manyadzo. Mbwenye musafunika kucita pinthu mwakucimbiza. Kupenula ndi ninga furuju peno udzingiri. Munthu angapwaza furuju, iyo inakwanisa kufudza cinthu ca ntengo ukulu. Toera kumalisa kupenula kwakuti kunakwanisa “kufudza” cikhulupiro canu, musafunika kubvundzika tenepa: ‘Kodi ine ndisakhulupira pinalonga Bhibhlya thangwi ya ntsogolo?’ Khala musapenula, musafunika kupfundza maprofesiya a Bhibhlya adakwanirisika kale. Munacita tani pyenepi?

7. Ninji pidaphedza Dhanyeli toera kupfundza maprofesiya? (Danyeli 12:10) (Onanimbo foto.)

⁷ Dhanyeli apangiza citsandzo cadidi kuna ife cakuti tinapfundza tani maprofesiya. Iye akhapfundza maprofesiya na cifuno cakudziwa undimomwene. Dhanyeli akhalimbo wakucepeseka. Iye akhadziwa kuti angapitiriza kukhala na uxamwali wakuwanga na Yahova mbambvera, iye mbadamphedza toera kubvesesa maprofesiya. (Dhan. 2:27, 28; lerini Dhanyeli 12:10.) Dhanyeli apangiza kuti akhali wakucepeseka thangwi yakunyindira ciphedzo ca Yahova. (Dhan. 2:18) Dhanyeli akhakomerwambo na kupfundza. Iye akhafufudza Malemba akhagumanika mu ndzidzi unoyu. (Yer. 25:11, 12; Dhan. 9:2) Munatowezera tani citsandzo ca Dhanyeli?

8. Thangwi yanji anango nee asatawira kuti maprofesiya a Bhibhlya anakwanirisika, mbwenye ife tisafunika kucitanji?

⁸ Nyerezerani kuti thangwi yanji musapfundza maprofesiya a Bhibhlya. Kodi imwe musapfundza maprofesiya a Bhibhlya thangwi musafuna kudziwa kakamwe undimomwene? Khala ndi tenepo, Yahova anakuphedzani.  (Juw. 4:23, 24; 14:16, 17) Mbwenye anthu anango asapfundza maprofesiya na mathangwi anango. Anango asapfundza maprofesiya thangwi asafuna kugumana pinthu pinapangiza kuti Bhibhlya nee yalembeswa na Mulungu. Iwo asanyerezera kuti khala Bhibhlya nee yalembeswa na Mulungu, natenepa anakwanisa kucita pisankhulo pyawo thangwi ya pinthu pyadidi na pyakuipa. Mbwenye ife tisafunika kupfundza maprofesiya a Bhibhlya na mathangwi adidi. Kusiyapo pyenepi, pali na n’khaliro wakufunika kakamwe wakuti unatiphedza toera kubvesesa maprofesiya a Bhibhlya.

9. Ndi nkhaliro upi unafuna kutiphedza toera kubvesesa maprofesiya a Bhibhlya? Fokotozani.

⁹ Khalani wakucepeseka. Yahova asapikira kuti anaphedza anthu akucepeseka. (Tiya. 4:6) Natenepa, ife tisafunika kuphemba ciphedzo cace toera kubvesesa maprofesiya a Bhibhlya. Pontho tingakhala akucepeseka, ife tinatawirambo ciphedzo ca m’bandazi wakukhulupirika na wandzeru wakuti asaphatisirwa na Yahova toera kutipasa cakudya cauzimu pa ndzidzi wakuthema. (Luka 12:42) Yahova ndi Mulungu wakulinganira, natenepa ife tinakwanisa kukhala na cinyindiro cakuti iye basi ene anaphatisira m’bandazi unoyu toera kutiphedza kubvesesa undimomwene unagumanika m’Mafalace.—1 Akor. 14:33; Aef. 4:4-6.

