1-2. Ndi munjira ipi Nkristu akhala ninga predhyo yakulapha kakamwe? (1 Akorinto 15:58)

 MU PYAKA 1970, mu nzinda wa Tokyo ku Japau kwamangwa predhyo yakulapha kakamwe. Anthu akhaona kumangwa kwa predhyo ineyi akhadzuma kuti iyo mbidapitiriza tani kukhala mwadidi nakuti mukhacitika piteketeke pizinji mu nzinda unoyu. Ninji pidacita anyakumanga toera pyenepi pikwanisike? Iwo amanga predhyo ineyi munjira yakuti inakwanisa kutekenyeka, mbwenye nee inagwa na piteketeke. Akristu akhala ninga predhyo ineyi. Munjira ipi?

² Nkristu asafunika kukhala dzololo na wakuwanga maseze atekenyeke. Iye asafunika kucita pyenepi ndzidzi onsene toera akwanise kubvera mitemo ya Yahova na midida yace. (Lerini 1 Akorinto 15:58.) Iye ‘asakhala dzololo toera kubvera,’ pontho asapitiriza kukhala wakukhulupirika. Kusiyapo pyenepi, iye asafunikambo kukhala “wakulinganira” khala ndi pyakufunika. (Tiya. 3:17) Nkristu wakuti ali na maonero akulinganira nee asayesera kukhazikisa mitemo mu pinthu pyakuti nee pyalembwa, pontho nee asapwaza mitemo ya Yahova. Mu nsolo uno, tinaona kuti tinakwanisa tani kukhala akuwanga. Kusiyapo pyenepi, tinaona njira zixanu zinaphatisira Sathani toera kutifewesa, pontho tinaona kuti tinapirira tani mayesero ace.

3. Ndi mitemo ipi ya Yahova inagumanika pa Mabasa 15:28, 29?

³ Ninga Nyakukhazikisa Mitemo, Yahova ndzidzi onsene asakhazikisa mitemo yakubveka mwadidi kuna atumiki ace.  (Iza. 33:22) Mwacitsandzo, mathubo akutonga a mu ndzidzi wa apostolo alonga pinthu pitatu pyakuti Akristu akhafunika kupicita toera apitirize kukhala dzololo: (1) kucalira kulambira madzimunthu mbalambira basi ene Yahova, (2) kubvera mitemo ya Yahova inalonga pya ciropa na (3) kubvera midida ya Bhibhlya inakhondesa ulukwali. (Lerini Mabasa 15:28, 29.) Akristu anakwanisa tani kukhala dzololo mu pinthu pyenepi pitatu?

4. Tinapangiza tani kuti tisalambira basi ene Yahova? (Apokalipse 4:11)

⁴ Ife tisacalira kulambira madzimunthu, mbatilambira basi ene Yahova. Iye apanga Aizraeli kuti iwo akhafunika kulambira iye basi. (Dheu. 5:6-10) Pontho mu ndzidzi udayeserwa Yezu na Sathani, iye alonga kuti ife tisafunika kulambira basi ene Yahova. (Mat. 4:8-10) Natenepa, ife nee tisafunika kulambira madzimunthu. Kusiyapo pyenepi, ife nee tisafunika kutsalakana anthu ninga alungu athu, mwakukhonda tsalakana khala ndi atsogoleri a mauphemberi, atsogoleri a ndale peno anthu akudziwika kakamwe anacita masendzekero. Ife tisafunika kulambira basi ene Yahova, ule ‘adacita pinthu pyonsene.’—Lerini Apokalipse 4:11.

