NSOLO WA PFUNDZIRO 34
‘Pitirizani Kufamba mu Undimomwene’
‘Pitirizani kufamba mu undimomwene.’—3 JUWAU 4.
NYIMBO 111 Tiri na Mathangwi Toera Kutsandzaya
PINAFUNA IFE KUPFUNDZA *
1. Tisaphedzeka tani tingapanga anango kuti tadziwa tani “undimomwene”?
“KODI imwe mwadziwa tani undimomwene?” Mwakukhonda penula, imwe mwatawira mbvundzo unoyu midzidzi mizinji kakamwe. Unoyu ndi ubodzi mwa mibvundzo inacita abale na alongo athu mu ndzidzi unadziwana ife unango na ndzace. Ife tisakomerwa kubva abale na alongo athu mbalonga kuti adziwa tani Yahova, pontho tisakomerwa kuapangambo kuti thangwi yanji tasankhula kukhala m’bodzi wa Mboni za Yahova. (Aroma 1:11) Kucedza kweneko, kusatiphedza toera tipitirize kuona kuti undimomwene ndi wakufunika kakamwe. Kusiyapo pyenepi, kusatiphedza toera tikhale akutonga ‘kupitiriza kufamba mu undimomwene’ peno kupitiriza kukhala m’maso munjira inakomeresa Yahova mbatitambira nkhombo zace.—3 Juwau 4.
2. Tinapfundzanji mu nsolo uno?
2 Mu nsolo uno, tinapfundza mathangwi mangasi anaticitisa kukomerwa na undimomwene. Buluka penepo, tinaona kuti tinapangiza tani kuti tisakomerwa na undimomwene. Mwakukhonda penula, kupfundza pyenepi kunatiphedza toera kupereka takhuta kakamwe kuna Yahova thangwi ya kutiphedza kudziwa undimomwene. (Juwau 6:44) Pontho kunatiphedzambo toera kufuna kakamwe kupfundzisa anango undimomwene wa Bhibhlya.
MATHANGWI ANATICITISA KUFUNA “UNDIMOMWENE”
3. Ndi thangwi ipi yakufunika kakamwe inaticitisa kufuna undimomwene?
3 Pana mathangwi mazinji anaticitisa kufuna undimomwene. Thangwi yakufunika kakamwe ndi yakuti ife tisafuna Yahova Mulungu, Mwanaciro undimomwene. Kubulukira m’Mafalace, Bhibhlya, ife tisakwanisa kun’dziwa ninga Nciti wamphambvu kakamwe wakudzulu na pa dziko yapantsi, pontho ninga Babathu waufuni wakuti asatitsalakana kakamwe. (1 Ped. 5:7) Ife tisadziwa kuti Mulungu wathu ndi ‘wantsisi na wakukoma ntima, wakupirira, waufuni kakamwe na waundimomwene.’ (Eks. 34:6) Yahova asafuna ulungami. (Iza. 61:8) Na thangwi ineyi, iye asatsukwala angationa mbatithabuka. Kusiyapo pyenepi, iye asafuna kakamwe kumalisa nyatwa zonsene, pontho anadzazimalisa pa ndzidzi wakuthema. (Yer. 29:11) Ife tisafunambo kakamwe kuti ndzidzi unoyu ufike, pontho ineyi ndi thangwi inango inaticitisa kufuna kakamwe Yahova.
Undimomwene wa Bhibhlya Walandana na . . . Nangula
Ninga nangula yakuti isacitisa bote toera ikhonde kukwatika na mphepo, undimomwene wa Bhibhlya usatiphedza toera tikhale akukhurudzika tingathimbana na nyatwa. Undimomwene wa Bhibhlya usatikulumizambo toera kupfundzisa anango thangwi ya cidikhiro cathu ca ntsogolo (Onani ndima 4-7)
4-5. Thangwi yanji mpostolo Paulu alandanisa cidikhiro cathu na nangula?
4 Ndi thangwi ipi inango inaticitisa kufuna undimomwene? Ndi thangwi yakuti undimomwene usatiphedza kakamwe. Nyerezerani basi: Undimomwene wa Bhibhlya usaphataniza cidikhiro cathu ca ntsogolo. Toera kupangiza kufunika kwa cidikhiro ceneci, mpostolo Paulu alemba: “Ife tiri na cidikhiro ceneci ninga nangula ya umaso wathu, cakunyindirika na cakuwanga.” (Aheb. 6:19) Ninga nangula yakuti isacitisa bote toera ikhonde kukwatika na mphepo, undimomwene wa Bhibhlya usatiphedza toera tikhale akukhurudzika tingathimbana na nyatwa.
