NSOLO WA PFUNDZIRO 28
NYIMBO 123 Tisabvera Yahova na Gulu Yace
Kodi Imwe Musakwanisa Kusiyanisa Undimomwene na Uthambi?
“Khalani akuwanga, mumange undimomwene ncunu mwanu ninga sintu.”—AEF. 6:14.
PINAFUNA IFE KUPFUNDZA
Tinaona kuti tinakwanisa tani kusiyanisa undimomwene unatipfundzisa Yahova na uthambi wa Sathani na wa ale anatitcinga.
1. Musapibva tani thangwi yakupfundza undimomwene?
NINGA atumiki a Yahova, ife tisakomerwa na undimomwene unagumanika m’Bhibhlya. Pontho cikhulupiro cathu cisabulukira mu undimomwene unapfundza ife. (Aroma 10:17) Ife tiri na cinyindiro cakuti Yahova akhazikisa mpingo Wacikristu toera ‘kuphedzera na kutsidzikiza undimomwene.’ (1 Tim. 3:15) Ife tisakhala akutsandzaya tingaphedzera “ale anatsogolera pakati” pathu, thangwi ndi abale anewa asafokotoza undimomwene wa Bhibhlya na kutiphedza toera kucita cifuno ca Mulungu.—Aheb. 13:17.
2. Mwakubverana na Tiyago 5:19, ndi pinthu pipi pyakuti panango pinacitika pakumala kupfundza undimomwene?
2 Ngakhale pakumala kupfundza undimomwene wa Bhibhlya na kutawira kuti tinabvera pitsogolero pya gulu ya Yahova, panango tinapeuswa. (Lerini Tiyago 5:19.) Sathani anatsandzaya kakamwe angaona kuti tasiya kunyindira pinalonga Bhibhlya na gulu ya Yahova.—Aef. 4:14.
3. Thangwi yanji tisafunika kupitiriza kubvera undimomwene? (Aefesi 6:13, 14)
3 Lerini Aefesi 6:13, 14. Mwakukhonda dembuka, Sathani anamwaza uthambi mbakwanisa kucitisa anthu azinji kuipirwa na atumiki a Yahova. (Apok. 16:13, 14) Ife tisadziwambo kuti Sathani anadzacita pyonsene pinakwanisa iye toera kunyengeza atumiki a Mulungu. (Apok. 12:9) Na thangwi ineyi, ndi pyakufunika kakamwe kukhunganyika cincino toera tikwanise kudzindikira kusiyana kwa undimomwene na uthambi, mbatipitiriza kubvera undimomwene. (Aroma 6:17; 1 Ped. 1:22) Toera tidzapulumuke pa nyatwa ikulu tisafunika kucita pyenepi!
4. Tinapfundzanji mu nsolo uno?
4 Mu nsolo uno, tinapfundza makhaliro mawiri akuti tisafunika kukhala nawo khala tisafuna kudzindikira undimomwene wa Bhibhlya na kutawira kutsogolerwa na gulu ya Yahova. Buluka penepo, tinaona pinthu pitatu pisafunika ife kucita khala tisafuna kupitiriza mu undimomwene.
MAKHALIRO ANAFUNIKA IFE KUKHALA NAWO KHALA TISAFUNA KUDZINDIKIRA UNDIMOMWENE
5. Kugopa Yahova kunatiphedza tani toera kudzindikira undimomwene?
5 Kugopa Yahova. Kugopa Yahova pisabveka kunfuna kakamwe mbatikhonda kucita cinthu cinantsukwalisa. Na thangwi ineyi, ife tisafunika kudziwa mwadidi kusiyana kwa pinthu pyakuipa na pyadidi, undimomwene na uthambi toera tikhale akutawirika kuna Yahova. (Mis. 2:3-6; Aheb. 5:14) Nakuti pinthu pinakomerwa na anthu kazinji kene pisatsukwalisa Yahova, ife nee tisafunika kutawirisa kuti kugopa anthu kutipingize kufuna Yahova.
