NSOLO WA PFUNDZIRO 30
Pitirizani Kufuna Yahova na Anango
‘Tisafunika kupangiza ufuni, munjira ineyi tinakwanisa kukula mu pinthu pyonsene.’—AEF. 4:15.
NYIMBO 2 Dzina Yanu Ndi Yahova
PINAFUNA IFE KUPFUNDZA a
1. Ndi pinthu pipi pidadziwa imwe mu ndzidzi udatoma imwe kupfundza Bhibhlya?
KODI imwe musakumbuka pinthu pidadziwa imwe mu ndzidzi udatoma imwe kupfundza Bhibhlya? Panango imwe mwadzumatirwa thangwi yakudziwa kuti Mulungu ali na dzina. Panango mwatsandzaya pidadziwa imwe kuti Mulungu nee asathabusa anthu mu djenje ya moto. Pontho panango imwe mwatsandzaya pidadziwa imwe kuti anyakufunika anu adafa anadzalamuswa muli akufa mbakhala pontho m’maso mparaizu pa dziko yapantsi.
2. Kusiyapo kupfundza Bhibhlya, ndi pinthu pipi pinango pidacita imwe toera kuthambaruka? (Aefesi 5:1, 2)
2 Mu ndzidzi ukhapitiriza imwe kupfundza Mafala a Mulungu, ufuni wanu kuna Yahova wathimizirikambo. Ufuni unoyu wakukulumizani toera kuphatisira pikhapfundza imwe. Imwe mwacita pisankhulo pyadidi pyakuti pisabverana na midida ya Bhibhlya. Pontho imwe mwacinja manyerezero na makhaliro anu thangwi mukhafuna kukomeresa Mulungu. Ninga mwana wakuti asatowezera Babace waufuni, imwe mwatowezera Babanu wakudzulu.—Lerini Aefesi 5:1, 2.
3. Tisafunika kubvundzikanji?
3 Ife tisafunika kubvundzika: ‘Kodi cincino ndisafuna kakamwe Yahova kupiringana mu ndzidzi udadziwa ine undimomwene? Kutomera mu ndzidzi udabatizwa ine, kodi ndisanyerezera na kucita pinthu ninga munafuna Yahova mukupangiza ufuni kuna abale na alongo anga?’ Mungaona kuti ‘ufuni ukhali na imwe pakutoma’ wathowa, lekani kutsukwala. Pyenepi pyacitikambo kuna Akristu a mu ndzidzi wa apostolo. Mbwenye Yezu nee aasiya, pontho iye nee anakusiyanimbo. (Apok. 2:4, 7) Iye asadziwa kuti tinakwanisa kukhala pontho na ufuni ninga ukhali na ife mu ndzidzi udatoma ife kupfundza Bhibhlya.
4. Tinapfundzanji mu nsolo uno?
4 Mu nsolo uno tinapfundza kuti tinapitiriza tani kufuna Yahova na anango. Buluka penepo tinaona nkhombo zinafuna kukhala na ife tingapitiriza kufuna Yahova na abale na alongo athu.
PITIRIZANI KUFUNA YAHOVA
5-6. Ndi pinentso pipi pidathimbana na mpostolo Paulu mu utumiki wace, pontho ninji pidamphedza toera apitirize kutumikira Yahova?
5 Mpostolo Paulu akhatumikira Yahova mwakutsandzaya, mbwenye iye akhathimbana na pinentso pizinji. Kazinji kene iye akhacita maulendo a nsindzo wakulapha, pontho mu ntsiku zenezi pikhali pyakunentsa toera kucita maulendo. M’maulendo anewa, Paulu midzidzi inango akhali “pangozwi m’mikulo” pontho akhali “pangozwi ya mambava.” Kusiyapo pyenepi, midzidzi inango akhatsalakanwa mwakuipa na anyakutcinga. (2 Akor. 11:23-27) Pontho abale na alongo midzidzi inango nee akhapereka takhuta thangwi yakuwangisira kukhacita Paulu toera kuaphedza.—2 Akor. 10:10; Afil. 4:15.
6 Ninji pidaphedza Paulu toera kupitiriza kutumikira Yahova? Iye apfundza pinthu pizinji m’Malemba thangwi ya makhaliro a Yahova, pontho apfundzambo na pinthu pidancitikira. Paulu akhali na cinyindiro cakuti Yahova Mulungu akhanfuna. (Aroma 8:38, 39; Aef. 2:4, 5) Natenepa ufuni wace kuna Yahova wathimizirika kakamwe. Paulu apangiza ufuni unoyu kuna Yahova ‘mukutumikira anthu akucena na kupitiriza kuatumikira.’—Aheb. 6:10.
