1. Yezu alonganji kuna anyakupfundzace thangwi ya ndzidzi wa kumala kwa dziko ino, pontho aacenjeza toera kucitanji?

 NTSIKU zingasi Yezu mbadzati kufa, anyakupfundzace anai ambvundza: “Ndi cipi cidzindikiro . . . ca kumala kwa makhaliro a dziko?” (Mat. 24:3) Anyakupfundza anewa panango akhafuna kudziwa ndzidzi ukhafuna kufudzwa Yerusalemu na templo. Pakuatawira, Yezu nee alonga basi ene pyakufudzwa kwa Yerusalemu na templo, mbwenye alongambo pya ‘kumala kwa makhaliro a dziko’ inakhala ife lero. Thangwi ya ndzidzi unoyu Yezu alonga: “Thangwi ya ntsiku ineyi na ndzidzi unoyu, nkhabe anapidziwa, nee aanju akudzulu, nee Mwana, mbwenye basi ene Baba ndiye anapidziwa.” Buluka penepo, iye acenjeza anyakupfundzace toera apitirize ‘kuyang’anira’ na ‘kupitiriza kukhala m’maso.’—Marko 13:32-37.

2. Thangwi yanji Akristu a mu ndzidzi wa apostolo akhafunika kupitiriza kukhala m’maso?

² Akristu Aciyuda a mu ndzidzi wa apostolo akhafunika kupitiriza kukhala m’maso thangwi pyenepi mbapidaaphedza toera kupulumusa umaso wawo. Yezu apanga atowereri ace pinthu pikhafunika iwo kuona toera adziwe kuti Yerusalemu na templo piri dhuzi na kufudzwa. Iye alonga: “Mungaona nzinda wa Yerusalemu mbuzungulirwa na anyankhondo, dziwani kuti uli dhuzi na kufudzwa.” Ndzidzi ukhafuna kucitika pyenepi, iwo akhafunika kubvera cenjezo ya Yezu mbatoma “kuthawira ku mapiri.” (Luka 21:20, 21) Ale adabvera cenjezo ineyi apulumuka mu ndzidzi udabwera Aroma mbafudza Yerusalemu.

3. Tinapfundzanji mu nsolo uno?

 ³ Lero tikukhala mu ndzidzi wakumalisa wa dziko ino yakuipa. Natenepa tisafunikambo kukhala andzeru mbatipitiriza kukhala m’maso. Mu nsolo uno, tinapfundza kuti tinakwanisa tani kukhala na maonero adidi mu ndzidzi unaona ife pinthu pinacitika n’dziko ino, tinacita tani mphole-mphole, pontho tinaphatisira tani mwadidi ndzidzi wathu.

4. Thangwi yanji tisafuna kakamwe kuona pinthu pinacitika n’dziko lero pyakuti pisakwanirisa maprofesiya a Bhibhlya?

⁴ Pana mathangwi adidi anaticitisa kufuna kuona pinthu pinacitika pyakuti pisakwanirisa maprofesiya a Bhibhlya. Mwacitsandzo, Yezu alonga pinthu pikhafuna kucitika pyakuti mbapidatiphedza kudziwa kuti kumala kwa dzino ino ya Sathani kuli cifupi. (Mat. 24:3-14) Mpostolo Pedhru atipanga kuti tisafunika kupitiriza kuona kukwanirisika kwa maprofesiya toera cikhulupiro cathu cipitirize kukhala cakuwanga. (2 Ped. 1:19-21) Bukhu ya Apokalipse yatoma na mafala awa: “Masomphenya adaperekwa na Yezu, adapaswa iye na Mulungu toera kupangiza atumiki ace pinthu pyakuti pisafunika kucitika mwakukhonda dembuka.” (Apok. 1:1) Na thangwi ineyi, tisafuna kakamwe kuona pinthu pinacitika n’dziko lero na kudziwa kuti pyenepi pisakwanirisa tani maprofesiya a Bhibhlya. Pontho, panango ife tisakhala na cifuno cakucedza na anango thangwi ya pinthu pyenepi.