6. Kugopa anthu kwacitisa tani Aizraeli khumi kusiya kulonga undimomwene?
6 Tingagopa kakamwe anthu kupiringana Yahova, tinasiya undimomwene. Onani citsandzo ca Aizraeli 12 adaenda kasuzumira dziko idapikira Yahova kupasa Aizraeli. Khumi mwa Aizraeli anewa agopa kakamwe Akanani kupiringana kufuna kwawo Yahova. Iwo apanga Aizraeli onsene: “Ife nee tinakwanisa kuenda kamenyana na mbumba ineyi, thangwi iwo ndi amphambvu kakamwe kupiringana ife.” (Num. 13:27-31) Ndimomwene kuti m’maonero a anthu, Akanani akhali amphambvu kakamwe kupiringana Aizraeli. Mbwenye kulonga kuti Aizraeli nee mbadakwanisa kukunda anyamalwa awo kwapangiza kuti iwo nee akhanyindira Yahova. Amuna anewa khumi akhafunika kunyindira pidalonga Yahova kuna Aizraeli toera kupicita. Iwo akhafunikambo kunyerezera pidaacitira Yahova nduli. Natenepa, iwo akhafunika kukumbuka kuti Akanani nee akhali amphambvu kupiringana Yahova wamphambvu zonsene. Mbwenye mwakusiyana na amuna anewa, Yoswa na Kalebe akhafuna kukhala akutawirika kuna Yahova. Iwo apanga mbumba: “Khala Yahova akomerwa na ife, mwakukhonda penula, iye anatipitisa mu dziko ineyi, mbatipasa dziko ineyi.”—Num. 14:6-9.
7. Tisafunika kucitanji toera tipitirize kugopa Yahova? (Onanimbo foto.)
7 Toera tipitirize kugopa Yahova, ndzidzi onsene unacita ife pisankhulo tisafunika kunyerezera pinakomeresa Yahova. (Mas. 16:8) Mungaleri mphangwa za m’Bhibhlya, bvundzikani: ‘Mbidakhala ndine, mbidacita cisankhulo cipi?’ Mwacitsandzo, Aizraeli khumi pidalonga iwo mphangwa zauthambi, kodi imwe mbamudatawira mphangwa zenezi mbamugopa anthu peno mbamudanyindira Yahova thangwi ya ufuni wanu kuna iye? Aizraeli nee akhulupira kuti Yoswa na Kalebe akhalonga undimomwene, na thangwi ineyi iwo aluza mwai wakupita mu Dziko Yakupikirwa.—Num. 14:10, 22, 23.
Kodi imwe mbamudakhulupira ani? (Onani ndima 7)
8. Ndi n’khaliro upi wakuti tisafunika kuukulisa, pontho thangwi yanji?
8 Kucepeseka. Yahova asapangiza undimomwene basi ene ale akuti ndi akucepeseka. (Mat. 11:25) Mwakucepeseka, ife tatawira kuphedzwa toera kupfundza undimomwene. (Mabasa 8:30, 31) Ngakhale tenepo, tisafunika kucita mphole-mphole toera tikhonde kukhala akudzikuza. Thangwi tingakhala akudzikuza, tinatoma kuona kuti maonero athu ndi akufunika kakamwe kupiringana midida ya Bhibhlya na pitsogolero pya gulu ya Yahova.
9. Tisafunika kucitanji toera tipitirize kukhala akucepeseka?
9 Tingafuna kupitiriza kukhala akucepeseka, tisafunika kukumbuka kuti Yahova ndi wankulu kakamwe kupiringana ife. (Mas. 8:3, 4) Pontho tisafunika kuphemba Yahova toera atiphedze kuti tikhale akucepeseka na kutawira kupfundziswa na iye. Yahova asatipfundzisa manyerezero ace kubulukira m’Bhibhlya na mu gulu yace, pontho iye anatiphedza toera kuona pinthu pyenepi ninga pyakufunika kakamwe kupiringana manyerezero athu. Mungaleri Bhibhlya, yeserani kuona pinthu pinapangiza kuti Yahova asakomerwa na anthu akucepeseka, mbwenye asaida anthu akudzikuza. Pontho wangisirani toera kukhala akucepeseka mungapaswa miyai yakutumikira.
TISAFUNIKA KUCITANJI TOERA TIPITIRIZE MU UNDIMOMWENE?
