1. Thangwi yanji Yezu aphemba Yahova toera aonere atowereri ace?

 NAMASIKU mbadzati kufa, Yezu aphemba cinthu cakufunika kakamwe kuna Babace wakudzulu. Iye aphemba Yahova toera atsidzikize atowereri ace. (Juwau 17:15, 20) Mwandimomwene, ndzidzi onsene Yahova asaona, asatsidzikiza, pontho asatsalakana mbumba yace. Mbwenye Yezu akhadziwa kuti atowereri ace mbadathimbana na nyatwa zakukhonda dikhira zikhabuluka kuna Sathani. Yezu akhadziwa kuti atowereri ace mbadafuna ciphedzo ca Yahova toera apirire mayesero a Dyabo.

2. Mwakubverana na Masalmo 33:18-20, thangwi yanji nee tisafunika kugopa nyatwa zinathimbana na ife?

² Dziko ino yakuti isatongwa na Sathani isabweresa nyatwa zizinji kuna Akristu andimomwene lero. Ife tisathimbana na nyatwa zizinji zakuti zisatifewesa manungo na kuyesera kukhulupirika kwathu kuna Yahova. Mbwenye ninga pinafuna ife kuona mu nsolo uno, ife nee tisafunika kugopa cinthu. Thangwi Yahova asaona nyatwa zonsene zinathimbana na ife, pontho ali dzololo toera kutiphedza. Tendeni tione pitsandzo piwiri pya m’Bhibhlya pinapangiza kuti Yahova ‘asaonera tani ale anan’gopa.’—Lerini Masalmo 33:18-20.

3. Ndi midzidzi ipi yakuti panango tinapibva kuti tiri tekhene?

³ Maseze tiri na abale na alongo azinji mu mpingo, midzidzi inango tinakwanisa kupibva kuti tiri tekhene. Mwacitsandzo, aphale na atsikana panango anapibva kuti ali okhene angalonga pinakhulupira iwo kuna andzawo akuxikola peno angacinja toera kuenda ku mpingo unango. Anango a ife panango anakhala  akutsukwala peno kuthimbana na manyerezero akuipa, mbanyerezera kuti anakwanisa kukunda manyerezero anewa okhene. Panango tinanyinyirika kupanga anthu anango mabvero anakhala na ife, mbatinyerezera kuti iwo nee anabvesesa. Midzidzi inango, panango ife tinadzudzumika khala mwandimomwene anthu asatitsalakanadi peno nkhabe. Natenepa, kupibva kuti tiri tekhene mwakukhonda tsalakana mathangwi ace, pinaticitisa kukhala akudzudzumika mbatinyerezera kuti nkhabe munthu anakwanisa kutiphedza. Yahova nee asafuna kuti ife tipibve tenepo. Thangwi yanji?

4. Thangwi yanji mprofeta Eliya alonga kuti: ‘Adasala ndine basi ninga mprofeta’?

⁴ Onani citsandzo ca mprofeta Eliya. Eliya athawa mu ntsiku zakupiringana 40 toera kupulumusa umaso wace, thangwi Yezabheli akhadapikira kuti mbadamupha. (1 Ama. 19:1-9) Natenepa, pikhali Eliya m’mphako, iye alonga kuna Yahova: ‘Adasala ndine basi ninga mprofeta.’ (1 Ama. 19:10) Mbwenye n’dziko ineyi mukhali na aprofeta anango. Mwacitsandzo Obhadhiya apulumusa aprofeta 100 akhafuna kuphiwa na Yezabheli. (1 Ama. 18:7, 13) Thangwi yanji Eliya akhanyerezera kuti ali ekhene? Panango iye akhanyerezera kuti aprofeta onsene adapulumuswa na Obhadhiya amala phiwa. Pontho kuti basi ene ndiye akhatumikira Yahova, maseze Yahova akhadapangiza kuti iye ndi Mulungu wandimomwene pa Phiri ya Karmelo. Kusiyapo pyenepi, panango iye akhanyerezera kuti nee munthu m’bodzi akhadziwa kuti iye akhali pangozwi, peno nee m’bodzi akhantsalakana. Bhibhlya nee isalonga mabvero onsene akhali na Eliya. Mbwenye pinadziwa ife ndi pyakuti Yahova akhabvesesa kuti thangwi yanji Eliya akhapibva kuti ali ekhene, pontho akhadziwa kuti mbadam’phedza tani.

