MU NTSIKU zingasi, madzi abvumba na mphepo mpaka n’Ciposi ntsiku 1 ya Nyendzi ya caka 1919, ntsiku ineyi kukhali dzuwa pontho kukhapisa. Pa ntsiku ineyi, anthu cifupi na 1.000 asonkhana pa mbuto ya nsonkhano wa gawo ku Cedar Point, Ohio, U.S.A. toera kubvesera khundu yakutoma ya nsonkhano. M’mbuto ineyi mbadakwanisa kupita anthu akukwana 2.500. Pidadoka dzuwa, anthu akupiringana 2.000 afika na bote, motokala na maxitima. N’Cipiri, mwinji wa anthu wathimizirika kakamwe, mbapicitisa kuti khundu idasala ya nsonkhano icitwe kunja pa nthundzi wa miti.

Ceza ca dzuwa cikhaoneka kubulukira m’matsamba a miti, pontho nthundzi ukhaoneka pa nguwo za anthu. Usalu wa maxapeu a akazi ukhaphepheruka na mphepo ikhabuluka mu thawala inacemerwa Erie. M’bale unango alonga: ‘Mbuto ikhali yakubalika kakamwe na yantendere, abale na alongo akhali pabodzi pene, kutali na dziko ya Sathani, mwandimomwene ikhali ninga paradizu.’

Cidacitisa mbuto ineyi kukhala yakubalika kakamwe ndi anthu adagumanika, thangwi onsene akhali akutsandzaya kakamwe. Tsamba ya mphangwa ya pacisa yalonga: “Onsene akhali aphinga kakamwe na akutsandzaya.” Kwa Anyakupfundza Bhibhlya anewa, kukhala pabodzi na abale awo Acikristu kukhali kwakutsandzayisa kakamwe, pakumala pyaka pingasi pya mayesero makulu, ninga kutcingwa mu ndzidzi wa nkhondo, kukhonda bverana m’mipingo, kufungwa kwa Bheteli ya ku Brooklyn, kuikhwa nkaidi kwa abale azinji thangwi ya Umambo, kuphatanizambo abale asere akhatsogolera basa yakumwaza mphangwa, akuti akhadatongwa kukhala nkaidi mu pyaka 20. *

Thangwi yakutsukwala na kudzudzumika, anyakupfundza Bhibhlya anango akhadasiya basa yakumwaza mphangwa. Mbwenye azinji akhacita pyonsene pikhakwanisa iwo toera kupirira kupondererwa kukhacitwa iwo na atongi a ndale. Ntsiku inango nyakufufudza unango alonga kuti mwakukhonda tsalakana kukhondeswa kukhacitwa iwo, Anyakupfundza Bhibhlya adabvundzisa iye, akhalonga kuti “mbadapitiriza kumwaza mphangwa za Mulungu mpaka kunkhomo.”

Mu pyaka pyenepi, Anyakupfundza Bhibhlya akukhulupirika “akhaona citsogolero ca Mbuya, . . . mbaphembera ndzidzi onsene toera kuphemba citsogolero ca Baba.” Mbwenye pa nsonkhano wa gawo ku Cedar Point, iwo akhali akuphatana pontho mwakutsandzaya. Mulongo unango apangiza mabvero a azinji akuti akhadzudzumika kuti mbadatoma tani basa yakumwaza mphangwa. Ngakhale tenepo, iwo akhali dzololo toera kutoma na basa.

Sumana yonsene, anthu adasonkhana akhasaka kudziwa mabvekero a fala ya “GA” adalembwa pa programu ya nsonkhano wa gawo, m’matsamba akucita bweraniko na pidzindikiro pikhagumanika pa mbuto yonsene ya nsonkhano. N’Cixanu, “Dia dos Colaboradores” [Ntsiku ya Anyakuphedza,] Joseph F. Rutherford, afokotoza mabvekero a fala ineyi kwa anyakubvesera akukwana 6.000. Fala yakuti “GA” ikhabveka Golden Age (A Idade de Ouro)​—revista ipswa toera kuphatisirwa mu utumiki. *

Mukulonga pya Akristu andzace akudzodzwa, M’bale Rutherford alonga: ‘Mwakukhonda tsalakana nyatwa zinathimbana na iwo thangwi ya cikhulupiro cawo, iwo asaona utongi wakudzumisa wa Mesiya. . . . Iwo asaona kuti basa ikulu na mwai uli na iwo ndi kudziwisa anthu onsene pya kutonga kwa Yezu. Ineyi ndi basa idapaswa iwo na Mulungu.’