5 Pa vesi ineyi Paulu akhalonga pya cidikhiro cakuenda kudzulu ca Akristu akudzodzwa. Mbwenye mafala anewa asaphatambo basa kuna Akristu ali na cidikhiro cakukhala kwenda na kwenda mparaizu pa dziko yapantsi. (Juwau 3:16) Mwandimomwene, kupfundza pya cidikhiro ca umaso wakukhonda mala, kwatiphedza toera kudziwa pinthu pinafuna kuticitikira.
6-7. Mulongo Yvonne aphedzeka tani thangwi yakudziwa undimomwene unalonga pya ntsogolo?
6 Onani citsandzo ca mulongo anacemerwa Yvonne. Anyakubalace nee akhali Mboni za Yahova, pontho pikhali iye mwana akhagopa kakamwe kufa. Iye asakumbuka kuti aleri mafala akuti nee akhakwanisa kuaduwala: “Na ntsiku yace nee kunadzaonekabve mangwana.” Iye alonga: “Mafala anewa andicitisa kukhonda kuphatwa na citulo thangwi ya kunyerezera pinthu pinafuna kucitika ntsogolo.” Ine ndanyerezera: ‘Umaso nee ukhafunika kukhala tenepa. Thangwi yanji ndiri m’maso?’ Ine ndikhanyerezera pyenepi thangwi nee ndikhafuna kufa.”
7 Mukupita kwa ndzidzi, pikhali iye ntsikana Yvonne acedza na Mboni za Yahova. Iye alonga: “Ndatoma kukhulupira kuti mbidakwanisa kukhala m’maso kwenda na kwenda mparaizu pa dziko yapantsi.” Kodi kudziwa undimomwene unoyu kwaphedza tani mulongo wathu? Iye athimiza: “Ine nee ndisacimwanabve kugona namasiku thangwi yakunyerezera pya ntsogolo peno thangwi yakugopa kufa.” Pyenepi pisapangiza kuti Yvonne asakomerwa na undimomwene wa Bhibhlya, pontho asakomerwa kupfundzisambo anango thangwi ya cidikhiro cace ca ntsogolo.—1 Tim. 4:16.
Undimomwene wa Bhibhlya Walandana na . . . Mpfuma
Kutumikira Yahova cincino na cidikhiro ciri na ife cakukhala na umaso wakukhonda mala mu Umambo wa Mulungu ndi ninga mpfuma. Natenepa kuwangisira kutumikira Yahova ndi kwakufunika kakamwe kupiringana pinthu pyonsene (Onani ndima 8-11)
8-9. (a) Munthu unango adalonga Yezu mu nsangani wace, aona tani mpfuma idagumana iye? (b) Kodi imwe musaona tani undimomwene?
8 Undimomwene wa Bhibhlya usaphatanizambo mphangwa zadidi za Umambo wa Mulungu. Yezu alandanisa undimomwene unalonga pya Umambo unoyu na mpfuma yakubisika. Pa Mateu 13:44, Yezu alonga: “Umambo wakudzulu walandana na mpfuma idabiswa m’munda, munthu unango aigumana mbaibisambo; thangwi yakukomerwa, iye aenda kagulisa pinthu pyonsene pikhali na iye mbagula munda unoyu.” Onani kuti munthu unoyu nee akhasaka mpfuma. Mbwenye pidaigumana iye, awangisira toera kukhala nayo. Natenepa iye agulisa pinthu pyonsene pikhali na iye. Thangwi yanji? Thangwi iye akhadziwa kuti mpfuma ineyi ikhali ya ntengo ukulu kakamwe kupiringana pinthu pyonsene pidagulisa iye.
9 Kodi imwe musaona undimomwene ninga mpfuma ya ntengo ukulu kakamwe? Tiri na cinyindiro cakuti musauona tenepo. Ife tisadziwa kuti nkhabe cinthu cakuti dziko ino inakwanisa kutipasa cakulandana na kutsandzaya kuli na ife thangwi yakutumikira Yahova cincino na cidikhiro cakukhala na umaso wakukhonda mala mu Umambo wa Mulungu. Mwai uli na ife wakukhala na uxamwali wakuwanga na Yahova ndi wadidi kakamwe kupiringana kuwangisira kunacita ife toera kuntumikira. Ife tisatsandzaya kakamwe ‘tingakomeresa’ Yahova mu pinthu pyonsene pinacita ife.—Akol. 1:10.
10-11. Ninji pidaphedza Michael toera kucita macinjo mu umaso wace?