5. Tisafunika kucaliranji, pontho tisafunika kucitanji? (Onanimbo mafoto.)

⁵ Tingacedza thangwi ya maprofesiya a Bhibhlya, tisafunika kucalira kuyesera kulotera pinthu pinafuna kucitika. Thangwi yanji? Thangwi ife nee tisafunika kulonga pinthu pyakuti pinacitisa mpingo kukhala wakugawana. Panango ife tinabva atsogoleri a dziko mbalonga kuti anamalisa tani kukhonda bverana mbabweresa ntendere na citsidzikizo. M’mbuto mwakuyesera kulonga kuti pyenepi pisakwanirisa profesiya inagumanika pa 1 Atesalonika 5:3, ife tisafunika kupitiriza kudziwa mwadidi pinalonga gulu yathu cincino. Tingalonga pinthu mwakubverana na pinalonga gulu ya Yahova, ife tinaphedza toera mpingo upitirize kukhala wakuphatana “na manyerezero mabodzi ene.”—1 Akor. 1:10; 4:6.

6. Tisapfundzanji na mafala anagumanika pa 2 Pedhru 3:11-13?

⁶ Lerini 2 Pedhru 3:11-13. Mpostolo Pedhru atiphedza toera kukhala na maonero adidi mu ndzidzi unaona ife kukwanirisika kwa maprofesiya a Bhibhlya. Iye alonga kuti tisafunika kupitiriza kukumbuka “kubwera kwa ntsiku ya Yahova.” Thangwi yanji? Ife nee tisacita pyenepi thangwi tisafuna kudziwa ntsiku na ndzidzi unafuna kubweresa Yahova nkhondo ya Armajedhoni, mbwenye thangwi tisafuna kuphatisira mwadidi ndzidzi wathu toera ‘kukhala anthu akucena, mbaticita pinthu pinapangiza kuti ndife anthu adaperekeka kuna Mulungu.’ (Mat. 24:36; Luka 12:40) Munjira inango, ife tisafunika kupitiriza kukhala na makhaliro adidi mbatikhala na cinyindiro cakuti pyonsene pinacita ife m’basa ya Yahova ndi thangwi ya kunfuna. Mbwenye toera kupitiriza kucita pyenepi, ife tisafunika kucita mphole-mphole.

7. Tinapangiza tani kuti tisacita mphole-mphole? (Luka 21:34)

⁷ Yezu apanga anyakupfundzace toera acite mphole-mphole, tayu basi na pinthu pinacitika n’dziko, mbwenye na pinthu pinacita iwo. Iye apangiza pyenepi pakweca m’mafala anagumanika  pa Luka 21:34. (Lerini.) Yezu alonga: “Citani mphole-mphole.” Munthu anacita mphole-mphole asaona pinthu pyonsene pinaikha pangozwi uxamwali wace na Yahova, pontho asawangisira toera kupicalira. Munjira ineyi, iye asapitiriza mu ufuni wa Mulungu.—Mis. 22:3; Yuda 20, 21.

8. Ndi mafala api adalonga mpostolo Paulu kuna Akristu andzace?

⁸ Mpostolo Paulu apanga Akristu andzace toera acite mphole-mphole. Mwacitsandzo, iye apanga Akristu a ku Efeso kuti: “Citani mphole-mphole kakamwe toera mukhonde kufamba ninga anthu akusowa ndzeru, mbwenye ninga anthu audziwisi.” (Aef. 5:15, 16) Nakuti Sathani ndzidzi onsene asayesera kufudza uxamwali wathu na Yahova, Bhibhlya isatipanga toera tipitirize “kubvesesa kuti ninji pinafuna Yahova.” Tingacita pyenepi ife tinakwanisa kutsidzikizika ku misampha yonsene inaphatisira Sathani.—Aef. 5:17.

