1. Ndi mitemo ipi mingasi ya Bhibhlya, mphapo kubvera mitemo ineyi kusatiphindulisa tani?

YAHOVA asatipasa mitemo yakubveka mwadidi kubulukira m’Bhibhlya. Mwacitsandzo, iye asaida ulukwali, upombo, kulambira adzimunthu, kuba na kuledzera. (1 Akor. 6:9, 10) Kusiyapo pyenepi, Mwana wa Mulungu, Yezu Kristu, apereka ntemo uyu kuna anyakupfundzace: ‘Ndokoni, citani anyakupfundza kwa anthu a madzindza onsene, mbamuabatiza mu dzina ya Baba na ya Mwana na ya nzimu wakucena mbamuapfundzisa kukoya pinthu pyonsene pidakupangani ine. Ine ndiri na imwe ntsiku zonsene mpaka kumala kwa makhaliro ano a pinthu.’ (Mat. 28:18, 19) Pinthu pyonsene pinatiphemba Yahova na Yezu toera kucita ndi pyadidi kwa ife. Kubvera mitemo ineyi kusatiphedza kukhala na ungumi wadidi na kuthimizira kutsandzaya kwathu m’banja. Cakufunika kakamwe, tingabvera mitemo ya Yahova kuphatanizambo ntemo wakumwaza mphangwa, iye asatsandzaya na asatipasa nkhombo.

2, 3. (a) Thangwi yanji Bhibhlya nkhabe kupereka mitemo m’makhundu onsene a umaso wathu? (b) Ndi mibvundzo ipi inafuna ife kudinga mu nsolo uno? (Onani cithundzithundzi cakutoma.)

² Mbwenye Bhibhlya nkhabe kutipasa mitemo m’makhundu onsene a umaso wathu. Mwacitsandzo, m’Bhibhlya nkhabe  gumanika mitemo inalonga pya ntundu wa nguwo zakuthema zinafunika kubvalwa na Akristu. Kodi pyenepi pisapangiza tani udziwisi wa Yahova? Mitundu ya nguwo na mabvaliro pisacinja mukupita kwa ndzidzi. Mbidakhala kuti Bhibhlya yapereka ndandanda wa nguwo zakutawirika na makhunganyikiro, mukupita kwa ndzidzi, ndandanda unoyu nee mbudaphatabve basa. Munjira ibodzi ene, Bhibhlya nee isapereka mitemo mizinji toera kutsogolera Akristu pakucita pisankhulo pya basa, kutsalakana ungumi na ubalangazi. Natenepa, Yahova asatawirisa kuti munthu paekha peno misolo ya mabanja acite pisankhulo mu pinthu pyenepi.

³ Natenepa, tingafuna kucita pisankhulo pyakufunika kakamwe pyakuti pinakhuya umaso wathu, pontho tingakhonda kugumana ntemo unalonga pya pisankhulo pyathu, panango tinabvundzika: ‘Kodi Yahova anakomerwa na cisankhulo cinafuna ine kucita? Kodi iye anadzakomerwa na pyonsene pinasankhula ine toera kucita maseze nee ndinaswa ntemo wa Bhibhlya? Ndinakhala tani na cinyindiro cakuti iye anadzakomerwa na cisankhulo cinafuna ine kucita?’

4, 5. Kodi pisankhulo pyathu pisakhuya tani ife na anango?

⁴ Anthu anango asanyerezera kuti anakwanisa kucita pyonsene pinafuna iwo. Toera kucita pisankhulo pyakuti pinatsandzayisa Yahova, tisafunika kudinga mitemo na midida inagumanika m’Bhibhlya mbatiiphatisira. Mwacitsandzo, Bhibhlya isakhondesa kuphatisira ciropa, natenepa tisafunika kubvera ntemo unoyu. (Gen. 9:4; Mach. 15:28, 29) Kucita phembero kunatiphedza toera kucita pisankhulo pyakuti pinakomeresa Yahova.

⁵ Pisankhulo pikulu pisakhuya kakamwe umaso wathu wauzimu na makhaliro athu. Pisankhulo pyonsene pinacita ife, pisakhuya uxamwali wathu na Yahova​—munjira yadidi peno yakuipa. Cisankhulo cadidi cisawangisa uxamwali wathu na Yahova, mbwenye cakuipa cinafudza uxamwali wathu na iye. Kusiyapo pyenepi, cisankhulo cakuipa cisakhuyambo anango, mu kuagwegwedusa mwauzimu peno kufudza kuphatana kwa mpingo. Natenepa, tisafunika kucita pisankhulo pyadidi.​—Lerini Aroma 14:19; Agalata 6:7.

