Ine ndaseka thangwi ndikhanyerezera kuti xamwali wanga nee akhakomerwa na pinthu pya uphemberi. Ine ndambvundza: “Ninji pinadziwa iwe thangwi ya Bhibhlya?” Iye nee atawira mwakucimbiza. Mbwenye adzandipanga kuti mai wace akhali m’bodzi wa Mboni za Yahova; iye apfundziswa pinthu pingasi na mai wace. Nakuti ndikhafuna kudziwa pizinji, ine ndam’phemba toera andipange pinthu pinango thangwi ya Bhibhlya.

Ife tacedza kakamwe masiku anewa. Xamwali wanga andipanga kuti Bhibhlya isalonga kuti Sathani ndi ntongi wa dziko. (Juwau 14:30) Panango imwe mukhadziwa pyenepi mu umaso wanu onsene, mbwenye kuna ine pyenepi pikhali pinthu pipswa. Ndzidzi onsene ndikhabva kuti Mulungu wakukoma ntima na waulungami ali kutonga dziko. Mbwenye pyenepi nee pikhabverana na pinthu pidaona ine mu umaso wanga. Maseze ndikhali basi ene na pyaka 26 pyakubalwa, ine ndaona pinthu pizinji kakamwe pyakuti pikhandidzudzumisa.

Pai wanga akhali nyakutekenya ndeka ya anyankhondo ku Estados Unidos. Natenepa pikhali ine mwana, ndadzindikira kuti na ntsiku yace mbakudaoneka nkhondo inacemerwa guerra nuclear; thangwi anyankhondo akhali dzololo toera kuponya mabhomba makulu-makulu. Nkhondo ya ku Vietname yacitika mu ndzidzi ukhapfundza ine ku universidhadhe ku Califórnia. Ine ndapitambo mu nsoka wa anyakupfundza akhacita uviyaviya. Apolixa akhatikhondesa mbatithamangisa, pontho mu ndzidzi ukhathawa ife nee tikhakwanisa kuona mwadidi thangwi iwo akhatiponyera gás lacrimogênio. Unoyu ukhali uviyaviya ukulu kakamwe. Thangwi atsogoleri a ndale akhaphiwa, pontho anthu akhacita uviyaviya m’miseu. Anthu onsene nee akhadziwa pinthu pikhafunika iwo kucita toera kumalisa uviyaviya unoyu.

Mu caka ca 1970, ine ndatoma kuphata basa ku Alaska, pontho ndikhatambira kobiri izinji kakamwe. Buluka penepo ndaenda ku Londres mbandigula mota, pontho ndacita ulendo mu nzinda unoyu mbandikhonda kudziwa kukhaenda ine. Pidapita miyezi mingasi ine ndafika ku Afrika. Mu ndzidzi ukhaenda ine ku Afrika, ndagumanikana na anthu akuti akhafunambo kuthawa nyatwa zawo.

Natenepa, thangwi ya pinthu pidaona ine na pidabva ine, cipfundziso ca Bhibhlya cakuti alipo nyakuipa  anatonga dziko catoma kukhala candimomwene kuna ine. Mbwenye ine ndikhabvundzika: Khala nee ndi Mulungu anatonga dziko, ninji pinacita iye?

Pidapita miyezi mingasi, ine ndagumana ntawiro. Pontho mukupita kwa ndzidzi, ine ndatomambo kudziwa na kufuna anthu azinji akuti akhali akukhulupirika kuna Mulungu wandimomwene mwakukhonda tsalakana nyatwa zikhathimbana na iwo.

Pidabwerera ine ku Londres, ine ndacedza na mai wa xamwali wanga, pontho iye andipasa Bhibhlya. Mukupita kwa ndzidzi, pidaenda ine ku Amsterdão, Países Baixos, m’bodzi wa Mboni za Yahova andiona pikhaleri ine Bhibhlya n’khundu mwa nseu, pontho andiphedza toera kupfundza pizinji. Buluka penepo ine ndaenda ku Dublin, Irlanda, pontho ndafika pa Bheteli ya Mboni za Yahova. Pidafika ine ndamenya nsuwo. Penepo ndadziwana na m’bale Arthur Matthews wakuti akhali waudziwisi na wa maluso. Ine ndaphemba toera kupfundza Bhibhlya, pontho iye atawira kundipfundzisa.

