Mu ndzidzi wa Nkhondo Yaciwiri ya Dziko Yonsene Yapantsi, anyakubalanga abuluka ku Estoniya mbaenda kakhala ku Alemanya, kudabalwa ine. Pidabalwa ine, iwo akhacita masasanyiro toera afuluke kuenda ku Kanadha. Nyumba yathu yakutoma ku Ottawa, Kanadha, ikhali ing’ono kakamwe, pontho ikhali dhuzi na thanga ya nkhuku. Ife tikhali akutcerenga kakamwe, mbwenye tikhali na mazai toera kudya namacibese.

Ntsiku inango, Mboni za Yahova zaleri lemba ya Apokalipse 21:3, 4. Pidabva mai wanga lemba ineyi, iye atsandzaya kakamwe mbatoma kulira. Anyakubalanga atoma kupfundza Bhibhlya, pontho pidapita ndzidzi pang’ono iwo akhali dzololo toera kubatizwa.

Maseze anyakubalanga nee akhabvesesa mwadidi Cingerezi, iwo akhali aphinga kakamwe. Masabudu onsene, ngakhale ntsiku zakuti pai wanga akhaphata basa namasiku, iye akhandikwata pabodzi na m’bale wanga wang’ono, Sylvia toera kuenda kamwaza mphangwa. Pontho masumana onsene banja yathu ikhapfundza Ncenjezi pabodzi. Anyakubalanga andiphedza toera kufuna Yahova. Pyenepi pyandicitisa kuperekeka kuna Yahova mbandibatizwa mu caka ca 1956 pikhali ine na pyaka khumi. Kufuna kwawo kakamwe Yahova kwandiphedza toera ndipitirize kuntumikira.

Pidamalisa ine xikola, nee ndikhatumikirabve Yahova na ntima onsene. Ine ndikhanyerezera kuti mbidakhala mpainiya, nee mbidakwanisa kukhala na dinyero yakukwana toera kucita pinthu pikhafuna ine kutomera uwana, pyakuti ndi kucita ulendo na ndeka toera kudziwa madziko akusiyana-siyana. Ine ndagumana basa pa radhyo ya pacisa. Basa yace ikhali yakuikha nyimbo, pontho ine ndikhakomerwa nayo kakamwe. Mbwenye ndikhaphata basa camasiku; natenepa kazinji kene nee ndikhagumanika pa misonkhano, pontho ndikhacita uxamwali na anthu akuti nee akhafuna Mulungu. Mukupita kwa ndzidzi, cikumbuntima canga cakupfundziswa na Bhibhlya, candiphedza toera kucinja makhaliro anga.

Ine ndafuluka mbandienda ku Oshawa, Ontario. Kweneko ndadziwana na Ray Norman, m’bale wace wa nkazi Lesli na apainiya anango. Iwo anditambira mwadidi. Kutsandzaya kwawo kwandiphedza toera kucinja pifuno pyanga. Iwo andiphedza toera nditome kutumikira ninga mpainiya, pontho ndacita pyenepi mwezi wa Setembro wa 1966. Ine ndikhali wakutsandzaya, pontho pinthu pikhandifambira mwadidi. Mbwenye pyadzacitika pinthu pinango pidacinja umaso wanga pyakuti nee ndikhapidikhira.

Pikhapfundza ine kuxikola, ndaprenxeri petisau toera katumikira ku Bheteli ya ku Toronto, Kanadha. Mukupita  kwa ndzidzi, pikhali ine mpainiya, ndacemerwa toera katumikira ku Bheteli mu pyaka pinai. Mbwenye ine ndikhafuna kakamwe Lesli, pontho ndikhagopa kuti mbidaenda ku Bheteli nee mbidamuonabve. Pidamala ine kucita maphembero akudembetera, ndatonga kuenda ku Bheteli, mbwenye ndatsukwala kakamwe pikhapangana ine na Lesli.

Pa Bheteli, ine ndaphata basa yakufula nguwo, pontho mukupita kwa ndzidzi ndaphata basa ninga mulembi. Mbwenye Lesli adzakhala mpainiya wakupambulika ku Gatineau, Quebec. Kazinji kene ndikhanyerezera kuti iye akhacitanji, pontho khala ndacita cisankhulo cadidi. Buluka penepo, cinthu cakutsandzayisa na cakukhonda dikhira cacitika. Ray, m’bale wa Lesli acemerwa toera kutumikira pa Bheteli, pontho tikhali nkwartu ibodzi ene! Pyenepi pyandiphedza toera nditome pontho kucedza na Lesli. Ife tamanga banja pa ntsiku idakwanirisa ine pyaka pinai pa Bheteli, ntsiku 27 ya Fevereiro ya 1971.