10 Azinji a ife acita macinjo mazinji toera kukomeresa Yahova. Anango asiya mabasa akupambulika kakamwe n’dziko, anangombo asiya kuwangisira toera akhale akupfuma, kusiyapo pyenepi, anango acinja umaso wawo mu ndzidzi udatoma iwo kupfundza undimomwene unalonga pya Yahova. Ndi pyenepi pidacita Michael. Iye nee akuzwa na anyakubala akuti ndi Mboni za Yahova. Pikhali iye m’phale, iye akhapfundza pya kumenyana. Iye alonga: “Ine ndikhakomerwa kuona kuti ndine munthu wamphambvu, pontho midzidzi inango ndikhapibva kuti nkhabe munthu anakwanisa kundikunda.” Mbwenye pidatoma iye kupfundza Bhibhlya, Michael adzindikira kuti Yahova asaida pinthu pyauphanga. (Masal. 11:5) Pontho Michael alonga pya banja ikhampfundzisa Bhibhlya kuti: “Iwo cipo andipanga toera ndisiye kupfundza kumenyana, basi ene akhapitiriza kundipfundzisa undimomwene wa Bhibhlya.”
11 Mu ndzidzi ukhapitiriza Michael kupfundza pya Yahova, ufuni wace kuna iye ukhathimizirikambo. Iye adzumatirwa kakamwe thangwi yakuona njira inabvera Yahova ntsisi atumiki ace. Mukupita kwa ndzidzi, Michael adzindikira kuti akhafunika kucita macinjo. Iye alonga: “Ine ndikhadziwa kuti kusiya kupfundza pya kumenyana mbicidakhala cinthu cakunentsa kakamwe kuna ine. Mbwenye ndikhadziwambo kuti pyenepi mbapidakomeresa Yahova, pontho ndikhali na cinyindiro cakuti kutumikira Yahova ndi kwadidi kupiringana pinthu pyonsene pikhafunika ine kusiya.” Michael akomerwa kakamwe na undimomwene udadziwa iye, pontho kukomerwa kweneko kwam’phedza toera kucita macinjo makulu mu umaso wace.—Tiya. 1:25.
Undimomwene wa Bhibhlya Walandana na . . . Nyale
Ceza ca nyale cisatiphedza toera kuona mwadidi pa cidima. Munjira ibodzi ene, Mafala a Mulungu asatiphedza toera kucita pisankhulo mwandzeru n’dziko ino ya Sathani (Onani ndima 12-13)
12-13. Undimomwene wa Bhibhlya waphedza tani Mayli?
12 Toera kupangiza kufunika kwa undimomwene, Bhibhlya isalandanisa undimomwene na nyale inamwanikira pa cidima. (Masal. 119:105; Aef. 5:8) Mayli wa ku Azerbaijão asapereka takhuta kakamwe thangwi ya kudziwa undimomwene wa Mafala a Mulungu. Anyakubalace akhali mu uphemberi wakusiyana. Pai wace akhali Musulumano, pontho mai wace akhali Muyuda. Mayli alonga: “Maseze ine cipo ndapenula kuti Mulungu alipo, pakhali na pinthu pinango pyakuti nee ndikhapibvesesa mwadidi. Ine ndikhabvundzika: ‘Thangwi yanji Mulungu acita anthu, pontho thangwi yanji anthu asathabuka mu umaso wawo onsene buluka penepo mbathabuswa kwenda na kwenda n’djenje ya moto?’ Nakuti anthu asalonga kuti pinthu pisacitika na cifuno ca Mulungu, ine ndikhabvundzikambo: ‘Kodi Mulungu asakomerwa kuona anthu mbakathabuka?’”
13 Mayli apitiriza kusaka mitawiro ya mibvundzo yace. Mukupita kwa ndzidzi, iye atawira kupfundza Bhibhlya mbakhala m’bodzi wa Mboni za Yahova. Iye alonga: “Undimomwene wa m’Bhibhlya wandiphedza toera kukhala munthu wakutsandzaya kakamwe. Kupfundza undimomwene wa Mafala a Mulungu kusandiphedza toera ndikhale na ntendere wa m’manyerezero.” Ninga Mayli, ife tonsene tisasimba Yahova ‘Ule adaticemera toera tibuluke ncidima mbatienda mu ceza cace cadidi kakamwe.’—1 Ped. 2:9.
14. Tisafunika kucitanji toera tifune kakamwe undimomwene? (Onani bokosi ya nsolo wakuti “ Pinthu Pinango Pyakuti Tinakwanisa Kupilandanisa na Undimomwene.”)
14 Pyenepi basi ene ndi pitsandzo pingasi pinapangiza kuti undimomwene ndi wakufunika kakamwe. Mbwenye pana pitsandzo pizinji pinango. Panango pinakhala pyadidi kupfundza mathangwi anango anaticitisa kufuna undimomwene. Thangwi tingafuna kakamwe undimomwene tinafunambo kusaka njira zakupangiza kuti tisafuna undimomwene unoyu.