Ine ndatoma kupfundza Bhibhlya, pontho ndikhakomerwa kakamwe na kuleri mabukhu na marevista akhabuluswa na Mboni za Yahova. Kusiyapo pyenepi, ine ndikhaleri Bhibhlya, pontho pyenepi pikhali pyakutsandzayisa kakamwe! Pa misonkhano ya mpingo, ine ndaona kuti ngakhale anapiana akhakwanisa kutawira mibvundzo yakuti anthu adapfundza kakamwe nee akwanisa kuitawira mu pyaka pizinji, ninga: ‘Thangwi yanji anthu asathabuka? Mulungu mbani? Ninji pinacitika munthu angafa?’ Ine basi ene ndikhacita uxamwali na Mboni za Yahova. Pyenepi pikhali pyakukhonda nentsa kuna ine, thangwi nee ndikhadziwa anthu anango mu dziko ineyi. Iwo andiphedza toera kufuna Yahova na kucita cifuno cace.

Ine ndabatizwa mu caka ca 1972. Pidapita caka cibodzi ndatoma kutumikira ninga mpainiya mu mpingo ung’ono ku Newry, Irlanda do Norte. Ine ndalugari nyumba yakuti ikhali ku mapiri, kutali pang’ono na nzinda. Kweneko ine ndikhali dhuzi na thanga ya ng’ombe, pontho ndikhayesera nkhani zanga dhuzi na izo. Zikhaoneka ninga ziri kubvesera mwadidi mu ndzidzi ukhadya izo tsanga. Izo nee zikhandipasa uphungu, mbwenye zikhandiphedza toera kuona kuti ndiri kuyang’anisa anyakubvesera mu ndzidzi ukhacita ine nkhani. Mu caka ca 1974, ine ndakhazikiswa ninga mpainiya wakupambulika, pontho ndatumikira pabodzi na Nigel Pitt adadzakhala xamwali wanga mu pyaka pizinji.

Mu ndzidzi unoyu ku Irlanda do Norte kukhacitwa uviyaviya kakamwe. Na thangwi ineyi, anthu anango akhalonga kuti Irlanda do Norte ndi “dziko ya mabhomba na mabhala.” Kazinji kene anthu akhamenyana m’miseu, akhaliza mpfuti, pontho makaru akhapiswa na mabhomba. Kazinji kene pyenepi pikhatomeswa na  anyandale na mauphemberi. Mbwenye uphemberi wa Mazolana na Katolika wadzindikira kuti Mboni za Yahova nee zikhacita khundu mu ndale za dziko, natenepa ife tikhakwanisa kumwaza mphangwa mwaufulu na mwakutsidzikizika. Anthu akhamwazira ife mphangwa kazinji kene akhadziwa mbuto na ndzidzi ukhafuna kucitika uviyaviya, natenepa iwo akhaticenjeza toera tikwanise kucalira ngozwi.