5. Thangwi yanji tisafunika kubvera ntemo wa Yahova unalonga pya kulemedza umaso na ciropa?

⁵ Ife tisabvera ntemo wa Yahova unalonga pya kufunika kulemedza umaso na ciropa. Thangwi yanji? Thangwi Yahova alonga kuti ciropa cisaimirira umaso wakuti ndi muoni wakufunika kakamwe udatipasa iye. (Lev. 17:14) Pidatawirisa Yahova anthu toera kudya pinyama, iye aapanga kuti nee akhafunika kudya ciropa. (Gen. 9:4) Iye alonga pontho ntemo unoyu mu ndzidzi udapereka iye Mwambo wa Mose kuna Aizraeli. (Lev. 17:10) Pontho iye atsogolera mathubo akutonga a mu ndzidzi wa apostolo toera kupfundzisa Akristu onsene kuti ‘apitirize kucalira ciropa.’ (Mabasa 15:28, 29) Ife tisabvera ntemo unoyu mu ndzidzi unacita ife pisankhulo thangwi ya ukondzi. b

6. Tisafunika kucitanji toera tibvere mitemo ya Yahova inalonga pya kucalira ulukwali?

⁶ Ife tisabvera mitemo ya Yahova inalonga pya kucalira ulukwali. (Aheb. 13:4) Mwakuphiphirisa mpostolo Paulu alonga ‘toera ticitise kuti manungo athu akhale akufa.’ Pyenepi pisabveka kuti tisafunika kuwangisira toera tikhonde kukhala na pifuno pyakuipa. Ife tisacalira kuona na kucita pinthu pyakuti pinatikulumiza toera kucita ulukwali. (Akol. 3:5; Yobe 31:1) Tingayeserwa toera kucita pinthu pyakuipa, mwakukhonda dembuka tisacalira manyerezero peno pinthu pyakuti pinafudza uxamwali wathu na Mulungu.

7. Tisafunika kukhala akutonga toera kucitanji, pontho thangwi yanji?

⁷ Yahova asafuna kuti tikhale “akubvera na ntima onsene.” (Aroma 6:17) Pitsogolero pyace ndzidzi onsene ndi pyakufunika kuna ife, pontho nee tinakwanisa kucinja mitemo yace. (Iza. 48:17, 18; 1 Akor. 6:9, 10) Ife tisawangisira toera kukomeresa Yahova na kukhala na maonero mabodzi ene ninga akhali na nyamasalmo adalonga kuti: “Ine ndatonga kubvera mitemo yanum’midzidzi yonsene mpaka kunkhomo.” (Mas. 119:112) Mbwenye Sathani anayesera kutifewesa. Kodi iye asaphatisiranji toera kucita pyenepi?

8. Sathani asaphatisira tani kutcinga toera kutifewesa?

⁸ Kutcingwa. Sathani asayesera kutifewesa mukuphatisira anthu toera kutitsalakana mwakuipa. Cifuniro cace ndi ‘kutidya’ peno kufudza uxamwali wathu na Yahova. (1 Ped. 5:8) Akristu a mu ndzidzi wa apostolo akhathuswa,  kumenywa na kuphiwa thangwi yakubvera kwawo Yahova. (Mabasa 5:27, 28, 40; 7:54-60) Sathani asapitiriza kutcinga atumiki a Mulungu lero. Pyenepi pisaoneka pakweca munjira inatsalakana anyakutcinga abale na alongo athu ku Rusya na madziko anango.

9. Longani citsandzo cinapangiza kufunika kwa kucita mphole-mphole na mayesero akukhonda kuoneka pakweca.

⁹ Mayesero akukhonda kuoneka pakweca. Kusiyapo kutcingwa, Sathani asaphatisirambo “manyengerero” toera kutifewesa. (Aef. 6:11) Onani citsandzo ca m’bale anacemerwa Robert wakuti akhadabhaxari ku kuxipitari toera acitwe operasau. Iye apanga madotoro kuti nee mbadatawira kuikhwa ciropa. Dotoro akhafuna kuncita operasau alemedza cisankhulo cace. Mbwenye namasiku mbadzati kucita operasau, pidabuluka banja ya Robert, dotoro unango aenda kacedza naye. Iye apanga Robert kuti madotoro panango nee anaphatisira ciropa. Mbwenye iwo mbadacisiya dhuzi toera iye angafuna aciphatisire. Panango dotoro unoyu akhanyerezera kuti Robert mbadacinja manyerezero ace, nakuti banja yace nee ikhali penepo. Mbwenye Robert apitiriza kubvera Yahova, pontho alonga kuti iye nee mbadatawira kuikhwa ciropa mwakukhonda tsalakana pinthu pikhafuna kucitika.