TINAPANGIZA TANI KUTI TISAFUNA UNDIMOMWENE?
15. Tinapangiza tani kuti tisafuna undimomwene?
15 Ife tinapangiza kuti tisafuna undimomwene tingapfundza Bhibhlya na mabukhu akubuluswa m’Bhibhlya ntsiku zonsene. Mwakukhonda tsalakana khala tadziwa undimomwene cincino peno kale, ndzidzi onsene pana pinthu pizinji toera kupipfundza. Revista yakutoma ya Ncenjezi yalonga tenepa: “Undimomwene wakhala ninga maluwa akuphimbirwa na tsanga thangwi n’dziko ino muna pinthu pizinji pyauthambi pyakuti pinakwanisa kuticimwanisa kudzindikira undimomwene. Toera kugumana maluwa anewa munthu asafunika kuasaka mwadidi. . . . Toera akhale nawo iye asafunika kuwangisira. . . . Mbwenye iye nee asafunika kukomerwa basi ene na maluwa akutoma adagumana iye. . . . Iye asafunika kupitiriza kusaka mwaphinga maluwa anewa a undimomwene.” Kupfundza ndi kwakunentsa, mbwenye kuwangisira kunatiphedza kakamwe.
16. Ndi njira ipi yakupfundza Bhibhlya inaona imwe kuti ndi yakuphedza kakamwe? (Misangani 2:4-6)
16 Nee ndi onsene a ife anakomerwa na kuleri na kupfundza. Mbwenye Yahova asatipanga toera ‘tipitirize kusaka’ toera tibvesese mwadidi undimomwene. (Lerini Misangani 2:4-6.) Tingacita pyenepi mwaphinga tinaphedzeka kakamwe. Pakuleri Bhibhlya, Corey alonga kuti asadinga vesi ibodzi na ibodzi. Iye afokotoza: “Ine ndisaleri pidzindikiro pyapantsi pyonsene, ndisaleri malemba onsene anabverana na vesi ineyi, pontho ndisafufudza pinthu pinango. . . . Pyenepi pisandiphedza toera kupfundza pinthu pinango.” Mwakukhonda tsalakana khala tisaphatisira njira ineyi peno inango, ife tinapangiza kuti tisafuna undimomwene tingakhala na ndzidzi wakupfundza undimomwene mwaphinga.—Masal. 1:1-3.
17. Pisabvekanji kucita pinthu mwakubverana na undimomwene? (Tiyago 1:25)
17 Ife tisadziwa kuti nee pyakwana basi ene kupfundza undimomwene. Toera tiphindule mwakukwana, ife tisafunika kucita pinthu mwakubverana na undimomwene. Pyenepi pisabveka kuphatisira pinthu pinapfundza ife. Tingacita pyenepi, undimomwene unatiphedza toera tikhale akutsandzaya kakamwe. (Lerini Tiyago 1:25.) Mphapo tinakhala tani na cinyindiro cakuti tiri kucita pinthu mwakubverana na undimomwene? M’bale unango alonga kuti tisafunika kudinga pinthu pinacita ife toera tione khala tisaphatisira pinthu pinapfundza ife, pontho khala pali na khundu inafunika ife kucinja. Mpostolo Paulu alonga: “Mwakukhonda tsalakana kuti tathambaruka mpaka papi, tendeni tipitirize kufamba munjira ibodzi ene.”—Afil. 3:16.
18. Thangwi yanji tisafunika kuwangisira toera ‘tipitirize kufamba mu undimomwene?’
18 Nyerezerani nkhombo zinakhala na ife tingawangisira toera ‘kupitiriza kufamba mu undimomwene.’ Ife tisakhala na umaso wadidi kakamwe, pontho tisatsandzayisa Yahova na abale na alongo athu. (Mis. 27:11; 3 Juwau 4) Mwakukhonda penula, anewa ndi mathangwi adidi kakamwe anaticitisa kufuna undimomwene na kucita pinthu mwakubverana na undimomwene.
NYIMBO 144 Pitirizani Kuyang’ana Sagwati!
^ Kazinji kene tisalonga kuti “undimomwene” ndi pinthu pinakhulupira ife na pinacita ife mu umaso wathu ninga Akristu. Natenepa, mwakukhonda tsalakana khala tadziwa cincino undimomwene peno kale, tonsene tinakwanisa kuphedzeka tingapfundza kuti thangwi yanji tisafuna undimomwene. Pyenepi pinatiphedza toera tikhale akutonga kukhala akutawirika kuna Yahova.