5. Yahova acitanji toera kupangiza Eliya kuti nee akhali ekhene?

⁵ Yahova acita pinthu pizinji toera kuphedza Eliya. Iye abvundza Eliya kawiri: ‘Ukucitanji pano?’ (1 Ama. 19:9, 13) Mu ndzidzi ukhalonga Eliya mabvero ace Yahova akhambvesera. Yahova atawira Eliya mukumpanga kuti iye akhali penepo, pontho iye ndi wamphambvu kakamwe. Yahova apasa Eliya cinyindiro cakuti pakhali na Aizraeli anango azinji akuti akhapitiriza kuntumikira. (1 Ama. 19:11, 12, 18) Mwakukhonda penula, Eliya akhala wakukhurudzika pidamala iye kupanga Yahova mabvero ace na njira idantawira Yahova. Iye apasa Eliya mabasa mazinji akusiyana-siyana. Yahova aphemba Eliya toera adzodze Azaeli kuti akhale mambo  wa ku Siriya, adzodze Jeu kuti akhale mambo wa ku Izraeli, pontho adzodze Elizeu kuti akhale mprofeta. (1 Ama. 19:15, 16) Thangwi ya kupasa Eliya mabasa anewa, Yahova aphedza Eliya toera aikhe manyerezero ace ku pinthu pyadidi. Pontho Mulungu acita masasanyiro toera Eliya akhale na uxamwali wa ponda ndipondembo na Elizeu. Musafunika kucitanji toera mutambire ciphedzo ca Yahova mungapibva kuti muli mwekhene?

6. Munalonganji mu phembero mungapibva kuti muli mwekhene? (Masalmo 62:8)

⁶ Yahova asatiphemba toera ticite phembero kuna iye. Iye asaona nyatwa zonsene zinatamba ife, pontho asatipasa cinyindiro cakuti anabvesera maphembero athu ndzidzi onsene. (1 Ates. 5:17) Iye asakomerwa kakamwe kubvesera maphembero a alambiri ace. (Mis. 15:8) Munalonganji mu phembero mungapibva kuti muli mwekhene? Longani nyatwa zanu zonsene kuna Yahova ninga pidacita Eliya. (Lerini Masalmo 62:8.) Mpangeni pyonsene pinakudzudzumisani, pontho mpangeni kuti pyenepi pisakhuya tani mabvero anu. Phembani Yahova toera akuphedzeni kudziwa pinthu pinafunika imwe kucita mu ndzidzi unapibva imwe kuti muli mwekhene. Mwacitsandzo, mungapibva kuti muli mwekhene peno musagopa kumwazira mphangwa andzanu akuxikola, phembani Yahova kuti akupaseni cipapo toera mukwanise kulonga mwakukhonda gopa. Imwe munakwanisambo kuphemba udziwisi toera mukwanise kufokotoza pinakhulupira imwe mwacilemedzo. (Luka 21:14, 15) Khala imwe muli kuthimbana na manyerezero akuipa, phembani Yahova toera akuphedzeni kulonga na Nkristu wakukola mwauzimu thangwi ya pyenepi. Imwe munakwanisa kuphemba Yahova toera aphedze Nkristu unoyu kuti abvesese mwadidi mabvero anu. Longani nyatwa zanu kuna Yahova, onani kuti anatawira tani maphembero anu, pontho tawirani ciphedzo ca anango. Mungacita pyenepi, munapibva kuti nee muli mwekhene.