Ine na Lesli tapangwa toera tikatumikire ku mpingo wa cilongero ca ku Fransa, ku Quebec. Pakupita pyaka pingasi, ndapangwa toera kutumikira ninga muyang’aniri wa cisa, pikhali ine na pyaka 28. Ine ndaona kuti ndikhali mwana, pontho nee ndathema, mbwenye lemba ya Yeremiya 1:7, 8 yandiwangisa kakamwe. Ngakhale tenepo, Lesli akhadacita cidengwa na karu kangasi, pontho akhanentseka toera kugona. Mphapo mbidakwanisa tani kucedzera mipingo? Lesli alonga: “Khala Yahova atiphemba toera kucita cinthu, ife tisafunika kucicita?” Ine ndatawirabbbbbbbb, pontho tatsandzaya kakamwe na basa yakucedzera mipingo mu pyaka 17.

Pikhatumikira ine ninga muyang’aniri wa cisa, ndikhali na mabasa mazinji, pontho midzidzi inango nee ndikhali na ndzidzi toera kucedza na Lesli. Ntsiku inango ndapfundza cinthu cakufunika kakamwe. Nciposi namacibese, ndabva munthu mbakagogodza nsuwo. Pidabuluka ine, basi ene ndagumana sestu yakuti ikhali na nguwo ya pameza, misapo, kejo, mapau, garafa ya vinyu, makopo na tsamba yakuti nee ikhali na dzina ya munthu adailemba, pontho patsamba ineyi pakhadalembwa tenepa: “Saka mbuto toera uende kacedza na nkazako.” Ineyi ikhali ntsiku yadidi, pontho dzuwa ikhagaka. Mbwenye ine ndapanga Lesli kuti ndikhali na nkhani toera kukhunganyika, pontho nee mbidakwanisa kuenda kukhafuna iye. Iye abvesesa, mbwenye atsukwala pang’ono. Mu ndzidzi ukhali ine pa mpando, cikumbuntima canga catoma kundilemera. Ine ndakumbuka lemba ya Aefesi 5:25, 28. Mafala anewa a Yahova andiphedza toera kucita pikhafuna nkazanga. Pidamala ine kucita phembero, ndapanga Lesli: “Tende.” Pyenepi pyantsandzayisa kakamwe. Ife taenda pa mbuto yakubalika kakamwe dhuzi na nyandza, tathasika nguwo ya meza, pontho tatsandzaya kakamwe ntsiku ineyi. Kusiyapo pyenepi, ine ndakwanisa kukhunganya nkhani zanga.

Ine ndatsandzaya kakamwe kutumikira ninga muyang’aniri wa cisa, kubulukira ku Colúmbia Britânica mpaka ku Terra Nova. Cifuno canga cakucita maulendo toera kudziwa mbuto zizinji cakwanirisika. Ine ndikhafuna kuenda ku Jiliyadhi, mbwenye nee ndikhafuna kukhala misionaryo mu dziko inango. Ine ndikhanyerezera kuti amisionaryo ndi anthu adidi kakamwe,  pontho ndikhaona kuti nee ndikhali wakuthema. Kusiyapo pyenepi, ndikhagopa kuti panango mbatidatumizwa mu dziko inango ya mu Afrika yakuti panango muna utenda peno nkhondo. Ine ndikhakomerwa na basa ikhacita ine ku Kanadha.

Mu caka ca 1992 pidatoma basa yathu m’madziko akhatongwa na União Soviética, ife tabvundzwa khala mbatidatawira kuenda katumikira ku Estoniya ninga amisionaryo. Ife tadzumatirwa kakamwe mbaticita phembero thangwi ya pyenepi. Natenepa tanyerezera: ‘Khala Yahova atiphemba toera kucita cinthu, tisafunika kucicita.’ Ife tatawira mbatilonga: ‘Mphyadidi kuti nee tiri kuenda ku Afrika.’

Mwakukhonda dembuka, tatoma kupfundza Cistoniya. Pidapita miyezi mingasi, ndaphembwa toera nditumikire ninga muyang’aniri wa cisa. Ife tikhacedzera mipingo 46 na misoka m’madziko a Estoniya, Letonia na Lituaniya, kuphatanizambo Kaliningrado ku Rusiya. Pyenepi pisabveka kuti tikhafunika kupfundza cilongero ca ku Estoniya, Letonia, Lituaniya na Rusiya. Pikhali pyakunentsa, mbwenye abale na alongo akhakomerwa kakamwe na kuwangisira kwathu toera kupfundza cilongero cawo, pontho iwo atiphedza kakamwe. Mu caka ca 1999, ku Estoniya kwakhazikiswa ofesi ya filiali, pontho ine ndasankhulwa toera kutumikira ninga m’bodzi wa komiti ya filiali pabodzi na Toomas Edur, Lembit Reile na Tommi Kauko.