Ngakhale tenepo, midzidzi inango pikhacitika pinthu pyakugoswa. Mwacitsandzo, ntsiku inango ine ndikhamwaza mphangwa na mpainiya unango anacemerwa Denis Carrigan, pontho ife tamwaza mphangwa mucisa cinango cifupi na kukakhala ife cakuti nee cikhali na Mboni za Yahova, pontho unoyu ukhali ulendo waciwiri kuna ife kumwaza mphangwa mucisa ceneci. Nkazi unango atipambizira kuti ife tikhali anyankhondo a ku Bhritanya, panango thangwi yakuti nee tikhalonga mwadidi Ciirlanda. Ife tagopa kakamwe. Munthu angacita uxamwali na nyankhondo, iye mbadakwanisa kuphiwa peno kulaswa mwendo. Pikhadikhira ife maxibhombo, pontho mu ndzidzi wakuti kunja kukhathondola kakamwe ife taona karu mbifika pa restauranti idatipambizira nkazi. Iye abuluka kunja mbalonga na amuna awiri akhali nkaru, pontho atithonya mwakutsandzaya. Buluka penepo amuna anewa abwera kuna ife na karu yawo, pontho aticita mibvundzo mingasi thangwi ya ndzidzi ukhafuna kufika maxibhombo. Mu ndzidzi udafika maxibhombo, iwo alonga na nyakutekenya maxibhombo. Ife nee tikhakwanisa kubva pikhalonga iwo. M’maxibhombo unoyu nee mukhali na anthu anango, natenepa ife tanyerezera kuti iwo akhacita masasanyiro toera kuenda katicita pyakuipa kunja kwa cisa ceneci. Mbwenye nee ndi pyenepi pidacitika. Pidafendedzera ine maxibhombo, ine ndabvundza nyakutekenya: “Amuna akhacedza na imwe akhabvundzanji thangwi ya ife?” Iye atawira: “Ine ndisakudziwani, pontho ndaapanga pyenepi. Lekani dzudzumika. Imwe muli akutsidzikizika.”

Mu caka ca 1976 pa nsonkhano wa gawo ku Dublin, ine ndadziwana na Pauline Lomax wakuti akhatumikira ninga mpainiya wakupambulika ku Inglatera. Iye akhali wakuwanga mwauzimu, wakucepeseka, pontho akhali mulongo wadidi kakamwe. Iye na m’bale wace Ray adziwa undimomwene mbali ana. Pidapita caka cibodzi, ine na Pauline tamanga banja, pontho tapitiriza kutumikira ninga apainiya akupambulika ku Ballymena, Irlanda do Norte.

Ine ndatumikira ninga muyang’aniri wa cisa mu ndzidzi ungasi ku Belfast, Londonderry na mbuto zinango zakugopswa. Ife tawangiswa kakamwe na cikhulupiro ca abale na alongo athu akuti asiya misambo ya mauphemberi, kusankhulana na kuidana mbatoma kutumikira Yahova. Yahova aapasa nkhombo na kuatsidzikiza.

Ine ndakhala ku Irlanda pyaka khumi. Buluka penepo mu caka ca 1981, ife tacemerwa toera kuenda kakurusari xikola ya Jiliyadhi, turma 72. Pidamalisa ife xikola ineyi, ife tatumizwa toera kuenda katumikira ku Serra Leoa, Afrika Ocidental.

Ife tikakhala pa nyumba ya amisionaryo pabodzi na abale na alongo akukwana 11. Ife tikhaphatisira kuzinya ibodzi ene, pimbuzi pitatu, makazadhibhanyo mawiri, telefoni ibodzi, makina akufula nawo mabodzi na makina a kuumisa mabodzi. Magetsi akhathima kazinji kene, pontho mwakukhonda dikhira. Kusiyapo pyenepi, matciru na nyoka pikhapita n’nyumba.

Maseze tikhali m’makhaliro anewa, ife tikhakomerwa kakamwe na utumiki. Thangwi anthu akhalemedza Bhibhlya, pontho akhabvesera mwadidi pikhaapanga ife. Azinji atawira kupfundza Bhibhlya, pontho adzakhala Mboni za Yahova. Anthu a mucisa ceneci akhandicemera “Pai Robert.” Pauline akhacemerwa “Mai Robert.” Mukupita kwa ndzidzi, pikhatumikira ife pa Bheteli ine nee ndikhaendabve kazinji kene mu utumiki, natenepa anthu atoma kucemera Pauline “Mai  Pauline.” Ine atoma kundicemera “Pai Pauline.” Pontho Pauline akhakomerwa na pyenepi.