10. Mwapfundzanji na citsandzo ca Esther?

¹⁰ Pfundzani mwadidi. Tomani kupfundza profesiya inakomerwa na imwe. Ndi pyenepi pidacita mulongo Esther. Iye akhafuna kakamwe kudziwa maprofesiya analonga pya Mesiya. Iye alonga: “Pikhali ine na pyaka 15 pyakubalwa, ndatoma kufufudza toera kuona pinthu pinapangiza kuti maprofesiya anewa alembwa Yezu mbadzati kubalwa.” Pinthu pidapfundza iye m’Mipukutu ya Bara Yakufa pyamphedza kakamwe. Iye athimiza: “Inango mwa iyo yalembwa Kristu mbadzati kubalwa, natenepa maprofesiya anagumanika mwenemo alembeswa na Mulungu.” Esther alonga: “Ine ndikhafunika kuleri pinthu kazinji kene toera ndipibvesese mwadidi.” Mbwenye iye ali wakutsandzaya thangwi ya kuwangisira kwace. Pakumala kupfundza mwadidi maprofesiya mazinji a Bhibhlya, iye alonga: “Ine ndakwanisa kuona kuti pinalonga Bhibhlya ndi pyandimomwene!”

11. Thangwi yanji ndi pyakufunika kukhala na cinyindiro cakuti pinalonga Bhibhlya ndi pyandimomwene?

¹¹ Tingaona njira idakwanirisika maprofesiya anango a Bhibhlya tinanyindira kakamwe Yahova kuphatanizambo pitsogolero pinatipasa iye. Kusiyapo pyenepi, maprofesiya a Bhibhlya asatiphedza toera kukhala na cidikhiro ca ntsogolo mwakukhonda tsalakana nyatwa zinathimbana na ife cincino. Tendeni tione mwacigwagwa maprofesiya mawiri adalemba Danyeli akuti ali kukwanirisika cincino. Kubvesesa maprofesiya anewa kunatiphedza toera kucita pisankhulo pyandzeru.

12. Kodi miyendo ya “utale wakubvungazwa na dongo iwisi” isaimiriranji? (Dhanyeli 2:41-43)

¹² Lerini Dhanyeli 2:41-43. Ndoto ya Mambo Nabukodonozore idafokotoza Dhanyeli, miyendo ya dzimunthu idaona mambo ikhali ya “utale wakubvungazwa na dongo iwisi.” Tingalandanisa profesiya ineyi pabodzi na anango a  m’bukhu ya Dhanyeli na Apokalipse tinakwanisa kubvesesa kuti miyendo ineyi isaimirira Estados Unidos na Bhritanya akuti asaphata basa pabodzi, pontho ndi amphambvu kakamwe lero. Thangwi ya utongi unoyu wamphambvu kakamwe Danyeli alonga kuti: “Khundu ibodzi ya umambo unoyu inadzakhala yakuwanga, khundu inango inadzakhala yakufewa.” Thangwi yanji khundu inango inadzakhala yakufewa? Thangwi anthu a umambo unoyu mbadacitisa kuti iwo ukhonde kukhala wamphambvu. b