9. Tinakwanisa tani kubvesesa pinthu pinafuna Yahova kuti tipicite?

⁹ Bhibhlya nee isalonga pinthu pyonsene pinaikha pangozwi uxamwali wathu na Yahova. Kazinji kene ife tisacita pisankhulo thangwi ya pinthu pyakuti nee pisalongwa pakweca m’Bhibhlya. Mbwenye toera kucita pisankhulo pyadidi, ife tisafunika kubvesesa kuti “ninji pinafuna Yahova.” Ife tinakwanisa kucita pyenepi tingapfundza Mafala a Mulungu ndzidzi onsene na kunyerezera mwadidi pinapfundza ife. Tingabvesesa mwadidi pinafuna Yahova mbatiwangisira toera kukhala na “manyerezero a Kristu,” tinakwanisa kufamba “ninga anthu audziwisi,” maseze tikhonde kukhala na mitemo inalonga pakweca pinthu pinafunika ife kucita. (1 Akor. 2:14-16) Midzidzi inango ndi pyakukhonda nentsa kudzindikira pinthu pinafunika ife kucalira; mbwenye midzidzi inango ndi pyakunentsa kakamwe.

10. Ndi pinthu pipi pinango pyakuti tisafunika kupicalira?

¹⁰ Pinthu pinango pyakuti tisafunika kupicalira pisaphataniza kupfinyirana diso, bibvu, kumwa kakamwe, kudya kakamwe, kulonga mafala akutsukwalisa anango na kuona mafilimu anapangiza pinthu pyauphanga, ucipezipezi na pinthu pinango. (Mas. 101:3) Nyamalwa wathu wankulu Sathani, ndzidzi onsene asasaka miyai toera kufudza uxamwali wathu na Yahova. (1 Ped. 5:8) Tingakhonda kucita mphole-mphole, Sathani anakwanisa kuticitisa kukhala abibvu, akusowa ulungami, akufuna pyonsene, akuidana, akudzikuza na akukoya pinthu pyakuipa muntima. (Agal. 5:19-21) Pakutoma, pinthu pyenepi panango nee pinaoneka ninga ndi pyakuipa. Mbwenye tingakhonda kuwangisira kumalisa makhaliro anewa mwakucimbiza, iwo anapitiriza kukula ninga utenda wakuti ungakhonda kukondzwa mwakucimbiza unakwanisa kuikha umaso wa munthu pangozwi.—Tiya. 1:14, 15.

11. Ndi cinthu cipi cakugopswa kakamwe cakuti tisafunika kucicalira, pontho thangwi yanji?

¹¹ Cinthu cinango cakugopswa kakamwe cakuti tisafunika kucicalira ndi kucita uxamwali na anthu akuipa. Nyerezerani kuti imwe musaphata basa pabodzi na munthu wakuti nee asatumikira Yahova. Nakuti musafuna kuti munthu unoyu adziwe kuti Mboni za Yahova ndi anthu adidi, imwe musakhala wakukoma ntima, pontho musam’phedza. Panango midzidzi inango imwe musatawira kudya na munthu unoyu. Pontho mwakukhonda dembuka, imwe musatoma kudya na iye kazinji kene. Midzidzi inango iye asatoma kulonga pinthu pyaulukwali pyakuti imwe musayesera kupicalira. Mbwenye mukupita kwa ndzidzi, imwe musatoma kudzolowera pinthu pinalonga iye, pontho nee musapionabve ninga pinthu pyakuipa. Buluka penepo,  ntsiku inango ndzanu unoyu wakubasa asakucemerani toera kumwa pabodzi pakukotoka kubasa, pontho imwe musatawira. Mukupita kwa ndzidzi, imwe musatoma kukhala na manyerezero mabodzi ene na ndzanu unoyu wakubasa. Natenepa mwakukhonda dembuka imwe musatomambo kucita pinthu pinacita iye. Ndimomwene kuti ife ndife akukoma ntima na acilemedzo kuna anthu onsene, mbwenye tisafunika kukumbuka kuti anthu anakhala na ife kazinji kene anakwanisa kucinja makhaliro athu. (1 Akor. 15:33) Tingacita mphole-mphole ninga pidacenjeza Yezu, tinacalira kucita uxamwali na anthu akuti nee asabvera midida ya Yahova. (2 Akor. 6:15) Ife tinakwanisa kudzindikira ngozwi mbatiicalira.