7. Ndi cinthu cipi cibodzi cinafuna kutiphedza toera kupitiriza kufuna Yahova?
7 Ife tinapitiriza kufuna Mulungu tingapfundza mwadidi Mafalace. Mu ndzidzi unaleri imwe Bhibhlya, yeserani kuona kuti khundu inaleri imwe isapangizanji thangwi ya Yahova. Bvundzikani: ‘Pinthu pyenepi pisapangiza tani kuti Yahova asandifuna? Pisapangiza tani mathangwi anandicitisa kufuna Yahova?’
8. Phembero inatiphedza tani toera kupitiriza kufuna Mulungu?
8 Njira inango inafuna kutiphedza toera kupitiriza kufuna Yahova ndi kucita phembero kuna iye ntsiku zonsene mbatimpanga mabvero athu. (Mas. 25:4, 5) Tingacita pyenepi, Yahova anatawira maphembero athu. (1 Juw. 3:21, 22) Mulongo Khanh wa ku Azya alonga: “Pakutoma ine ndikhafuna Yahova thangwi ya kundziwa, mbwenye ufuni unoyu wadzathimizirika pidaona ine njira ikhatawira iye maphembero anga. Pyenepi pyandikulumiza toera kucita pinthu pinankomeresa.” b
PITIRIZANI KUFUNA ANANGO
9. Timoti apangiza tani kuti akhapitiriza kufuna abale na alongo ace?
9 Pyaka pingasi pidamala Paulu kukhala Nkristu, iye adziwana na m’phale wadidi akhacemerwa Timoti. Timoti akhafuna Yahova na anthu. Paulu apanga Akristu a ku Filipi kuti: “Ine nkhabebve munthu unango ali na manyerezero ninga ace, wakuti anakutsalakanani mwadidi.” (Afil. 2:20) Pa lemba ineyi, Paulu nee alonga maluso a Timoti peno njira ikhacita iye nkhani, mbwenye alonga njira ikhapangiza Timoti ufuni kuna abale na alongo ace. Mwakukhonda penula, abale na alongo akhakomerwa kakamwe angacedzerwa na Timoti.—1 Akor. 4:17.
10. Anna na mamunace apangiza tani kuti asafuna abale na alongo awo?
10 Ife tisasakambo njira toera kuphedza abale na alongo athu. (Aheb. 13:16) Onani pidacitikira mulongo Anna adalongwa mu nsolo udamala. Pidamala kucitika condzi cikulu, iye na mamunace aenda kaona banja ibodzi yakuti ndi Mboni za Yahova, pontho agumana kuti ntsoi ya nyumba ya banja ineyi yafudzika. Na thangwi ineyi, banja ineyi nee ikhali na nguwo zakucena toera kubvala. Anna alonga: “Ife takwata nguwo zawo mbatizifula, pontho pidamala ife kuzipasari tazifunya mbatienda kaapasa. Kuna ife, pyenepi pikhali pinthu pyakucepa, mbwenye pyaticitisa kukhala na uxamwali wa ponda ndipondembo mpaka lero.” Ufuni wa Anna na mamunace kuna abale na alongo waacitisa toera kuphedza anango.—1 Juw. 3:17, 18.
11. (a) Anthu anango asapibva tani tingapangiza ufuni kuna iwo? (b) Mwakubverana na Misangani 19:17, Yahova anacitanji tingapangiza ufuni kuna anango?