13. Ndi undimomwene upi wakufunika unapfundza ife mu profesiya ineyi?

¹³ Ife tisapfundza undimomwene wakufunika kakamwe kubulukira mu dzimunthu idafokotoza Dhanyeli. Ife tinapfundza pizinji makamaka na miyendo ya dzimunthu ineyi. Cakutoma, utongi wa dziko yonsene wa Anglo-Amerikana usapangiza kuti ndi wamphambvu kakamwe. Mwacitsandzo, iwo ukhali pabodzi na madziko adawina Nkhondo Yakutoma Ya Dziko Yonsene Yapantsi na Nkhondo Yaciwiri Ya Dziko Yonsene Yapantsi. Mbwenye utongi unoyu wa pa dziko yonsene uli kufeweswa, pontho unapitiriza kufeweswa na uviyaviya unacitwa na anthu anatongwa na utongi unoyu. Caciwiri, utongi unoyu wa pa dziko yonsene unadzakhala wakumalisa mu ndzidzi unafuna kudzafudza Umambo wa Mulungu mautongi onsene a pa dziko yapantsi. Maseze mautongi anango ayesere kumenyana na utongi wa Anglo-Amerikana wa pa Dziko Yonsene, iwo nee anadzaupitira m’mbuto. Ife tisadziwa pyenepi thangwi mwala unaimirira Umambo wa Mulungu unadzanyedza miyendo ya dzimunthu yakuti isaimirira utongi wa Anglo-Amerikana.—Dhan. 2:34, 35, 44, 45.

14. Kubvesesa profesiya inalonga pya miyendo ya utale wakubvungazwa na dongo kunatiphedza tani toera kucita pisankhulo pyadidi?

¹⁴ Kodi imwe musakhulupira kuti profesiya ya Dhanyeli inalonga pya miyendo ya utale wakubvungazwa na dongo ndi yandimomwene? Khala ndi tenepo, pyenepi pinakuphedzani toera kusankhula mwadidi pinafuna imwe kucita mu umaso wanu. Imwe nee munasaka kukhala na kobiri izinji peno pinthu pinango pyakumanungo, thangwi musadziwa kuti mwakukhonda dembuka dziko ino yakuipa inafudzwa. (Luka 12:16-21; 1 Juwau 2:15-17) Kubvesesa profesiya ineyi kunakuphedzanimbo toera kuona kuti basa yakumwaza mphangwa na yakupfundzisa ndi yakufunika kakamwe. (Mat. 6:33; 28:18-20) Pakumala kupfundza profesiya ineyi, bvundzikani: ‘Kodi pisankhulo pinacita ine pisapangiza kuti ndisanyindira kuti Umambo wa Mulungu unadzafudza mautongi onsene mwakukhonda dembuka?’

15. Mbani “mambo wakunkwiriro” na “mambo wakunterero” lero? (Dhanyeli 11:40)

¹⁵ Lerini Dhanyeli 11:40. Lemba ya Dhanyeli kapitulu 11 isalonga pya amambo awiri peno mautongi amphambvu akuti asagwinyana unango na ndzace. Tingalandanisa profesiya ineyi na maprofesiya anango a Bhibhlya tisadzindikira kuti “mambo wakunkwiriro” ndi Rusya pabodzi na onsene anam’phedzera, pontho “mambo wakunterero” ndi Utongi wa pa Dziko Yonsene wa Anglo-Amerikana. c

16. Ndi pinentso pipi pinatamba atumiki a Mulungu anakhala mu dziko inatongwa na “mambo wakunkwiriro?”

¹⁶ Atumiki a Mulungu anakhala mu dziko inatongwa na mambo wakunkwiriro ali kutcingwa na mambo unoyu. Abale na alongo anango asamenywa mbafungirwa nkaidi thangwi ya cikhulupiro cawo. Kutcingwa kwa abale na alongo athu “na mambo wakunkwiriro” kusawangisa cikhulupiro cawo. Thangwi yanji? Thangwi iwo asadziwa kuti kutcingwa kwa atumiki a Mulungu kusakwanirisa profesiya inagumanika  m’bukhu ya Dhanyeli. d (Dhan. 11:41) Kudziwa pyenepi kunatiphedza toera kukhala na cidikhiro cakuwanga mbatikhala akukhulupirika kuna Yahova.