7. Mwapfundzanji na citsandzo ca Mauricio?

⁷ Yahova atipasa basa yakufunika kakamwe toera kucita. Khalani na cinyindiro cakuti iye asaona, pontho asapereka takhuta na pyonsene pinacita imwe mu mpingo na mu utumiki. (Masal. 110:3) Kukhala akuphatika m’mabasa anewa kunakuphedzani tani mungapibva kuti muli mwekhene? Onani citsandzo ca m’bale unango anacemerwa Mauricio. * Pidamala iye kwene kubatizwa, xamwali wace m’bodzi wa ponda ndipondembo asiya undimomwene. Mauricio alonga: “Pidaona ine kuti iye asiya kutumikira  Yahova, ndatoma kupenula. Ine ndikhadzudzumika khala mbandidakwanisa kukwanirisa pikiro yanga yakutumikira Yahova, pontho khala mbandidakwanisa kupitiriza kucita khundu ya atumiki a Yahova. Ndikhapibva kuti ndiri ndekhene, pontho ndikhanyerezera kuti nkhabepo munthu anakwanisa kubvesesa mabvero anga.” Ninji cidaphedza Mauricio? Iye alonga: “Ndathimizira basa yanga yakumwaza mphangwa. Pyenepi pyandiphedza toera ndisiye kunyerezera basi ene thangwi ya ine na kusiya mabvero akuphonyeka. Ndakhala wakutsandzaya, pontho nee ndikhapibvabve kuti ndiri ndekhene pikhamwaza ine mphangwa na abale anango.” Ndimomwene kuti nee tisamwazabve mphangwa pabodzi na Akristu andzathu ninga kale, mbwenye tisawangisana tingamwaza mphangwa mukuphatisira telefoni peno kulemba matsamba. Ninji pontho cidaphedza Mauricio? Iye alonga: “Ndikhacitambo mabasa mazinji mu mpingo. Cincino ine ndisakhunganyika mwadidi makhundu a anyakupfundza anacitika pa mpingo. Makhundu anewa asandicitisa kupibva kuti ndine wakufunika kuna Yahova na kuna anango.”

8. Kodi nyatwa zakusiyana-siyana zisatikhuya tani?

⁸ Mu ntsiku zino zakumalisa, ife tisadikhira kuthimbana na nyatwa zizinji. (2 Tim. 3:1) Nyatwa peno mayesero anango anakwanisa kucitika mu ndzidzi wakuti nee tikhadikhira. Panango ife tinathimbana na nkandzo wakusowa kobiri, panango dotoro anatipanga kuti tiri na utenda wakukhonda kuwanga, peno kuferwa na munthu wakufunika. Pyenepi pingacitika, panango tinatsukwala peno kufewa manungo makamaka khala tisathimbana na nyatwa zizinji mu ndzidzi ubodzi ene. Kumbukani kuti Yahova asaona nyatwa zathu, pontho na ciphedzo cace ife tinakwanisa kupirira nyatwa zonsene.

9. Longani nyatwa zingasi zidathimbana na Yobe.

⁹ Onani kuti Yahova aphedza tani mamuna wakukhulupirika Yobe. Iye athimbana na nyatwa zizinji mu ndzidzi ubodzi ene. Pa ntsiku ibodzi basi, Yobe apangwa kuti pinyama pyace pyabiwa, pontho anyabasa ace na anapiana ace aphiwa. (Yobe 1:13-19) Mu ndzidzi ukhali iye wakutsukwala, Yobe aphatwa na utenda wakugopswa kakamwe. (Yobe 2:7) Yobe akhathimbana na nyatwa zakunentsa kakamwe. Natenepa iye alonga: ‘Ine ndisaida umaso wanga, nee ndisafunabve kukhala m’maso.’—Yobe 7:16.