11 Tingapangiza kukoma ntima na ufuni kuna anango, iwo anakwanisa kuona kuti tisawangisira toera kutowezera Yahova. Pontho panango iwo anapereka takhuta kakamwe thangwi ya pinthu pinaacitira ife. Khanh adalongwa mu ndima 8 asakumbuka ciphedzo cidapaswa iye. Iye alonga: “Ine ndisapereka takhuta kakamwe kuna alongo onsene akhaenda pabodzi na ine m’basa ya m’munda. Iwo akhabwera kudzandikwata panyumba panga, akhandicemera toera kudya pabodzi na iwo, pontho akhandiphedza toera ndifike kunyumba mwakutsidzikizika. Cincino ndisaona kuti iwo akhawangisira kakamwe toera kucita pyenepi. Pontho iwo akhacita pyenepi mwaufuni.” Mwandimomwene, anthu anango nee anapereka takhuta thangwi ya pinthu pinaacitira ife. Khanh alonga tenepa thangwi ya ale adamphedza: “Ine ndisafuna kakamwe kucita pinthu pyadidi kuna ale onsene adandicitira pinthu pyadidi, mbwenye nee ndisadziwa kunakhala iwo onsene. Ngakhale tenepo Yahova asadziwa kunakhala iwo, pontho ndisacita phembero toera iye aapase nkhombo thangwi ya pinthu pyadidi pidandicitira iwo.” Pidalonga Khanh ndi pyandimomwene thangwi Yahova asaona ngakhale pinthu pyakucepa pinacitira ife anango. Iye asaona pyenepi ninga ntsembe yadidi kakamwe, pontho ninga mangawa akuti iye anadzaalipa.—Lerini Misangani 19:17.
Munthu angathambaruka mwauzimu, asasaka njira toera kuphedza anango (Onani ndima 12)
12. Abale anapangiza tani kuti asafuna abale na alongo mu mpingo? (Onanimbo foto.)
12 Khala ndimwe m’bale, munapangiza tani ufuni kuna anango na kucita pinthu toera kuaphedza? M’bale anacemerwa Jordan abvundza nkulu wa mpingo kuti anacitanji toera akwanise kuphedza kakamwe abale na alongo mu mpingo. Nkulu wa mpingo unoyu ansimba thangwi ya kuthambaruka kwace, pontho ampasa uphungu toera akwanise kucita pinthu pinango. Mwacitsandzo, iye apanga Jordan toera afike nakweru pa Nyumba ya Umambo na kumwanyika abale na alongo, apereke mitawiro pa misonkhano, amwaze mphangwa mwakukhonda phonya pabodzi na nsoka wace wa basa ya m’munda na kunyerezera pinthu pinango pinafunika iye kucita toera kuphedza anango. Pidaphatisira Jordan uphungu unoyu, iye apfundza mabasa mapswa, pontho apitiriza kufuna kakamwe abale na alongo. Jordan apfundzambo kuti m’bale nee asatoma kuphedza anango angakhala ntumiki wakutumikira, mbwenye asapitiriza kuaphedza.—1 Tim. 3:8-10, 13.
13. Ufuni waphedza tani m’bale Christian toera kutumikira pontho ninga nkulu wa mpingo?
13 Ndiye tani khala mukhatumikira ninga ntumiki wakutumikira peno nkulu wa mpingo mbwenye cincino nee musatumikirabve? Yahova asakumbuka basa idacita imwe na ufuni udakukulumizani toera kucita basa ineyi. (1 Akor. 15:58) Iye asaonambo ufuni unapitiriza imwe kupangiza. M’bale anacemerwa Christian atsukwala pidasiya iye kutumikira ninga nkulu wa mpingo. Mbwenye iye alonga: “Ine ndatonga kucita pyonsene pikhakwanisa ine toera kutumikira Yahova mwakukhonda tsalakana khala ndine nkulu wa mpingo peno nkhabe.” Mukupita kwa ndzidzi, iye akhazikiswa pontho ninga nkulu wa mpingo. Christian athimiza: “Ine ndanyinyirika toera kutumikira pontho ninga nkulu wa mpingo. Mbwenye ndaona kuti khala Yahova asafuna kuti nditumikire pontho ninga nkulu wa mpingo, ndisafunika kucita pyenepi thangwi ya ufuni wanga kuna iye na kuna abale na alongo.”
14. Mwapfundzanji na mafala adalonga mulongo Elena?
14 Atumiki a Yahova asafunambo anthu akuti nee asatumikira Yahova. (Mat. 22:37-39) Mwacitsandzo, mulongo Elena anakhala ku Georgia, alonga: “Pakutoma, cinthu cikhandikulumiza toera kumwaza mphangwa basi ene ndi ufuni wanga kuna Yahova. Mbwenye mu ndzidzi ukhathimizirika ufuni wanga kuna Babanga wakudzulu, ufuni wanga kuna anthu ukhathimizirikambo. Ndikhayesera kuona nyatwa zikhathimbana na iwo, pontho ndikhaphatisira pyenepi toera kuapfundzisa. Mu ndzidzi ukhanyerezera ine kakamwe pyenepi, ndikhafunambo kakamwe kuaphedza.”—Aroma 10:13-15.