Abale na alongo azinji akhali akutcerenga, mbwenye Yahova ndzidzi onsene akhaatsalakana, pontho midzidzi inango akhacita pyenepi mwakudzumatirisa. (Mat. 6:33) Ine ndisakumbuka mulongo m’bodzi wakuti nee akhali na kobiri izinji toera kugula cakudya toera akwanise kudya iye pabodzi na anace, mbwenye iye apasa kobiri ineyi m’bale unango akhaduwala wakuti nee akhali na kobiri toera kugula mitombwe ya malariya. Ntsiku ibodzi ene, mwakukhonda dikhira nkazi unango alipa kobiri mulongo unoyu toera atsalakane tsisi yace. Pinthu ninga pyenepi pikhacitika kazinji kene.

Ife takhala ku Serra Leoa pyaka pipfemba. Buluka penepo tacinjwa toera katumikira ku Bheteli ya Nigerya. Bheteli ineyi ikhali ikulu kakamwe. Ine ndapitiriza kucita basa ibodzi ene ikhacita ine ku Serra Leoa, mbwenye kuna Pauline anewa akhali macinjo makulu na akunentsa. Thangwi ku Serra Leoa iye akhamala maora 130 pa mwezi m’basa yakumwaza mphangwa, pontho akhali na mapfundziro a Bhibhlya akuthambaruka. Mbwenye pa Bheteli iye akhaphata basa mu sala yakusona nguwo, pontho ntsiku zonsene iye akhafunika kusona nguwo zakupanduka. Papita ndzidzi toera adzolowere makhaliro anewa. Mbwenye iye adzindikira kuti abale na alongo akhakomerwa kakamwe na basa ikhacita iye, pontho iye akhacita pyonsene pikhakwanisa iye toera kuwangisa abale na alongo pa Bheteli.

Makhaliro a ku Nigerya akhali mapswa kuna ife, pontho tikhafunika kupfundza pinthu pizinji. Mwacitsandzo, ntsiku inango, m’bale unango apita mu ofesi mwanga mbandipangiza mulongo wakuti akhadafika kwene pa Bheteli. Pidampasa ine manja toera kum’mwanyika, iye agodama m’miyendo yanga. Ine ndadzumatirwa kakamwe na pyenepi, pontho mu ndzidzi ubodzi ene ndakumbuka malemba mawiri: Mabasa 10:25, 26 na Apokalipse 19:10. Ine ndabvundzika: ‘Kodi ine ndisafunika kumpanga toera akhonde kucita pyenepi?’ Mbwenye mu ndzidzi ubodzi ene, ndadzindikira kuti iye akhadacemerwa toera atumikire pa Bheteli, pontho akhadziwa pinapfundzisa Bhibhlya.

Ine ndakhala na manyadzo mu ndzidzi udapitiriza ife kucedza. Pontho buluka penepo ndasaka kudziwa thangwi ya pyenepi. Ine ndadzindikira kuti pinthu pidacita mulongo pikhabverana na misambo inango ikhacitwa mu ndzidzi unoyu mbuto zinango za dziko ineyi. Amuna akhagodamambo munjira ibodzi ene. Ineyi ikhali njira yakupangiza cilemedzo, tayu kulambira anango. M’Bhibhlya muli na pitsandzo pinapangiza pyenepi. (1 Sam. 24:8) Ine ndakomerwa kakamwe  thangwi nee ndalonga cinthu cakuti panango mbacidapasa manyadzo mulongo unoyu.

Ife tadziwana na anthu azinji ku Nigerya akuti apangiza cikhulupiro cakuwanga mu pyaka pizinji. Onani citsandzo ca Isaiah Adagbona. a Iye apfundza undimomwene pikhali iye m’phale, mbwenye mukupita kwa ndzidzi adzindikirwa kuti akhali na utenda wa matanya. Iye aendeswa ku mbuto inango yakuti ikhali na anthu a matanya, basi ene ndiye akhali Mboni wa Yahova ku mbuto ineyi. Mwakukhonda tsalakana kutcingwa, iye aphedza anyamatanya akupiringana 30 toera kupfundza undimomwene, pontho aphedzera toera kukhazikisa mpingo kweneko.