Ife tadziwa abale na alongo azinji akhadamangwa mbaendeswa ku Sibherya. Maseze atsalakanwa mwakuipa pidaikhwa iwo nkaidi, pontho akhali kutali na abale awo, iwo nee akhala akuipirwa kakamwe. Mbwenye apitiriza kumwaza mphangwa mwaphinga na mwakutsandzaya. Pyenepi pyatiphedza toera kuona kuti tinakwanisa kupirira mbatikhala akutsandzaya m’midzidzi ya nyatwa.

Ife taphata basa mwakuwanga mu ndzidzi uzinji, pontho nee tikhali na ndzidzi toera kupuma; natenepa Lesli atoma kukhala wakuneta kakamwe. Ife nee tadzindikira kuti kuneta kweneko ndi thangwi yakuti akhali na utenda unacemerwa fibromialgia. Ife taona kuti mphyadidi tibwerere ku Kanadha. Pidacemerwa ife toera kuenda ku Patterson, Nova York, E.U.A., toera kakurusari xikola ya abale anatumikira pa komiti ya filiali, ine ndapenula khala mbatidakwanisa. Mbwenye pidamala ife kucita maphembero akudembetera, tatawira. Yahova atipasa nkhombo thangwi ya cisankhulo cidacita ife. Thangwi ndi mu ndzidzi ukhali ife kuxikola ineyi udakwanisa Lesli kukondzwa utenda wace. Natenepa takwanisa kupitiriza na mabasa athu ninga pikhacita ife kale.

Ntsiku inango namasiku mu caka ca 2008, ku Estoniya, ine ndaligarirwi na abale a ku ofesi ikulu mbandibvundza khala mbatidatawira kuenda katumikira ku Kongo. Ine ndadzudzumika kakamwe, makamaka thangwi ndikhafunika kutawira mangwana mwace. Pakutoma, nee ndapanga Lesli thangwi ndikhadziwa kuti iye nee mbadagona ntsiku ineyi. Mbwenye adakhonda gona ndine, thangwi ndikhacita phembero kuna Yahova mbandimpanga pikhandidzudzumisa.

Mangwana mwace, ndapanga Lesli, pontho talonga: “Yahova ali kutiphemba toera tiende ku Afrika. Tinadziwa tani kuti tinacimwana basa ineyi mbatikomerwa  nayo tingakhonda kuyesera?” Natenepa pakumala kutumikira ku Estoniya mu pyaka 16, taenda ku Kongo, Kinshasa. Bheteli ya kweneko ikhali yakubalika, pontho ikhali na maluwa adidi. Cibodzi mwa pinthu pidamanika Lesli nkwartu mwathu ndi tsamba ikhali na iye kutomera mu ndzidzi ukhali ife ku Kanadha. Patsamba ineyi pakhadalembwa mafala akuti: “Tsandzaya konsene kunakhala iwe.” Pidamala ife kudziwana na abale, kucitisa mapfundziro a Bhibhlya, kukomerwa na basa ya umisionaryo, kutsandzaya kwathu kwathimizirika. Mukupita kwa ndzidzi, takhala na mwai wakucedzera maofesi a filiali m’madziko 13 a mu Afrika. Pyenepi pyatiphedza toera kudziwa makhaliro a anthu akusiyana-siyana. Ine nee ndikhagopabve ninga kale, pontho tapereka takhuta kuna Yahova thangwi yakutitumiza toera katumikira ku Afrika.

Ku Kongo, ife tikhapaswa pyakudya pyakusiyana-siyana, ninga pinyama ping’ono pyakumburuka, pontho ndikhanyerezera kuti nee mbatidakwanisa kupidya. Mbwenye pidaona ife abale athu mbakapidya, ife tayeserambo kupidya, pontho takomerwa napyo.

Ife tikhaenda ku mabulukiro a dzuwa a dziko ineyi toera kubalangaza abale na kuapasa pinthu pikhafuna iwo, thangwi kukhali na misoka ya anyankhondo akuti akhaphekesa akazi na ana mupisa pya kweneko. Abale na alongo azinji akhali akutcerenga. Ngakhale tenepo, cidikhiro cawo cakulamuswa muli akufa, kufuna kwawo Yahova na kukhulupirika kwawo kuna gulu Yace, kwatiwangisa kakamwe. Citsandzo cawo caticitisa kunyerezera mathangwi anaticitisa kulambira Yahova, pontho cawangisa cikhulupiro cathu. Abale na alongo anango aluza nyumba zawo na pyakudya pidalima iwo. Pyenepi pyandikumbusa kuti pinthu pyakumanungo pinakwanisa kuzambazika mwakukhonda dembuka, pontho kuti uxamwali wathu na Yahova ndi wakufunika kakamwe. Maseze akhatamba nyatwa zizinji, abale na alongo athu nee akhadungunya. Njira ikhaona iwo pinthu, yatiphedza toera kupirira nyatwa zikhatamba ife, kuphatanizambo nyatwa za ungumi.