10. Thangwi yanji tisafunika kucita mphole-mphole na manyerezero a anthu? (1 Akorinto 3:19, 20)

¹⁰ Manyerezero a anthu anakhonda bvera Yahova. Tinganyerezera pinthu munjira inanyerezera anthu akuti nee asabvera Yahova, panango tinatoma kupwaza mitemo yace. (Lerini 1 Akorinto 3:19, 20.) “Udziwisi wa dziko ino” kazinji kene usacitisa anthu toera akhonde kubvera Mulungu. Akristu a ku Pergamo na a ku Tiyatira akhali na maonero aulukwali na akulambira madzimunthu ninga anthu a m’mizinda ineyi. Yezu asandika mipingo ineyi, thangwi iwo akhatawirisa makhaliro aulukwali. (Apok. 2:14, 20) Lero, anthu asayesera kuticitisa kukhala na maonero akuphonyeka. Acibale athu, andzathu akuxikola peno akubasa panango anayesera kutipanga toera ticite pinthu pyakuti nee pisakomeresa Yahova. Panango iwo anayesera kutipanga kuti nee ndi pyakuipa kucita pinafuna ife, peno kuti midida ya Bhibhlya ndi yakale kakamwe.

11. Tisafunika kucaliranji mu ndzidzi unawangisira ife toera kukhala dzololo?

¹¹ Midzidzi inango panango tinanyerezera kuti pitsogolero pinatipasa Yahova nee ndi pyakubveka mwadidi. Panango tinayesera kucita pinthu pinango “kupiringana pire pidalembwa.” (1 Akor. 4:6) Atsogoleri a mauphemberi mu ntsiku za Yezu akhacita pyenepi. Iwo akhathimizira mitemo yawo mu Mwambo, pontho akhacitisa kuti pikhale pyakunentsa kuna anthu toera abvere Mwambo. (Mat. 23:4) Yahova asatipasa pitsogolero pyakubveka mwadidi mukuphatisira Mafalace na gulu yace. Ife nee tiri na mathangwi toera kuthimizira pinthu pinango mu pitsogolero pinatipasa iye. (Mis. 3:5-7) Natenepa nee tisafunika kucita pinthu pinango kupiringana pire pidalembwa m’Bhibhlya peno kukhazikisa mitemo kuna Akristu andzathu thangwi ya pinthu pyakuti nee pisalongwa m’Bhibhlya.

12. Sathani asaphatisira tani “manyengerero apezi”?

¹² Manyengerero. Sathani asaphatisira “manyengerero apezi” na “maonero a dziko” toera kupeusa anthu na kuacitisa kuti akhale akugawana. (Akol. 2:8) Mu ndzidzi wa apostolo, manyengerero anewa akhaphataniza pipfundziso pya anthu na pipfundziso pya Ayuda pyakuti nee pikhabverana na Malemba. Kusiyapo pyenepi, manyerezero anewa akhaphatanizambo cipfundziso cakuti Akristu nee akhafunika kubvera Mwambo wa Mose. Manyerezero anewa akhapeusa anthu, thangwi akhaacitisa kukhala kutali na Yahova wakuti ndi Mwanaciro udziwisi.  Lero, Sathani asaphatisira televizau maradhyo na majornali, kuphatanizambo interneti toera kumwaza mphangwa zauthambi zinalongwa na atsogoleri a ndale. Ife takwanisa kuona pyenepi mu ndzidzi wa utenda wa COVID-19. c Mboni za Yahova zidabvera pitsogolero pya gulu yathu nee zakhala zakudzudzumika kakamwe ninga anthu akhabvesera mphangwa zauthambi.—Mat. 24:45.