10. Yahova aphatisira ani toera kupfundzisa na kupereka pitsogolero kuna mbumba yace?
10 Nyindirani gulu ya Yahova. Mu ndzidzi wakale, Yahova aphatisira Mose, pontho mukupita kwa ndzidzi aphatisira Yoswa toera kupereka pitsogolero kuna Aizraeli. (Yos. 1:16, 17) Aizraeli akhapaswa nkhombo mu ndzidzi ukhaona iwo amuna anewa ninga aimiriri a Yahova. Mbwenye mukupita kwa pyaka, mu ndzidzi udakhazikiswa mpingo Wacikristu, apostolo khumi na awiri ndiwo akhatsogolera mbumba ya Mulungu. (Mabasa 8:14, 15) Buluka penepo nsoka unoyu wathimizirika, pontho ukhaphataniza akulu a mpingo anango mu Yerusalemu. Thangwi yakubvera pitsogolero pya amuna anewa akukhulupirika, “mipingo ikhapitiriza kuwangiswa cikhulupiro, pontho anyakupfundza akhathimizirika ntsiku zonsene.” (Mabasa 16:4, 5) Lero, ife tinapaswambo nkhombo tingabvera pitsogolero pya gulu ya Yahova. Kodi Yahova anapibva tani tingakhonda kubvera ale adasankhula iye toera kutitsogolera? Tinakwanisa kutawira mbvundzo unoyu tingaona pidacitikira Aizraeli mu ndzidzi ukhaenda iwo ku Dziko Yakupikirwa.
11. Ninji pidacitikira anthu adakhonda kulemedza Yahova na ule adasankhula iye toera kuatsogolera? (Onanimbo foto.)
11 Mu ndzidzi ukhaenda Aizraeli ku Dziko Yakupikirwa, amuna apidzo atoma kulonga mwakuipa Mose na basa idapaswa iye na Yahova. Iwo alonga: “Mbumba yonsene [tayu basi Mose] ndi yakucena, onsene, pontho Yahova ali pakati pawo.” (Num. 16:1-3) Ndimomwene kuti kuna Yahova ‘mbumba yonsene’ ikhali yakucena, mbwenye Yahova akhadasankhula Mose toera kuatsogolera. (Num. 16:28) Thangwi yakupandukira Mose, iwo akhapandukirambo Yahova. Iwo nee akhanyerezera pikhafuna Yahova, mbwenye akhanyerezera basi ene pikhafuna iwo, kukhala na cidzo na kubvekera. Yahova afudza amuna anewa pabodzi na anthu azinji kakamwe akhaaphedzera. (Num. 16:30-35, 41, 49) Munjira ibodzi ene lero, ife tisadziwa kuti Yahova nee asakomerwa na ale anakhonda kubvera pitsogolero pya gulu yace.
Kodi imwe mbamudaphedzera ani? (Onani ndima 11)
12. Thangwi yanji ndzidzi onsene tisafunika kunyindira gulu ya Yahova?
12 Ndzidzi onsene tisafunika kunyindira gulu ya Yahova. Pingaoneka kuti pasafunika kucitwa macinjo a kubvesesa kwathu undimomwene wa m’Bhibhlya peno njira inatumikira ife Yahova, ale anatitsogolera nee asadembuka toera kucita macinjo anewa. (Mis. 4:18) Iwo asacita pyenepi thangwi asafuna kakamwe kukomeresa Yahova. Kusiyapo pyenepi, iwo asawangisira kakamwe toera kucita pisankhulo pyenepi piwiri mwakubverana na Mafala a Mulungu, pontho atumiki onsene a Yahova asafunikambo kucita pyenepi.
13. “Ntundu wa mafala adidi” ninji, pontho tisafunika kucitanji na mafala anewa?
13 “Pitiriza kuphatisisa na manja mawiri ntundu wa mafala adidi.” (2 Tim. 1:13) “Ntundu wa mafala adidi” ndi pipfundziso Pyacikristu pinagumana ife m’Bhibhlya. (Juw. 17:17) Ndiwo anatipasa cinyindiro ca pyonsene pinakhulupira ife. Gulu ya Yahova isatipfundzisa toera tiphatisise na manja mawiri pipfundziso pyenepi. Tingacita pyenepi, tinapaswa nkhombo.
14. Akristu anango a mu ndzidzi wa apostolo asiya tani “kuphatisisa na manja mawiri mafala adidi”?
14 Ninji pinafuna kucitika tingasiya “kuphatisisa na manja mawiri ntundu wa mafala adidi”? Onani citsandzo ici: Mu ndzidzi wa apostolo, Akristu anango akhamwaza mphangwa zauthambi zakuti ntsiku ya Yahova yafika. Panango iwo atambira tsamba ikhalonga pyenepi yakuti panango yalembwa na mpostolo Paulu, mbakhonda kusaka kudziwa undimomwene wa tsamba ineyi. Natenepa Akristu anango ku Tesalonika akhulupira mphangwa zenezi zauthambi mbatoma kupangambo anango. Iwo mbadakumbuka pidaapfundzisa mpostolo Paulu, nee mbadanyengezwa na mphangwa zenezi. (2 Ates. 2:1-5) Paulu akhadapanga abale anewa toera akhonde kukhulupira pinthu pyonsene pikhabva iwo, pontho toera kuaphedza mu pinthu pikhafuna kucitika ntsogolo. Paulu amalisa kulemba tsamba yace yaciwiri kuna Atesalonika na mafala awa: “Tambirani mwanyikiro wanga ine Paulu, udalemba ine na manja anga, wakuti ndi cidzindikiro m’matsamba anga onsene; awa ndi malembero anga.”—2 Ates. 3:17.