6. Ninji cisafunika kutitsogolera pakucita pisankhulo?

⁶ Tinacita tani pisankhulo pyadidi mu ndzidzi wakuti Bhibhlya nkhabe kupangiza pinafunika ife kucita? M’makhaliro anewa, m’mbuto mwakucita pinafuna ife, tisafunika kunyerezera mwacidikhodikho pya makhaliro athu mbaticita cisankhulo cakuti cinakomeresa Yahova. Natenepa tinakwanisa kukhala na cinyindiro cakuti Yahova anadzatiphedza kucita cisankhulo cadidi.​—Lerini Masalmo 37:5.

7. Khala nkhabe ntemo wa Bhibhlya unalonga pya cisankhulo cathu, tinadzindikira tani pinafuna Yahova kwa ife?

⁷ Panango munabvundzika: ‘Khala nkhabe ntemo wa Bhibhlya unalonga pya cisankhulo cathu, tinadziwa tani pinafuna Yahova?’ Lemba ya Aefesi 5:17 isalonga: ‘Pitirizani kudzindikira cifuno Yahova.’ Khala nkhabe ntemo wa Bhibhlya unalonga pya cisankhulo cathu, tinadzindikira tani cifuno ca Yahova? Tisafunika kucita phembero kwa iye, mbatitawira citsogolero cinapereka iye kubulukira mwa nzimu wakucena.

8. Kodi Yezu adzindikira tani cifuno ca Yahova kwa iye? Perekani citsandzo.

⁸ Onani kuti Yezu adzindikira tani pikhafuna Babace. Mwacitsandzo, m’maulendo mawiri mu ndzidzi wakuti mwinji wa anthu ukhali na  njala, Yezu acita phembero mbaadyesa mwacirengo. (Mat. 14:17-20; 15:34-37) Mbwenye pikhali iye na njala, mbayeserwa na Dyabo nthando toera kusanduza miyala kudza mikate, iye akhonda. (Lerini Mateu 4:2-4.) Yezu akhadziwa mwadidi maonero a Babace, natenepa akhadziwa kuti Yahova nee mbadafuna kuti iye aphatisire nzimu wakucena toera kukwanirisa pifuno pyace. Mukukhonda kucita pyenepi, iye apangiza kuti akhanyindira citsogolero na ciphedzo ca Yahova.

9, 10. Ninji cinafuna kutiphedza toera kucita pisankhulo pyadidi? Perekani citsandzo.

⁹ Toera kucita pisankhulo pyandzeru ninga Yezu, tisafunika kunyindira citsogolero ca Yahova. Tisafunika kucita pinthu mwakubverana na uphungu uyu: ‘Nyindira Yahova na ntima wako onsene, leka kunyindira ndzeru zako. Nsake munjira zako zonsene, natenepa iye anadzalungamisa njira zako. Leka kunyerezera kuti ndiwe wandzeru kakamwe, mbwenye gopa Yahova mbuleka kutoweza njira zakuipa.’ (Mis. 3:5-7) Tingadziwa maonero a Yahova kubulukira mu kupfundza Bhibhlya, pinatiphedza toera kudzindikira kuti iye asafuna ticitenji. Tingabvesesa maonero a Yahova, ntima wathu unadzanyindira kakamwe citsogolero cace.​—Ezek. 11:19.

¹⁰ Mwacitsandzo: Nyerezerani kuti nkazi wakumanga banja akugula pinthu. Iye aona ntsapato zakuti asazifuna kakamwe, mbwenye ndi zakudhula kakamwe. Maseze nee ali pabodzi na mamunace, iye asadziwa kuti angabvunga kobiri izinji panango mamunace nee anakomerwa napyo. Asadziwa tani pyenepi? Thangwi iye ali m’banja na mamunace mu pyaka pizinji, natenepa iye asadziwa kuti mamunace asafuna aphatisire tani kobiri yawo. Munjira ibodzi ene, tingadziwa mwadidi maonero a Yahova na njira zace, tinadzathimizira luso yathu yakubvesesa kuti Babathu wakudzulu asafuna ticitenji m’makhundu akusiya-siyana a umaso wathu.

11. Ndi mibvundzo ipi yakuti tinakwanisa kuicita pakuleri Bhibhlya peno pakupfundza Bhibhlya? (Onani bokosi “ Pakupfundza Bhibhlya, Bvundzikani.”)