17. Ndi pinentso pipi pinathimbana na atumiki a Mulungu anatongwa na “mambo wakunterero”?

¹⁷ Kale, “mambo wakunterero” akhatcingambo atumiki a Yahova. Mwacitsandzo, mu Nkhondo Yakutoma Ya Dziko Yonsene Yapantsi na Nkhondo Yaciwiri Ya Dziko Yonsene Yapantsi, abale na alongo azinji aikhwa nkaidi, pontho ana anango a Mboni za Yahova abuluswa m’maxikola thangwi yakukhonda kuphedzera pinthu pyandale. Pontho mu pyaka pyacincino, atumiki a Yahova anakhala m’madziko anatongwa na mambo wakunterero asathimbana na mayesero mazinji thangwi ya cikhulupiro cawo. Mwacitsandzo, mu ndzidzi unacitwa makampanya a mavoto, panango Nkristu anayeserwa toera kuphedzera nsoka ubodzi wa ndale. Panango iye nee anaenda kavotari; mbwenye m’manyerezero mwace na muntima mwace ali kuphedzera nsoka unoyu. Toera tikhonde  kuphedzera pinthu pyandale tisafunika kucita mphole-mphole na pinthu pinacita ife, pinanyerezera ife na mabvero athu.—Juwau 15:18, 19; 18:36.

18. Thangwi yanji nee tisafunika kudzudzumika na kugwinyana kwa “mambo wakunkwiriro” na “mambo wakunterero”? (Onanimbo foto.)

¹⁸ Ale anakhonda kukhulupira maprofesiya a Bhibhlya, panango anadzudzumika kakamwe angaona “mambo wakunterero” ali kugwinyana na “mambo wakunkwiriro.” (Dhan. 11:40) Amambo anewa awiri ene ali na mabhomba amphambvu kakamwe akuti anakwanisa kufudza anthu onsene pa dziko yapantsi. Mbwenye ife tisadziwa kuti Yahova nee anatawirisa kuti pyenepi picitike. (Iza. 45:18) Natenepa m’mbuto mwakudzudzumika na pinthu pinafuna kucitika ntsogolo, kugwinyana kwa “mambo wakunkwiriro” na “mambo wakunterero” kusawangisa cikhulupiro cathu. Pyenepi pisapangiza kuti makhaliro a dziko ino ali dhuzi na kumala.

19. Ninji pinafunika ife kudziwa thangwi ya maprofesiya a Bhibhlya?

¹⁹ Ife nee tisadziwa kuti maprofesiya anango a Bhibhlya anakwanirisika tani. Ngakhale mprofeta Dhanyeli nee abvesesa mabvekero a pinthu pyonsene pidalemba iye. (Dhan. 12:8, 9) Maseze nee tisadziwa mwadidi kuti maprofesiya anango a Bhibhlya anakwanirisika tani, pyenepi nee pisabveka kuti iwo nee anakwanirisika. Mbwenye ife tinakwanisa kukhala na cinyindiro cakuti Yahova anatiphedza toera kubvesesa pinafunika ife kudziwa pa ndzidzi wakuthema, ninga pidacita iye mu ndzidzi wakale.—Amosi 3:7.

20. Ndi maprofesiya api a Bhibhlya anafuna kukwanirisika mwakukhonda dembuka, pontho tisafunika kupitiriza kucitanji?

²⁰ Mwakukhonda dembuka, anthu anadzalonga mafala akuti “ntendere na citsidzikizo!” (1 Ates. 5:3) Buluka penepo atongi a dziko anadzapomokera uphemberi wauthambi mbaufudza. (Apok. 17:16, 17) Angamala, iwo anapomokera atumiki a Mulungu. (Ezek. 38:18, 19) Kupomokerwa kwa atumiki a Mulungu kunadzatomesa nkhondo ya Armajedhoni. (Apok. 16:14, 16) Ife tiri na cinyindiro cakuti pinthu pyenepi pinacitika mwakukhonda dembuka. Ndzidzi unoyu mbudzati kufika, tendeni tipitirize kupereka takhuta kuna Babathu wakudzulu mukuonesesa mwadidi kukwanirisika kwa maprofesiya a Bhibhlya na kuphedza anango toera acitembo pibodzi pyene.