Bhibhlya nee isalonga thangwi yace. Mbwenye isalonga pinthu pyakuti panango pyaacitisa kucita cisankhulo ceneci.

Anju m’bodzi apanga Mariya kuti mbadakhala na mimba mbabala mwana. Pidalonga anju mphangwa zenezi, Mariya na Zuze akhakhala ku Nazareti, mu nzinda wa Galileya. (Luka 1:26-31; 2:4) Mukupita kwa ndzidzi, pidabuluka iwo ku Ejitu, abwerera pontho ku Nazareti. Yezu akula kweneko mbacemerwa wa ku Nazareti. (Mat. 2:19-23) Natenepa, ife tisakumbuka nzinda wa Nazareti tingalonga pya Yezu, Zuze na Mariya.

Mariya akhali na wacibale wace ku Yuda akhacemerwa Elizabheti. Elizabheti akhali nkazi wa nyantsembe Zakariya, pontho adzakhala mai wa Juwau M’batizi. (Luka 1:5, 9, 13, 36) Mariya akhadaenda kaona Elizabheti ku Yuda, pontho akhala kweneko miyezi mitatu. Buluka penepo Mariya abwerera ku Nazareti. (Luka 1:39, 40, 56) Na thangwi ineyi, Mariya akhadziwa mwadidi dziko ya Yuda.

Mukupita kwa ndzidzi, Zuze abvera ntemo wa ‘kulemberwa’ kwa anthu. Natenepa, iye abuluka ku Nazareti mbaenda ku Bhetelehemu mu “nzinda wa Dhavidhi” wakuti mbudabalwa Mesiya. (Luka 2:3, 4; 1 Sam. 17:15; 20:6; Mik. 5:2) Pidamala Mariya kubala Yezu, Zuze aona kuti nee mbapidakhala pyakuthema kucita ulendo wakulapha na khombwani toera kubwerera ku Nazareti. Na thangwi ineyi, iwo akhala ku Bhetelehemu kwakuti kukhali nsindzo wa makilometru mapfemba toera kufika ku Yerusalemu. Natenepa mbapidakhala pyakukhonda nentsa kuna iwo toera kukwata mwanawo mbaenda naye ku templo toera kapereka ntsembe mwakubverana na Mwambo.—Lev. 12:2, 6-8; Luka 2:22-24.

Anju wa Mulungu akhadapanga Mariya kuti mwanace ‘mbadapaswa mpando waumambo wa Dhavidhi mbatonga ninga Mambo.’ Kodi Zuze na Mariya aona kuti pikhali pyakufunika kuti Yezu abalwe mu nzinda wa Dhavidhi? (Luka 1:32, 33; 2:11, 17) Panango iwo aona kuti pikhali pyadidi kupitiriza kweneko mbadikhira pitsogolero pya Mulungu.

Ife nee tisadziwa kuti iwo akhadakhala ndzidzi ungasi ku Bhetelehemu mpaka pidafika anyakudziwisa pya nyenyezi. Mu ndzidzi unoyu, iwo akhali na nyumba kweneko, pontho Yezu akhali “mwana.” (Mat. 2:11) Pisaoneka kuti m’mbuto mwakubwerera ku Nazareti, iwo apitiriza kukhala ku Bhetelehemu.

Herodhi alonga kuti “ana amuna onsene mu Bhetelehemu . . . kutomera a pyaka piwiri kuenda pantsi” akhafunika kuphiwa. (Mat. 2:16) Pidacenjezwa Zuze na anju thangwi ya pyenepi, iye, Mariya pabodzi na Yezu athawira ku Ejitu mbakhala kweneko mpaka ndzidzi udafa Herodhi. Mukupita kwa ndzidzi, Zuze aenda ku Nazareti na banjace. Thangwi yanji iwo nee abwerera ku Bhetelehemu? Thangwi mu ndzidzi unoyu mwana wa Herodhi, Arkelau akhatonga mu Yudeya, pontho akhali wakuipa kakamwe. Kusiyapo pyenepi, anju apanga Zuze kuti pikhali pyakugopswa kubwerera kweneko. Ku Nazareti, Zuze mbadakwanisa kukuza Yezu mwakutsidzikizika.—Mat. 2:19-22; 13:55; Luka 2:39, 52.

Pisaoneka kuti Zuze afa Yezu mbadzati kufa, pontho mbadzati kufungula njira toera anthu anango akhale na mwai wakwenda kudzulu. Natenepa, Zuze anadzalamuswa muli akufa mbakhala pa dziko yapantsi. Anthu azinji anadzaonana naye, pontho anadzadziwa kuti thangwi yanji iye na Mariya apitiriza ku Bhetelehemu pidabalwa Yezu.