Cacitika cinthu cinango cakukhonda dikhira. Ife taphembwa toera kuenda katumikira ku Bheteli ya Hong Kong. Ife cipo tanyerezera kuti na ntsiku yace tinakhala ku Azya! Mbwenye thangwi yakuona ufuni na ciphedzo ca Yahova m’mabasa anango onsene adapaswa  ife, tatawira kuenda kweneko. Mu caka ca 2013, tatsukwala kakamwe pidasiya ife axamwali athu akufunika a ku Afrika na pinthu pyakubalika kakamwe pya kweneko, mbatikhonda kudziwa pikhafuna kuticitikira ntsogolo.

Kuenda kakhala ku Hong Kong akhali macinjo makulu, thangwi nzinda unoyu ukhadadzala na anthu. Pikhali pyakunentsa kakamwe toera kupfundza Cixina. Ngakhale tenepo, abale atitambira mwadidi, pontho tikhakomerwa na pyakudya pya kweneko. Basa pa Bheteli ikhathambaruka, mbwenye mbuto toera kugula zikhadhula kakamwe. Natenepa, Mathubo Akutonga aona kuti pikhali pyadidi kugulisa mbuto zinango za Bheteli. Pidapita ndzidzi ungasi, mu caka ca 2015, ife taenda katumikira ku Koreya do Sul. Pikhali pyakunentsa kupfundza cilongero, mbwenye abale na alongo akhatiwangisa mukutipanga kuti tikhakwanisa kulonga cilongero ca ku Koreya.

Kukhala na axamwali midzidzi inango kusanentsa, mbwenye taona kuti tisafunika kukhala akutoma kucemera anango toera abwere panyumba pathu kuti tidziwane mwakucimbiza. Ife taonambo kuti abale na alongo athu nee ndi akusiyana kakamwe, pontho kuti Yahova aticita munjira yakuti tinakwanisa kufungula mitima yathu mbatipangiza ufuni kuna axamwali azinji kakamwe.—2 Akor. 6:11.

Ife tapfundza kuti tisafunika kuona anthu ninga munaaonera Yahova na kusaka pinthu pinapangiza kuti Yahova asatifuna, pontho asatitsogolera. Tingatsukwala peno tingadzudzumika khala anango anakomerwa na ife, tisaleri pontho matsamba akuwangisa adatipasa axamwali athu. Mwakukhonda penula, ife takwanisa kuona kuti Yahova atawira maphembero athu mbatipasa cinyindiro na mphambvu.

Mu pyaka pizinji, ine na Lesli tapfundza kuti ndi pyakufunika kakamwe kukhala na ndzidzi wakucedza, maseze tikhale na mabasa mazinji toera kucita. Ife tapfundzambo kuti midzidzi inango tisafunika kuseka tingacita madodo, makamaka khala tiri kupfundza cilongero cipswa. Pontho ntsiku zonsene namasiku, tisayesera kusaka cinthu cidaticitira Yahova toera kupereka takhuta.

Mwandimomwene, ine ndikhanyerezera kuti cipo mbidakwanisa kukhala misionaryo peno kutumikira m’madziko anango. Ngakhale tenepo, ine ndapfundza kuti na ciphedzo ca Yahova pinthu pyonsene ndi pyakukwanisika. Ine ndisakumbuka mafala awa a mprofeta Yeremiya: “Yahova, imwe mwandinyengeza.” (Yer. 20:7) Mwandimomwene, iye atipasa pinthu pizinji pyakutsandzayisa na nkhombo zakukhonda dikhira, kuphatanizambo kukwanirisa cifuno canga cakucita ulendo na ndeka. Ife tadziwa madziko mazinji na kucedzera mabheteli. Pontho madziko adadziwa ife ndi mazinji kupiringana akhanyerezera ine mu ndzidzi ukhali ine m’phale. Ine ndisaperekambo takhuta kuna Lesli thangwi iye akhali dzololo toera kundiphedza m’mabasa onsene.

Ndzidzi onsene tisayesera kukumbuka kuti pinthu pinacita ife ndi thangwi tisafuna Yahova. Nkhombo ziri na ife cincino ndi zakucepa tingazilandanisa na umaso wakwenda na kwenda unafuna kukhala na ife, Yahova ‘angafungula djanja yace mbakwanirisa cifuno ca pinthu pyonsene piri na umaso.’—Mas. 145:16.