YAHOVA ANATIPASA NKHOMBO TINGAFUNA ANANGO
Kupangiza ufuni kuna munthu m’bodzi kunakwanisa kuphedza anthu azinji (Onani ndima 15-16)
15-16. Ninga pinapangizwa pa foto, ndi nkhombo zipi zinafuna kukhala na ife tingafuna anango?
15 Tingapangiza ufuni kuna abale na alongo athu, anaphedzeka nee ndiwo basi. Pidatoma utenda wa COVID-19, m’bale Paolo na nkazace aphedza alongo azinji akugwesera toera adziwe kuphatisira ntokodzi, thabhuleti peno komputadhori pakumwaza mphangwa. Mulongo m’bodzi wakuti pakutoma akhanentseka toera kuphatisira pinthu pyenepi, mukupita kwa ndzidzi akhakwanisa kuphatisira mwadidi. Iye akwanisa kupiphatisira toera kucemera acibale ace kuti agumanike pa Cikumbuso. 60 mwa iwo agumanika pa Cikumbuso mukuphatisira vidhyukonferensya! Mulongo unoyu na acibale ace aphedzeka kakamwe thangwi ya kuwangisira kudacita Paolo na nkazace. Mukupita kwa ndzidzi, mulongo unoyu alembera tsamba Paolo kuti: “Takhuta kakamwe na kupfundzisa ife ankhalamba. Cipo ndinaduwala citsalakano ca Yahova na kuwangisira kwanu toera kutiphedza.”
16 Pinthu pyenepi pyapfundzisa Paolo cinthu cakufunika kakamwe. Iye apfundza kuti ufuni ndi wakufunika kakamwe kupiringana udziwisi peno maluso akubalwa nawo. Paolo alonga: “Ine ndikhatumikira ninga muyang’aniri wa cisa. Lero, ine ndadzindikira kuti abale na alongo panango aduwala nkhani zikhacita ine, mbwenye iwo asapitiriza kukumbuka pinthu pikhacita ine toera kuaphedza.”
17. Mbani anaphedzekambo tingafuna anango?
17 Tingafuna anango, ife tisaphedzekambo mwakukhonda dikhira. Ndi pyenepi pidacitikira Jonathan wa ku Nova Zelandiya. Ntsiku inango Nsabudu namasikati mu ndzidzi wakuti kunja kukhapisa kakamwe, iye aona mpainiya wakuti akhamwaza mphangwa ekhene. Jonathan atonga kumwaza mphangwa pabodzi na mpainiya unoyu m’masabudu onsene na masikati. Iye nee akhadziwa kuti kucita pyenepi mbakudamphedzambo. Jonathan alonga: “Mu ndzidzi unoyu ine nee ndikhakomerwa na basa yakumwaza mphangwa. Mbwenye mu ndzidzi ukhaona ine njira ikhapfundzisa mpainiya unoyu na kuona kuti utumiki wace ukhafamba mwadidi, ndatomambo kukomerwa na basa yakumwaza mphangwa. Kusiyapo pyenepi, m’bale unoyu adzakhala xamwali wanga wa ponda ndipondembo, pontho iye andiphedza toera kukomerwa na utumiki mbandikhala na uxamwali wakuwanga na Yahova.”
18. Yahova asafuna kuti ticitenji?
18 Yahova asafuna kuti tonsene tipitirize kufuna iye na anango. Ninga pidapfundza ife mu nsolo uno, ife tinakwanisa kupitiriza kufuna Yahova tingaleri Mafalace na kunyerezera mwadidi pinaleri ife, pontho tingalonga na iye m’phembero kazinji kene. Ife tinakwanisambo kupitiriza kufuna abale na alongo athu tingaaphedza. Ufuni wathu ungathimizirika, tinakhala na uxamwali wakuwanga na Yahova pabodzi na abale na alongo athu. Pontho tinadzakhala na axamwali anewa kwenda na kwenda!
NYIMBO 109 Tifunane na Ntima Onsene
a Mwakukhonda tsalakana khala tadziwa undimomwene cincino peno tisatumikira Yahova mu pyaka pizinji, tonsene tisafunika kupitiriza kuthambaruka. Mu nsolo uno, tinapfundza kuti kufuna Yahova na anango kunatiphedza tani toera kupitiriza kuthambaruka. Mu ndzidzi unapfundza ife pinthu pyenepi, nyerezerani pinthu pidacita imwe toera kuthambaruka na pinafuna kucita imwe toera mupitirize kuthambaruka.
b Madzina anango acinjwa.