13. Thangwi yanji nee tisafunika kudzudzumiswa?

¹³ Kudzudzumika. Ife tisafunika kupitiriza kunyerezera ‘pinthu pyakufunika kakamwe.’ (Afil. 1:9, 10) Kudzudzumika kunakwanisa kubvunga ndzidzi wathu uzinji kakamwe wakuti mbatidauphatisira toera kunyerezera pinthu pyadidi. Pinthu pyakuti tisapicita kazinji kene ninga kudya, kumwa, ubalangazi na kuphata basa panango pinatidzudzumisa tingaona pinthu pyenepi ninga pyakufunika kakamwe mu umaso wathu. (Luka 21:34, 35) Kusiyapo pyenepi, ntsiku zonsene tisabva, pontho tisaona mphangwa za uviyaviya na za ndale za dziko. Ife nee tisafunika kudzudzumiswa na mphangwa zenezi. Thangwi tingacita pyenepi panango tinatoma kuphedzera m’bodzi wa iwo mu ntima mwathu. Sathani asaphatisira pinthu pyenepi pyonsene toera kutifewesa mbatisiya kucita pinthu pyadidi. Cincino tendeni tione kuti tinakunda tani mayesero ace mbatipitiriza kukhala akuwanga.

14. Ninji cinafuna kutiphedza toera tipitirize kukhundu ya Yahova?

¹⁴ Nyerezerani kuti thangwi yanji mwaperekeka kuna Yahova mbamubatizwa. Imwe mwacita pyenepi thangwi mukhafuna kukhala kukhundu ya Yahova. Kumbukani pinthu pidakuphedzani toera kukhala na cinyindiro cakuti mwagumana undimomwene. Imwe mwadziwa Yahova, pontho mwatoma kumulemedza na kunfuna ninga Babanu wakudzulu. Imwe mwatoma kukhulupira pikhapfundza imwe, pontho pyenepi pyakuphedzani toera kutcunyuka. Imwe mwasiya kucita pinthu pinaida Yahova mbamutoma kucita pinthu pinankomeresa. Imwe mwatsandzaya kakamwe pidadziwa  imwe kuti Yahova akulekererani. (Mas. 32:1, 2) Imwe mwatoma kugumanika pa misonkhano Yacikristu na kupangambo anango pinthu pyadidi kakamwe pikhapfundza imwe. Cincino ninga Nkristu wakuperekeka na wakubatizwa, imwe muli kufamba munjira inatsogolera ku umaso, pontho musawangisira toera kupitiriza munjira ineyi.—Mat. 7:13, 14.

15. Thangwi yanji ndi pyakufunika kupfundza Mafala a Mulungu na kuanyerezera mwadidi?

¹⁵ Pfundzani Mafala a Mulungu na kunyerezera mwadidi pinapfundza imwe. Ninga muti wakuti usakhala wakuwanga khala mitcici yace yaenda pantsi kakamwe, ife tinakwanisambo kupitiriza kukhala akuwanga khala cikhulupiro cathu kuna Yahova ndi cakuwanga. Mu ndzidzi unakula muti unoyu mitcici yace isaenda pantsi kakamwe, pontho isathimizirika. Tingapfundza na kunyerezera pinapfundza ife m’Bhibhlya, tinawangisa cikhulupiro cathu, pontho tinakhala na cinyindiro cakuti mitemo ya Yahova ndzidzi onsene ndi yadidi. (Akol. 2:6, 7) Nyerezerani pipfundziso pya Yahova, citsogolero cace na citsidzikizo cidapereka iye kuna atumiki ace nduli. Mwacitsandzo, Ezekyeli akhayang’ana mwadidi mu ndzidzi udaona iye masomphenya anju mbakapima templo. Masomphenya anewa awangisa Ezekyeli, pontho asatipfundzisambo kuti tinabvera tani midida ya Yahova toera tipitirize mu ulambiri wakucena. d (Ezek. 40:1-4; 43:10-12) Ife tinaphedzekambo tingakhala na ndzidzi wakupfundza na kunyerezera mwadidi pinthu pyakunentsa pinagumanika m’Mafala a Mulungu.