¹¹ Toera kudziwa mwadidi maonero a Yahova, tisafunika kucita pfundziro ya munthu paekha mwakukhonda phonya. Pakuleri peno pakupfundza Bhibhlya, tisafunika kubvundzika: ‘Kodi pyenepi pisandipfundzisanji thangwi ya Yahova, njira zace zaulungami na maonero ace?’ Tisafunika kukhala na maonero mabodzi ene ninga nyamasalmo Dhavidhi, iye alonga: ‘Yahova, ndidziwiseni njira zanu, mundipfundzise njira zanu. Ndiphedzeni toera kufamba mu undimomwene wanu mbamundipfundzisa, thangwi imwe ndimwe Mulungu wa cipulumuso canga. Cidikhiro canga ciri kwa imwe ntsiku zonsene.’ (Sal. 25:4, 5) Pakunyerezera mwacidikhodikho pinaleri imwe m’Bhibhlya, bvundzikani: ‘Ndinaphatisira tani mphangwa zenezi m’banja yanga? Ndi mbuto zipi zinafuna ine kuphatisira mphangwa zenezi? Panyumba? Kubasa? Kuxikola? Peno mu utumiki?’ Tingadziwa mbuto inafuna ife kuphatisira mphangwa zenezi, pinatiphedza toera kudziwa kuti tinaziphatisira tani.

12. Kodi mabukhu athu na misonkhano pinatiphedza tani toera kudziwa mwadidi maonero a Yahova m’makhaliro akusiyana-siyana?

¹² Njira inango toera kudziwa mwadidi maonero a Yahova, ndi kuphatisira mwadidi pitsogolero pinapereka gulu yace kubulukira m’Bhibhlya. Mwacitsandzo, bukhu ya Índice das Publicações da Torre de Vigia na Guia de Pesquisa para Testemunhas de Jeová asabuluswa toera kutiphedza kupfundza pya maonero a Yahova m’makhundu mazinji akuti tisafunika kucita pisankhulo pyathu. Tisaphindulambo kakamwe mukubvesera mwacidikhodikho  pa misonkhano Yacikristu na kupereka matawiro athu. Kunyerezera mwacidikhodikho pinapfundziswa ife, kunatiphedza toera kudziwa pizinji thangwi ya maonero a Yahova na kuphatisira maonero ace mu umaso wathu. Tingaphatisira mwaphinga cakudya cauzimu cinatipasa Yahova, mwapang’ono pang’ono tinakwanisa kubvesesa mwadidi njira zace. Pyenepi pinatiphedza toera kucita pisankhulo pyakuti pinadzatsandzayisa Yahova.

13. Perekani citsandzo cinapangiza kuti kubvesesa maonero a Yahova kunatiphedza tani toera kucita pisankhulo pyadidi?

¹³ Tendeni tidinge citsandzo cinapangiza kuti kuphatisira maonero a Yahova kunatiphedza tani toera kucita pisankhulo pyandzeru. Panango imwe musafuna kutumikira ninga mpainiya wa ndzidzi onsene. Toera kukwanirisa pyenepi, imwe mwalulupisa umaso wanu toera kuphatisira ndzidzi uzinji mu utumiki. Mbwenye nee muli na cinyindiro cakuti munadzatsandzaya na pinthu pyakucepa piri na imwe. Mwandimomwene, Bhibhlya nkhabe kulonga kuti tisafunika kukhala mpainiya toera kutumikira Yahova mwakukhulupirika. Tinakwanisa kupitiriza kuntumikira mwakukhulupirika ninga amwazi mphangwa. Mbwenye Yezu atipasa cinyindiro cakuti ale anaperekeka toera kucita pizinji m’basa ya Umambo, anadzatambira nkhombo zizinji. (Lerini Luka 18:29, 30.) Kusiyapo pyenepi, Bhibhlya isapangiza kuti Yahova asakomerwa kakamwe tingacita pyonsene pinakwanisa ife toera kunsimba, pontho asafuna kuti ticite pyenepi mwakutsandzaya. (Sal. 119:108; 2 Akor. 9:7) Kuphatisira uphungu unoyu wa Bhibhlya na kuphemba citsogolero ca Yahova, kunatiphedza toera kudzindikira maonero ace, kucita cisankhulo cadidi na kutambira nkhombo za Babathu wakudzulu.

14. Munadzindikira tani khala ntundu wa nguwo inafuna imwe inakomeresa Yahova?

¹⁴ Dingani citsandzo cinango: Nyerezerani kuti musafuna kakamwe ntundu unango wa nguwo, mbwenye musadziwa kuti anango m’mpingo panango anadzudzumika mungabvala nguwo ineyi. Mbwenye Bhibhlya nkhabe kulonga pya ntundu unoyu wa nguwo. Mphapo munadziwa tani maonero a Yahova? Mpostolo Paulu apumirwa toera kulemba uphungu uyu: “Akazi abvale nguwo zakuthema, zakulemedzeka na zakukhonda kupasa manyadzo. Aleke kudzibalikisa na mitundu yakumanga tsisi, ndalama, miyala ya ntengo ukulu kakamwe peno nguwo zakudhula. Mbwenye acite ninga munafunika kwa akazi akulemedza Mulungu pakweca na macitiro adidi.” (1 Tim. 2:9, 10, NM) Uphungu unoyu usaphatisirwa kwa  Akristu onsene, kuphatanizambo amuna. Ninga atumiki a Yahova, nee tisafunika kunyerezera pya ife basi, mbwenye tisafunikambo kunyerezera kuti nguwo zidabvala ife na makhunganyikiro a manungo athu pinakhuya tani anango. Nakuti tisafuna abale na alongo athu, ife tisacalira kuatsukwalisa peno kuagwegwedusa mwauzimu. (1 Akor. 10:23, 24; Afil. 3:17) Kusiyapo pyenepi, kudinga pinalonga Bhibhlya kunatiphedza toera kudzindikira maonero a Yahova na kucita pisankhulo pyakuti pinankomeresa.