15. Tinatsidzikizika tani ku mphangwa zauthambi zinaoneka ninga zandimomwene? Perekani citsandzo. (Onanimbo mafoto.)
15 Tisapfundzanji na mafala adalonga Paulu kuna Atesalonika? Tingabva mphangwa zakuti nee zisabverana na pinapfundza ife m’Bhibhlya, peno tingabva mphangwa zinango zinaoneka ninga ndi zakutsandzayisa, tisafunika kucita pinthu mwandzeru. Ulendo unango, ku União Soviética, anyamalwa athu apasa tsamba abale yakuti ikhaoneka ninga yatumizwa na abale a ofesi ikulu ya Mboni za Yahova. Tsamba ineyi ikhalonga kuti abale anango akhafunika kukhazikisa gulu inango. Pontho tsamba ineyi ikhaoneka ninga yabulukadi ku ofesi ikulu ya Mboni za Yahova. Mbwenye abale akukhulupirika nee anyengezwa na uthambi unoyu. Iwo adzindikira kuti mphangwa zikhagumanika mu tsamba ineyi nee zikhabverana na pidapfundza iwo. Munjira ibodzi ene lero, ale anaida undimomwene, midzidzi inango asaphatisira interneti na maredhi sociais toera kutinyengeza na kuticitisa kukhala akugawana. M’mbuto mwa ‘kuluza mwakucimbiza manyerezero athu adidi’ tisafunika kucita mphole-mphole tingabva mphangwa peno tingaleri mphangwa zakuti nee zisabverana na undimomwene udapfundza ife.—2 Ates. 2:2; 1 Juw. 4:1.
Lekani kunyengezwa na uthambi unaoneka ninga undimomwene (Onani ndima 15) a
16. Mwakubverana na Aroma 16:17, 18, tisafunika kucitanji anango angatoma kumwaza mphangwa zauthambi?
16 Pitirizani kukhala akuphatana na anthu akukhulupirika kuna Yahova. Mulungu asafuna kuti timulambire mwakuphatana na abale na alongo athu, mbwenye ife tinakwanisa kucita pyenepi basi ene tingapitiriza mu undimomwene. Munthu anamwaza mphangwa zauthambi asacitisa mpingo kukhala wakugawana. Na thangwi ineyi, Yahova asaticenjeza toera ‘ticalire’ anthu anewa. Tingakhonda kucita pyenepi, tinatoma kukhulupira mphangwa zauthambi mbatisiya kukhala akukhulupirika kuna Yahova.—Lerini Aroma 16:17, 18.
17. Ndi nkhombo zipi zinafuna kukhala na ife tingadzindikira undimomwene mbatipitiriza mu undimomwene unoyu?
17 Tingadzindikira undimomwene mbatipitiriza mu undimomwene unoyu, tinakwanisa kukhala cifupi na Yahova mbatipitiriza na cikhulupiro cakuwanga. (Aef. 4:15, 16) Kusiyapo pyenepi, ife nee tinanyengezwa na pipfundziso pya uthambi wa Sathani, pontho tinatsidzikizwa na Yahova mu ndzidzi wa nyatwa ikulu. Natenepa, pitirizani mu undimomwene, “pontho Mulungu wantendere anadzakhala na imwe.”—Afil. 4:8, 9.
NYIMBO 122 Tikhale Dzololo, Mbatileka Kufewa!
a MAFALA ANAFOKOTOZA FOTO: Foto yakutoma isapangiza abale ku União Soviética mu ndzidzi udatambira iwo tsamba ya anyamalwa athu ikhaoneka ninga yabuluka ku ofesi ikulu ya Mboni za Yahova. Foto yaciwiri isapangiza kuti anyamalwa athu anakwanisa kuphatisira interneti toera kumwaza uthambi thangwi ya gulu ya Yahova.