16. Kukhala na ntima wakukhulupirika kwaphedza tani Robert? (Mas. 112:7)

¹⁶ Khalani wakukhulupirika muntima mwanu. Mambo Dhavidhi apangiza kuti cipo mbadasiya kufuna Yahova mu ndzidzi udalonga iye kuti: “Ntima wanga ndi wakukhulupirika kuna imwe Mulungu.” (Mas. 57:7) Ife tinakwanisambo kukhala na ntima wakukhulupirika tinganyindira Yahova na ntima onsene. (Lerini Masalmo 112:7.) Onani pidaphedza Robert adalongwa mu ndima zakutoma. Pidapangwa iye kuti ciropa mbacidakhala dhuzi toera kumuikha pingafunika, iye alonga kuti mbadabuluka  mu xipitari angafuna kumuikha ciropa. Mukupita kwa ndzidzi Robert alonga: “Ine nee ndapenula cisankhulo canga, pontho nee ndadzudzumika na pinthu pikhafuna kucitika.”

17. Tisapfundzanji na pinthu pidacita Robert? (Onanimbo foto.)

¹⁷ Robert akhali wakuwanga thangwi akhadacita kale pinthu mbadzati kuenda ku xipitari toera akhonde kupenula cisankhulo cace. Cakutoma, iye akhafuna kutsandzayisa Yahova. Caciwiri, iye akhapfundza Bhibhlya na mabukhu athu analonga thangwi ya kulemedza umaso na ciropa. Cacitatu, iye akhali na cinyindiro cakuti Yahova mbadampasa nkhombo angabvera mitemo yace. Ife tinakwanisambo kukhala akuwanga mwakukhonda tsalakana mayesero anafuna kuthimbana na ife.

18. Citsandzo ca Bharaki cisatipfundzisanji thangwi ya kunyindira Yahova? (Onani foto iri patsamba yakutoma.)

¹⁸ Nyindirani Yahova. Onani kuti Bharaki awina tani nkhondo thangwi ya kunyindira pitsogolero pya Yahova. Maseze mu Izraeli nee mukhalibve xango peno dipa, Yahova ampanga toera aende kamenyane na anyankhondo a ku Kanani akuti akhali na pida pizinji, pontho akhatsogolerwa na Sizera. (Aton. 5:8) Mprofeta wa nkazi Dhebhora apanga Bharaki toera abuluke pa phiri toera aende ku mbuto ya kuzwerera kamenyana na Sizera wakuti akhali na ngolo za anyankhondo 900. Maseze mbapidakhala pyakunentsa kuna Aizraeli toera kumenyana na anyankhondo akuti akhali na ngolo pa mbuto ineyi, Bharaki abvera. Mu ndzidzi ukhatcita anyankhondo pa Phiri ya Tabhori, Yahova acitisa kuti madzi abvumbe kakamwe. Ngolo za Sizera zatcerera m’matope, pontho Yahova aphedza Bharaki toera kuwina. (Aton. 4:1-7, 10, 13-16) Munjira ibodzi ene, Yahova anatiphedza toera kuwina tingan’nyindira na kubvera pitsogolero pinatipasa iye mukuphatisira gulu yace.—Dheu. 31:6.

19. Thangwi yanji musafuna kupitiriza kukhala dzololo?

¹⁹ Mu ndzidzi unapitiriza ife kukhala mu dziko ino, tisafunikambo kuwangisira toera tikhale dzololo. (1 Tim. 6:11, 12; 2 Ped. 3:17) Natenepa tisafunika kukhala akukhurudzika, tingatcingwa, tingathimbana na mayesero akukhonda oneka, manyerezero a anthu, manyengerero apezi na kudzudzumika. (Aef. 4:14) M’mbuto mwace, tisafunika kukhala dzololo na akuwanga mbatipitiriza kufuna Yahova na kubvera mitemo yace. Kusiyapo pyenepi, tisafunikambo kukhala akulinganira. Mu nsolo unatowera, tinapfundza kuti Yahova na Yezu asapangiza tani mwadidi kakamwe n’khaliro unoyu.