Revista ya A Idade de Ouro ndi “Tsamba ya Mphangwa Zandimomwene, za Cidikhiro na Zakunyindirika yakuti mbidaphatisirwa toera kufungula njira ipswa yakumwaza mphangwa​—kampanya yakumwaza mphangwa nyumba na nyumba. Pidabvundziswa iwo kuti ndi anthu angasi akuti mbadafuna kucita basa ineyi, anyakubvesera onsene alamuka. Buluka penepo, “mwakutsandzaya pontho na phinga inadziwika basi ene na ale anatowerera mathanyo a Yezu,” iwo aimba: “Mbuya tumani ceza canu na undimomwene.” M’bale J. M.  Norris alonga: “Cipo ndinadzaduwala ntsiku ineyi idaimba ife mwakugaluza kakamwe kwakuti pikhali ninga miti ikhatekenyeka.”

Pakumala kwa khundu ineyi, abale akhala pa nzera mu ndzidzi uzinji toera kukhala akutoma mwa ale adalembesa kuti atambire marevista anewa mwakukhonda phonya. Azinji akhalambo na mabvero mabodzi ene ninga a Mabel Philbrick, iye alonga: “Pikhali pyakutsandzayisa kakamwe kudziwa kuti tikhali pontho na basa toera kucita!”

Anyakupfundza Bhibhlya akukwana 7.000 akhunganyika toera kucita basa. Bukhu yakuti Organization Method na kabukhu A Quem se Confia a Obra afokotoza: Departamentu ipswa Yakuyang’anira Basa ku ofesi ikulu ndiyo ikhafuna kutsogolera basa yakumwaza mphangwa. Pakhafunika kukhazikiswa Komiti Yakuyang’anira Basa pa mpingo na ntsogoleri toera kupereka pitsogolero. Cisa cibodzi na cibodzi cikhafunika kukhala na nyumba 150 mpaka 200. Nsonkhano wa M’munda ukhafunika kucitwa n’Cinai cakumaulo toera abale alonge pyakugumana napyo na kupereka lipoti ya basa ya m’munda.

Herman Philbrick alonga: “Pidabwerera ife kunyumba, tonsene tikhali akuphatika mu kampanya yakulembera anthu.” M’mbuto zonsene iwo agumana anthu akuti akhafuna kubvesera mphangwa. Beulah Covey alonga: “Pisaoneka kuti pidamala nkhondo na kutsukwala, anthu onsene akhatawira mwadidi mphangwa zikhalonga pya nkhombo za dziko ipswa.” Arthur Claus alonga: “Mpingo onsene wadzumatirwa kakamwe na kuona kunjipa kwa anthu adatawira kulembesa toera kutambira marevista.” Mu nthanda ziwiri basi pakumala kubuluswa kwa revista ineyi, kwagawirwa makopya cifupi na hafu ya miliyau ibodzi ya marevista A Idade de Ouro, pontho anthu adalembesa toera kutambira marevista akhali akukwana 50.000.

Mukupita kwa ndzidzi, M’bale A. H. Macmillan alonga kuti nsolo wakuti “Envanjeliyo ya Umambo” udabuluswa mu A Sentinela ya 1.° de Julho de 1920 ndi wakutoma udawangisa abale na alongo onsene pa dziko yapantsi toera kumwaza mphangwa zadidi za Umambo wa Mulungu.” Nsolo unoyu wakulumiza Akristu onsene akudzodzwa toera “kupereka umboni pa dziko yonsene wakuti Umambo wa Mulungu uli cifupi.” Lero, abale a Kristu “adapaswa basa” asaphata basa pabodzi na mamiliyau a anthu akuti asamwaza mphangwa mwaphinga mu ndzidzi unadikhira iwo utongi wa Mesiya.