10. Kodi Yahova acitanji kuna Yobe toera apirire nyatwa zace? (Onani foto iri patsamba yakutoma.)

¹⁰ Yahova akhaona pyonsene pikhacitikira Yobe. Nakuti Yahova akhanfuna, iye ampasa pyonsene pikhafuna iye toera apirire nyatwa zace na kupitiriza kukhala wakukhulupirika. Yahova alonga na Yobe, ankumbusa pya udziwisi Wace wakukhonda mala, pontho ankumbusa kuti iye asatsalakana mwaufuni pinthu pyonsene pidacita Iye. Yahova alongambo thangwi ya pinyama pizinji pyakudzumatirisa. (Yobe 38:1, 2; 39:9, 13, 19, 27; 40:15; 41:1, 2) Kusiyapo pyenepi, Yahova aphatisira m’phale wakukhulupirika anacemerwa Eliyu toera kuwangisa na kubalangaza Yobe. Eliyu apasa cinyindiro Yobe kuti ndzidzi onsene Yahova asapasa nkhombo atumiki Ace thangwi yakupirira kwawo. Pontho Yahova aphedza Eliyu toera apereke uphungu waufuni kuna Yobe. Eliyu aphedza Yobe toera asiye kunyerezera pya iye basi, pontho ankumbusa kuti ife ndife ang’ono kakamwe tingalandanisika na Yahova, Nciti wa pinthu pyonsene. (Yobe 37:14) Yahova apangambo Yobe toera acite phembero thangwi ya axamwali ace atatu akuti akhadacita madawo. (Yobe 42:8-10) Kodi Yahova asatiphedzambo tani lero tingathimbana na nyatwa zakunentsa?

11. Bhibhlya inatiphedza tani tingathimbana na nyatwa?

¹¹ Lero, Yahova nkhabe kulonga na ife ninga pidacita iye na Yobe, mbwenye Iye asalonga na ife kubulukira m’Mafalace, Bhibhlya. (Aroma 15:4) Iye asatiwangisa mukutipasa cidikhiro ca ntsogolo. Onani pitsandzo pingasi pinapangiza kuti Bhibhlya inakwanisa kutibalangaza tingathimbana na nyatwa. M’Bhibhlya, Yahova asatipasa cinyindiro cakuti nkhabepo cinthu, kuphataniza nyatwa zakunentsa zakuti zinakwanisa ‘kuticimwanisa kutambira ufuni wace.’ (Aroma 8:38, 39) Pontho asatipasa cinyindiro cakuti iye ‘ali dhuzi na onsene anancemera’ mu phembero. (Masal. 145:18) Yahova asatipanga kuti tinga’nyindira, tinakwanisa kupirira nyatwa mbatikhala akutsandzaya maseze tithabuke. (1 Akor. 10:13; Tiya. 1:2, 12) Mafala a Mulungu asatikumbusambo kuti  nyatwa zathu ndi za ndzidzi wakucepa tingazilandanisa na nkhombo zakukhonda mala zinatipasa iye. (2 Akor. 4:16-18) Yahova asatipasa cidikhiro cakuti anadzafudza ule anacitisa nyatwa zathu, Sathani Dyabo na onsene anacita pinthu pyakuipa ninga iye. (Masal. 37:10) Kodi imwe musakumbuka malemba mangasi a m’Bhibhlya anafuna kukuphedzani toera kupirira nyatwa ntsogolo?

12. Kodi Yahova asafuna kuti ticitenji toera tiphedzeke kakamwe na Bhibhlya?

¹² Yahova asafuna kuti tikhale na ndzidzi wakuleri Bhibhlya ntsiku zonsene mbatinyerezera mwadidi pinaleri ife. Tingaphatisira pinapfundza ife, cikhulupiro cathu cinakhala cakuwanga, pontho tinafendedzera cifupi Babathu wakudzulu. Kusiyapo pyenepi, ife tinakwanisa kupirira mayesero. Yahova asaperekambo nzimu wace wakucena kuna ale ananyindira Bhibhlya. Pontho nzimu wakucena usatipasa “mphambvu yakupiringana yacibaliro” toera tipirire ntundu onsene wa mayesero.—2 Akor. 4:7-10.