12. Anyakupfundza a Yezu akhafunika kucitanji mu ndzidzi ukhadikhira iwo kumala kwa makhaliro a pinthu?

¹² Yezu akhafuna kuti anyakupfundzace akhale na pinthu toera kucita mu ndzidzi ukhadikhira iwo kumala kwa makhaliro a pinthu. Natenepa iye aapasa basa toera kucita. Iye aapanga toera amwaze mphangwa zadidi “mu Yerusalemu, ku Yudeya konsene na ku Samariya, mpaka kunkhomo kwa dziko yapantsi.” (Mabasa 1:6-8) Ineyi ikhali basa ikulu kakamwe. Thangwi yakucita pyonsene pikhakwanisa  iwo toera kumwaza mphangwa, iwo mbadaphatisira mwadidi ndzidzi wawo.

13. Thangwi yanji tisafunika kuphatisira mwadidi ndzidzi wathu? (Akolose 4:5)

¹³ Lerini Akolose 4:5. Toera kucita mphole-mphole, ife tisafunika kunyerezera mwadidi njira inaphatisira ife ndzidzi wathu. Thangwi “pinthu pyakukhonda kudikhirwa” pinakwanisa kucitika kuna ife tonsene. (Ekle. 9:11) Panango ife tinafa mwakukhonda dikhira.

14-15. Tinaphatisira tani mwadidi ndzidzi wathu? (Ahebheri 6:11, 12) (Onanimbo foto.)

¹⁴ Ife tinakwanisa kuphatisira mwadidi ndzidzi wathu tingacita cifuno ca Yahova na kuwangisa uxamwali wathu na iye. (Juwau 14:21) Natenepa ife tisafunika kukhala ‘dzololo na akuwanga, ndzidzi onsene mbatikhala na pizinji toera kucita m’basa ya Mbuya.’ (1 Akor. 15:58) Tingacita pyenepi, ndzidzi wakumala kwa dziko ino ungafika peno tingakhala dhuzi na kufa nee tinatsumbikika na njira idaphatisira ife ndzidzi wathu.—Mat. 24:13; Aroma 14:8.

¹⁵ Lero, Yezu asapitiriza kutsogolera anyakupfundzace mu ndzidzi unamwaza iwo mphangwa za Umambo wa Mulungu pa dziko yonsene yapantsi. Yezu ali kukwanirisa pikiro yace. Thangwi mukuphatisira gulu ya Yahova iye asatipfundzisa kuti tinamwaza tani mphangwa, pontho asatipasa maferamentu akufunika toera kuaphatisira m’basa ineyi. (Mat. 28:18-20) Ife tinapangiza kuti tisacita pidatipanga Yezu tingawangisira kumwaza mphangwa na kupfundzisa anango, pontho tingapitiriza kukhala m’maso mu ndzidzi unadikhira ife kumala kwa makhaliro ano a dziko. Tingaphatisira uphungu unagumanika pa Ahebheri 6:11, 12, ife tinaphatisisa na manja mawiri cidikhiro cathu “mpaka kunkhomo.”—Lerini.

16. Tiri akutonga toera kucitanji?

¹⁶ Yahova akhazikisa kale ntsiku na ndzidzi unafuna iye kufudza dziko ino ya Sathani. Ndzidzi unoyu ungafika, Yahova anakwanirisa maprofesiya onsene anagumanika m’Bhibhlya analonga pya dziko ipswa. Mu ndzidzi unadikhira ife ntsiku ineyi, panango tinanyerezera kuti kumala kwa dziko ino kuli kudembuka. Mbwenye ntsiku ya Yahova ‘nee inadembuka!’ (Abha. 2:3) Natenepa, tendeni tikhale dzololo toera ‘kupitiriza kuyang’anira na kudikhira Yahova, mbatidikhira cipulumuso cathu kuna Mulungu.’—Mik. 7:7.