Mu caka ca 1996, ife tacinjwa mbatienda katumikira ku Bheteli ya Keniya. Kutomera ndzidzi udafika ine ku Keniya mbapicitika pinthu pidalonga ine pakutoma, unoyu ukhali ulendo wanga wakutoma kubwerera pontho mu dziko ineyi. Ife tafikira pa Bheteli. Pontho pa kintalo ya Bheteli pakhali na mabongwe mazinji. Mabongwe anewa akhaba misapo ikhathukula alongo. Ntsiku inango pa Bheteli, mulongo m’bodzi abuluka mbasiya bwandzu janela ya nkwartu mwace. Pidabwerera iye agumana mabongwe mazinji akhadya nkwartu mwace. Iye akhuwa mbathawa. Mabongwe akhuwambo mbanumpha na pajanela.

Ine na Pauline tikhasonkhana mu mpingo wa Ciswahili. Mukupita kwa ndzidzi, ine ndatoma kucitisa Pfundziro ya Bukhu ya Mpingo (cincino isacemerwa Pfundziro ya Bhibhlya ya Mpingo). Mbwenye ine nee ndikhalonga mwadidi Ciswahili. Natenepa ndikhakhunganyika mwanyapantsi toera ndikwanise kuleri mibvundzo. Mbwenye mitawiro ya abale na alongo ingasiyana pang’ono na pidalembwa, nee ndikhabvesesabve pikhalonga iwo. Pyenepi pikhali pyakupasa manyadzo kakamwe! Pontho ndikhatsukwala thangwi ya pyenepi. Ngakhale tenepo, ine ndikhadzumatirwa kuona kuti abale na alongo akhapitiriza kundibvesera mwakupirira na mwakucepeseka.

Ife takhala ku Keniya basi ene miyezi mingasi. Buluka penepo, mu caka ca 1997 tacemerwa ku Bheteli ya Brooklyn, Nova York. Mu dziko ineyi anthu azinji ndi akupfuma, mbwenye mpfuma zenezi zisabweresambo nyatwa. (Mis. 30:8, 9) Ngakhale tenepo, mu dziko ineyi abale na alongo athu ali na cikhulupiro cakuwanga kakamwe. Iwo asaphatisira ndzidzi wawo na pinthu pyawo, tayu toera kukhala a mpfuma kakamwe, mbwenye toera kuphedzera mabasa adidi mu gulu ya Yahova.

Natenepa mu pyaka pizinji ine ndaona cikhulupiro ca abale na alongo athu m’makhaliro akusiyana-siyana. Ku Irlanda, abale na alongo akhali akukhulupirika mwakukhonda tsalakana uphanga ukhacitika mu dziko ineyi. Ku Afrika, abale na alongo akhali akukhulupirika mwakukhonda tsalakana utcerengi na kukhala kutali na anango. Ku Estados Unidos, abale na alongo ndi akukhulupirika maseze ali n’dziko yakupfuma. Mwakukhonda penula, Yahova asatsandzaya kakamwe angaona kuti atumiki ace asapangiza ufuni kuna iye m’makhaliro akusiyana-siyana.

Pyaka pyapita mwakucimbiza kakamwe kupiringana “ntsingano pakusona nguwo.” (Yobe 7:6) Cincino ife tiri kutumikira pa Bheteli ya Warwick, Nova York, pontho tiri akutsandzaya kupitiriza kutumikira pabodzi na abale na alongo akuti asafunana kakamwe unango na ndzace. Ife tiri akutsandzaya thangwi tisacita pinakwanisa ife toera kuphedzera Mambo wathu, Kristu Yezu, wakuti mwakukhonda dembuka anadzapasa nkhombo anthu onsene akukhulupirika.—Mat. 25:34.