15, 16. (a) Kodi Yahova asapibva tani tingapitiriza kunyerezera pinthu pyaulukwali? (b) Pakusankhula ubalangazi, tinadzindikira tani pinakomeresa Yahova? (c) Tisafunika kucita tani pisankhulo pikulu?

¹⁵ Bhibhlya isapangiza kuti Yahova asatsukwala kakamwe anthu angacita pinthu pyakuipa, peno ‘anganyerezera pinthu pyakuipa ndzidzi onsene.’ (Lerini Genesi 6:5, 6.) Na maonero anewa, tisadzindikira kuti kunyerezera pyaulukwali na upombo ndi pyakuipa kakamwe, thangwi pinatsogolera munthu toera kucita madawo makulu, pontho nee pisabverana na maonero a Yahova. Mpostolo Tyago alemba: ‘Udziwisi wakudzulu, pakutoma ndi wadidi na wakusowa pyakuipa, caciwiri ndi wa ntendere, wakulinganira, wakubvera, wakudzala na ntsisi na misapo yadidi, wakusowa tsankhu na wakusowa umpfakafaka.’ (Tgo. 3:17) Kudziwa pyenepi kusafunika kutikulumiza toera kucalira ubalangazi unacitisa anthu kunyerezera peno kufuna pinthu pyakukhonda kucena na pyakuipa. Nkristu wakukola mwauzimu, asadziwa kuti ndi mabukhu api, ndi mavidyu api, peno ndi masendzekero api anakhonda komeresa Yahova. Thangwi Bhibhlya isapangiza pakweca maonero a Yahova mu pinthu pyenepi.

¹⁶ Pisankhulo pizinji pinakwanisa kucitwa munjira zakusiyana mbatipitiriza kukomeresa Yahova. Mbwenye pakucita pisankhulo pikulu kakamwe, mphyadidi kuphemba maonero kuna akulu a mpingo peno Akristu anango akukola mwauzimu. (Tito 2:3-5; Tgo. 5:13-15) Mwandimomwene, si pyadidi tayu kuphemba anango toera aticitire pisankhulo pyathu. M’mbuto mwace, tisafunika kunyerezera mwacidikhodikho pinapfundza ife m’Bhibhlya mbaticita tekhene cisankhulo cathu. (Aheb. 5:14) Tonsene tisafunika kucita pinthu mwakubverana na mafala adalonga mpostolo Paulu: ‘M’bodzi na m’bodzi anadzathukula ekhene ntolo wace.’​—Agal. 6:5.

17. Tisaphindula tani tingacita pisankhulo pinakomeresa Yahova?

¹⁷ Tingacita pisankhulo pyathu mwakubverana na maonero a Yahova, tisawangisa uxamwali wathu na iye. (Tgo. 4:8) Tisakhala akutawirika kwa iye, pontho asatipasa nkhombo. Pyenepi pisawangisa cikhulupiro cathu kuna Babathu wakudzulu. Natenepa, tendeni titsogolerwe na mitemo na midida ya Bhibhlya, thangwi iyo isapangiza maonero a Yahova. Ndimomwene kuti tinapitiriza kupfundza pinthu pipswa thangwi ya Yahova. (Yobe 26:14) Mbwenye tingacita phinga, tinakwanisa kukhala na ndzeru, udziwisi na luso yakudzindikira toera kutiphedza kucita pisankhulo pyadidi. (Mis. 2:1-5) Maonero na manyerezero a anthu akusowa ungwiro pisacinja mukupita kwa ndzidzi, mbwenye nyamasalmo alonga mwakulinganira: ‘Pinatonga Yahova ndi pya kwenda na kwenda, manyerezero ace asapitiriza mpaka dzindza na dzindza.’ (Sal. 33:11) Mwandimomwene, tinakwanisa kucita pisankhulo pyadidi kakamwe khala manyerezero athu na macitiro athu asabverana na maonero a Yahova, Mulungu wathu waudziwisi onsene.