13. Cakudya cauzimu cinapereka “m’bandazi wakukhulupirika na wandzeru” cisatiphedza tani toera kupirira nyatwa?

¹³ Na ciphedzo ca Yahova, “m’bandazi wakukhulupirika na wandzeru” asakhunganya mabukhu, mavidhyu na nyimbo toera kutiphedza kuwangisa cikhulupiro cathu mbatikhala cifupi na Yahova. (Mat. 24:45) Tisafunika kuphatisira mwadidi pyonsene pinatipasa Yahova. Mulongo unango anakhala ku Estados Unidos apereka takhuta kakamwe thangwi ya cakudya cauzimu. Iye alonga: “Mu pyaka 40 pidatumikira ine Yahova, cikhulupiro canga cayeserwa kazinji kene.” Mulongo unoyu athimbana na nyatwa zakunentsa kakamwe. Yavu wace adhimwa na karu mbafa thangwi motorista akhadaledzera, anyakubala ace aphatwa na utenda mbafa, pontho iye aphatwa na utenda wa cancro kawiri. Ninji pidam’phedza toera kupirira? Iye alonga: “Ndzidzi onsene Yahova akhanditsalakana. Cakudya cauzimu cikhapereka iye kubulukira kwa m’bandazi wakukhulupirika na wandzeru candiphedza toera kupirira. Ndakwanisa kupibva ninga Yobe adalonga: ‘Mpaka kufa kwanga, ine nee ndinasiya kukhala wakukhulupirika!’—Yobe 27:5.

14. Yahova asaphatisira tani abale na alongo athu toera kutiphedza mu ndzidzi wa nyatwa? (1 Atesalonika 4:9)

¹⁴ Yahova asapfundzisa atumiki ace toera kufunana na kubalangaza unango na ndzace m’midzidzi yakunentsa. (2 Akor. 1:3, 4; lerini 1 Atesalonika 4:9.) Ninga Eliyu, abale na alongo athu ali dzololo toera kutiphedza toera tipitirize kukhala akukhulupirika  tingathimbana na nyatwa. Mwacitsandzo, onani kuti abale na alongo aphedza tani Diane toera apitirize kukhala wakuwanga mwauzimu mu ndzidzi ukhaduwala mamunace. Iye alonga: “Pikhali pyakunentsa kakamwe. Mbwenye ife taona ufuni wa Yahova miyezi ineyi yakunentsa. Abale na alongo mu mpingo wathu acita pinthu pizinji toera kutiphedza. Iwo abwera kudzationa, atimenyera ntokodzi, pontho atiphedza toera tipirire. Nakuti nee ndikhadziwa kutekenya karu, abale na alongo akhandiphedza toera kugumanika pa misonkhano na m’basa yakumwaza mphangwa ndingakwanisa.” Pyenepi pyatitsandzayisa kakamwe thangwi yakukhala na abale na alongo aufuni mu mpingo.

15. Thangwi yanji tiri na cinyindiro cakuti tinakwanisa kupirira nyatwa?

¹⁵ Tonsene tinathimbana na nyatwa. Mbwenye ninga pidaona ife, nee tinathimbana na nyatwa zenezi tekhene. Ninga Baba waufuni, ndzidzi onsene Yahova asaona nyatwa zathu. Iye ali dhuzi na ife, asabvesera maphembero athu, pontho ali dzololo toera kutiphedza. (Iza. 43:2) Ife tiri na cinyindiro cakuti tinakwanisa kupirira nyatwa zathu thangwi iye asatipasa pyonsene pinafuna ife toera kupirira. Iye atipasa muoni wakucita phembero, Bhibhlya, cakudya cauzimu cakunjipa, pontho atipasa abale na alongo aufuni toera kutiphedza pa ndzidzi wakuthema.

16. Tisafunika kucitanji toera Yahova apitirize kutiphedza?

¹⁶ Ife tisapereka takhuta kuna Babathu wakudzulu wakuti asaona nyatwa zathu. ‘Mitima yathu isakomerwa na iye.’ (Masal. 33:21) Ife tinapangiza kuti tisapereka takhuta kuna Yahova thangwi ya citsalakano cace caufuni tingaphatisira pyonsene pinatipasa iye toera kutiphedza. Ife tisafunika kucitambo khundu yathu toera Mulungu apitirize kutiphedza. Munjira inango, tingapitiriza kucita pyonsene pinakwanisa ife toera kubvera Yahova mbaticita pinthu pinaona iye kuti ndi pyadidi, iye anapitiriza kutiphedza kwenda na kwenda!—1 Ped. 3:12.